依撒意亞50:4

吾主上主賜給了我一個受教的口舌,叫我會用言語援助疲倦的人。(依50:4)

2016年9月1日 星期四

嘉嘉航空,丹麥之旅(一),哥本哈根初探

話說我已經完成咗極光之旅,亦都去埋Talin,咁由Talin返到赫爾辛基係唔係就可以返香港呢?其實係嘅,因為我都係咁行嚟行去行咗好多地方下,不過我嘅旅程其實又未完喎,咁點解呢?其實最初我是不想去太多國家的,因為帶著一大件行李上機下機的覺得很麻煩,但在不斷的看資料的過程中,又令我度度都想去。最後我決定多遊一個國家,在荷蘭與丹麥之間,我怎樣揀呢?兩個地方我都未去過,當然,我係唔計啱啱畢業嘅時候果次歐洲十天八國之旅,因為當年縱然我係入過荷蘭境,但係我連佢一朵鬱金香都未睇真就又去咗第二個國家,所以我基本上係唔算遊過荷蘭,雖然係咁,但係我最終都係揀咗丹麥,原因很簡單,我買果本標題係Scandinavia嘅Lonely Planet,話就話係講北歐,但係佢亦都包含了丹麥的介紹,咁睇下睇下,又覺得佢好似幾多嘢睇喎,而最重要嘅係,為食的我,真是想去丹麥食番一個正宗的Danish,丹麥酥!

由赫爾辛基飛去哥本哈根,一個鐘頭都唔駛,睇嚟乘客好多都係成日來回呢兩個國家,所以寄倉行李一尐都唔多真係一入丹麥國境之後,你就好清楚你人在哥本哈根,因為一大塊牌在提取行李處等著你,讓你知道你進入了這個啤酒之都。等我初頭以為一出機場就會見到一大隻Danish等緊我?唔係呀,佢其實重有另一件國寶,就係嘉士伯啤酒呀,真係邊度都見到,初時真係驚佢呢度會唔會冇水飲呢!不過,其實分別都唔大,因為尐水係貴過啤酒嘅!

這個機場很有趣,熱鬧到不得了。出境入境都是同一處,而成個出入境處都開滿咗酒吧,而酒吧又都坐滿人喎,不知道還以為去了蘭桂坊定係邊條酒吧街!喺機場入面走錯方向並不困難,當然去到關鍵時刻你會知道你是走錯方向的,但係就真係行咗唔少冤枉路囉!

由機場出嚟之後,我地就直奔中央火車站,冇錯,因為我地又揀咗一間平靚正而近火車站嘅酒店嚟住。這家酒店距離哥本哈根中央火車站只有100米遠,即係話如果牙買加飛人保特住呢度,只需要10秒就可以去搭火車。sorry個gag有少少爛!講番間酒店,真係一出火車站,行過對面小車路,再前行幾步就到,超方便。由酒店行去著名的蒂沃麗花園(Tivoli Gardens)僅有5分鐘步行路程,距離哥本哈根的主要街道Strøget以及市政廳廣場(City Hall Square)有800米。 其實真係好近。

雖然著名嘅Tivoli Gardens就喺對面,但係佢其實係一個類似荔園嘅場所,所以我門口就經過好多次,因為每次去市中心都要經過佢,但係真係諗都冇諗過要入去。有尐地方唔係出名就要去嘅!

Check in完酒店settle down之後,其實已經天黑,但係點都要搵尐嘢食嘅!而且初到貴境,冇理由唔出去八下啫。哥本哈根俾我嘅第一印象係佢尐人身型比較瘦,當然我係同牛高馬大嘅芬蘭人比,同香港人比,佢地依然有著數。佢地之所以瘦,我相信同佢地好多人以單車作為交通工具有關,一般嘅馬路,都有兩三條線俾你踩單車,係咪好羨慕呢?咁人地地多人少,同香港又係冇得比嘅!


行呀行,就喺Tivoli過少少見有一間賣牛扒的餐廳生意不錯,於是又走入去碰碰運氣。雖然是一間賣牛扒的店,但見左右都點了豬肋骨,我們也入鄉隨俗,我們兩人叫一份,那寫單姐姐看來有點不以為然,但係我參考過隔離位嘅份量,我相信我地嘅選擇是啱嘅,而結果坐我地傍邊兩枱的人,佢地係一人叫一份呀,但係結果各自都係打包收場。呢個豬肋骨幾好味,比我地嘅Dan Ryan's好味好多之餘,又真係豬有豬味!
而既然來到這個啤酒之都,也點都要啤啤佢。唔知係心理作祟定係人地釀啤酒真係有一手又或者唔駛諗得咁複雜,原來只要新鮮就好味,點都好,呢杯啤酒真係好味好多喎!
飲飽食醉,也不四圍走,回酒店休息,反正在這裡有好幾天的時間,不急!


2015年12月31日 星期四

加一撮鹽,為食路上

我今日會同大家講下點樣整菠蘿蛋糕,除咗香蕉蛋糕之外,菠蘿蛋糕都係我嘅拿手好戲,主要係我媽媽好鍾意食菠蘿,所以我也懂得好幾款用波蘿做的蛋糕的做法, 而其中最常做的,就是這款「反轉波蘿蛋糕」。

            材料:牛油120克、黄沙糖200克、菠蘿5-7片、雞蛋4隻、一個檸檬嘅皮(切幼絲)鹽一小撮、白沙糖100克、自發粉180克。
            預熱焗爐至攝氏180度,在一個10吋直徑可上火及入焗爐的焗盆內,放入100克牛油和黄沙糖一同煑溶,離火後將菠蘿片平鋪在溶液上,置於一傍。

            在另一容器內把蛋黄、20克溶化了的牛油及檸檬皮拌好。

            先將蛋白加一小撮鹽打至企身,再輕手拌入白沙糖,之後拌入蛋黃混合物,最後拌入篩過的自發粉,輕手拌混後應是可以流動的厚液體狀,否則可能是蛋太細以致液體不足,這時就要加點水或加點稀釋了的菠蘿汁。再把這麵粉糊倒在早置一傍的菠蘿片及溶液上,放入焗爐焗大概30分鐘。焗好後,覆蓋一只比焗盆大的碟子於焗盆上,反手把蛋糕倒在碟子上,跟住你會見到菠蘿片美麗地鋪喺蛋糕面。

咁就完成了!

何嘉麗嘅晨光第一線生涯都完成了!


我今日之所以同大家整菠蘿蛋糕,係因為佢特別甜,我希望咁樣,可以喺大家嘅印象中留下甜蜜的記憶,因為呢篇亦係最後一篇嘅嘉嘉的為食路上。係呀,做埋今日就走喇,節目應該係一月中至有變動嘅,但係我一早已經請咗假一月會去南美,而且亦已經訂咗機票同酒店,重有同行嘅朋友都請哂假,所以我會早過Cuson同鵬仔離開晨光。

離開晨光亦都代表我會再一次離開港台,心情並唔好過,但係好拍檔難求!年少時好幸運遇上兩個合拍嘅同事,而近日三個老嘢亦都越見磨合,可惜變幻原是永恆,當日如果唔係舊人離去,我呢尐當年新人亦都冇機會上位。今日亦都係時候要讓路喇,喂,你地好自為之呀,要保住二台個金漆招牌呀!


最後,我要多謝電台俾我嘅動人時光,多謝馮棠哥同Wendy過去咁多年唔止一次咁邀請我返港台,多謝司勳同Vincent照顧得我無微不致,多謝我親愛嘅聽眾,特別係嘉友,你們的收聽,無論讚我或者鬧我,都係我向前嘅動力。


工作同生命一樣,並唔由我地嚟控制佢嘅長度,但係我地可以好似煮餸或者焗蛋糕般調效它的味道,若生活得太苦,就要自己找點甜味來調劑,而生活得太如意、身邊太多甜言蜜語的話,也要加一撮鹽以作警醒呀。後會有期!




2015年11月19日 星期四

為食路上,聖誕蛋糕2015

這是去年的制成品
十一月中,是時候開始做聖誕蛋糕了,本來今年不打算講,但當我在何嘉麗Call Me GaGa Facebook上提大家浸乾果時,竟然又有人問做法,於是才又再講一次。做聖誕蛋糕並不需要太高技巧,齊全的材料和充足的醞釀時間就幾乎可以肯定不會失敗。所以做聖誕蛋糕的第一個步驟是先去市場一轉,買料。今年比較好運,材料一早買齊,連比較難得的綠色糖漬車厘子我都搵到。

之後是醞釀,其實就是是用酒來招呼乾果,可以是Marsala,brandy或sherry,我試過用未祝聖嘅彌撒酒,純粹由個人口味出發,而今年我就用了紅酒Merlot!讓喝飽了酒的乾果,用不少於三星期的時間令酒精全面滲入蛋糕內,美味醉人的聖誕蛋糕就完成了!


講完一大輪,是時候開工了。乾果包括:金黃色乾提子350克,普通黑色提子乾100克,加侖子50克,另外糖漬的紅色車厘子、綠車厘子、雜錦果皮各50克,酒一支。把乾果放入大盆內,以酒浸至蓋過所有乾果,務求把乾果全面灌醉,呢枝酒係唔慳得嘅。


雖然酒已浸過所有材料,但仍然要每隔三、五小時去翻弄一次,以確保所有乾果都充份地吸收酒精,因為只有吸飽酒精嘅乾果,才有能力將酒精傳給蛋糕,箇中道理,當你打開個蛋糕果一刻你就明。


浸乾果的時間最好有48小時,如果時間真的緊迫,也不可以少過12小時。
或許你可以趁今天去買定所需材料,以便周未做一個100克(六吋方型焗盆)的聖誕蛋糕。

除了上述的乾果及酒外,什材料還有牛油100克、黃砂糖100克、麵粉400克,大雞蛋兩隻,雜錦香料、玉桂粉、鹽各小許,杏仁精華一茶匙,果皮醬一湯匙。

做法簡單得很,預熱焗爐至150度。先把放軟了的牛油與糖攪至忌廉狀,顏色應比未打前淺,另外搞起來感覺輕身便成。

再分別加入雞蛋,每加一隻要先攪勻才加第二隻,之後加入果皮醬,再之後分次輪流加入篩過的麵粉和浸過的乾果(先把酒隔去,並留起之後用),每次都要仔細攪勻才可再加入材料。


然後倒入已鋪了牛油紙之六吋四方焗盆內,放入焗爐內焗2小時或直至試針無黏附物為止。如果你用的是焗爐火數低又或者不是吹風式焗爐,也許要焗2.5小時。

焗好後趁熱在蛋糕面盡情掃上浸過乾果的酒,

再快手用兩三層鍚紙把製成品連焗盆包實,並放在一旁攤凍。蛋糕全面放涼後,先把它從焗盆搬出來,再以一張新鍚紙包好,放入密封盒內靜待最少三星期才拿出來吃,喜歡酒味濃的,可每星期拿出來掃酒一次。在天氣凍而乾燥的地方,可隨手放在陰涼處,但在亞熱帶的香港這個時冷時熱又潮濕的地方,為免蛋糕發霉,便只好先放進密實盒再放入雪櫃了。

聖誕蛋糕並不難做,難只難在找齊材料並用自己愛飲的酒浸至入味,及在焗好後等酒味在蛋糕內揮發的過程,少一點耐性及心機也不行。今年一早已搵齊材料,係一個好嘅開始,預祝大家今年,有一個平安歡樂嘅聖誕!

2015年11月7日 星期六

為食路上,流浮山

早兩個星期,約咗朋友去流浮山,呢個時候去流浮山就梗係想食黃油蟹喇。進食時間係晚上七點,心諗途長路遠咁去到流浮山,汽油時間都用咗,冇理由就咁食完餐飯就走人,於是就計劃早尐入去,再兜埋入去白泥,睇埋個日落至食飯。如果以時間計,最理想就梗係早一個鐘頭前入去睇日落喇,咁就可以睇完日落就有飯食,但係日落唔係你阿媽,佢係唔會遷就你嘅,佢話收工就收工,完全冇得lur!

咁唯有早尐入去,於是五點出發,經過一大程車之後,個天已經越嚟越暗,當時至真係明白,乜野叫做時間唔等人!雖然天色變得好快,但我地相信既然已經到咗流浮山,過去白泥嘅路都唔係好遠,應該都趕得切,可以見到個咸蛋黃!

點知當架車一轉入深灣路已經見前面有車塞住,咦,呢個時間應該冇乜人入去睇日落喇,點解會大塞車呢!轉個彎可以睇遠尐,原來前面唔係有好多部車,不過最頭果度有架軍車,而軍車嘅體積對呢條路嚟講係大咗尐,所以每轉一個彎,都要慢慢腿嘅同時,對頭亦有好多車由白泥出嚟,所以至形成車龍!

於是我地就係咁跟住部軍車,磨下磨下,磨極都磨唔到白泥嘅同時,我係見到我右手邊嘅太陽開始由高位下滑,睇情形佢係好想收工,但係睇情形我亦唔可以喺白泥見到佢,於是,我唔理咁多喇,反正前面又停哂車等阿軍車腿位,於是我將部手機伸出窗影番幾幅留念先!

終於到達白泥,原來有軍車開路一尐都唔好玩!去到白泥竟然喺路邊有車位,梗係喇,人地都睇完走人喇!正在學人漫步沙灘之際,泊車的方向傳來警車響號,叫我地呢尐非法泊車人士好走喇,唔係佢就抄牌㗎喇!唉,都未企定就要走!

但係咁樣磨下磨下又竟然俾我磨到七點,即係有得食喇。



隻隻成包紙巾咁大隻呀!



呢支可樂真係幫到手!
負責訂位嘅朋友一早講咗有乜嘢食㗎喇,有豉油王蝦碌喇,有清蒸鮑魚、有豉椒聖子,有蒜溶扇貝,有蒸魚,當然重有專程為佢遠道前來嘅黃油蟹。點解由朋友訂位?佢識人吖嘛!

食物一一上枱,全部新鮮美味,火喉亦都啱啱好,終於輪到黃油蟹出場喇,嘩,一分為二立即見到成層樓咁高嘅羔出現眼前,真係睇見已經興奮,等唔切喇,一口咬落去,尐羔香到不得了,好好味,膽固醇?坐得埋枱就唔諗咁多喇,一路食一路驚,重衰過食咗過量膽固醇喇,唔嚟好過囉!埋單,真係一尐都唔貴,一人大概四百蚊。

有人話流浮山今非昔比,唉,你同我都今非昔比喇,以我話,流浮山未必冇好嘢食,但係真係要識人好尐,唔係話佢唔收你錢,又或者收你平尐,呢個唔可能喇,人地打開門做生意都要食嘅,唔可能做蝕本生意,但係俾足料同俾靚料你,就已經好好喇!呢個秋天,真係要多尐入流浮山至得呀,有風景有美食,唔係度度有,而且黃油蟹嘅季節重短過大閘蟹呀。


2015年10月23日 星期五

為食路上,上海吃大閘蟹

既然係大閘蟹季節,咁當我去到上海就唔可以唔食大閘蟹喇!上海食大閘蟹嘅店鋪,比較出名嘅有幾間,包括新光、王寶和同埋成隆行。新光我好多年前去過,而王寶和我亦都試過,前者當年係劃一地以套餐形式出現,聽講而家都係咁做,當年已經成700幾蚊,相信而家重貴,佢嘅好處係幫你脫哂殼,然後分開膏還膏,肉還肉、腳還腳咁一份一份食,好處就係唔駛食到手損脷損,唔好處就係你都唔知自己食咗幾多隻,而亦因為佢幫你做哂你冇乜嘢好做,唔好玩!同埋食大閘蟹喺揭開個蓋前,唔知尐膏夠唔夠多果一刻係好刺激嘅!

王寶和好尐,佢可以散叫,而價錢亦都相對合理。係上海的食大閘蟹食肆之中,最親切嘅選擇。成隆行就未去過,正因為未去過,所以今次就專程去試一試。不過我地都係淺嚐即止,因為佢嘅價錢都唔算平,三百幾蚊一隻先至得5两,而且我地第二日就會去上海以外嘅洋澄湖食大閘蟹,果度我之前去過喇,今次係食過番尋味!

喺上海住嘅同學安排之下,我地坐咗成兩個小時嘅車去到巴城。沿途係冇乜風景,大可閉目養神,而去到亦都已經係晚上,所以都冇乜湖光山色可言!不過此程目的係同大閘蟹死過,所以唔睇景就罷!

去到巴城附近已經見到有婦女走出馬路拉客去食大閘蟹,都咪話唔牙煙!再近尐就見到一個二個大牌寫住唔同嘅蟹場名字。我地去上海朋友用開果間,佢先帶我地去後面蟹場睇下,係一個二個浸喺水中嘅大籠,知道我地想食五兩左右就絞起其中一籠,嘩真係倒瀉籠蟹!

話就話俾我地揀,但係冇榜冇盛而燈光又昏暗,再加上水嘅反映,你真係唔知佢地有幾大隻,唯有講個信字!所以熟人介紹好重要。不過有一樣嘢可以肯定嘅,就係尐蟹好生猛。咁幾錢先!哈,呢度係80蚊一隻,哈哈,尋晚食三百幾蚊隻果尐即刻dump,唯有食多幾食維皮喇!

20分鐘後,一大盤蟹殺到,膏雖然未係最飽滿,但係肉味特別鮮甜。果位蟹農同我講話大閘蟹就係咁,膏多肉就冇咁甜,而肉甜尐膏又未夠滿。

咁就易喇,農曆九月就食肉連唔錯嘅膏,而農曆十月就食膏,幾時上去食,自己執生喇。


2015年10月15日 星期四

為食路上,「任食大閘蟹」攻略

我好細個屋企已經貫輸冇咁大隻鴨乸隨街跳嘅觀念,而我喺中電個老闆,亦好鍾意講 too good to be true。所以一分錢一分貨呢個道理,我一早就明,你以為一百蚊真係可以食到碗燕窩?不過如果你信,咁可能因為心理因素,你會覺得自己食完之後靚咗都冇人會拉你嘅!所以對於果尐一個價錢任食嘅鋪頭,我係好有保留。但係有一樣例外,就係任食大閘蟹。
今年精喇,一叫二十隻。
話說呢樣嘢係我舊年開始做,而咁啱又有幾個朋友同我癲埋一份,所以今年食過番尋味。其實我嘅癲係癲得嚟好理性嘅。我係好鍾意食大閘蟹嘅,而我又唔係咁鍾意食好大隻果尐,咁前年有個朋友喺網上團購,幫我買用500蚊唔駛買咗十隻大閘蟹,每隻四兩左右,我當時都驚唔知係乜貨,點知我揸住張團購單至知完來係銅鑼灣老字號,咁已經放心好多,跟住去攞貨、食完,覺得真係好抵食。至知道原來五十蚊隻大閘蟹係好食得過。

之後有記者朋友同我講話紫粵軒個「任食大閘蟹餐」都好抵食,而且佢尐貨係來自外國,所以水準有保證。咁我又心思思囉喎,但係成要成四百幾蚊一個人落樓,如果唔正咪好可憐!唔單止蝕水,重用埋我尐大閘蟹quota,呢樣先至超唔抵!思前想後,覺得都要去試嘅。於是就約埋幾個肯同我癲嘅人一齊去。

嘩,乜咁多花式㗎,又薰衣草、又風沙、又油泡,搞咁多花神都冇用,係完全吸引唔到我嘅,我只食一味,就係蒸。結果我食咗十一隻,但係食完之後我係有尐覺得自己輸咗嘅,所以我同朋友檢討一輪之後,決定今年如果佢再嚟,我地要調整策略。

首先,真係乜嘢都唔可以另外叫,上年我個朋友叫咗一杯香片,結果係加咗成百蚊。咁你又唔駛擔心會口行行,因為佢係有薑茶不停添加,同埋熱水亦都係免費嘅。其實食大閘蟹除非你飲花雕,如果唔係佢杯薑茶都好啱駛,一來夠熱可以消下滯,二來可以驅下大閘蟹尐寒氣,自己喺屋企食,都不過係飲呢兩樣嘢啫。

另外,佢呢個任食大閘蟹餐係包一碗蟹黃羹同一碟類似炸蝦丸物體。根據去年嘅經驗,呢兩樣嘢好long胃,係會影響你食蟹嘅數量嘅,而且食完蟹你會想搵尐熱嘢食下,咁呢碗蟹黃羹,雖然我唔食,因為有蛋,但係真係可以幫你暖下個胃。
一人叫得一隻,食完之後,要等半點鐘至有第二隻!
到咗戲肉部份,就係落單叫蟹嘅時候喇,我地舊年一來唔識路,二來扮斯文,第一次落單一人叫一隻,結果食完一隻再點第二隻,係等咗半粒鐘有多,真係乜嘢心情都冇哂喇!

所以根據去年經驗,我歸納咗呢幾招攻略。
1. 除咗你好想飲花雕之外,唔好另外點任何飲品或食物。
2. 請佢將蟹黃羹同埋果碟炸嘢喺你食完大閘蟹之後先至上,唔好俾佢牙住你個胃,俾佢質到飽哂!
3. 落單叫蟹嘅時候,唔好一隻一隻咁叫,要預備一人食四、五隻,然後喺大家食到第三隻嘅時候再落柯打,咁就喺你食完枱面嘅蟹之時,就有新蒸好熱辣辣嘅另一批貨到,咁個食蟹過程就好順暢,唔駛坐喺度等到冇哂食慾!
今年成績:12隻
最後呢個供略係最重要嘅,就係如果你冇能力食番至少六、七隻,我勸你唔好去,因為一定維唔到皮。但係如果你好似我咁食到十隻以上,咁就真係好抵,第一佢尐蟹嘅質素唔差,雖然只有三兩同埋蒸老咗,但係尐蟹好有羔,另外有人幫你煮埋、洗埋,自己食完拍下手就走得,真係乾手淨腳,心情特別好。

2015年10月10日 星期六

為食路上,豬肺湯

雖然這幾天的天氣並不像秋天,但根據中國的曆法,秋天確實已經在微涼的晚風中駕臨。天氣變得乾燥,皮膚就最能反映真相了。這種氣候就真係要喺飲食上潤一潤,嗱,煲豬肺湯就最適合不過喇!每當我跟朋友說起可以如何、如何去煲豬肺湯,朋友不是不信我懂得煲這湯,就是當我行咗一件奇蹟咁萬般讚嘆﹗唉,中國湯水有幾難,來去兩個要訣:材料加時間﹗不過煲豬肺湯就要多加一個要訣,就係心機。

買個豬肺已經要有準備工夫,你要早一天去同相熟的豬肉檔,請他代留新鮮豬肺一副,如果唔係就未必有豬肺,又就算有都可能唔夠新鮮,又或者新鮮但係個肺好多窿,咁咪一路入水一路漏水,咁咪洗到天光都未洗得乾淨囉!

買到靚豬肺番屋企之後,先洗下個豬肺嘅表面,之後搵一條大概八吋嘅膠喉,如果冇就要去買喇,咁呢條喉係點用嘅呢?佢一邊係用嚟插喺水喉出口,而另一邊則插去豬肺個喉位,之後就開水喉灌水入豬肺內,直至個肺漲滿,再把水擠出,這第一次擠出的水,應是淡紅色的。

之後把這灌水、擠水的過程重複,又重複,再重複重複重複,前後最少半小時,直至擠出來的水,是清澈透明為止,這步驟不可偷懶,未洗乾淨個豬肺便用來煲湯,事實會係點我唔知,因為未試過,但係一句講哂,後果自負!

呢個時候你都應該已經身水身汗,但係只係做咗預備工夫嘅一半,呢個moment唯有繼續幻想煲好之後碗湯幾咁潤,同埋屋企人會幾咁大力讚賞你,如果唔係,真係好想放棄!

咁豬肺都洗到乾淨哂喇,重有乜嘢做呢?你問!嗱,等豬肺洗乾淨後,便用刀把豬肺切成二吋乘二吋左右的方塊,之後再把豬肺方塊洗乾淨,睇下重有冇漬血或者其他尐唔知乜。之後就開火將隻鑊燒熱,把豬肺塊放落去就咁炒,乜都唔好落,就咁白鑊炒,一路炒一路有水從豬肺塊走出來,當炒出來的水差不多滿一鑊,便要把倒咗尐水去,再把豬肺回鑊繼續炒,直至豬肺唔再出水為止。你諗下,如果唔炒尐豬肺,你飲果碗湯其實係尐洗肺水,都咪話唔核突!

好喇,講番個肺,這時豬肺塊的尺碼,大概是未炒時的一半,所以切豬肺時唔可以切得太細塊—否則又係後果自負喇!

由於時間關係,我地事先已經將白菜、菜乾、肉排、南北杏及蜜棗洗乾淨,呢個時候可以將佢地同已經俾你炒到水都冇滴嘅豬肺,放入大湯煲入面煲嘞,先以大火煲至大滾,再收細火至湯水仍然滾動為止。係咁煲一個鐘頭,中間留意下佢有冇乾水,之後就可以放入燜燒煲,再喺飲之前半小時再攞番出嚟煲,咁就得嘞,咁你中間果段時間梗係唔可以得幾個字喇,點都要有番三幾小時。咁如果你冇燜燒煲,又或者冇時間,就要係咁中火煲佢三小時。

咁樣,一煲滋潤養生的豬肺湯便可以上枱嘞!這個湯的製作過程真係非常操勞,飲果個應該非常潤肺兼養顏,但係做果個就勞神而傷肝,真係飲咗都未必補得番!咁如果咁難搞嘅一煲湯都有人肯煲俾你飲,就真係要飲多幾碗喇,一來你要領略人地嘅心意,二來將來佢得手之後未必肯煲㗎喇!