依撒意亞50:4

吾主上主賜給了我一個受教的口舌,叫我會用言語援助疲倦的人。(依50:4)

2015年3月27日 星期五

嘉嘉的為食路上,Dan Ryan's

數數手指,真係有幾十年了!當我要出外吃飯,而又不知去邊時,我多數會去呢間呢間並不是最好吃,價錢亦不是特別便宜,但勝在水準穩定而環境舒適,雖然而家生意難做,枱與枱之間安排得密左尐,但係仍然不影響我對佢嘅印象。

我向來只點那三兩種食物,包括以新鮮而爽脆的羅馬菜加特製醬汁撈成的Caesar Salad,還有骨肉均勻、醬料惹味的baby spare rib,如果胃口好的話,還會點香辣鮮甜的Ciopino意大利海鮮湯飯,又如果是星期五或六,我就只取楜椒蟹了,與新加坡的做法各有千秋,但這裡勝在斤兩十足。最後無論我吃得多飽,也必需要吃她們的甜品,特別是Tiramisu,大大件的十足一塊東坡肉,但入口卻又那麽芳香誘人!只有一邊搓著肥肚腩大叫好飽好飽、另一邊大口大口的啖那肥美的美點!

但係人會變,而我呢個變並唔係變心,而係對美好食物嘅進一步追求,所以除左意大利海鮮湯飯之外,我已經有一段時間冇點佢嘅Caesar Salad同埋Baby Spare rib喇,因為幾年前開始,佢果份用左超過十年、我瞇埋眼都識背的餐牌終於有變了,無論前菜或主菜也加強了陣容。而經過左一輪嘅試味之後,我又有新飛佛嘞!

沙律方面我會揀希臘芝士紅菜頭沙律,很清甜開胃,而微辣嘅芥辣醬汁更加係惹味非常,再加上大量嘅核桃肉同紅莓乾,前者酥脆,後者酸甜開胃,所有加起來就是最好的開胃食品!吃過這沙律之後,真係胃口大開㗎。

主菜我會揀蟹餅,厚厚圓圓的兩件蟹餅要成百幾兩百蚊,並不便宜,但係真係好好味,相信不純是蟹肉,應該夾雜有魚肉,但係比例得宜,再加上略煎的表面,真是香口而可口。

又如果你不想吃這大份的兩件蟹餅,可以點它的釀蘑菇,所用的釀料類似蟹餅的材料,當然份量少很多,但釀在蘑菇內又是另一種食法,而且小小的一口作為前菜也是一個很好的選擇。


不會不點的是它的意大利海鮮湯飯。份量不可同日而語,但味道及材料依然充足,價錢貴了,但份量縮水了,你仍說是可以接受!你說。是呀,縮水的又何只這個湯飯,更縮水的是甜品,以前的Tiramisu真是一大塊肥豬肉似的撻在你面前,叫你求生不得求死不能,吃又怕肥不吃又怕對唔住自己,現在的版本只及當年的三份之一,但當你看看它身處的商場你就知道每一度菜所背負著的租金,你就會寬容一點了,而且這裡的食客都很懂得尊重別人的進食空間,熱鬧但不噪吵,不過這環境可能會慢慢改變,因為那天招呼我的一位侍應是只講中文的,也可能代表了它們要接待講不同語言的客人了。物換星移,這轉變也許無可厚非,就在變得面目全非前,多去幾次吧!


那這間餐廳是不是無懈可擊?不,它的湯類只有兩款、酒精以外的飲品也選擇不多,咖啡更是行貨,但這些都不影響我對它的喜愛,更何況它的店長都友善而態度專業。雖然我熟悉的店長走了一個又一個,但只要佢嘅食物的水準不變,我仍然會在想不起去那裡開餐時上門幫趁的。

呀,差尐唔記得佢嘅鎮店之寶,就係落單之後免費奉上嘅核桃muffin,鬆軟可口,加埋佢特製嘅牛油,真係食三個都收唔到口,最記得有一次,我特登唔食,心諗打包番屋企做早餐,點知去完個洗手間出嚟就俾佢收左,嬲得我呀,一來冇得食,二來佢地一定掉,咁好食,哂左唔好吖嘛!

2015年3月19日 星期四

嘉嘉的為食路上,黑麥

我間中會學人文化一番,但係文化係食唔飽嘅,所以去文化之前,都總要醫肚。咁就算我係幾咁為食,我都唔會去石澳食完飯至出去藝術中心睇表演嘅,所以就腳就係最大原因。其實喺藝術中心呢附近,係有好幾間食肆嘅,但係無論我去藝術中心、演藝又甚至會展,我都會去藝術中心果間「黑麥」度食飯。

雖然話係食飯,但係唔一定要食飯嘅,因為佢嘅選擇都唔算少,有all day breakfast全日早餐、有漢堡包、有飯亦有麵,咁亦當然有飲品喇,餐廳唔賣飲品係同自己倒米,點解?咁好利錢,而且亦係客人必需品,唔會唔賣嘅。咁好似好多嘢食?其實又唔係喎,因為佢每一類嘅選擇又唔係多喎!好似湯咁,話就話有兩款,兩款?你問!嗄,咁你覺得多定係少呢?梗係少喇,係呀,不過重未講完,餐牌上雖然寫左兩款,但係好多時都只係得一款,而唔知係我好彩定係佢從來只係煲一款湯,因為次次都係南瓜湯!

食物嘅選擇相對就多好多喇,近日重加咗一款海鮮併盤,雖然成$750,但係我有興趣試呀,可惜次次去都係貪佢去睇騷就腳,所以時間趕急,一直未試。喺啱啱過去嘅呢個星期,我又去咗果度食喇。我今次點左佢地嘅晚餐套餐,包一個湯,一個主菜重有咖啡添。湯,唔駛再講喇,係嘛,梗係南瓜湯喇。而主菜我揀左慢煮茶薰三文魚配糙米飯。

個湯,我想信係用微波爐番熱嘅,所以上枱時好熱,一羹嗶落去,熱氣走哂就變得暖,雖然我鍾意飲熱湯,但係要趕住睇表演,暖暖地易入口,咁就冇所謂喇!

到個主菜嘞,我想信佢都係用微波爐番熱嘅,因為又係上枱之時看似熱騰騰,但係飄過一陣煙之後就回暖嘞,可能係場地問題要用微波爐都唔定,呢點無可厚非喇!好,我地試下逐部分析下呢個慢煮茶薰三文魚配糙米飯先,首先係慢煮,其實佢係唔係慢煮我係唔知咖,因為慢煮最大優點係肉質軟熟,但係我果舊係魚腩部位,本身都好軟,唔會太嚡,其實就算嚡都冇所謂,因為果舊魚得果兩吋唔夠,咁細舊你一定會用刀叉撕碎佢再混埋尐飯一齊食喇,咁又點學嚡呢!跟住就係茶薰,記憶中好似重係綠茶薰添,即係用綠茶煙薰果舊三文魚。我努力咁試味,但係唔好話係綠茶味,連茶味我都唔多覺,不過呢個名係改得好好嘅,夠吸引,至少我就係俾佢呢個名引到嘞!

到糙米飯,好坦白講,如果唔係佢果舊魚改左個咁好嘅名,我係唔會叫呢個主菜,因為我其實好怕食糙米飯,硬堀堀食到一口渣,食糙米飯對身體有幾健康我真係唔知,但係食落口果下個口感有幾差,我係可以即時話俾你知,所以佢呢個糙米飯本身應該冇問題嘅,問題係糙米本身太硬令人食到牙骹都梗埋果度出問題唧!

咁聽落呢個晚餐都幾難食喎,咁又唔係喎,可能係我揀錯食物咋喎,因為我朋友叫果個漢堡包就唔錯嘞!其實好多時出街食飯,你去到一間餐廳唔點人地嘅手本名菜而自己亂點係會出事嘅,因為呢間餐廳其實當日就係以麵包出名,所以佢嘅麵包類相關食物係有水準嘅,係我揀錯啫!

咁我重會唔會去?會,都話我只要喺附近睇表演,我都一定會嚟呢度食,一來佢簡單快手,二來環境清靜,當然呢樣好受其他食客影響,但係一般嚟講都係清靜嘅,三來佢唔算貴,一百蚊唔使就有湯有飯有咖啡,重想點,更何況佢杯咖啡幾好飲,外面賣一杯咖啡都成$50,我咁樣拉下補上,叫做圍到下皮㗎。


2015年3月14日 星期六

嘉嘉的為食路上,食家朋友

我係一個為食嘅人,但係我對食其實唔算揀擇,最常掛喺口邊嘅一句說話係好一餐,唔好咪食過餐囉。其實食物唔啱胃口冇乜大不了,唔鍾意咪食少件,真係食唔落口嘅咪番屋企煮個麵囉,我係唔會對住人地尐食物發哂老皮嘅!唔知係我為食,所以自自然然會親近尐食家朋友,定係我條命生成係同尐食家做朋友,點都好,我真係時時有機會食好嘢,但係事實上我係好怕同尐所謂食家出街食飯,蔡瀾例外。

我認識嘅食家朋友唔少,佢地除左本身咀尖自封食家之外,好多亦有寫專欄,係大眾公認嘅食家。食家喎,所寫嘅嘢當然係對食店有影響喇,所以當佢地入到一間餐廳時,係真係有特別禮遇的。最簡單係個廚會即刻走出嚟同佢打招呼,之後由個廚發版食乜餸,咁煮出嚟嘅當然係份量十足,心機百倍嘅食物喇。但係好多時候我覺得咁樣整出嚟嘅食物會係衰左嘅!可能因為太緊張,所以失去神韻,更可能係太急於表現,以至進退失據,煮出一鑊粥!作為香港人,你應該明白一鑊粥並唔係一鑊粥咖呵!

而事實上材料係特別充足嘅,我記得有一次個朋友帶我去食龍蝦宴,其中一味炒球,嘩,舊舊都係肉,真係一隻腳都冇,咁呢尐係咪特種龍蝦呢?梗係唔係喇,尐腳咪去哂其他枱果度囉!係呀,我地成日吹捧尐食家,甚至跟住佢地嘅推介嚟食,其實某程度上係剝削緊自己!

好嘞,講左咁多親近食家嘅著數,講番同食家一齊食飯嘅唔好處先,有尐食家為左表現佢地嘅身份,係會喺骨頭裡挑雞蛋,唔好誤會,我唔係講錯,佢地真係喺骨頭裡挑雞蛋,因為都冇嘢俾佢挑剔!其實遇到呢尐場面,有時都幾尷尬,嗱,好似人地放左碗湯喺我面前,當我呼嚕呼嚕飲得興高彩列嘅時候,佢突然講句:嘩,唔得喎,呢碗湯!嗄,佢話唔得?但係我又覺得幾好飲喎,咁我應該飲落去呀,定係即刻剎停自己個口呢!唔飲,就咁倒左幾碗湯哂左尐呀!飲埋佢先喇,我心諗!但係見其他人都定哂鏡,唔通我咁唔俾面阿食家咩!於是我亦只好放下匙羹,走向人群!

跟住,多數就係個經理出嚟問有乜嘢問題,然之後就係個廚轉頭換過款湯我地再飲。通常呢第二碗我係唔會點飲嘅,一來我之前飲左,二來點知個廚會唔會太高興而加料㗎!點解?你懂的!唏,話埋俾你聽都唔怕嘞,咁足料嘅湯,我驚會補得滯,嘻嘻!

咁,同食家出去食飯都有好處,就係唔駛多講,好似有一次,跟衫尾去食日本菜,個老闆博命推薦佢尐魚生,又話新鮮又話抵,俾著同其他人就一定會話,怕咩呀,人地打開門做生意,冇事嘅,最後都係點左點呢個魚生!但係同食家去,佢就會明白平嘢冇好嘅道理,魚生,咁平又咁新鮮,即係本港海域捕獲囉,咁尐水質如何心中有數喇!

另外一次又係同魚有關,餐廳話有條野方脷,於是立即叫佢蒸喇,點知一上枱,唔係養方脷,亦都唔係熟得滯,係有汽油味,俾著其他人,一定會你一啖我一啖咁試下係咪先,咁條魚俾你試到好似食哂咁,重點叫人退貨!但係同食家一齊就唔同嘞,佢只要聞一聞再夾少少嚟試,已試出汽油味!

不過我真係唔係幾鍾意跟食家去食飯,雖然有好嘢食,但係都好緊張下嘅,有幾次試過胃痛添!好似阿媽話事解,做人都係食自己著自己好尐,著數有陣時都好惡哽㗎!


2015年3月5日 星期四

嘉嘉的為食路上,團餐

我其實已經有一段很長的時間沒有參加旅行團了,一來自己已摸索到一套自助旅遊的方法,二來我亦不想放假散心也被人時刻控制!但今次的哈爾濱旅程,我參加了旅行團!因為我想看的大型展覽,如果不跟團,可能天黑都未能入場!參加團的好處亦謹此而已。因為你要被它限時限刻,要6點morning call、要全團人一齊行動、要參觀海產店、棉服鋪、東北特產店等等等等!不過最要命的是食得差!其實我在選旅行團時,亦特別留意每團的膳食安排的了!

終於我報名參加了一個東北三省八天團,聽團友們說,我們這團算是比較貴的了。咦,你不是講為食路上嗎?為甚麼講旅行團呀?你問。係呀,我講食咋,所以我係唔會講呢團嘅行程有幾鬆散,亦都唔會講某一尐導遊係點樣斬到你一頸血嘅!

好,咁呢8日有乜嘢食先。一日三餐,乘以8日就係24餐,但其中兩天都在航機上,所以實際只有19餐,其中7餐是酒店早餐,而一餐自費,所以有11餐是由旅行社安排。這11餐中有一餐喺冰屋食火鍋,呢餐好玩多過好食,不過試下無妨,另外滑雪場內午餐、特色農家菜、特色鍋包肉、大地春餅同餃子王,淨係聽個名,你都唔會對佢地有乜幻想喇!

不過剩底果5餐一餐係烤鴨餐我心諗即係食北京填鴨喇、一餐係吉菜食府即係食吉林菜喇、哈,吉林菜即係食乜嘅呢?一餐係滿族人家即係食滿州菜喇、重有一餐係滿族三套碗?嘩,呢餐直情勁喇、重有一餐係祖傳滿族旗人菜,旗人雖然係外族,但係入關咁多年又假假地都係王族,食嘢應該好有格局喎。
講下果6餐令人毫無幻想嘅先。果然,喺冰屋打邊爐同平時打邊爐嘅分別就係你要著住羽絨大褸,而食物係凍得好快嘅!另外,所謂鍋包肉不過係A貨糖醋排骨,其他幾餐都係照字面解讀就得嘞,但係勝在平實,8餸一湯、白飯任裝咁喇!

終於等到填鴨餐喇,第一碟就係片好嘅鴨肉同薄餅,大家食得興高彩列,但係之後都只係平日食開果尐菜式!算,填鴨未食過咩,下一餐。下一餐係滿族三套碗,三套碗呢個名堂並唔係隨便叫,真係要有十款涼菜、三款大件、十二款爆炒、湯燴菜、六款麵點共三十一度菜組成。各種菜式上枱喇,確係件數十足,可式味道極差,就連馬仔都係又乾又硬,咬唔入口。你唔好以為我多聲氣,全團兩圍枱尐食物都冇乜點郁過,個個都覺得唔好食,真係浪費!

其他果幾餐都係得個名,除左一碟係乎合主題之外,其他都係菜炒菜、蛋蒸蛋、雲耳泮雲耳、豆腐煎豆腐等等。本來都已經心如止水嘞,點知阿導遊呢個時候叫大家交錢食俄羅斯大餐,喺哈爾濱食俄羅斯大餐應該有睇頭喎,因為佢曾經俾俄羅斯統治過,而且阿導遊不停咁話間餐廳好靚好有氣氛,前後大大話話有成十度菜,而最特別係佢嘅麵包!

係呀,俄羅斯麵包好好食咖,我嘅記憶同我講。於是我就乖乖獻上240蚊人民幣嘞!一坐低我已經知道出事喇,所謂好靚嘅裝修,原來係TVB佈景板。左手面係白麵包,同我記憶中有餡嘅麵包有好大分別,而最特別係麵包傍邊嘅果占,食早餐咩,大佬!


之後係羅宋湯,你隨手喺超市買罐蕃茄膏都可以開30碗好喫過佢嘅!跟住係牛仔肉,好韌呀,亦都好蘇,於是我問待應攞黃色的芥茉,對方問我綠色的可以嗎?嗄?我都未反應得切,已經有一支wasabi空降我面前!跟住就係我祈待嘅炆羊肉,噢,原來呢度尐羊咁貴咩,一人得三粒仔!之後確實有好多度菜,可惜無論味道同埋材料都係乏善足陳!之後同團友傾起,都同意以當地消費水平計,呢餐最多值80蚊。

唔怪得導遊同領隊喺另一邊食得咁開心!

我唔係挑剔,亦明白團餐點會有好嘢,但係佢老老實實咁8餸一湯、白飯任裝我係唔會怪佢嘅喎,佢乞人憎在作到咁大,等大家充滿祈望,到最後貨不對版,至令人越食越謦之嘛!

2015年3月1日 星期日

嘉嘉的為食路上,啤啤佢

我喜歡間中去飲酒,但我是那種不會在家飲酒,更不會一個人飲酒的人。咁你沒有失意或落寞的日子嗎?你問。不是,沒有這些時刻又怎算人生!我認為飲酒是開心的事,要與朋友高高興興的聚。而我另一個飲酒嘅條件,係果度尐野食得下。香港飲酒嘅好地方唔少,但係好多都只供應微波爐餐單,即係急凍炸魚薯條,冇食牌亦冇人煮,所以啱我去嘅酒吧並唔多,但係都唔係話冇,事在人為啫!

我近日嘅新發現係尖東海傍嘅一間德國酒吧 brotzeit。冇錯,又係德國吧,我又真係幾鍾意飲德國啤酒嘅。話說有一天行完山,想飲番杯又想醫肚,想起海傍那一列酒吧中的其中一間。去到想坐窗邊,其實之所以去尖東也是想望住個無敵維港景飲酒,不然大可去河內道飲喇!點知個侍應話有人訂左,我話我地好快,食完走,點知對方望望我然後話,我地有最低消費,嗄,酒吧都有最低消費,我真係第一次聽!之後佢叫我地上樓上,乜樓上又冇最低消費咩,哦,原來樓上又真係冇最低消費喎!咁即管上去睇睇喇,上到去就知道點解樓上冇最低消費,因為佢連景都冇!於是走人,過隔離睇睇!

去到隔離,樓上差不多坐滿,侍應叫我地落樓下,我地問:樓下有冇最低消費,佢好驚訝咁答:最低消費?我話隔離有!佢笑一笑然後話,冇,酒吧點會有最低消費。咪係!哈,第一印象已經好好。落到樓下,即係之前我想去果間嘅隔離,咦,呢個角度個海景重靚,我地被安排喺一列玻璃窗傍邊,坐低叫左杯啤酒先,係德國啤,佢重自稱係慕尼克最多人飲嘅啤酒添!唔,清清地,幾好味!個杯高高瘦瘦幾好揸。

咁要搵尐野嚟送酒嘅,我地點左咖哩香腸,之前未食過吖嘛。咖哩就當然辣喇,但係佢入口之後,辣完一陣就冇事,但係味道齒頰留香,而伴碟嘅薯角炸得非常美味,外脆內軟,一啖咬開,入面重係熱嘅,喉嚨痛咪就係咁嚟咖囉!

飲得咁上下,係時候食尐飽肚嘅嘢喇,咁我地就點左一個pizza,呢度嘅pizza係方形嘅,香香脆脆,幾好味,不過實在太大個喇,食到攬住個肚呀。

不過幾飽都好,甜品係一定要叫嘅,因為喺睇餐牌嘅時候,已經俾佢果張dessert platter嘅圖片所吸引,所以飽極都要食,最多叫細份,唔叫大份囉!

其實幅相已經影得好清楚佢有尐乜野食,但係當佢成碟擺喺你面前時,又係另一回事,就好似你一日都黑都睇周潤發做戲,亦都見佢成日周街同人selfie,但係佢有一日真係喺你面前出現,你咪一樣會叫到癲!同樣當呢碟甜品擺喺你面前時,第一個反應係想尖叫,因為實在太靚仔,蘋果批一望你就知係好料,重有果球雪糕,簡直係絕配呀!心太軟已經好明顯咁將個心擺左喺你面前,你見到能不心軟嗎!重有家鄉pancake,一放上檯已經聞到佢嘅香味,再加上酸甜適中嘅果醬,我等不及數一二三已經開動喇!

心滿意足的埋單,其實計起上嚟,我地嘅消費絕對超過隔離餐廳嘅最低要求,但係佢嘅做法乞人憎,所以我急急轉場,點知又竟然俾我搵到寶,今晚我飲得高興食得開心,再加上維港上嘅清風與山頂嘅明月,我終於明白乜野係無價寶喇!