為食路上，爵祿軒

唔知由幾時開始，我俾左人一個錯覺，以為我係泰國通，所以朋友去泰國之前總係會問下我有乜好介紹，其實我一、唔識泰文，二、對泰國唔係好通，因為我只係去過曼谷，所以充其量只可以叫做曼谷通，但係喺曼谷，我其實來來去去都係住果幾間酒店，食果幾間餐廳，行果幾度地方，不過有一樣我比較強，就係有尐朋友住喺泰國，而佢地又都好鍾意食，亦時時將尐食物照放上交友網站，咁佢地尐介紹就梗係地道得多喇，所以令我尐介紹好似好特別咁，其實，有尐我時時去嘅地方，好多旅遊書都有介紹㗎喇！

咁啱，近日又有朋友去曼谷，佢話想食中國菜，而佢之前都去過連阿小田純一郎都聽講有去果間，係由的士哥哥車去嘅，佢覺得普普通通。佢講呢間食肆我都去過，我又唔覺得好普通，至少價錢就唔係太普通嘞，不過尐食物唔算差，至於點解佢會覺得普通呢，可能係去錯鋪頭！去錯？朋友問，係的士佬車我去嘅喎！我唔敢挑戰我呢位開始有尐激動嘅朋友，我只可以講，我聽人講過當你跳上的士話去呢間好出名嘅中國餐廳，係有尐的士哥哥會車左你去另一間，反正我地都睇唔明門牌地址，有碟咖哩蟹食下就當係！

其實泰國的中國人很多，中國餐館也自然不少，但富麗堂潢而價錢合理，食物美味而場面不污糟的，地點方便而有BTS站，我只吃以燒乳豬聞名的爵祿軒！她在泰國的時代廣場Time Square的二樓，對面就係Robinson，坐的士嘅話要留意發音，我試過有一次真係好攰，而行去BTS站都有一段路，咁咪坐的士諗住喺架車度抖下，點知俾佢車左去Siam Square，爭持左一輪都不得要領，結果我咪走番去Siam搭BTS去呢間中國餐廳囉。所以真係唔好諗，一於坐BTS，完全冇爭拗，成件事變得非常容易，因為佢就喺Asok站上面！

我嘅經驗係人唔算多，但係如果你有得七八個人就最好訂位，因為作為遊客，你係唔知佢邊時會突然多人，兩三個人冇位佢易安排，又甚至可以過對面Robinson行下，但係成圍人就唔知等到幾時至有大枱，所以都係訂左位好尐！

爵祿軒最有名的當然是燒乳豬仔，呢個係必吃之選，真是皮脆肉香毫不肥膩，肥瘦適中，刺激食慾！乳豬仔細細隻，被片出大概二十塊皮，片片香脆，之後店家會把豬身拿去切件，攞番出嚟又係一碟肉香淡薄但鮮美可口嘅燒肉，人多嘅話，一人一兩塊會有少少唔夠喉，而我試過四個人係咁吃呀吃的，就把一隻大約呎半長的乳豬，頭頭尾尾、手手腳腳的吃過精光！你唔好以為會好滯喎，之後重可以食其他餸！

記得有一次我地一行八人去曼谷玩，你可能會嘩一聲叫左出嚟，冇錯，八個人如果要一齊行動，做統籌果個，那係我，會慘過返工，所以我地每日只會見兩次，就係午餐同晚餐，大家約好時間，然後各自去到餐廳集合，咁就可以食多好多嘢之同時，又唔會破壞友情。既然咁多人，就一定要嚟食番隻乳豬喇，一人得果一兩塊確係唔夠喉，但係佢其他餸都做得好好，你隨便喺餐牌見到想食嘅就叫就得嘞，點解可以唔隨便？一來佢尐餸菜都有番咁上下水準，二來價錢真係平，唔駛就住叫。

不過有樣嘢係唔叫得嘅，就係反沙芋！一心以為潮州人咁多，佢嘅反沙芋一定做得好喇，點知一上枱已知出事，個芋頭好靚，咬落去好粉，冇腎到，但係佢嘅外層竟然唔係比糖膠包住，而係沈滿糖粉icing sugar喎，嘩，完全唔係果回事喇！不過整體嚟計，佢依然高分。

為食路上，2015大阪排隊

搵食其中一條不二法則係跟大隊，無論工作上還是食物上都係。但係一本通書係唔可以睇到老嘅，好多嘢係要因時制宜。

就以搵食搵長龍為例，其實之前做番多尐資料搜集，係可以慳番唔少時間同腳骨力嘅。我今次去大阪，好自然就會去一蘭食番碗原庄正版嘅拉麵，咁我記得上次去就係因為條龍長過乜而放棄，但今次我係點都要食番碗喇，因為真係好想知佢同香港果間尐口味有冇分別吖嘛！

於是，我第一晚就去探路，嘩，發覺門外條龍好似條盤龍鱔咁，轉呀轉，轉左唔知幾多個圈至到盡頭，咁我就梗係唔會同佢排喇，雖然而家大阪嘅天氣非常好，清風徐來，但係我嚟得果四五日，冇理由要浪費成粒鐘喺排隊之上呀，於是我轉plan，去食壽司先。

然後第二日，都唔駛好早，十二點鐘鬆尐，我又去過，果然，門外水淨鵝飛，唔好話龍，連人都唔多見。於是，我就可以好輕鬆咁入門口，再透過購票機買麵同埋買其他配料，非常方便。

由坐低到輕輕鬆鬆咁食麵，到後來連最後一滴湯都飲埋，我用左唔夠四十五分鐘，呢個時間用嚟喺晚飯時間排隊都唔夠喇。而且食拉麵又唔一定要晚上食，做午飯重好，唔夠飽之後重可以食其他嘢！

咁真係肚餓又有乜好食呢？嘩，喺道頓堀可以食嘅嘢就多喇，不過，非常之受旅遊書影響嘅香港遊客，係一定要去試下果間PABLO芝士蛋糕嘅，點解？因為旅遊書話係十大必吃囉！嗱，唔好理好唔好食先，但係門外又係有一條長龍喎，咁點呢？哦，原來喺不遠處係有另一間細少少，但係賣緊同一樣貨式咁PABLO，咁，你就又可以縮短排隊嘅時間！咁如果你連排十個八個人都嫌長，其實，呢間以出售半熟cheesecake出名嘅鋪頭，佢嘅分店亦已經開到去地下街，我住嘅JR大阪站就有一間，係好細，個鋪面，但係貨式一樣，反正都係工廠出品，所以品質係冇分別嘅！

但係有尐龍呢，你就算點唔願都係要排嘅。問番你先，你有冇留意，點解之前果兩間店可以唔介意食嘅時間同售賣地點呀？因為佢地係工廠式制作，有哂方程式，唔會出錯，除非你入錯左間假冒嘅鋪頭喇！但係有尐小本經營，兩公婆一腳踢，做完就冇得賣果尐，你就真係條龍幾長，只要佢唔截龍，你真係三個鐘都要排！

另一種就係人手現場做嘅，都係冇得郁，除非唔食，否則都只好死死地氣去排隊！所以我唔係唔排，係合理並聰明地排。好似今次我都有排呀，就係排隊食章魚丸。我知美國村有間章魚丸店，佢以自家制醬汁聞名，我食過喇，不過佢真係太多人，而我今次去美國村果日就咁啱落雨，攞住盤章魚丸都唔知lay去邊度食好，所以我冇食甲賀流，反而我喺道頓堀果晚，就去左一蘭傍邊果間章魚店排隊。

呀，你要小心喎，唔好見章魚店就走入去買喎，因為兩間章魚店係並排嘅，但係瘋刺地，一間係打哂蛇餅，而另一間就只係得個做字，都冇乜人幫趁，不過以香港人食嘢嘅觸覺，應該唔會搵錯，見人龍就啱㗎喇！

為食得嚟都要唔好浪費自己嘅時間至得㗎！

嘉嘉的為食路上，瓜

時間過得真係快，半年又就快過去，而下個星期一亦係24節氣之中嘅「夏至」喇，雖然我唔識醫術，但廣東人點都識番少少食療，咁夏至要點食法至可以保養身體呢？原來夏天要保護陽氣，所以飲食要清淡，要多食雜糧以寒其體，不可過食熱性食物，以免助熱，更加要多飲水，以收清熱解毒，利尿消腫之效。而諗起利尿嘅食物，我就會諗起冬瓜湯。

冬瓜湯真係由細飲到大，健康又愉快。呢個湯個賣相就認真麻麻，啡啡灰灰，成盤洗腳水咁，細個時唔多願飲，但係我鍾意食冬瓜喎，於是媽媽就𢳂一碗冬瓜俾我食，咁食完冬瓜個碗就梗有尐湯水嘅，咁佢話唔好嘥飲埋佢，我見少少就順下佢意喇，如果者佢每次加多尐湯水，咁逐少逐少加，到後來已經習慣左，而個湯亦實在唔算難飲，咁就養成左冬天飲冬瓜水嘅習慣。

這個湯非常之易煲。份量：一量米杯之扁豆赤小豆，半米杯意米，兩斤半冬瓜，陳皮一片，這個份量夠五六人用。用清水把扁豆赤小豆及意米和陳皮分別洗淨，再把冬瓜連皮切大塊，水滾後把所有材料放入，再滾後收細火，但以水仍能滾動為準，煲大概兩個半小時，便可飲用，其實而家自己搬左出嚟住，有陣時煲一煲冬瓜水連渣食，真係飯都唔駛煮又一餐，而且佢絕不肥膩，真係乾手淨腳。

不過呢個冬瓜湯都唔係冇難飲嘅時候㗎，不過唔關個湯本身事，係煮果個嘅問題，因為尐外籍家務助理係分唔清你尐廣東人咁多湯，呢樣加乜、果樣又唔加尐物，試過有一次，個家務助理醒得滯，竟然喺煲湯度落鹽，嘩，難飲到呢！所以切記，不要下鹽，真係好難飲的，屋企有外籍助理的要特別留意。要次次煲都提佢，唔係就浪費左煲湯喇！

雖然話夏天飲冬瓜水飲得好開心，但係夏天我其實更加鍾意西瓜。在熱爆錶的天氣下，渾身不自在，頭重重、鼻興興、昏昏欲睡的，如果這時候走去開著部冷氣瞓番一覺，應該可以補救到，但係番緊工呀，大佬，點瞓呀。等陣間老闆叫你番屋企瞓飽佢，以後都唔駛番就重衰！呢個時候，走落超級市場買隻西瓜嚟食，對我嚟講，係可以即時冇哂尐頭暈身罄嘅！

媽媽成日講佢細路仔時喺鄉下，遇上暑熱或身體不舒服，嫲嫲就會去攞隻冬瓜出嚟，俾媽媽抱著來消暑。不過喺香港我諗除了賣菜婆之外，其他人有機會見到一個完整冬瓜嘅機會並唔多，更何況要搵一整個冬瓜嚟抱！於是我想起它的親戚，阿西瓜。

而家尐西瓜好抵食，而且一般都幾甜同多水，不過小心唔好買左嘔泡或者爆炸西瓜就真。買左西瓜番屋企之後，我係唔會攬住佢嘅，我會將佢一分為二，一半切粒放入雪櫃，好方便我口痕時拮下一塊拮下一塊的吃，另一半的四分一則用來搾汁。嘩，呢招非常有效，一大杯西瓜汁咁飲落去，清甜非常之餘，又真係好似俾佢沖洗緊我全身咁，真係連暑氣也一併給它沖走。

這西瓜汁也真神奇，喝過以後不消三分鐘，頭重重嘅感覺冇左，胃部的漲滯感也沒有了，不單暑氣全消，果尐感冒徵象全部冇哂，疲憊感也消失了，呢個時候我會將剩低果四分一個西瓜切粒，一邊上網一邊拮下拮下咁食，真係寫意非常，非常寫意呀。

曼谷2015，馳名的文華東方自助餐

去曼谷旅行，似乎亦代表了暴飲暴食，去到說要減肥的是會俾人藐的！所以去曼谷食自助餐就成了必然行程。曼谷出名吃自助餐的地方主要有三間酒店，我之前在節目都略為提過，這三間酒店就是Sukhothai、Four Seasons(現改名為Anatara)及我大力推薦的文華東方。以價錢計，三間都差不多，而以Four Seasons 的最貴，但它也貴得有原因的，因為它是一個sparkling buffet，即是在食之餘，亦可以任飲有汽酒，注意，是有汽酒，不是香檳。不過如果不飲酒又或酒量有限的，也很難回本，而由於生意實在好，它的坐位安排得比較迫夾，雖未至於背碰背，但也可以伸手去隔離張檯篤佢尐嘢嚟食！

另外的Sukhothai，它的食物也很有水準，而曾經最吸引的就是佢個果汁檔，幾十種生果擺到五光十色，重可以隨你心意溝果汁嚟飲，諗番起都興奮，但而家已經冇支歌仔唱嘞，聽講話得番幾款咋喎！況且佢嘅甜品一直都冇乜進步，所以近年我都少去。

咁點解我會大力推薦文華東方的Lord Jim's呢？因為佢夠全面。價錢方面，如果係閒日，就連稅大概2000銖，星期六、日或者假日就係3000銖左右，價錢唔同當然食物都有分別，我試過閒日去冇得食鵝肝，而今次就冇得食生蠔，而其中分別最大嘅就係甜品，閒日真係少好多。

呢幾隻蠔係上次食嘅，假日，今次冇生蠔呀！

Lord Jim's就喺酒店正門入口右手邊樓梯上，地方唔算大，但係坐得比較疏，唔會背碰背，喺你入坐之前其實已經見到有沙律吧、魚生吧、中式蒸物包括蒸魚、扒車包括羊扒、牛扒，再行前尐嘅右手面就係煎枱，其中最搶手嘅就係煎鵝肝，再過就係日本食物，包括天婦羅，而左手邊就有頭盤、海鮮同甜品。呢個時候如果你太心急就會亂左陣腳，作必須要問下自己最想食乜、最多可以食尐乜，然後再作選擇，否則你一入門就俾佢尐蒸魚吸引，食唔夠兩舊就乜都飽哂喇！蒸魚，香港冇得食咩！

我次次去親，都係先食一打生蠔（如果有嘅話），再食六件煎鵝肝，然後再加兩塊牛扒。點解我咁揀？一來係我真係鍾意食，不過鍾意還鍾意，都要考慮圍皮嘅問題，就算好鍾意飲麵豉湯，你都唔會走去飲兩碗啩！二來自己喺屋企煎鵝肝，會彈到一地油，一路食諗起之後要抹地會好唔開心。咁食完呢三樣嘢之後，我係未飽嘅，就可以睇下有乜頭盤嘞，今次我覺得個龍蝦肉最鮮味。

你可能會問，咦，你唔食魚生嘅？係呀，我唔係隨便食魚生㗎，而且我見佢尐魚生貨式普通，不如留肚食其他嘢好過喇！

今次我食鵝肝有少少得著，事關我見果鍋煎鵝肝上面有尐好細粒黃色物體，其他人就撥開佢淨係夾件鵝肝，我好奇呀，於是夾粒試下係乜嘢嚟嘅，點知原來係芒果粒，咦，呢個配搭感覺上幾啱喎，而且人地大廚咁安排得，一定有道理嘅，於是我又去芒果糯米飯果邊夾佢半個芒果試試，果然，係天造地設嘅配對，芒果嘅清甜，完全可以抵消鵝肝嘅油膩，食完六件都唔覺滯，真係想再食多幾件！不過唔覺滯同唔滯係兩回事，都係節制下好尐！

之後就係食甜品喇，一枱都係真係唔知食邊樣好，但係食乜都好，都要先去攞番兩件馬卡龍同叫甜品枱個阿姐幫我整件橙酒班戟Crepe Suzette，可惜呀，而家嘅Crepe Suzette已經係預制件，唔似以前咁係即場做，味道梗有分別，氣派都唔同喇！

又係假日至有呢個陣容

最後，嚟杯咖啡，望住越嚟越繁忙嘅蕉柏椰河，感受下當日名作家喺呢度摘取靈感嘅餘韻，，陽光已經曬到入屋喇，不過曬我唔到喎，因為我一入座已經知會曬親，立即要求換位，所以至可以悠然自得咁坐喺度望住條河發呆！