為食路上，荔枝角那仿似Soho的身影

唔知你記唔記得一幅甲網上圖片，呢幅相之所以可以喺網上go viral，就一定同佢個主角有關，但係更特別嘅係，呢位仁兄點解會出現喺果度！一個俾人認為係冇型廠佬先至會出沒嘅荔枝角，碧咸竟然著到行哂咁出現！

不過後來有朋友同我講，荔枝角近住D2出口果邊，而家好Hip，重有一兩間食肆幾型㗎喎！嗄？荔枝角好Hip！冇諗過喎，亦好難聯想，因為我喺果頭附近返工返左成十幾年，真係諗唔到佢邊忽會Hip囉，一係佢真係變得好厲害，一係個Hip字有新定義！不過點都好，所有人講嘅嘢都要自己親身求證至有發言權，於是搵個晚上，我去試下，果次去食日本菜，話就話係爐端燒，但係乜都有得食，果次因為同舊同事食，就掛住八而冇影相，但記憶中，價錢比食物突出！

之後亦提不起興趣再去，直至上兩個星期，想吃一點類似西班牙食物，但係又唔想過海，諗呀諗，就俾我想起呢間荔枝角的西班牙餐廳Rustico。打個電話去睇下而家乜嘢環境先。可以預約，但分兩輪，六點或八點半，咁我就book左八點半果輪，你可能會問，八點半唔夜咩？夜呀，但係我冇諗過八點半去，我諗住七點半去，因為以我嘅經驗，除非真係好紅嘅餐廳，否則分兩個seatings其實係餐廳自我感覺良好啫，事實係唔會坐得滿。

果然，到去就有位！咁雖然有位，但係我前面都有一對男女等緊入座，咁咪等一陣囉，呢尐西餐禮儀我都有嘅，但係唔知點解果位好型嘅餐廳女待應，竟然同我講，佢地嚟先，一陣間會係佢地入座先，希望你唔好覺得驚奇！呢句其實係英文嚟嘅，中文好少咁講嘢法嘅，咁我又貪得意咁回覆佢：我覺得驚奇，我意思係我好驚奇你會咁同我講囉！點知佢竟然問我乜話，之後成晚冇招呼過我，就算我點甜品佢都係搵等二個埋嚟！

餐廳嘅客人都唔算少，不過餐廳都幾多枱，望下周圍，從衣著睇，似係喺附近番工嘅，廠佬模樣都有好幾個，坐正喺我隔離係兩對好似好識食嘅夫婦，人地賣緊十五年火腿佢又嫌人老要十二年，下刪一萬字，好彩後尾佢個位滴水搬左去第二張枱，唔係真係煩死！

咁我食左尐乜嘢呢？西班牙餐廳就梗係食Tapas喇，但係我地今次人唔多，只點左最基本嘅西班牙腸Choriso同芝士火腿炸球，兩樣都幾好味，以後者更加精彩，火腿同芝士混合得天衣無縫，一口咬落去，香鬆惹味，而Choriso嘅醬汁亦好正，諗住叫份麵包嚟點下，點知眼大睇過龍，以為只有蕃茄包，但係好明顯蕃茄包同Choriso個汁係唔配嘅，個包本身唔係太精彩，亦同價錢噸—成比例，至於我，係蠢左！

其實食完兩份Tapas都幾飽，所以就share左一個Main course，係當日廚師精選，大蝦意粉。呢個意粉味道非常好，乾濕適中，大蝦亦都grill得好惹味，食得我非常滿意。

咁心情好就自己開胃，於是又叫多個甜品，Waffle加雪糕，普普通通，不過不失咁喇！

埋單四百幾蚊，但係我地好多食物都係share嘅，所以唔算平，但講真都唔算貴，材料好尐就梗係要貴尐，唔通要人做蝕本生意咩！















如果要彈就真係要講下佢尐服務，西班牙餐廳最重要係果份親切感，唔一定要下下同你吹水，亦都唔一定要不停換碟，重要嘅係果種感覺，呢間餐廳尐服務無論門口果位型姐到介紹當日精選果位重覆姐，到企喺Open Kitchen後面果班哥哥，都俾你一種唔冷唔熱嘅感覺，你話佢招呼唔好咩，你每次搵人你都搵到，但係就係好冷，好例牌咁囉！

其實我係同情阿重覆姐嘅，我估佢果晚起碼將個Chef's recommendation講左冇100都有50次，唔悶死都口臭死！人地得十幾個位嘅餐廳仔至用呢招啫，你咁多張檯，佢一枱講一次都唔駛做其他嘢，咪哂左個人手！

Rustico嘅食物係好嘅，但係招呼咁cool，唔敢再去，我驚凍親囉！

為食路上、三杯鴛鴦，一種情懷

在過去一個星期，我竟然一共幫趁了三間茶記。兩間在港島、一間在九龍。我說竟然，是因為三間都是在沒有計劃的情況下，闖了進去的。我所講的茶記是貨真價實，現沖現賣，沒有廠房預制配方，沒有上市，沒有連鎖店的茶記，是童年現在一般可愛果種茶記，係有樓上雅座嘅茶記，係冇絮，加一，唔會限時限刻，重一坐低已經奉上熱茶的茶餐廳。

關於茶記嘅記憶特別多，其中一個係我到好大個都分唔清兩種飲品嘅顏色。佢地一個叫好立克，一個叫阿華田！你或者會話，咁都分唔到，搞錯呀！冇搞錯喎，分唔到就分唔到㗎喇，我姐姐教過我㗎，佢話你記住有克字果個唔係黑色咪得囉！有克字果個唔黑，咁即係想飲白就叫克，嘩，重混亂呀！咁我就索性叫果隻飲品做白色，我成屋人都知㗎！

另一個關於茶記嘅記憶就係我成日打爛杯。細個時候，茶餐廳用嘅杯又厚又重，而我鍾意飲嘅白色，就係用一隻純白色嘅杯裝嘅，果時細個吖嘛，有杯甜甜地嘅熱嘢飲，都好開心㗎！加上個杯好靚，於是每次佢一放落枱，我會急不及待一手𢲡起隻杯耳，但係對一個小朋友嚟講，隻杯係太重喇，於是好自然另一隻手會走去幫忙，但當隻手一掂到熱辣辣嘅杯邊，就自然反應地放手，而果陣時嘅我，就真係小嘉嘉嚟嘅，所以一放就兩隻手都放哂，咁杯白色飲品連白色嘅杯就會跌左落地！

我好記得每一次當我打爛隻杯時，爸爸都話，唔駛驚，好彩冇淥親！於是我真係以為冇乜特別，只要唔淥親就得，到我大個至知道，原來爸爸每次除左要俾多一杯飲品嘅錢之外，重要俾埋果隻杯嘅錢。不過後來老闆娘一見我嚟，就換個膠杯嚟裝住杯飲品，咁就冇再打爛杯嘞，但係到好大個都俾個老闆娘囉！

重有一樣茶餐廳嘅深刻記憶就係樓上雅座！過去呢個星期我去過嘅茶餐廳，都係正牌茶記，通通都有樓上雅座嘅！樓上雅座係收貴尐㗎，而聽哥哥講，爸爸自己去嘅時候係坐樓下嘅，帶住我地幾個時失至坐樓上，果時以為好矜貴，後尾至知，原來樓下係平尐之餘，客人亦都開放尐，即係如果冇粗口做連接詞係講唔到一句完整句子嘅，咁我地係細路仔，爸爸唔想我地咁早接觸另一類文化係可以理解嘅！

今日我並唔係想講嘉嘉的個體回憶，我反而想大家一齊嚟回憶下你嘅茶餐廳經驗。

呢個禮拜，我去嘅第一間茶餐廳，喺堅尼地城卑路乍街嘅祥香，聽講係金漆招牌，做左成五十幾年，能夠喺大熱天時隨手搵一間餐廳嚟竭下腳，而俾我走左入去係我嘅運氣，刻意走上樓上係想回味一下目往事，而叫杯鴛鴦，係想扮下當年大人，點知杯鴛鴦竟然非常之到家，睇嚟，佢呢個長期啡香滿溢嘅樂園，應該有排做。

另一家都喺西環，不過喺正街，叫做聯華。又係隨便走入去想同自己過個冷河同歎番杯鴛鴦，杯嘢好唔好飲？正如我落柯打時問阿伙計哥，呢度有冇鴛鴦，佢答話，呢尐茶餐廳點會冇鴛鴦，所以我會答你，呢尐茶餐廳，杯鴛鴦點會唔好飲！

而我去呢間聯華嘅時間係下午茶時份嘅尾聲，所以人客都唔少，但係由伙計到食客都好輕鬆，有尐客坐喺度打機，阿嬸喺度填番尐糖同豉油，而個水吧哥哥，同個肥嘟嘟茶客傾到不知幾高興，真係飲完杯鴛鴦，成個人都開心哂！

重有一杯喺九龍飲嘅，話說大前日我去完書展，坐完架滿載香港精神，即係速度驚人嘅小巴之後，落車平要定一定神，於是就走左去小巴街度搵杯嘢飲下。

離遠見間茶餐廳個名叫做蘭亭咁有詩意，雖然個牌匾一定唔係王羲之提字，但係喺旺角有個咁嘅名，真係令我有種出汙泥而不染嘅感覺，於是即刻走入去。可能係晚飯時份，人客唔算多，而大部份都只係飲嘢，我同樣叫左杯鴛鴦，同樣，茶餐廳嘅鴛鴦又點會唔好飲呀。

三間餐廳，都堅守茶餐廳嘅陣地，俾我地知道我地對茶記嘅回憶，係真實嘅，亦都俾我地嘅下一代知道，我地時時掛喺口邊但係已經好少發揮嘅人情味係乜嘢一回事！香港唔止呢三間餐廳嘅，我冇叫你好似我咁老遠走去飲鴛鴦，但係你屋企附近一定有一間茶餐廳嘅，幫趁佢地呀，因為茶餐廳唔應該只係我地嘅回憶，而應該係我地嘅生活！

為食路上，牧羊少年

話說我其實成日都行河邊近文化博物館果段路，因為我個個星期都至少去一次果邊望彌撒，但係就冇乜點行過過去博物館果邊。有一晚我嘅步行路線轉左少少，竟然俾我見到喺博物館後面有一間餐廳燈光火著，我心諗，以前都經過過呢度，但係就冇咁光猛，而餐廳入面亦都冇咁熱鬧，喺門口望左一輪，咦，牧羊少年好似有少少名氣喎，係以鼓勵旅遊為賣點，但係因為約左人喺沙田市中心食飯，諗住下次至幫趁。

到下一次，計劃由屋企出發行過去，快步走嘅話，四十分鐘之內一定完成，心諗咁幾好呀，又可以做運動又可以食嘢，點知，去到門口，黑墨墨，影都冇個，嗄，唔係執得咁快係嘛！問下喺傍邊尐凳度坐緊嘅阿姐，佢話周一休館，你唔知咩！嘻，真係唔好意思，冇乜文化，少嚟，真係唔知！咁我順口問阿姐，咁重有冇邊日休館呀？阿姐話，一個禮拜休一日夠喇，唔駛做咩！係嘅係嘅，抵鬧！

咁又到下一次，今次依然係行落去，嘩，今晚清風徐來，行左三十分鐘都唔覺熱，心情舒暢，真係萬事都順利，餐廳梗係有開喇，連位都唔駛等添，唔好以為呢個時間果個地方，會冇乜人，因為佢係唔限你進食時間，所以都有尐大學生模樣嘅人喺度傾功課，但係佢地係好靜咁傾嘅，完全冇兜巴星咁嘈！咁我搵左個位坐，隔左一陣都冇人理我嘅！

哦，原來係半自助式，即係你要自己去買嘢食，之後佢俾個牌你，就會有食物送到你面前。

唔，餐牌嘅選擇並唔多，而且尐材料好似冇乜特別，所以睇左一次又一次之後都唔知揀乜好！不過如果你鍾意食all day breakfast，佢都有得供應，飲品就幾得意，結果我揀左香蒜黑椒煙鴨胸意大利粉同朱古力沙冰，而朋友就點左鮮忌廉白菌煙三文魚意大利粉同奇青奶酪。其實呢尐材料真係間間小餐廳都係咁上下，煙鴨胸同煙三文魚都應該係現成貨，所以冇乜期望，揀呢碟都係希望個香蒜黑椒會辣辣地冇咁悶。

呢個時候我放眼四周睇下，寧靜嘅環境真係可以提升心情，面前係到頂嘅一列書櫃，書櫃最頂層擺左好多旅遊書，除左Lonely Planet亦都有閃閃書，下面就係一365個櫃筒仔，我冇行埋去開呢尐櫃筒仔，但係因為佢呢間餐廳有一個慢遞服務，係可以幫你喺一年或多年後寄番封明信片俾你嘅，呢尐櫃筒仔應該係你寄俾自己嘅第一步，之後餐廳至根據你嘅意願幫你寄出去。好浪漫呀，自己寄明信片俾自己，有一刻，我都想寄，但係我真係諗唔到同一年後嘅自己講尐乜嘢好！

食物到喇，先到的梗係飲品喇，我個沙冰唔多沙，可能係尐冰磨得太幼，好快就溶到水水地，不過個朱古力好香，好好味。而朋友嘅奇異果青色奶酪嘅味道亦好清新，那係好fresh呀！

食物登場喇，我個香蒜黑椒煙鴨胸意大利粉，上枱聞到嘅味道唔錯，而且望落去都好得下，因為唔會水liu liu咁，幾乾身。咁都要試下個味先，味道食落都幾好，黑椒味濃過蒜味，但係咁樣反而重惹味，但係鴨胸就平平無奇，水準之內咁囉。朋友嘅鮮忌廉白菌煙三文魚意大利粉都唔錯，比一般餐廳嘅同樣菜式有水準。咦，隔離枱尐甜品好似幾好樣喎，但係今日有尐飽，下次嚟先至試。

咁肯定有下次？有，埋單平均一個人$120，環境優靜，食物過得去，又營造到一個浪漫氣氛，我一定會再嚟，或者下一次我諗要寫尐乜嘢俾一年後嘅自己呢！希望佢守得住自己嘅特色，希望食客都一齊守護呢片小小嘅靜土！

為食路上，鼎泰豐

我第一次食小籠包係喺台北，重記得朋友話呢間嘢好出名，尐小籠包嘅包面限定有幾多褶，好好生意㗎！講真，我喺香港都食過下小籠包，但係印象就認真麻麻，因為都係未食落口已經穿左並漏哂尐汁出嚟，而小籠包尐肉係出名剁到好溶下，所以我並唔係好識得欣賞！但係台北嘅朋友一場招呼，咁都要去㗎！

係一間好舊嘅樓，樓下坐滿左人，我地由側邊嘅樓梯行上二樓，嘩，好在我果陣時後生，因為條樓梯都幾跣，少尐下盤功夫都會變成滑梯。終於上到二樓，講真，環境都幾噏耷下，我心諗，食隻小籠包啫，駛唔駛咁艱辛呀！

坐低，點菜，咁咪小籠包囉！朋友問我一籠夠唔夠，我話兩個人一籠？佢話，唔係，一人一籠！嗄？一人一籠？係喎，左右隔離尐人都係一人一籠咁食，有尐重疊起兩籠，乜真係咁好食咩，咁重駛食其他嘢嘅？我於是用援兵之計，話叫住一籠先喇費事攤凍哂喇！但係朋友冇我咁好氣，叫左兩籠！我唯有內心扁咀！

真係等左好耐，兩籠熱騰騰嘅小籠包終於駕到，一人面前放一籠，真係好有氣勢！我一睇，眼都大埋，十隻？點食呀？朋友完全冇留意我嘅疑惑，重好似好得意咁喺我面前同隻小籠包玩蕩韆鞦，佢重話，你睇下，咁蕩法都唔會穿㗎！哈，又係喎，我交足戲！

個小籠包其實真係幾好食，尐薑絲亦切得非常幼細，但係十隻真係太多，結果我係食哂嘅，不過就成日滯到好似一隻小籠包咁，一pat嘢咁郁都唔想郁！果次之後，我冇再食小籠包！

又過左一排，聽講喺台灣鼎鼎大名嘅一個小籠包牌子進駐香港，喺九龍城落腳，咁果時我成日落九龍城食嘢，心諗其實小籠包都幾好食嘅，唔好食咁多隻咪得囉，於是拉大隊去幫趁，但係呢次嘅經驗係好差嘅，尐包皮穿哂不特止，食物都唔係幾得，以咀尖嘅香港人嚟計，佢唔進步係冇得做嘅，果然，冇幾耐，佢就全面撤出香港。

之後，佢又番番嚟香港喎，嘩，宣傳做得好好，條人龍長到好似唔駛錢咁，我又真係企喺度等位喎，果次真係好俾面，我等左45分鐘，我諗除左我阿媽，係冇人可以令我等佢咁耐嘅，好彩，佢尐嘢又幾好食，薑絲切得又幼又細之餘，亦好疏爽大大碟咁放喺你面前，小籠包鮮嫩可口，重一籠只有六隻，真係啱哂我胃口！而最開心係俾我發現佢嘅豆沙粽！外層係糯米，煙煙韌韌，而內層是厚厚的紅豆沙，填得飽飽滿滿，埋到枱第一個接觸到嘅係佢嘅豆香，之後就係一口又一口甜淡相宜嘅紅豆沙，就算之前食到幾飽都可以食得落...半隻！

食飽飽摸住個肚，呢個時候最應該做嘅動作就係獠牙，無論你牙罅疏唔疏，有冇留定尐食物做宵夜，你都要獠，因為呢間食肆嘅牙簽，係非常之正，幼幼嘅牙縫刷在牙罅之間遊走，係一件好舒服嘅事，所以每次去到，就算我唔用，我都一定會攞走哂尐牙簽嘅，咁你唔好以為我好貪心，攞哂！佢每張枱只係放四枝，由此亦可知佢嘅牙簽係幾咁受歡迎。

咁多年都會時不時去下，不過，近日我發覺佢嘅水準有變呀，至少沙田果間係咁喇！尐薑絲細碟左好多，而且切到一岩一忽，冇左之前嘅優美，而隻豆沙粽，佢一放落枱我已經覺得佢做乜細左咁多，再攞枝互簽度度，嗄，只係比一枝牙簽長少少！我再將佢分開，以前分五舊係好見得人，而家分四舊都好似冇乜點得食！重有，最初入坐時間係一小時四十五分鐘，之後改為一小時三十分鐘，而家係一小時十五分鐘！雖然都夠用，但係個感覺唔好囉！

唉，唔通又係大地產商嘅錯！

為食路上，Te 意粉店

問你一個問題先，一間餐廳嘅老闆，點樣對待員工算係好呢？你可能會話薪高糧準喇，重有呢？包飯餐喇、唔介意我遲到早退、唔介意我間中偷懶喇，喂喂喂，好似越講越離譜喎，如果咁都得，除非你係太子喇，不過就算係，你呢個太子都唔做得好耐，因為有個你咁嘅員工，成日掛住偷雞，間餐廳都應該好快執！

其實我點解會咁問呢，因為我上個星期去左一間餐廳食飯，見到好感動嘅場面，嗱，感動唔一定係流哂眼淚果種，有所感應而牽動感情就算係㗎喇！

話說果日我出左尖沙咀iSquare果度睇戲，睇完都成兩點半，咁一定係好肚餓喇，於是四圍搵下有乜嘢好食喇，店鋪確實唔少，但係選擇唔係好多，而啱我口味嘅就更少，於是一路行呀行，咦，見到間望落去窗明几淨嘅 Te 餐廳，行埋尐睇下佢個菜牌，真係簡單過簡單，一張過，上面印左二十幾個格，清一色係意大利粉，心諗，可唔可以有其他選擇呀，正想走人，朋友話，呢間尐意粉食得過喎！係？朋友講左一尐背任景資料俾我聽，又真係似曾相識喎，咁反正未試過，一試無妨喇，而且真係肚餓喇，唔想再搵食喇！

嘻嘻，真係大口氣，唔想搵食，搵少尐你都冇得食呀，何嘉麗！

以意大利粉嚟計，我最鍾意食蒜片辣椒意粉，貪佢辣辣地好惹味，但係佢好似冇，於是叫左另一個都應該係有少少辣嘅Arrabbiata，而朋友就叫左個蜆肉意粉，我一聽佢叫呢樣就眉頭都縐哂，呢尐地方食蜆肉意粉會有乜好嘢呢，咪係尐罐頭蜆肉你！但係朋友冇理我對眼已經反到上天，堅持己見！算，我同佢講，我話嚟到見勢色唔對，就唔同你share囉，嘻，喺飲食方面，我係冇乜義氣嘅！

購買過程快到我都唔知買完，而飲品選擇亦都唔多，不過唔買飲品都唔緊要，佢地有清水供應。我都未坐定，朋友已經一手攞住一碟意粉坐喺我面前，嘩，乜咁快！朋友冇我咁好氣咁話，人地就係標榜快之嘛！嗄，我有尐驚囉，快，咁好唔好食㗎！

之後眼尾稍下果兩碟意粉，碟蕃茄意粉好似略為濕左少少，但係碟蜆肉意粉，咦，竟然唔係罐頭貨，係有殼蜆肉喎，我立即一手攞起一隻試試，唔，蜆肉新鮮香甜，蜆殼重盛左尐煮麵汁，好味！

都唔理朋友嘅白眼，即刻𢳂左半碟嚟食！另外果碟我都食左一半，除左汁多左少少之外，味道唔錯，而最正係兩碟意粉都非常之咁彈牙，唔會因為係番熱而又霖又粉一pad嘢咁！埋單$120我覺得非常合理。

不過合理嘅食物唔係我今日要講呢間餐廳嘅原因，我開始嘅時候咪問過你好老闆嘅定義嘅？話說，喺我食緊意粉嘅時候，佢有一兩個員工都坐喺隔離枱食飯，應該係午餐喇，就係喺我想埋單嘅時候，我見到個員工已經食完，不過佢重坐左喺度，吸引我嘅事情出現喇，我見到佢面前放左一本書，嘩，呢個世代，有年青人睇書真係難過中六合彩三獎，重唔止喎，佢果本係英文書，唔好話我snobbish，而家尐年青人唔似我地果個年代咁，鍾意攞本英文書扮型，佢放本英文書喺面前就真係睇㗎！

當然下晝成三點鐘，餐廳冇乜客，但係真係有老闆唔俾你做自己嘢，咁亦可能佢用緊嘅係自己食飯時間睇書，但亦有老闆唔俾你坐喺餐廳入面㗎喎，咁亦有可能係大家遷就，放飯時間如果有需要就幫下樓面。不過點都好，一個伙計可以好安靜咁食完飯睇一陣書，呢間餐廳個老闆我直覺認為唔會太衰！而我亦有理由相信，一個老闆見到一個年青人會埋頭於英文書本中，都應該係會支持嘅！