依撒意亞50:4

吾主上主賜給了我一個受教的口舌,叫我會用言語援助疲倦的人。(依50:4)

2015年1月30日 星期五

嘉嘉的為食路上,雪糕梳打

幾時第一次接觸雪糕?唔記得喎,應該好細個喇,細到唔記得。但係雪糕係一樣我從來冇試過唔鍾意食嘅嘢,而我亦都相信,冇乜人會唔鍾意食雪糕,佢地最多係怕凍、怕牙痺,或者會因為個味道唔啱所以唔食,但係就唔係唔鍾意食!我真係未見過人唔食雪糕,尤其是軟雪糕添,細個嘅時候最鍾意跟大人去睇戲,因為會有軟雪糕食,而大個左一聽見有雪糕車果個音樂響起,就一枝箭咁飛去買,有陣時去到佢又咁啱走左,都幾失落咖!反而而家喺九龍塘成日停喺上廣播道果架小巴隔離果架雪糕車,我少幫趁!

雪糕其實有好多食法,最基本就係喺雪糕之上加鹽加醋,例如香蕉船喇,咁你梗係以為我最鍾意食香蕉船,因為我可以一次過食三球雪糕,但係問心果句,除非冇其他選擇,我其實並唔係太鍾意食香蕉船,因為我覺得佢唔夠形,冇乜創意,扼食扼得嚟有尐太明顯,就咁三球雪糕加條分開左嘅香蕉再git尐朱古力漿咁,太過一心只為食,冇經過思考,冇乜氣質!

呢,反而雪糕梳打我就鍾意嘞,佢雖然只有一球雪糕,但係佢重有一枝汽水,一次過可以食齊雪糕汽水,亦都係我鍾意食雪糕梳打嘅原因。做法其實好簡單,就係將雪糕放喺個高身杯入面,送到埋檯再自己將尐汽水倒入個杯度。咁樣,雪糕同汽水會混合而成另一個形態,好得意,所以我好鍾意呀!

而且,佢好玩,因為尐汽水倒落雪糕度時,係會湧得比冇雪糕時快,一邊倒汽水一邊驚佢會倒瀉,而又真係次次都倒瀉,咁就要第一時間飛個頭埋隻杯度,以高速飲番由杯邊漏緊出嚟嘅汽水,跟住又乘機用條利lam下舊雪糕!然之後,就到𢳂雪糕喇,你要知道呢個時候,個杯係充滿左汽水嘅,而當果球雪糕喺汽水上面浮下浮下果陣,你係好難至𢳂得到尐雪糕嚟食嘅,於是每次只係食到一尐尐,但係咁𢳂下,漏下,又食下,lam 下,搞到自己忙哂,大汗疊細汗之餘,一杯雪糕梳打就咁樣食完喇,每次食完,我都會望住個高身杯依依不捨,而次次我都會喺我能力範圍內盡lam!

我最初每次都食雲尼拿雪糕溝七喜,後來有一次學人睇餐牌,見到有一款雪糕梳打叫做黑牛,咁食過嘅你一定知係乜,但係當時我係唔知嘅,蠢到以為係牛肉汁,覺得好核突,好彩我個哥哥去問人係乜野嚟嘅,至知道原來係...冇錯喇,係朱古力雪糕溝可樂呀,我當時第一個反應就係...咁點解唔叫做黑朱呢!不過,冇人採我!

唔駛多講,都知過左冇幾耐,就有一隻高身杯裝住球朱古力雪糕,另外重有一枝可樂放喺檯面。咁我又依足程序,食到身水身汗喇,但係喺食完呢杯黑牛之後,我並冇好似食白色果隻雪糕梳打咁lam盡,而係食完就算!因為我覺得黑牛冇咁好味,可能因為我鍾意飲可樂,咁樣溝左之後就失去左可樂嘅味道,而朱古力雪糕同可樂都係甜嘅,咁兩樣溝埋嚟飲,就會變得太甜喇!

不過,呢個唔太好嘅經驗並冇影響我對雪糕梳打嘅喜愛,唔知你地而家重會唔會飲雪糕梳打嘅呢!




2015年1月24日 星期六

嘉嘉的為食路上,雪條

雪條,有陣時係要嚟形容非常凍嘅天氣,例如、凍到好似條雪條咁,又或者形容尐喺冬天著短裙嘅女生,就話佢地對腳冇遮冇掩,好似條雪條咁!而我地今日講嘅雪條,就梗係食果尐雪條喇!

我諗冇乜邊個人未食過雪條,因為凍嘢就係人都鍾意食,尤其是係夏天,熱辣辣嘅時候,一枝汽水,一杯雪糕,一條雪條,係冇人會拒絕嘅!但係喺細個果陣時,零用錢唔多,而屋企兄弟姊妹又多,要一人一杯雪糕都真係幾肉赤,但係一人一條雪條就相對消費低好多喇!

記憶中我係重來都食唔哂一條雪條嘅,永遠喺我食到最滋味時,就聽到阿媽話,溶喇溶喇,就快滴到成身都係喇,咁之後阿媽就會攞左去自己食!究竟係唔係溶,係唔係滴污糟左件衫,我真係冇乜記憶,我只係記得條雪條往往就係咁食左一半都唔知有冇就冇得食!記得果時我次次都有為咁而喊,但係後來大左我就明喇,阿媽其實並唔係搶我條雪條去食,佢自己係冇買俾自己食,佢只係買俾我地食,而佢又只係喺我食到天一半地一半時至出手,咁佢其實係幫我執手尾,而唔係唔俾我食,如果佢真係唔俾我食,就買都唔買喇!不過呢尐要大個左先至明嘅!但係而家諗番轉頭都好窩心!

所以你唔好以為要俾人分左雪條食,係一個唔好嘅記憶喎,我讀書果陣,就成日同同學夾份食雪條嘞!咦,點食呀,你一啖,我一啖咁呀!咁核突!哈,梗係冇咁核突喇,有孖條咖嘛!孖條而家都重有得賣呀,佢一定係果汁雪條,而果汁雪條就從來都係雪條之中最平嘅,而佢重有另一個威勢呢,就係可以一分為二,咁一條本來已經係最平嘅雪條,再除二,咁對我地呢尐想食雪條又冇乜零用嘅學生哥嚟講,就真係正到冇朋友喇!

不過食孖條都唔係全部係美好回憶咖!我諗你同我都一樣有一個機會係可以唔駛扭已經有雪條食,但係呢個機會,又唔係好想佢出現喎!因為係要去剝牙囉!細個果陣時,成日去農甫道睇牙,而一年又總有一次甚至兩次係要剝牙嘅!咁,剝牙喎,咁大件事,梗係喊到拆天喇,而之後最乞人憎就係要咬住果舊,冇味道但係好左訂嘅綿花!每次我都想lur左佢出嚟!咁一路離開間牙科診所,阿媽就會話,嗱你咬實呀,唔好lur左佢出嚟呀,唔係止唔到血就大件事喇,呢句說話對我嚟講係冇意思嘅,因為我唔知唔止血有幾大件事,所以我係一定lur,不過阿媽係好知我心意嘅,佢跟住就會話,嗱,你咬到番屋企,我買條雪條俾你食!

嗱,呢句說話對我嚟講就有意義喇,有雪條食又唔同講法!於是我真係好乖咁忍果舊綿花,沿途留哂口水核核突突,我都唔lur番佢出嚟,咁我阿媽又永冇失信,佢真佢會買條雪條,不過係孖條,佢會一條分做兩條,另一條就係俾留喺屋企做功課嘅哥哥!而同樣,如果我哥哥去整牙,咁媽媽會揍埋我去,而如果我乖唔扭計,咁我都可以分到哥哥果半條孖條!

係呀,我地七十年代就係咁樣長大咖喇,物質唔係好充裕,但係總有得食下咁囉。分享嘅樂趣,而家係要嚟講嘅,我地果個年代就係要嚟做嘅。講多無謂,行動最實際,今日當我地一日到黑講分享,我會覺得我地當年嘅實際行動更真更自然!

嘉嘉的為食路上,記憶中的點心

飲茶真係香港人好重要嘅飲食文化。以前淨係飲早茶,後來發展到放食晏都約埋一大班同事去飲茶,而家重有埋夜茶添,重唔止,周街重有好多淨係賣點心嘅鋪頭。作為香港人,你梗係知道飲茶就唔係飲茶咁簡單,係飲茶兼食點心,而亦會隨時妹仔大過主人婆,叫到一檯點心,反而唔係咁多人願意出五六十蚊去沖壺靚少少嘅茶。

不過而家尐點心真係大不如前呀!乜野都塞隻蝦入去,蝦腸、蝦餃當然有蝦喇,咁燒賣有蝦都唔過份,但係唔駛有三隻蝦咁誇張係嘛!咁搞法,燒賣隨時發展成為只係黃色皮嘅蝦餃咋!你唔好笑我作大呀,我問你,你近排食嘅蝦餃,有幾多隻係有筍咖!雖然,燒賣嘅餡係有冬菇粒,但係照咁嘅發展速度,蝦餃燒賣,應該會慢慢合併成為一款點心而唔係兩款囉!我冇誇張呀,點心真係不斷咁變化咖!

唔駛講第二樣,就講下灌湯餃。而家你見到尐灌湯餃係一個黃色皮嘅,比蝦餃大一倍嘅餃,內容都不外乎係尐冬菇瘦肉蝦撈埋一堆嘅物體,另外有尐會加入一兩條魚翅類物體,然後就成隻野擺喺一個有湯嘅碗入面。個餡同外型都唔同佢計較住,講左個造型先。嗱,講到明係灌湯喇嘛,咁就梗係個餃入面灌滿左湯,而唔係一隻大尐嘅餃擺喺湯入面至稱得上做灌湯餃喇,不過除左老式嘅茶樓,我真係見唔番細個時候食嘅灌湯餃喇!你地知就話我聽,等我去懷舊一下。

灌湯餃以前係點樣嘅?以前食灌湯餃賣果個又戰戰兢兢,食果個又戰戰兢兢咖!因為佢真係一隻漲卜卜、注滿湯嘅餃,我重記得佢個點心籠比蝦餃燒賣果尐大,另外一個籠只係得一隻,咁呢隻咁矜貴嘅灌湯餃喺個籠入面係有寶座嘅,佢係坐喺一張銀色有窿嘅架上面,架嘅背面有個小掛勾,用泥方便我地叻起個灌湯餃嘅!

咁點解賣果個會戰戰兢兢呢?因為如果佢喺果籠灌湯餃放到我檯面之前,尐湯就流左出泥,咁呢籠灌湯餃就報銷咖喇!咁雖然唔關佢事,但係佢都會好凳事頭唔抵,因為一穿左,入面尐湯就會流哂出泥,係完全冇辦法挽救嘅!

咁當佢將籠灌湯餃安全咁放到我檯面,就開始到我戰戰兢兢囉喎,咁,我果陣時咁細,呢個將隻灌湯餃轉落隻碗度嘅動作,係唔到我做嘅,但係我都知道未放到入碗前,穿左嘅後果,所以我都好緊張。

咁咁隆重嘅儀式就一定係由我爸爸做,咁雖然籠灌湯餃係我地叫,但係其實成間茶樓尐食客都會望住你,當爸爸快手快腳咁成功將隻灌湯餃移入碗仔,咁大家就好似冇事發生過咁繼續睇報紙、歎茶,但係如果一個唔好彩穿左,咁成間茶樓尐人就會同你一齊驚叫,一齊凳你唔抵喇!好熱鬧咖!

係呀,果個年代,乜野都簡單尐,穿左隻灌湯餃,係我地穿左喎,都可以俾人講成餐茶咖!但係呢尐亦都係而家呢個年代所缺少嘅溫情。




2015年1月10日 星期六

嘉嘉的為食路上,一盅兩件

有冇聽過一盅兩件呀?如果有,你一定同我咁,有番上下...年紀!計起上泥,我上茶樓飲茶嘅資歷,呀,唔係,係上茶居飲茶嘅資歷至啱,真係有五十年,因為我好細個,即係未識行嘅時候,已經跟阿爺去飲茶,一路飲到而家!

當然,連行都未識行嘅時候,我去飲茶食過尐乜,我係完全唔記得嘅,只係聽阿媽講,話我坐喺張高凳上面,都係咦咦吖吖,見有人喺我身邊賣點心就跳到離哂凳,總之乜都想食,但係最後都只係得個叉燒包!呢尐關於我自己嘅歷史,既然係口傳,我就只會半信半疑,因為時日已遠,我就當然係冇記憶,我相信我阿媽都係記尐唔記尐!

但係到我大左少少,對茶居我就真係好有記憶。不過記得最清楚係喺紅磡近住黃埔果間雲慶樓,果陣時阿爸有時放早,咁阿媽就會帶我去果度同阿爸一齊飲茶,呢個經驗係我獨享嘅,因為哥哥姐姐都番哂學。咁我重記得果間茶樓有個哥哥叫做阿新,最鍾意同我阿爸傾偈。記憶中,佢著一件白色唐裝上衣,穿一條黑色闊褲,對腳著住嘅係好似黃飛鴻著果尐黑布鞋。佢一日揸住個水煲四圍沖茶,沖到咁上下,就去個好大嘅熱水爐果度斟水,之後又再幫人沖茶。

通常走完兩轉,佢就會放個煲喺我地檯面果個辣燶左個位度,係呀,我地次次都係坐果張檯咖。咁佢就開始同我阿爸傾偈,即係而家嘅吹水。由於佢不停講嘢,所以我特別留意佢個口,佢係有一棚金牙嘅!呀,佢地果陣時重有個好型嘅外號,叫做茶博士!點解?我真係唔知呀,但係你咁叫佢,佢會好開心,佢會笑到E起棚金牙俾你睇之外,亦會幫我地入廚房攞尐啱啱蒸好嘅點心出泥俾我地食,有時,重會叫個腸粉師傅幫我地放多尐料入條腸粉度至卷,所以,我對而家果尐成條腸粉加埋得一片叉燒嘅叉燒腸係好有意見咖!

你或者會話咁咪幫老闆倒米!我又唔係咁諗呀,我諗呢尐係人情味囉,一個禮拜見幾日,好朋友都冇見咁多喇!

關於舊式茶樓,另一樣印象深刻嘅就係拖地。果陣時果間茶樓係階磚地,重係令面嘅,而茶樓嘅地下係好多垃圾嘅,我最開心就係見到阿嬸掃地,掃地有乜好嘢好睇呢!因為佢一掃就有好多垃圾俾佢掃哂出泥?唔係,因為阿嬸掃完地就係拖地嘅時候,果時成間茶樓都知,如果我阿爸阿媽喺拖地嘅時候埋單,我係會嘈到拆天嘅!

咁拖地又有乜好睇呢!嗱,我正話都講過,果時尐係階磚地,而間茶樓個地下又污糟,咁個地板就係好多漬嘅,但係當阿嬸將個吸滿左漂白水開嘅拖地水嘅地拖,拖喺地上面,果尐漬就會一拖即除,成個地下就會變得白雪雪,而我因為係坐高凳,所以當其他人喺阿嬸一邊大叫縮腳,個地拖已經同時殺到,一係就俾佢枝地拖撞親,一係就縮得腳泥又執唔切手上嘅報紙而跌到一地嘢好狼狽嘅時候,我就可以安然高坐,欣賞呢個熱鬧而有趣嘅場面,因為故事係未完咖。

啱啱拖完嘅地係好滑嘅,尐人要好小心至可以唔會跣親,咁呢個時候你就會見到所有人都會細細步細細步咁行,真係好似做戲果尐小偷咁,而我地嘅老友阿新就會跣住跣住咁行,佢唔會跌咖,好型咖!而一般泥講,拖完地,阿爸係唔會埋單住,佢會等個地下乾咁尐至起身,怕跣親我同阿媽呀嘛,咁我咪可以喺茶樓坐耐尐囉!


2015年1月1日 星期四

嘉嘉的為食路上,聖誕過後

聖誕過後,如果你屋企曾經攞出泥招呼過朋友,就一定會有好多剩餘物資。剩餘物資排行榜第一位一定係火雞!火雞最神奇嘅地方在於我冇聽過人鍾意食火雞,但係聖誕party如果冇番隻火雞坐陣又好似唔似樣,於是唔理大細,係人都訂一隻,有朋友以為自己將隻火雞分成兩份,自己屋企聖誕party食一邊,另一邊就叻去朋友個Boxing Day Party果度食,朋友都覺得呢個安排可以接受,聖誕節呀嘛,點都要有尐類似火雞物體嘅,一人一件,點都食得哂喇!但係,結果同想象有好大出入,一人並唔會食一件,去Christmas Party 尐人對住火雞唔知點解會咁慳,佢地係喺冇予先夾定嘅情形之下,幾個人分一件泥食!

咁一隻火雞,就算你分開兩個parties泥用,都係會剩番四份三嘅!咁,火雞最平果隻都要五百蚊,掉左就可惜尐,不過之後就要享受火雞三文治喇、火雞飛碟喇、火雞意粉喇、栗子炆火雞喇、金針雲耳火雞喇,呢個火雞餐單可以喺菜牌上出現成三個星期咁長,因為次次變種之後,食剩喺碟上嘅,依然只有火雞!於是煮完又煮、煮完又煮,煮到連個家務助理都要洗橫手,一係咋啼跌左落地,一係煮到佢癡哂底,爖到唔食得為止,咁個聖誕節就算過完嘞!

剩餘物資排行榜第二位就係沙律!唔知幾時開始所有party都要有一大盤沙律,我懷疑係三十年前,當大家重好鍾意跟旅行團去菲律賓嘅時候所種下嘅因!有屋企人去過菲律賓嘅你,屋企點都有番一套木制沙律盤啩!咁果陣時要騷俾人睇自己去過菲律賓,當年都算係一回事泥咖,就梗係要整沙律,然後搬套法寶出泥,咁至自然,於是一整就整左三十年,到今日已經冇乜幾多家人重keep住個菲律賓木沙律盤,但係仍然整得興致勃勃!

聖誕節喎,整沙律最好喇,又可以一早整定,又多蔬果,健康夾人人鍾意食!咪住,第一,唔一定健康,除左果尐沙律醬係隱形殺手之外,沙律中必備嘅薯仔同紅蘿蔔,都唔係好應該食太多,會轉化成澱粉質,肥,咪就係靠佢之嘛!而且唔係係人都鍾意食沙律,我就唔鍾意嘞!但係聖誕節係一定有一盤沙律,重係一大盆,大到可以同個BB仔沖涼果隻!咁聖誕之後,搞party嘅屋企要食沙律就係常識嘞,不過好彩,沙律唔擺得耐,所以三兩餐如果食唔哂係點都要掉!

而對於我呢類獨居老人泥講,party完之後,要處理嘅就係用剩嘅豉油豆粉糖、薑蔥蒜、一大煲嘅咖哩汁,同一屋食物!雖然話呢尐食物係封好嘅,唔打開唔會變壞,但係成十包八包嘅薯片、一樽二樽嘅果仁、一盒二盒朱古力,party前一定要買夠甚至買突,請朋友泥自己屋企,冇靚嘢食都要夠嘢食呀,但係party之後,我一個人點食,而且呢尐嘢好睇唔好食,而家就更加唔敢食添,容乜易食到沙聲開唔到工,冇收入咪冇飯開!

所以每一年聖誕節前都好興致勃勃咁搞party,但係越接近正日就越後悔,但係又唔可以取消,不過好彩,近年多左食肆喺聖誕節做到會,亦多左好地方賣魚生壽司,咁叫番一兩盆就點都夠食,而魚生重有一個好處就係完全唔放得耐,一係就地正法,一係就要掉,至少唔駛令屋主好似火雞咁,食足一個月咁傷呀!