沖繩2015，琉球之牛攻略

何物琉球之牛竟然要出攻略，係呀因為其實成個沖繩尐嘢都係幾好食，但係亦冇乜嘢係特別好食，所以難得有一間算係水準之作，就一定要介紹番。呢間本格炭火燒肉店，喺恩納村，如果你唔會去西南岸享受陽光與海灘，咁你就無謂去嘞，因為由那覇開車入去都要成50幾公里，一來一回已經三、四小時，但係如果你會住番一兩晚渡假村，咁呢間鋪頭，就可算係沖繩最佳選擇。

一早已經收到風，知佢常滿，於是就托朋友用佢果張credit card嘅貴賓服務幫我地訂咗兩晚。兩晚？你話。係呀，係兩晚呀，因為既然知道成個沖繩最好食係佢，咁做乜要食尐冇咁好嘅嘢唧！朋友回覆話只可以訂5點半前，之後就全部要現場輪候。唉，我只係希望佢呢張卡一撻出嚟會有人情講下啫，多謝朋友幫忙之餘，我心諗，好，咁有性格係嘛，一於全力攻佔佢。

第一晚5點半去到，即刻有得入座，門外亦唔多見有人，心諗，呢間嘢係咪名大於實呀！入到門口佢叫我將對鞋放入locker，然後就入座。入到去一睇，枱數並唔多，我冇刻意去數，估計只有十二張枱左右，大部份都係四人卡位，但係中間有四張枱係用竹簾隔開，一拉起「堂」簾就可以變成八人座位，非常方便。

坐低就奉上放滿燒到紅哂嘅炭一大抽，好磬！之後就送上毛巾清水，然後就係餐牌，係中文版添。氣氛好優悠，又係例牌叫番杯啤酒先，之後再慢慢睇下個餐牌，見到有尐有個紅手指公印，即係推薦品喇，但係睇嚟睇去都唔知點取捨，因為雖然朋友推薦呢間，但係就只係話要訂位，其他乜都冇講。

咁我見反正明晚都會再嚟，叫個套餐睇下點，於是我地叫咗芭蕉套餐，即係有上等牛五花肉同上等牛里肌肉，另外叫左特選牛排套餐，即係肋眼牛排。

啤酒唔駛再介紹喇，又係Orion。

嘩，套餐原來重有好多嘢食，包括白飯、麵豉湯、韓式涼菜和沙律。主角到喇，厚切的牛五花肉非常惹味，一層油一層肉，咬落層次分明，但係又似乎分唔清邊層係油邊層係肉。到肋眼排，我當正佢一大件肉眼排咁燒，先燒四面再燒前後，咁樣就可以鎖住尐肉汁，然後燒到剛剛熟，就即刻夾起嚟食，唔，入口溶化，回味尤甘。

好味，兩個套餐連啤酒，埋單至係一萬日元，食得過。肯定明晚再來，但係我地明日要去遠遊，心諗，佢地見我地今日幫趁，應該可以俾我地改時間啩，點知都係打咩！

第二日，我地辛水辛汗咁趕到去，都係遲左到，雖然只係遲左半小時，但係都要等一個鐘，唔係等一分鐘喎！好彩，我地住果間酒店就喺附近，咁重好，可以沖個涼，換過件衫舒舒服服咁食。我見其他香港人就好困擾，聽講有兩夫婦嘅酒店係一個小時車程至到，而另一家則扶老攜幼，個細路唔識性扭計就唔在講，老人家要等咁耐都好辛苦！

一小時後，再出現，都重要等一陣呀！今次我地精喇，唔叫套餐，叫左一份牛五花肉、一份肋眼牛排同一份豆腐乾沙律同埋一份牛舌。

肋眼排保持水準，可惜今日碟牛五花肉係薄切，第一片唔覺意燒燶左，之後真係要兩面輪流燒再加上金晴火眼咁岌住佢至冇再浪費食物，但係就冇左果份閑情囉，好彩，份牛舌補番數，嘩，真係好食到冇朋友，你見佢切得唔厚嘅，但係𡁻落去真係質感十足，又爽又軟，真係唔知點形容好！

其實佢尐食物就只係料靚，唔知點解其他店做唔到，搞到兩邊佈滿食店嘅一條街，得佢一間最好生意！食完之後，再喺附近無拘無束咁行下，一來消化下，二來享受下呢度嘅小村落氣氛，辛苦搵嚟自在食，咁努力賺錢咪就係咁之嘛！

沖繩2015，沖繩的陽光與海灘

一提起沖繩，想到的除了是離核電廠爆炸點最遠的一個日本小島外，就是陽光與海灘，當然，還有苦瓜。但這一次，我卻沒有甚麼機會吃苦瓜，只是在早餐的沙律蝦架上見過苦瓜，並隨便拿了一條來吃，苦苦甘甘的，也沒有特別研究它是不是好味過人。但沖繩的陽光海灘，卻是我一心想見識的，所以你會見我一去到沖繩就立即露兩手，即是露出一對肥手臂也！一來這裡天氣真熱，能露出手臂人也覺得清涼多，另外就是可以替我那分段手臂劃一顏色，畢竟，一段棕一段白的，很難看，而棕又會令手臂看起來纖細些！

而且這裡的太陽是那麼的熱情而溫柔，你真的會在不知不覺間被它弄得面紅耳赤，可惜只是表面的顏色而不涉感情。脾氣是有點難以捉摸，前一刻明明開朗可人，下一秒卻又大發雷霆，還好這也是氣象變化而不近人情。

我們在泡瀨吃過午飯，就驅車往北走，第一站，不，並不是甚麼海灘名勝，而是剛開幕不久的Aeon Mall Rycom，這個被譽為日本是大的商場，有說行日半也不會厭，我又怎可不去一看。先在車上的GPS定位，轉眼已到，很大，我指那個停車場，也是免費的。就算你以為自己錯過了停車場入口，也不用怕，因為它其實有很多個入口的，繞住個Mall轉就一定有入口。

入到去，一心想大開眼界，卻有點失望，大是大了，真的很大！空間比我們香港的商場多很多很多，但店鋪與我們香港的商場的類形差不多，走呀走的，如果不是四周的空間，和遍尋不獲的拖篋，我真以為自己去了新城市廣場。

當然地下那個大魚缸是很宏偉的，僅此而已！真不知道那個說可以在這裡行日半的，可以如果消磨36小時！既然如此，不如早點去酒店check in，好好歎下間酒店的服務。

又開了個多小時的車，終於到達望位於恩納村的酒店，住客很多都是日本人，也有香港來的，但比例不多，泊好車，這裡要收500日元一晚停泊費，我覺得有點多餘，不是錢的問題，光是處理這個程序的行政費也不止500日元喇！

上房了。酒店與沙灘相連，從房間望出去就是海灘，酒店還體貼地提供了人字拖。安頓過後就攤在露台，看著海灘上的人們在嬉水，也有人在玩水上活動，見有一個人在玩那種可以在水上企到離開水面的遊戲，一次失敗，再試又失敗，每見他有少許進步又替他打氣，見他可以略為企起，又暗裡替他叫好，到他失手跌番落水又會唉呀一些叫出來，其實我都唔識佢，佢成功失敗又關我乜事，但人在假期中，凳人開心也是樂趣。

是時候去吃飯了，book了琉球之牛，滿有祈待的，食評留意明天晨光第一線8點20分播出的嘉嘉為食路上，又或看明天的甫士喇。

吃飯的地方與我住的酒店很近，飯後回到酒店就踩落沙灘，也許都是家庭住客，晚上的沙灘非常靜寂，微涼的風吹來一陣海邊獨有的清新，很舒服！雖然沙粒有點粗，貝殼碎有點梗腳，但當細數上一次這樣無憂無慮的在沙灘上無聊的走，已是幾十年的事時，就會更珍惜這難得的機會，要好好感受默默記住。

無聊也是一種幸福！

沖繩2015，租車攻略、前往渡假區

第三天了，今天我們會去渡假區，所以訂了車，開始自駕遊。要去沖繩中部或北部的渡假區並不一定要自己開車，那覇也有穿梭巴士來往，但一個小時只有一班，而車程也很遠，當然你也可以乘公共車到渡假區酒店，再轉車在附近遊玩，但就是不太方便，所以如果你想一家大細，扶老攜幼的去渡假區這邊，我建議你參加遊行團。

回說我的自駕遊。我早在香港已在網上訂了車，日本機構真的很信任客人，因為你只需要訂，即是通知對方你想要的車型、租車的時間日期及在那裡取車已經成事，並不需要先以信用卡過數的。雖然很多網上資料都說如果不是一落機就去機場附近的車場取車，你就要住入某間酒店，因為酒店傍邊就是那間著名的出租車公司OTS，其實你是可以要求OTS去酒店接你的。

我們約了OTS在早上九點半接我們去取車，派來的竟是一部的士。在日本坐的士不容易呀，因為貴，所以非常高興，覺得賺咗！還以為的士會車我們到附近的酒店取車，原來不是，是去到泊漁港！咦，這個泊漁港與昨天提及的泊Iyumachi有沒有關係？真聰明，是有的，如果你會去泊Iyumachi食魚生，又不想好似我咁行到身水身汗，就可以在訂車時，指定在泊漁港的分點攞車，咁你攞完車之後自己開車過去，真係三分鐘唔駛！我就蠢咗！

講番攞車先。的士司機車我地去到泊漁港，同我地攞埋行李，帶我地去到OTS嘅鋪頭至走人，當然我地係唔駛俾錢嘅。入到去攞個號碼牌就坐低等，不過都唔駛等一分鐘就已經到我地。我離遠坐低見朋友同個服務員不停對話，咦，我朋友唔識日文嘅喎，唔通... 果然，服務員係講普通話嘅，辦完簡單嘅手續同埋俾咗現金（也可以碌卡）之後，就上去傍邊果幢停車場攞車。

佢一早講明幾樓。上到去就見你架車等緊你。個只係識少少英文嘅日本服務員講解得非常詳細，亦都好有耐性逐樣俾你試，見你好似唔太肯定咁，佢又會再同你做一次。其實架車係最普通嘅日本車，有過三幾年開車經驗嘅人，應該實識揸。而個GPS亦都好簡單，入電話號碼或者地圖碼都可以搵到你想去嘅目的地。語言方面有日文、英文同普通話。個哥哥幫我地揀咗普通話版。

set好目的地就開車喇。咁如果我地想去泊Iyumachi點呀，你問。哦，咪就係打泊iYumachi個mapcode囉！那覇好多地圖都印埋主要遊客活動點嘅Mapcode，好方便。如果唔係，出發前喺網上都搵到。

我地嘅第一個目的地係泡瀨漁港。去到至知，真係一個唔算大嘅地方，泊車嘅地方好多，都係免費嘅。入到去，唔駛諗，淨係食一樣嘢，就係海膽焗龍蝦。

以為得一款，點知都有唔同套餐，終於我地叫咗一款連一份海膽同一份淨海膽焗龍蝦。但係淨海膽焗龍蝦都有兩個價錢，一款貴千幾日元，係碗湯唔同，我地叫咗，發現碗湯係大碗尐、有尐香菜同多幾舊魚，否則細碗魚湯重好飲。

其實佢都有魚生賣，不過我地遲去，所以賣哂！

海膽焗龍蝦真係好食，而且唔知點解會咁多肉，喺香港食同樣大細嘅龍蝦真係冇佢咁多肉，所以真係好飽。果份海膽唔算大隻，但係勝在鮮甜。埋單都成萬日元。嚟咗沖繩唔經唔覺食咗三餐海鮮，係一間比一間好，咁如果你時間趕急，你知點揀喇！

沖繩2015，首里城與泊Iyumachi、海鹽雪糕

今天出發去首里城，你當然可以開車去，但係我既然買左張24小時單軌通行證，就梗係坐單軌喇。半個小時唔駛就去到首里站，跟住在風和日麗的天氣下，我行咗20分鐘，就到首里城，其實呢個城係好細嘅，冇得同故宮果尐比，比京都二條城重細，不過保養得幾好，入場前會俾個膠袋你代住自己對鞋，出門口就要還番個袋俾佢，會循環再用。進入主要建築物，沿住指示行，又係唔駛半小時行完。記念品店亦都冇乜嘢可以引起我嘅購買慾，咁就又行番番去單軌車站。

講真，我覺得去首里呢個地方，最正嘅係之後行去同之後離開果兩段行程，陽光普照，微風吹來，都不知幾舒服。

呀，提下果尐開車去嘅人呀，你喺轉上首里之前，係會見到好幾個停車場，個個都話15分鐘就行到，本來行下無壞，但係如果有老人家，果段路都幾甘。你地唔駛急㗎，當你轉上去首里果條路，係有個停車場嘅，喺首里門口，好方便㗎！

好嘞，講番我自己。去完首里我地就坐單軌去美榮橋站，然後行去泊Iyumachi食魚生。講真，呢段路有尐長，但係中間經過泊瀨碼頭，可以喺果度行下，輕鬆下，又係一件賞心樂事。咁啱果日係星期日，重有一大片地安排左尐民娛活動，我又行去八下，都幾好玩。

終於行到泊Iyumachi激鮮漁港喇，規模比牧志公設市場大，但係因為係星期日，所以好多鋪頭都冇開，但係亦因為咁，我地多出左幾張枱，其實係放尐魚生同壽司喺人地個檔口果度食，因為呢度其實都不過係一個魚市場，只係一個二個檔口，並冇食肆。

唔知係因為星期日，定係時間關係，冇乜日本人—撞口撞面都係香港人，當然今日開檔嘅亦擺明係做遊客生意。呢度尐魚生多選擇尐，壽司都係，重有鮑魚仔刺身添，重有煮熟左嘅魷魚鬚。於是我又快手快腳掃幾盤又坐低食喇。

呢度尐魚生新鮮尐，所以如果你只有時間去一間魚市場，我提議你嚟泊Iyumachi。

之後我又坐番單軌去國際通。今次由牧志站開始行，因為尋日我係由中間行嘅。今日係假期，所以成個下午變左做行人專用區，不過中間嘅小街係有車行嘅，但係有人睇住，所以都好安全。不過正如我先前講過，條國際通來來去去都係果類店鋪，行左十份一已經等如行完。不過，我今次嚟係有任務嘅，就係試下佢個鹽味雪糕。

買咗杯軟雪糕，就咁坐喺門口食。雪糕本身已經咸咸地，其實呢種又咸又甜嘅處理手法，泰國人是高手，佢尐椰汁加小小鹽，真係好似關淑儀話齋：令人動心。講番呢杯鹽雪糕先。又係秉承咗沖繩嘅淡淡然嘅氣氛，即係點呢？就係你知道佢有鹽味，但係又未至於會特別吸引囉！或者你話，人地就係淡淡地俾你去加面前尐鹽呀！我知，亦都試過，不過幾款都唔係太吸引，唯一綠茶味嘅鹽比較特別。死喇，咁食法，唔知會唔會超標添！

之後又係行下行下，就行咗去果間好出名嘅沖繩咖啡店飲咗杯咖啡，幾骨子嘅環境，寧靜而舒服，左右都係本地年青人，唔知係唔係偽文青呢，不過點都好，佢地都係渴慕文化嘅人，呢度地方迫夾，三兩個靜靜地還可以，你一行六人扶老攜幼就唔好嚟喇！

之後就去食燒肉。冇跟旅遊書介紹，係自己行下行下，見有尐日本人都走入去，於是我又走入去。入到去坐低，先至知道大件事，佢所以待應真係小小英文都唔識，個餐牌只有少量食物係有英文，算喇，既來之則安之，是但督幾款嚟食喇，哈，又俾我地博到，重幾好食添，不過個牛舌就有尐失望，希望過幾日會食到好嘢喇！

沖繩 2015，在那覇自由食及電話卡的安裝

吃完了第一牧志公設市場的幾份魚生，其實並唔飽的。但這也是我計劃中的一部份，因為我想睇下那覇有冇得掃街。

行番出國際通，左手面就係喺大阪要排大隊至買到嘅Pablo芝士蛋糕店，呢度重有地道紅芋味芝士蛋糕添，但係冇乜人幫趁，搞到我都唔記得左影相。再過一個鋪就係激安之殿堂，又係靜英英！我繼續向縣廳前站的方向走，見有間Blue Seal，嘩，是沖繩名店呀，相等於曼谷的Swensen，咁要試下喇！我要左一杯地道的芋頭味，試啖先！清清地，甜甜地，冇乜芋頭味又冇乜奶味，全杯軟雪糕最好食係個筒，夠脆！呢杯嘢對我呢次行程有好大影響，因為佢令我對沖繩嘅雪糕冇信心，沿途冇再食，冇咁肥！

之後又行下行下，經過一尐旅遊書推介嘅店鋪，睇落唔多開胃，望入去又冇乜人，唯有繼續前行，竟然行到番酒店附近。見四周冇乜燈火，知道已過了遊客區，但係仍然肚餓，於是見有小小燈光嘅就行埋去，大部份都係一尐居酒屋，呢尐反而坐滿人。

呢條樓梯都幾大整蠱，飲大左你估唔會碌落嚟咩！

又再行呀行，到旭橋站附近見有一間無名小店，要上二樓的，心想應該會有位，一入門才知其盛況，熱鬧到不得了，剛有人埋單我們才有位。坐下二話不說，先來一杯沖繩名物Orion啤酒，之後就點菜，全是日文真係估佢唔到，幸好有畫有幾個公仔，唯有看圖識食！

點了餃子與聲稱自家制的香腸。

啤酒先到，又是淡淡的味道。忽然聞到好香的味道，原來是pizza，而他們這裡的pizza是夾餅式的，不單聞起來香，見左右各枱都有叫，就知自己走寶，不過我們叫的餃子與肉腸也不失禮，肉腸尤其惹味，雖然肥左少少！很輕鬆的吃了一餐之餘，亦窺探了沖繩人的生活一小角，我見好幾枱都是一班女生跟一個男生一起食飯飲酒。

悠閑的步回酒店，但旋即又要面對煩惱的事，我的電話卡！返到酒店我再把說明書拿出來，按中文指示照做，仍是不得要領，翻去後面看英文版，嘿，原來是翻譯惹的禍！翻譯把查詢資料的link寫成登記的link，英文版就寫得清楚！豈有此理，害我擔心了一個下午！

步驟簡單：開Safari，去www.freemb.cn/1html，會見到藍色Download and install即下載鍵，按下，就會出現以下這個畫面，你唔駛理佢個"not signed"，其實已經搞掂。（iPhone才有這個麻煩，Android機就可以直接set APN）

連手機也搞掂了，今晚可以好好瞓。

搞掂張電話卡後，沖繩忽然間美麗起來！

沖繩2015，第一牧志公設市場

我住的酒店就在單軌站傍邊，非常方便。安頓好之後，立即出發覓食，既然在那霸，第一站就一定是第一牧志公設市場（牧志），但我買的電話卡出了一點狀況，於是我在美榮橋站下車，沿沖映通向國際通方向走，在接近國際通的交界，有一間Docomo，我先要去那裡開電話卡。

我上次在大阪的電話卡也出了一點問題，梅田內Big Camera的Docomo員工很友善，一會兒就幫我搞掂，今次我在機場搞了一輪也上不了4G，於是又去請他們幫手。不過，這裡的員工很堅持，說我的電話卡並不是由Docomo發出，所以不能幫我做任何事，但卡上明明印著Docomo，如果說與Docomo無關而Docomo又唔去告佢用佢個名，我諗唔到點解與Docomo無關！解釋了一輪仍然不得要領，惟有走人！食完飯至算。

牧志並不難搵，在市場本通內，即沖映通與國際通交接的路口對面，入到市場本通再直行一小段路就見到指示。由於我搭乘的是下午航班，所以抵達牧志已是傍晚，牧志內很多店鋪都已收市，在內走了一圈，發現來去都是那幾款，於是搵了一間日本人也在買的小檔，就隨手揀了幾款自己喜歡的魚生。

魚生很多都標明價錢，大都是1000日元。但我見有一大塊Fatty Tuna幾靚，佢望一望我用力點頭，意思是問我真係要？我於是回以一個更大力的點頭，表示真係要，一磅之下，才不過4000日元，決定去馬。這個價錢，在香港一定食唔到。不過，淨係睇樣係唔夠嘅，一定要食落口至知。另外我也買了一盒海膽，一盒帶子及一盒赤具。埋單7000日元。

之後店主也問我要不要買海鮮上樓上煮。我說不用了。因為我在抵達之前已決定了只吃魚生。一來，處理熱海鮮的方法，是很講究的，我在網上見過這裡煮出來的食物的照片，都不見得食物處理得有水準，二來，我很怕環境嘈雜地吃魚生。

買了食物就到小檔後面搵位坐。只有幾張凳三張檯，但勝在乾淨。

立即開餐！帶子很鮮、很甜，赤貝夠爽脆，而海膽，雖然細隻左尐，但係都好鮮美，冇買錯。Fatty Tuna終於處理好喇，嘩，片埋都有好多件下，處理好之後重靚仔，等唔切喇，起筷！好肥美，真係想要埋另外果大塊。

呢度尐食物唔係太高檔，但勝在平同埋新鮮，如果話佢有尐乜嘢唔好，就係冇嘢飲！你話如果有杯熱茶就真係perfect喇。食得滿意之後，走上樓上八下個熟食部份先。同網上見到嘅一樣，好嘈好迫，完全冇飲食樂趣。我真係寧願坐樓下，清清靜靜，咁先至嗒到件魚生嘅鮮味吖嘛！

呀，另一個要注意嘅就係唔好俾尐檔主，尤其是果尐講普通話嘅員工影響，佢地會向你介紹尐當地特產，但係當地特產而又唔能夠沖出當地，就一定係勁極有限。我見坐喺我隔離果對男女，對住隻片成一片片嘅螺狀物體，男嘅話都冇味嘅，女嘅話，係咁味。男嘅話，乜你試過咩，女嘅話出嚟玩乜都要試下，男嘅話咁點解你話係咁味！之後黑面，收聲！

出嚟玩，係乜都可以試下，但係明知搵自己笨嘅都試，就真係...（你自己填喇）

沖繩2015，那覇交通篇

沒想過會去沖繩！終於也去了沖繩。當然是自由行！除非扶老攜幼的一家人去，不然一定是自由行了。

才兩個多小時的航程，很快已到達沖繩國際機場。這個國際機場很小，當然沖繩的目標客人不是外國人而是本國人，所以她的國內線機場相對是體面得多。你可能會問，我怎麼知道，難道我走去八人地個場？

不是八，我邊有咁得閑，是必經的，因為我是自由行，要去坐單軌出城。單軌車站與國內線機場是相連的，從這個安排你可想而知國內客重要還是國外客。

我們這些國外客，在出禁區之後，就要向右邊一直走，走到盡頭的門才出去，這時你會見到一片大空地，是旅行車停泊之用。你要繼續向前走，這段路是露天的，如果下雨的話，都幾甘，不過沖繩多的是太陽，下雨的日子不多，不過都讓我遇上，幸好不在機場。

水牌上寫明二樓往單軌站

到得了國內線機場，就乘升降機上二樓，之後跟著指示走，很快就抵達單軌車站。如果你會在那霸留一兩天的話，我建議你買Day Pass，它最好的地方是平，才700日元，兩程半已可以維皮。另一個好處是以24小時計算，通常留兩天買1日的通行證，留三天買兩天48小時的最化算。我買了一張24小時的，到最後埋單賺了千多日元，用它來買首里城入場券，還有八折！

蓋上首里城的小紅印，表示已用了折扣優惠。

作為遊客，如果大家在那霸地區活動的話，我大力推薦你們用單軌車，因為那覇是一個很小的區域，我知道有人在抵達機場之後就去租車，之後把車開到酒店後就一直泊在那裡，因為那覇可以行走的地方不多，那條國際通比花園街還要短，而裡面的商店種類也很重覆，你開車去逛故然傻瓜，你租一部車而不用則更蠢！租一部車連保險雜項一天也要成萬日元，這樣租嚟泊實在不化算，何況某些酒店還要收泊車錢，雖然只是象徵式，也是不化算。當然入閘時也不能太大鄉里，它不是我們慣用的插咭，是用嘟嘟碼的。

如果個blog read唔到呢條片，請搵番9月14號 Call Me GaGa Facebook

你可能說，我要開車去那覇附近的名勝呀！你要去首里城？單軌就有一個首里站，下車之後可以轉車上首里，而我由單軌站行過去也不過15分鐘。雖然陽光太普照，清風徐來，卻也很開朗自在。

D陽光真係曬得好疏爽

你要去第一牧志公設市場，就有一個牧志站在附近，這裡的海產真的便宜。

不過吃魚生的話，我又覺得泊Iyumachi魚市場的更好！如果由單軌站美榮橋走過去是有點遠，但在風和日麗的天氣下走走，也是一件賞心樂事。不過如果你已租車，又有另一個更好的安排，遲些再講。

為食路上，金壘餐廳

我最鼓勵人食遠飯，嗨，聽緊收音機嘅朋友唔好誤會，我呢個遠，係遠近個遠，唔係軟硬個軟！我唔係鼓勵人，尤其係男士食軟飯，我係鼓勵大家去遠尐嘅地方食飯。

食遠飯有咩好呢？首先，你會去一個唔太熟悉嘅地方，於是你要事先搵下資料，例如點去喇，例如果頭附近除左食重有尐乜嘢行或者乜嘢玩喇。咁如果你係一家人，喺呢個過程中，就可以藉此增進家人嘅關係，咁周未周日，就唔駛淨係行商場咁沈悶喇！咁，行商場都唔係冇好處，就係唔駛諗，去到實有嘢食，而香港而家嘅小朋友亦都習慣左假日活動只有行商場，但係佢係你個仔嚟㗎，香港係你長大嘅地方，你有責任向你嘅下一代介紹下香港呀！

唔，長氣左添。我細個嘅時候已經好鍾意食遠飯嘅，尤其是去元朗，因為我個姑姐喺元朗教書，佢每年到左呢個時候，就會叫我地入元朗玩，重會帶我地去留浮山食蠔添。不過今次我唔係講食蠔，係講食西餐，而呢間亦唔係細個同屋企人去，而係大個女同朋友去嘅。

話說我今日要講呢間兩老牌西餐廳，喺元朗八鄉嘅金壘，門口有巴士小巴經過，不過我係開車去嘅。其實都係喺我入左電台做至識得去呢間餐廳，而家開車入去就好方便，一條路直入，沿途景物舒適開朗，淨係呢程車都值回票價，咁，話就話一條路直入，但係唔係一定唔塞車嘅，不過我近排多數假期入去，都好暢順就亦都係事實。

間餐廳有車位嘅，汽油如果平尐，去一次真係一件賞心樂事。佢近幾年裝修過，冇左以前果種舊式餐廳嘅感覺，但係勝在光鮮乾淨，如果秋天或者初冬嚟到，坐喺外面真係風涼水冷，不過希望唔好太多人食煙，如果唔係就重浪漫，變成煙雨淒迷！

食物方面，冇乜退步，亦冇乜進步，咸豬手依然係最受歡迎之作，有番四五個人嘅檯差唔多都有叫，而佢嘅炸魚亦都係做得唔錯嘅，不過我次次去都係食咖哩，真係幾好味嘅，所以我今次亦都點左咖哩雞。單點加$45就可以轉做餐，咁我一定轉喇，因為我鍾意飲羅宋湯吖嘛。朋友因為想飲鮮蠔周打湯，所以冇得轉。

待應喺檯面放低小籠包連牛油就行開，你唔好誤會，係一個小蒸籠入面放左兩個餐包仔啫，轉頭羅宋湯就到，嘩，乜咁細碗！

不過算喇，$45連湯包咖啡或茶係咁上下喇，人地開門做生意，燈油火臘人工都唔少錢。碗湯個味道唔錯，不過真係少左尐！朋友嘅蠔湯到，唔係餐湯就梗係大碟尐，但係朋友一𢳂、再𢳂，乜只蠔咁細隻，要打撈一輪至搵到！

到我嘅咖哩雞飯喇，好香，一放落檯已經聞到，立即𢳂番一羹嚟飲下先，好味，依然係我食開果隻味，二話不說將尐汁撈哂入尐白飯度，講真，食咖哩飯其實唔駛食餸，個汁正已經可以送哂成大碟白飯。但係既然有雞又冇理由唔食，不過一食就扣分，尐雞唔新鮮！佢呢尐又唔係雪雞，因為肉嘅質感好好，但係有一陣雪味，究竟係隻雞隔夜被迫變成咖哩雞，定係隻雞處理得唔好而留有雪味呢？我唔肯定，但係隻雞同尐咖哩係冇friend到就係一定嘅，因為雞依然係雞，除左面頭果層有咖哩汁外，你基本可以當佢係一舊有雪味嘅蒸雞嚟食都得！確實係有尐失望！

我重會唔會去？會，我下次會夜晚黑去，雖然我已經好少夜晚去果度食飯，點解？吖，唔記得話你知，我地以前鍾意去咁遠嘅其中一個原因係可以遠離人群，食下嘢、飲下啤酒、講下人生，而家都唔可以飲酒開車，重點會途長路遠去得咁密喎！不過我真係會搵晚再去試真尐，夜晚個廚應該唔會俾尐咁嘢我歎！

為食路上，Mango Tree，泰菜

認識我嘅人，都知道我好鍾意去曼谷，我鍾意果度尐人夠簡單，亦鍾意果度尐治安，對於一個遊客，甚至係單身遊客嚟講，都係好好嘅，咁當然，我唔會去尐環境太複雜嘅地方。至於食同住就更加係冇得彈，泰國菜固然比我地九龍城果尐價廉味美又新鮮，而意大利菜甚至法國菜，除左美味之外，重係同樣價錢不同幣值，即係同樣係300蚊，但一個係港幣一個係泰銖，咁你話點會唔食。

重有酒店，五星級酒店一般要成四五千蚊一晚，但係喺曼谷，如果就啱有酒店連機票套餐，真係千零蚊就有得住。咁你話對於我呢尐為食懶人嚟講，點會唔成日心思思想去喎！不過近年真係去少左，局勢不穩就一定有影響。我試過喺紅衫軍事件平靜左之後，去曼谷玩，但係當我食完碗海南雞飯行出鋪頭，就見到有一大隊插住紅旗嘅電單車隊巡遊，雖然後尾酒店話佢地只係巡一陣，但係當時個心都驚一驚㗎！之後有幾次好似平靜左，但係坐的士時，們的士司機又會兜你去Lumpini Park，去到個司機會對住你指手劃腳，解釋點解咁多人著紅衫，雖然冇幾耐佢就會車你去目的地，但係個心都會冇咁定。所以今次四面佛炸彈事件真係嚇到我唔敢去住㗎。

好奇怪喎，好似有一段時間冇去曼谷之後，個心係會掛住尐泰國菜，咁你話可以去九龍城喇，果度大把喇！係，係大把，但係冇感情呀！最後，的起心肝，我走左去Elements果間Mango Tree。咁呢間又有感情咩？有呀，因為每次我由曼谷番嚟，我都一定喺佢機場禁區入面果間芒果樹食番碗牛腩麵同食下其他泰國菜，真係有一種沖線嘅感覺。

咁點解去Elements呢間要的起心肝至去到呢？因為佢貴過曼谷果邊好多呀！

果日我冇訂位，去到walk in都即刻有檯，不過限時個半鐘頭還檯，呢個問題唔大。安排左喺右手面一個望窗位置，我話可唔可以坐窗邊，佢話有人訂左，咁冇所謂喇，於是趁佢地人未到我先影番幾張黃昏景相先。

一坐低我就叫左個大蝦柚子沙律，嚟到見唔算大碟，蝦亦只得3隻，但係都算新鮮，味道亦唔錯，少少辣。食下食下，聽到click click clock clock嘅聲音，原來待應帶緊兩位內地美女入座，樣靚、身材好、滿身名牌，就係俾對涼鞋出賣左！

之後我地又叫左一碟糯米釀雞翼，炸得幾脆，不過尐飯爛左少少，佢喺飯入面加左尐泰國香草，味道唔濃，但係好惹味。其實一人一隻連皮食埋都幾飽，但係我地重唔收手，再叫一碟芒果蟹肉炒飯，初時擔心炒飯會有蛋，問清楚至知原來係冇嘅，碟飯炒得乾身左尐，但係尐芒果同提子乾加入尐炒飯度，又好開胃喎，於是我又忘記左自己其實已經幾飽㗎喇，又食左兩大碗。

真係好飽喇，甜品都食唔落喇。食飽坐陣先，飲番杯茶解下滯。咦，點解忽然間咁靜，哦，原來兩位美女埋單起身走人！

我都走人喇，埋單四百幾蚊，以呢個環境、呢個地段、呢種服務計，唔貴，但係同曼谷比就一定係三倍價錢喇。

到我地食完哂埋單，窗邊果兩張檯都重係冇人坐嘅，一個咁上佳嘅位置，唔知點解佢要留位俾空氣都唔俾我地坐呢！係咪對我唔訂位嘅一種懲罰呢！