嘉嘉航空，福岡之旅（十三）絕世好旅館

在過去十多天的在這裡講我福岡之旅，我時不時會提及我這次旅途所住的第二間旅館，並不時強調它的好。至令好多朋友也whatsapp及在Fanpage inbox我，問我係邊間，其實過程中我都有擔心會唔會吹得太大呢！嗱，講明，我一直話佢係平靚正，冇講過佢係隱世旅館呀！不過係我自己蔽鄉，所以未聽過咋！

我住嘅呢間旅館係Dormy Inn，相信好多時時去日本旅行嘅朋友都會住過呢間旅館，不過我未住過，真係未住過！我唔係唔會住呢類旅館，我都成日講，話喺旅途中，除咗喺一尐我諗住去休息嘅地方，譬如曼谷，否則我對住嘅要求唔高，有套房，有熱水涼同埋乾乾淨淨就得。所以喺日本，我都係住旅館多，一來日本尐酒店真係越嚟越貴，二來嚟親日本都係早出晚歸，間房真係要嚟瞓㗎咋，咁多設施都用唔到喇，但係我通常住Sunroute呀咁，真係冇住過Dormy Inn。

樓下就係Family Mart，超方便！

朋友話間間Dormy Inn都好平靚正，但係我只住過福岡呢間，所以只可以話呢間真係平靚正。咁佢有咩咁好呢！佢個位置好，極近祇園站，去邊度都咁方便。如果你唔鍾意坐鐵路，咁佢門口行前小小就有巴士站，￥100已經去到博多站同埋好多其他地方，又如果你只想喺附近行下，幾百步之內就有Canal City，再向著中州川端站走，就是激安之殿堂，路程也只是十分八分之內，如果真嫌遠，行完Canal City之後，就回頭到博多川端商店街閒逛也可以。

每天3點會有咖啡免費任飲。

除了地點就腳之外，它很多服務也是很貼心的，例如check in時有免費咖啡，在升降機內有一張椅子讓有需要時休息，坦白說，好幾次逛街之後，雖然只矮矮的幾層，這張電椅子也救了我一命呀！

當然最正的是它提供免費的拉麵服務，拉麵並沒有叉燒，也不是很大碗，但有時候浸完溫泉，就算當日已吃了很多，也真會覺得有點肚餓的，細細的一碗麵，剛好！

既然提到溫泉，也不能不讚這間旅館的溫泉。旅館雖只有幾層，但它的溫泉是很大方得體的，尤其在我去過Hokke那間浴缸也似的溫泉後！

這是女泉

它的溫泉也要有密碼才能進入的，換衫的地方寬闊通爽，locker、洗手間、吹頭、化妝的地方的設備都很齊全。換去衣服之後，沖身的地方就在溫泉傍，有成七八個沖身位，在沖身傍的溫泉比較大，如果以浴缸比，應該放得下剛五六個浴缸有多，它傍邊是一個細細的冰水池，身體健碩的、心臟負擔得來的，可以來一個冰火浴。

這是男泉，有露天景，重正！

而它另外還有一間獨立房，浸的也是同樣的泉水，本來是很清靜的，但它電視常開，我覺得有點吵耳，所以沒有去過一次便不再去了。還未止，還有一間sauna房呢！真是麻雀雖少，五臟俱全。坦白說，在這裡浸溫泉，會令你有去了伊豆的感覺。

到介紹房間了。一入門是一個大概6呎乘6呎的空間，前面一度門，左邊一度門，右邊是洗手盤和衣櫃。

推開左邊的門一看，原來是廁所，

入面又有一度門，哦，原來是沖涼房。

可惜，我一次也沒有用這沖涼房，因一天浸兩次溫泉，之前又徹底的沖身，應該不用回房間沖涼了！再回到空間，右邊是洗面的地方，日用品一應俱全。

再推開前面的門，原來這才是房門！

望開去是陽光燦爛的窗外風景，兩張床整齊有致的放在左邊，床頭還有各式各樣最新的差電插頭，真細心。

而右邊就是電視及放行李的地方，還空出地方放沙發及茶几。放了這許多傢具，房間並不覺迫夾！

講到這裡，不知道的還以為我收了錢，我可是真金白銀的在網上訂房的，而且人家生意不知幾興隆，絕對不用我來替它宣傳，你現在試去訂，假期的話，尤其是日本假期，應該滿了。好喇，今次的福岡之旅到此為止，又要計劃下一個行程喇！

嘉嘉航空，福岡之旅（十二）雪糕滋味

每次去日本旅行，都一定吃雪糕，北海道不用說，它的北海道牛奶如此有名，雪糕怎可能不好吃，作為遊客又怎會不吃它的雪糕。但日本其他地方的雪糕都是特別好味而香滑的，也許是放得化學材料多？唔知喇，不過出外旅行也不理這麼多，吃得開心就是。

今次福岡之旅，我只吃了兩杯雪糕。一杯在上川端町，一杯在門司港。話說那天在Canal City行完一轉，便計劃打道回旅館，當由Canal City條天橋落到地面，左望望、右望望之際，這是我出外旅行常有的動作，很多時候，就是這樣望呀望，俾我望到有尐好嘢睇。今次真係俾我望到一條好似狸小路果種購物街，但係當然佢嘅繁華程度，同狸小路完全冇得比，不過既然都係叫做一條購物街，咁又即管行下喇！

博多川端商店街

條街真係冇乜嘢好買，尐鋪頭連行埋去嘅興趣都唔係好大，因為真係唔係好啱胃口呀！咁唯有繼續前行喇，就係咁就經過一間鋪頭，面外擺咗一個雪糕嘅大模型，我一見，即刻諗起，我今次嚟日本，真係未食過雪糕喎，見都行得攰攰地，於是就走入去買番杯嚟食下。當個店員幫我唧尐雪糕出嚟嘅時候，我有機會睇下間鋪頭，好簡單嘅一間鋪，所賣嘅嘢都同豆腐有關，當然有雪櫃食嘅豆腐，亦都有豆漿賣，而另一邊就賣用豆腐做嘅面膜，幾得意喎！不過我已經冇做面膜好耐，所以冇興趣買番塊嚟試！

之後交收完畢，我就揸住杯雪糕坐喺門外食完至走。期間都有好幾個當地人入去買豆腐，亦有其他人入去買雪糕。講真，杯雪糕好好食，好軟滑，豆腐味好濃，但係亦都好清甜，份量唔多，但係食完之後，真係齒頰留香，係好清新嘅豆腐味呀！

到我食完走人，就見到有一對香港人，佢地攞住本旅遊書，望下望下，又對下對下，然後指指個鋪頭，又指指本書，跟住就好高興咁走咗入去買雪糕，嘩，我見佢地巡鋪果個樣，真係好似執到咁，於是我至打開我果本旅遊書，至知，原來呢間盛田屋係上川端町嘅人氣名物，真係有眼不識泰山，原來人地賣雪糕同豆腐係搭單㗎咋，人地主打係豆腐面膜，台灣同日本都好受歡迎！sorly 囉！

另一杯雪糕係喺門司港食嘅。又係行到攰攰地，而當時重未買到芒蕉芝呀，個心好急，而又成日冇乜點飲水，又係一見到個雪糕大模型就飛咗入去，一來當然想食雪糕，二來都想坐下至再行。其實當時喉嚨已經確確地，因為果度比較大風，吹都比尐風吹到喉嚨乾哂。咁坐低見佢有蜜糖雪糕，就叫咗一杯，心諗希望可以潤一潤個喉嚨，點知我見佢喺雪糕杯低放咗尐脆脆片，就再喺脆脆上面唧尐普通雲尼拿雪糕，心諗搵笨喎，又話蜜糖雪糕，咪即係普通雲尼拿！咁我點知果尐係雲尼拿雪糕呢？因為我個朋友之前點雲尼拿雪糕，佢就係俾果尐佢吖嘛！點知，我都未諗完姐，就見佢喺個蜜糖樽度嗶一羹蜜糖落雪糕面，哦，原來咁樣叫做蜜糖雪糕，我重以為係加咗蜜糖做成嘅雪糕添，咁重好，好似貨真價實尐，於是就坐埋一邊慢慢食，又當然對眼會四圍及下喇。

嘩，好多一樽一樽嘅蜜糖賣呀。原來呢間又係名物呀！佢叫做Bee Honey，原來佢嘅蜜糖係100%天然嘅。咁呢個我又信喎，真係食完之後，喉嚨一尐都冇確喇！仲俾我發現，原來就咁加尐蜜糖喺雪糕面係幾好食㗎喎，等我下次自己喺屋企都試下先，咁當然，蜜糖嘅味道同質素都好重要，唔通你淋尐BBQ嘅蜜糖會有呢個效果咩！

嘉嘉航空，福岡之旅（十一）燒肉@牛太本陣

由門司港番到去祇園站再番旅館，第一件就梗係去浸番個溫泉先。呢間旅館有幾好，我遲尐話你知。咁浸完溫泉之後，成個人都輕鬆哂，休息一陣就要計劃食尐乜嘢嘞！最後決定就係不如去食多一餐多牛喇，但係經過上次嘅教訓，我地諗住夜尐至去，即係大概八點果種喇。咁之前有乜嘢好做呢！咦，早兩日一出博多站番旅館時，好似見到有一間Daiso喎，呢間嘢喺好多地方都有分店，主力賣平嘢，即係我地尐十元店。但係而家香港尐十元店已經變咗12元，但係日本依然係￥100店，連埋稅換算落嚟即係八蚊港幣唔駛，真係抵好多！

於是就決定去行一轉。呢間鋪頭好易搵，就喺博多站出口右手邊果幢大廈，而且佢外牆牛咁大隻字寫住Daiso，紅色發亮，係唔會睇唔到嘅！Daiso就係喺六樓，同朋友約定一個小時之後喺收銀處集合。

跟住我就耷低頭係咁揀，係咁揀，尐貼身腰包真係抵￥100，用嚟去尐扒手多嘅國家就最好，旅行時將尐錢貼身袋，就唔駛驚俾人搶銀包，唔見錢都事少，旅行證件冇咗至最煩呀。順手又買多幾個俾朋友。跟住去園藝部，嘩，大到不得了，有好多好啱用嘅工具，都係￥100，真係停唔到手呀！正在好興奮，我朋友行過嚟，我心諗，乜夠鐘喇咩！原來唔係，佢話佢好快咁行咗一個圈，發覺呢個場好大，以我嘅探測速度，一個小時應該唔夠行，佢建議俾多半個鐘我，哦！之後又繼續行，仍然喺園藝部。嘩，你話如果呢度係香港，我應該會卜架貨車仔嚟幫我搬貨！行下行下，有尐腳攰，但係後尾至知，呢個時候我都未行完佢嘅三分之一！另一個殺傷力好強嘅部門係手工藝部，果尐手工用品、材料全部都好吸引，而一諗起只係8蚊，就又諗都唔諗就買！

之後輪到食物器材！好彩，呢方面嘅用具我都好齊全，而且我對於做食物嘅器具，喺質量方面係好有要求嘅，所以喺呢度殊乜買嘢，但係齋睇唔買都行咗成半粒鐘。冇錯，最後，我喺呢度停留咗兩個小時有多！好滿足咁抽住一袋二袋戰利品，但係呢尐嘢係唔飽肚嘅！又攰又肚餓，冇理由重行去多牛㗎！等陣間佢又要我等唔知幾耐，我咪死！

諗起好似正話上電梯嘅時候見到頂樓有燒肉放題，不如上去睇下咩環境先喇！上到去，見間鋪頭都幾多人下，一問之下，原來重要等，不過冇幾耐就有人埋單！其中一對係香港人，我問佢食唔食得過呀，佢話都ok㗎！咁問得人就要信下人喇！

喺等位期間，睇咗一輪餐牌，發覺佢最平果隻放題，好似冇乜好嘢食，亦都好似冇牛，反而第二個價錢比較似樣。於是就揀咗￥2980，原來當日重減￥500，真好！

入座後，個待應教我用部電腦入單，原來乜嘢都要透過電腦order，係唔會有人幫你嘅！放題時間係90分鐘，我地另外叫埋酒精飲品放題。

雖然有英文，初頭唔係好識用部機，又係蠢到逐樣叫，都用熟咗同埋見人地都係一上幾碟，就開行turbo咁食喇！

飲嘢又係，初時以為得啤酒，到後來至知，總之電腦上我地睇到嘅嘢都可以叫，雪糕都可以叫！

不過呢間嘢真係癲癲地，連濕紙巾同埋換燒網，都要喺電腦落order！唔理佢喇，繼續食！食呀，食，越食越高興，正想再點肉嘅時候，佢部機冇反應，以為壞機，點知個待應過嚟話夠鐘，嗄，未喎，我地睇下個表，重有成15分鐘喎！個待應check番上手尐單，又確認我地係未夠鐘，但係system已經log out咗我地，於是佢同我地用手寫一次單，但係每樣只準叫一樣，譬如我想叫梅酒同埋可樂，佢就只係俾一樣，好唔公平呀！

好嘞，講下尐食物，真係中規中矩喎，以呢個價錢，我更加覺得係抵添！不過如果咁啱你都會去呢間放題，我建議你入座前同佢對對表，唔係又好似我咁，蝕呀！

嘉嘉航空，福岡之旅（十）仍然係門司港

話說我坐上前往御裳川嘅巴士，一路望住巴士顯示牌以免唔識落車，但係個巴士司機重緊張過我，佢一到站就叫我落車嘞！車程唔算長，好怡人。落咗車，嘩，好好風景呀，天氣又好，望出去就係一條河，河上面有條橋，果日幾大風，所以橋下嘅水流都好急速下。但係真係好舒服，河邊有幾座大炮，另外重有一座係放喺個涼亭入面，唔知佢有幾矜貴要咁樣招呼佢法，但係我冇特別興趣睇，一來呢尐係戰爭武器，二來我有另外一個更吸引我嘅景點等緊我。其實我下一個景點，應該喺落車嘅後面，但係我見咁靚景，過馬路吸收下好似好甜嘅空氣，同埋睇下個景先姐。

睇夠喇，就行過番過對面，並且要搭升降機落地低喇。冇錯，我係會利用「關門人道隧道」由海底嘅一條行人隧道，由山口縣嘅下關，行番過去福岡縣。嘩，穿越兩個縣喎，路程會唔會好長呢！路程唔算長，而雖然有斜路但係因為佢嘅入口唔係地面，所以斜極有限，你話如果好似我地西隧咁由地面開始落，就真係斜到冇朋友喇，呢一點跑過馬拉松嘅朋友就明。

沿途一尐都唔索氣，當日重有一團日本長者同行，都唔見佢地有乜頂唔順嘅場面出現。不過，雖然佢已經畫咗尐魚呀，水草呀咁喺兩面牆身，但係其實係唔算有裝飾嘅，所以行下行下都幾悶。

正想問幾時行完呀！就見前面開始塞人，哦，原來已經行到兩縣嘅分界線，大家停喺度留影。咁當然我都唔執輸，排隊影番張相先。跟住又繼續行，沿途又係冇乜驚喜，咁就行完嘞！咁如果你有興趣，記得喺由下關嘅入口吸個印仔，不過得半邊嘅咋，要等你行到過福岡至有另外半邊俾你印，好似粵語殘片果尐相認玉配咁，都幾有諗頭，但係我都冇做！

出咗去其實就係正話望過嚟嘅對面。所以風景一樣咁好。喺咁風和日麗嘅天色下，行下行下，沿途影下相，執下松果，再行上去一部已經改裝為餐廳嘅舊火車上面行下，食下，擺下甫士，好快就到懷舊觀光列車停泊處，潮風號車站。

呢條臨海嘅貨運鐵路路線原本已經廢置咗，現在重新包裝成為大受遊客歡迎的門司港懷舊觀光列車潮風號路線。唔係時時開㗎，要查清楚行車時間表呀。

呢架潮風號一共有四個車站，如果你由九州鐵道記念館站出發，即係由JR門司港站對面嘅車站上車，你會先經過出光美術館、諾福克廣場到達關門海峽和布刈站，咁我嘅行程啱啱調轉，所以我嘅終站就係九州鐵道記念館站。全程共2.1公里，需時10分鐘。

佢係一架舊式嘅鐵路車，只有兩卡，如果可以坐前面果卡，就可以沿途欣賞最美麗嘅風景，不過就咁坐喺車入面都好有氣氛㗎，尤其是當佢進入隧道嘅時候，架車個天花重會發光添！

好耐冇經歷過火車捐出窿嘅滋味喇，真係好開心，細個時候坐火車入沙田嘅記憶番哂嚟呀！

落車之後，我就行番去門司港港峽Plaza果邊喇。目的只有一個，就係去搵芒蕉芝呀！不過原來真係要搵㗎，初時以為佢喺尐記念品店果度賣，但係行哂喇都唔見，其中有一間有賣其他款式嘅monchhicci，但係都冇阿蕉姐！心諗唔係賣哂嗄話！唔忿氣，開口問人。原來阿蕉姐係喺樓上嘅一間教做手工藝品嘅鋪頭賣嘅，嘩，嗱嗱聲飛上去買喇！終於到手喇！

於是好高興咁抱住阿蕉姐打道回旅館！

嘉嘉航空，福岡之旅（九）門司港

在九州旅遊，如果自己開車的話，又有番6、7日，就真係邊度都去到。不過我今次唔係自駕遊，所以只可以去福岡同埋尐就近嘅地方，今次揀咗門司港，貪佢有得食又有得行下咁喇。其實門司港唔係特別近，不過有新幹線之後，矩離就唔係問題。

由博多站搭新幹線去門司港，要先去小倉，只需要20分鐘，而我嘅實地測試就只係同咗15分鐘就已經到。但係一分錢一分貨，新幹線唔平㗎，我地搭嘅特定特急要￥2110一個人，來回都成三百幾蚊港幣㗎喇！

新幹線以時速300公里送咗我地去小倉，之後再轉時速93公里電車就到門司港！俾佢拖慢哂呀！

去到門司港車站，大家已急不及待舉起手機，因為呢個地方好識do咁預咗好多景物俾遊客拍照，佢除咗有好多款火車俾大家拍照之外，重有個類似博物館物體，大家唔知以為呢度就係鐵路記念館，都急急拍照，其實鐵路紀念館喺外面，而且係收費嘅！

出閘之後，喺售票處即刻買番張價值￥800「關門海峽攻略」套票，呢張套票係冇時間限制，總之當日完成就得嘞。佢包括一程由門司港去下關唐戶嘅船票、一張由唐戶去御裳川嘅巴士飛同埋一張潮風號嘅乘車券。而潮風號嘅停車點就係門司港，跟住至喺門司港附近玩都未遲。又如果你想掉轉嚟玩，即刻坐咗潮風號先都得，但係我地就啱時間過去唐戶食晏，所以先至由水路出發。

唐戶係一個魚港，而尤其多雞泡魚，所以一落船就見到好多雞泡魚嘅模型牛咁大隻幢喺度同你影相。再行前小小，見到一個好大嘅石碑，睇內容至知，原來St Francis Xavier 聖方濟沙勿略1550年喺下關上岸開始傳播天主教嘅福音。我喺石碑前祈禱，希望我都能夠成為天主傳教嘅工具。

我地今次嘅真正目標係唐戶市場，當然係有魚生食喇，不過我地去到都成點幾，好多鋪頭都收咗檔，我都只係買咗尐昆布呀咁，就走去食迴轉壽司喇。間鋪頭嘅讀音係「海轉」海灘個海，轉係婉轉個讀音，係車字邊做個雲，個雲字係簡體字寫法，你唔好以為我成點幾兩點至到應該唔駛等位喇，你就想，一樣咁多人呀。

左下角果間就係嘞！

行到埋去，又係自己寫抵自己個名喺枱面個表果度，嘩，又有成兩版紙至到我。但係唔通唔食咩！好彩佢有好多位俾你坐住等，咁都冇咁攰！等呀等，終於到我個名果版紙喇，今次我精喇，我行去果個叫名哥哥面前，指指我個名，再指指我自己，然後又指指我排隊果個位，咁就唔怕叫到我都聽唔明喇！佢果然好好人，到我嘅時候佢冇叫我個名，係行嚟我面前，真係arigado！

入到去重要坐一陣至有位。坐到埋位就生猛喇，見尐壽司一碟一碟咁轉埋嚟，真係好興奮，但係我好冷靜，唔係乜都食，當然都會叫一碟雞泡魚壽司。呢樣嘢我喺香港同日本都食過，唔知點解尐人形容得咁天仙，係就係爽尐，有𡁻頭，魚肉鮮美，但係未至於要拼死食河豚囉！埋單兩個人食咗13碟，盛惠￥5281，價錢合理。

食到肚滿腸肥，係時候要展開行程，做下運動之餘，亦要用埋我張套票呀。

根據套票嘅攻略，我地要行去搭巴士去御裳川。咁巴士站喺邊呢？邊個方向係御裳川呢？佢係冇地圖或者任何指示嘅，真係當正你係當地人。於是唯有搵。巴士站在碼頭的另一端是常識吧，冇理由巴士站喺海邊嘅！於是向右邊行，上到去就見到有個地圖，但係只有日文，前小小就係巴士站，有部巴士剛剛到，其中仲有御裳川果幾個字顯示喺側邊嘅車身添！上到車行去問車長，佢酒手擰頭又指指對面個巴士站，哦，原來方向錯咗！由天橋行過對面又咁啱有部巴士到，問明司機，呢部車係會車我到御裳川嘅，即刻安心哂！

嘉嘉航空，福岡之旅（八）米芝連2星 - 季樂

我是離開香港才吃牛肉的，所以每次出外旅行，我一定搜集哂所有當地美味的牛肉食肆，然後再決定去那一間。第一晚的多牛是價廉物美。而另外一間我想去食的是季樂。本來我是想去佐賀本店的，但由博多站坐特急海鷗號，單程也要40分鐘，來回就不見了兩小時，而且佐賀並沒有甚麼好行，以我今次只有前後四天的時間，平白的走這一轉並不化算。

但它在福岡市也有分店。既然說佐賀牛僅次於神戶牛，而季樂又係米芝連兩星餐廳，咁就貴尐我都一定要試喇。

旅遊網同埋旅遊書都話如果嫌貴，可以去食晏，因為lunch set平好多。係平好多，但係一分錢一分貨，人地開門做生意唔會蝕俾你。要食好嘢，一定唔可以食set。我因為一心諗住試佐賀牛，而為免同人迫，我選擇夜晚去。

當然我都想八下個lunch set係咪咁抵先。一睇，價錢確係平，佢一共有四款午餐，由￥1500至￥3200，￥1500果隻包括佐賀產和牛、和牛同埋雞，最貴果隻￥3200有佐賀產和牛、佐賀產和牛特上、和牛等，你以為好抵？你冇留意呀，全部係佐賀產和牛，而唔係佐賀牛呀！識食嘅你，應該知道中間嘅分別喇啩！

福岡市嘅季樂位於中央區西中州，即係由Canal City直行，喺橋頭已經見到好靚嘅一座建築物，呢間就係季樂喇。矮矮嘅一座得幾層，但係都好有氣勢，三樓係鐵板燒，二樓係自己燒，我梗係坐二樓，自己最知自己口味，可以嘅話，自己燒好玩尐。

入到去，見全部間哂房，本來想坐窗邊位，但係佢話俾人book哂，咁只可以坐中間嘅房，唔算完全隔聲，但成個空間就只有自己一張枱，好舒服，相比起窗邊嘅房每間有兩張枱，呢度真係自成一國呀，想點影相，想點講嘢，只要唔係太大聲，都冇人理你。放低兩杯茶同餐牌之後，個待應又走番出去。

其實我嚟之前都諗過如果佢有晚餐set我都可以試，打開餐牌一睇，真係有喎，價錢仲有四種￥4500、￥5500、￥7500 同埋￥9800，想食佐賀牛嘅話，起錶價係￥7500，而￥9800果set呢，就真係全部係佐賀牛嘞。咁我見佢個餐牌￥9800果set果幅相好似幾大份喎，有四款牛，每樣都有三塊，諗住點呢個試下喇，睇真尐，佢隔離有行字仔寫住係2名盛，嗄，即係2人份？定係我誤會呢，問下先，正當呢個念頭喺腦內興起，個待應就出現嘞，咁好嘢！讀心術？一問之下，幅相顯示嘅果然係二人份，咁冇可能夠食喇！

唔，咁點呢，食單品都好貴下，每款都要成￥3/4000！唏，咁遠嚟到，唔爭在喇，於是叫單品，每款叫一份。嘩，真係好細份呀，佢話有5安士，我冇帶磅，唯有信佢！不過我一定要金精火眼睇住嚟燒呀，因為燒壞咗一片係好肉赤㗎！不過，佢尐肉真係靚，我初頭重燒到表面熟至食，後尾我係咁以燒一燒就食，嘩，軟熟肥美到漏油。佢嘅牛舌係薄切，但係爽軟適中，好好味！

相比起多牛，其實真係冇得比，不過都比較下喇！以肉計，季樂嘅肉幼細好多，而佢嘅肉仲有一種香，係好清嘅，當然佢嘅雪花亦都比多牛嘅肉嘅雪花分佈均勻，所以食落去至咁肉香肥美。

而佢比多牛好嘅另一樣就係佢嘅抽氣系統呀，你記得我講過話多牛多油煙之餘亦都多人抽煙，而我相信呢度都有人抽煙嘅，不過佢個系統真係好到一尐味都冇，唔單止坐喺位嘅時候冇味，就算你離開咗都唔會好似我地平日打邊爐咁搞到一身味，就呢樣都值回票價喇！