嘉嘉航空，貨幣及即食麵

在過去這兩個星期，多謝大家的支持，大家都好像看得好投入，但我都明，日日講前奏而總未入戲肉是有些不是味道，好喇... ...寫埋呢篇就開始旅程。苦口良藥唔好食，提點詳細唔啱聽，但我八篇所講的，都是出發前必需安排好的，不然去到當地才打點，浪費時間還好，有時你想搵都搵唔到就慘！

今次講的是貨幣。歐洲不是用歐羅嗎，還用說！不，歐洲不是全部國家都用歐羅的，有些國家會用自己貨幣之餘也會用歐羅，但有些是不接受歐羅的，而有些小店就算國家接受歐羅，她也不接受的，真是有生意都唔做，這是歐洲人驕傲的民族性，要懂得尊重，更要懂得為自己安排！

芬蘭是用歐羅的，在香港大部份銀行都可以換到，挪威用挪威克郎，但歐羅在國內也很通行，不過如果你用歐羅購物，找回來的錢會是挪威克郎，蝕了差價，但至少有錢可用，但丹麥則絕大部份情況都要用丹麥克郎，你沒有她們的貨幣便不能在那裡運作自如了！當然，市中心一帶都有找換店，但若剛巧遇不上時便真的幾唔方便，所以我建議所有貨幣也換定才上機，反正對換率也不會差太遠，人在外，少一件事要擔心就多一份享受！另外我自己無論去那一個地方，都習慣帶美金，這是個人選擇，你不必跟隨。

要預備的都差不多了，還有甚麼未講？有，食物。食物？那邊這麼先進的國家沒有食物嗎？不是沒有，也許有時趕時間、也許有時胃口不對、也許有時買不到、也許有時思鄉！所以你當是安慰劑也好，一定要有幾件傍身。餓起上尼冇嘢食係好可憐咖！而就算在機場等上機，也可以是很沈悶而浪費時間的，想吃一片香口膠？機場一定有得賣喇，但偏偏歐洲人的口味就不是我的口味，所以我是一定會帶自己吃慣的零食在身邊的，有甚麼事也有少少安慰！

好喇，差不多喇，可以上機喇！

喂，咁駛唔駛帶背囊呀，駛唔駛帶太陽眼鏡呀，駛唔駛帶護膚品呀，駛唔駛帶充電器呀，駛唔駛帶... ...重問？再問，我要牧師上身：不如帶埋個菲傭喇！

不過有一樣嘢一定要帶，就係水壺，唔嫌重，帶多個小型暖水壺都重好！水煲就唔駛喇，因為一般酒店都有熱水煲，就算沒有，也可請他們幫忙，一定安排到。但如果你覺得安心，帶定也無妨！

出發喇！

極光之旅（？），他鄉遇… …

阿媽教落，日頭唔好講人，其實去到世界各地都唔好講人，因為原來隔牆真的有耳！

話說那天我們由赫爾辛基的中央火車站附近搭9號電車去西邊的碼頭（Helsinki West Harbour），再搭船去愛沙尼亞（Estonia）的塔林（Tallinn），幸運地我們在頗為人多的車廂內找到坐位。我們一邊自命好運，有位坐，一邊高談闊論到了碼頭該買那一間船公司的票，由價錢到船隻的新舊，到航班時間都是我們討論的題目，水花四濺自然少不免，間或分貝略高，正在七咀八舌間，傍邊那位金髮女郎忽然對我們一笑，然後問：Do you speak English? 對這突如其來的一問，因為不知道她的來意，而在電光火石間rewind也覺自己好像大聲了些，乃滿帶歉意的點頭！

之後她就用英文問我們剛才說的是不是廣東話！我們真的有點摸不著頭腦，仍只好一臉尷尬地點頭！繼而她又問我們懂不懂普通話！原來只是我們作賊心虛，人在外地心情輕鬆，又見四周都是白皮膚的歐洲人乃肆意發言，以為她是嫌我們嘈吵，原來只是善意的交流。之後就以普通話交談。

原來她是位愛沙尼亞小姐，在蘇聯時期，已去了中國讀書，所以她的普通話比我的流俐而標準！之後更在福建工作了幾年，才返國，她跟我們說，單是香港也去過八次了！之後她就教我們到了碼頭後可以怎樣買票，然後怎樣走，不過她說平價票通常是一早一晚的時間，我們那個時間的票價是最貴的了！沒辦法，自助遊當然不會六點morning call咁委屈自己，而所謂的最貴與最平的價錢也相差無幾，船隻較新較安全也已值回票價！

另一次就是在赫爾辛基的機場，因為是內陸航班，又是廉航，所以不包餐，於登機前在機場內的Picnic隨便吃點東西填肚。正在大快剁頤間，只覺傍邊的一名邊女子不時的望向我們這邊，但見我們回望又忙低頭繼續進食。一來怕自己說話大聲騷擾到人家，二來也怕她不懷好意，但如果想打我們主意又斷不會如此明目張膽！正自狐疑，她忽然對我們微微一笑，然後…竟然以標準的廣東話問我們是不是香港人！

原來她祖藉印度，兩歲時去了香港，十年前父母都不在了，家姐又嫁了去加拿大，才跟哥哥移民到芬蘭。我以為她在這裡做接待香港人的工作，因為移民十年了，廣東話仍然講得這樣好，她笑笑說不，只因在家中與哥哥仍是以廣東話溝通。我聽了她這樣說心頭一陣感動，原來香港才是她的家鄉，我與她其實是鄉厘。今天我是遊客，過一陣子我就回家了，但我會不會有一天為了追尋理想的生活環境而也要飄泊他鄉呢！不敢想下去了！這時她也吃完飯要開工了。

畢竟是萍水相逢，也不好意思問太多：適應這裡的天氣嗎？她搖搖頭：凍死了！之後大家相視一笑，互祝好運，就各走各的路了！

嘉嘉航空，丹麥，嘉士伯啤酒廠

話說第一日去到哥本哈根，已經俾佢嘅啤酒所吸引，而喺丹麥呢段行程，其實冇乜特別計劃，唔似去睇極光咁係仔細策劃咗，所以第二日就走去參觀啤酒廠。其實佢重有一間美術館，係佢老闆多年嘅收藏，但係關我咩事喎，佢尐品味未必啱我，反而啤酒我就幾鍾意，於是喺酒店係咁以食尐嘢就出門。

喺火車站對面就有一個巴士站，可以坐18或者20號車就去到啤酒廠。不過果度唔係總站，所以你上車時最好請司機到站通知你一聲。佢地一般都好好人，除非你好乞人憎，又或者聽唔明你尐英文，否則一定提你落地車嘅！落車之後重要行成五分鐘至到，不過唔駛怕會行錯，因為一落車就有一個大牌指你路。我地果日咁啱落緊濃密嘅毛毛雨，你見周圍尐人又冇開遮，好似好酷咁，於是自己都學人型下喇，點知係咁俾雨耷咗成五分鐘，原來都幾唔舒服下！好在，都俾我撐到入室內，唔會中途開遮咁唔型。

入場費70丹麥克郎，大概港幣$80，包兩杯啤酒。如果你唔係參加旅行團，咁基本上係冇人帶你行嘅，但係佢喺你買咗飛之後有一個好簡單嘅地圖俾你，自己跟住嚟行就得。其實呢個啤酒廠都唔係太大，但係係咁行上行落又影下相咁，都可以行成大半日㗎！初頭見有一團美國人喎，於是諗住mend車邊，扮埋做團友，而佢地又好似唔介意咁，於是咪聽囉！但係聽下聽下，有尐唔對路，因為果個人講得好慢同埋好詳細，一來室內有暖氣，二來呢度尐燈光有尐昏暗，搞到我差尐瞓著，但係人地已經認得我呢個中國人，如果我中途離隊好似唔係幾有禮貌，終於我地嚟到飲啤酒嘅等一站，我就係趁尐人喺度慢慢享受果杯酒時，快手快腳飲完自己果杯走人先！

雖然呢杯啤酒我飲得好快，但係並冇影響佢嘅味道，新鮮嘅啤酒真係唔同嘅，飲落去冰凍清涼，你完全唔會因為天寒地凍而唔想飲凍嘢。呢杯啤酒有幾勁？佢勁在係用最呢個牌子最古老嘅啤酒配方釀出嚟，真係好飲，本來想要多杯，但係佢唔俾我揸住去繼續參觀，咁又係嘅，呢尐杯咁靚，容乜易攞走咗㗎，又或者打爛咗都好麻煩喇。咁都好，等行完再飲。

自己一路前行，我最有興趣就係佢個啤酒收藏庫，真係全世界嘅啤酒佢都有收藏，當然包括我比較熟悉嘅香港、內地同日本嘅啤酒喇！數量真係唔少，不過冇乜點打理亦都係真嘅，尐樽鋪哂塵都冇人抹下！繼續前行就係舊嘅啤酒廠，呢樣嘢我冇乜興趣，再前行就行到室外，係一個打理得都算企理嘅花園，但係畢竟係冬天，我見唔到燦爛嘅花朵！花園入面有條美人魚，原來都歷史猶久嘅，繼續前行，就見到好多古董車，都係佢地早年要嚟送貨用嘅，再行前尐重見到馬添，不過佢地呢尐馬唔係要嚟跑嘅，係要嚟運貨嘅，而到今日佢地間中都會行出去送下貨，做下宣傳大使㗎！

係咁行下影下相，時間過得好快，原來已經行到現代釀酒廠，而隔離就係一個餐廳，於是我就攞埋我果張免費啤酒券出嚟飲埋杯啤酒佢。行得都有尐攰㗎，坐低飲下飲下，好似好悶咁，走去睇下有尐乜嘢買嚟送酒喇，點知來去都係尐花生，真係好唔吸引呀！算喇。番到埋位諗住執下個背囊喇，點知，俾我執咗一包齋燒味出嚟，嘩，咁又唔同喇，成個人精神哂，啤酒都更好味，就喺我歎得非常過癮之際，就俾人提示我不得自攜食品入內，我當時非常面懞呀！覺得自己似大媽呀！於是急忙say sorry然後收埋餘下嘅半包齋燒味，梗係喇，俾我發現有咁美味嘅送酒物，梗係留番今晚番酒店享用喇！

好飲埋杯啤酒就走人喇，臨走時經過精品店，都係尐瓦杯，T恤呀咁，冇乜特別，而且之後重有地方去，秤住咁重嘅杯咪𥵃搞！走人喇，再去下一站參觀！ 

DenMark

話說我已經完成咗極光之旅，亦都去埋Talin，咁由Talin返到赫爾辛基係唔係就可以返香港呢？其實係嘅，因為我都係咁行嚟行去行咗好多地方下，不過我嘅旅程其實又未完喎，咁點解呢？其實最初我是不想去太多國家的，因為帶著一大件行李上機下機的覺得很麻煩，但在不斷的看資料的過程中，又令我度度都想去。最後我決定多遊一個國家，在荷蘭與丹麥之間，我怎樣揀呢？兩個地方我都未去過，當然，我係唔計啱啱畢業嘅時候果次歐洲十天八國之旅，因為當年縱然我係入過荷蘭境，但係我連佢一朵鬱金香都未睇真就又去咗第二個國家，所以我基本上係唔算遊過荷蘭，雖然係咁，但係我最終都係揀咗丹麥，原因很簡單，我買果本標題係Scandinavia嘅Lonely Planet，話就話係講北歐，但係佢亦都包含了丹麥的介紹，咁睇下睇下，又覺得佢好似幾多嘢睇喎，而最重要嘅係，為食的我，真是想去丹麥食番一個正宗的Danish，丹麥卷!

由赫爾辛基飛去哥本哈根，一個鐘頭都唔駛，睇嚟乘客好多都係成日來回呢兩個國家，所以寄倉行李一尐都唔多。真係一入丹麥國境之後，你就好清楚你人在哥本哈根，因為一大塊牌在提取行李處等著你，讓你知道你進入了這個啤酒之都。等我初頭以為一出機場就會見到一大隻Danish等緊我？唔係呀，佢其實重有另一件國寶，就係嘉士伯啤酒呀，真係邊度都見到，初時真係驚佢呢度會唔會冇水飲呢！不過，其實分別都唔大，因為尐水係貴過啤酒嘅！

這個機場很有趣，熱鬧到不得了。出境入境都是同一處，而成個出入境處都開滿咗酒吧，而酒吧又都坐滿人喎，不知道還以為去了蘭桂坊定係邊條酒吧街！喺機場入面走錯方向並不困難，當然去到關鍵時刻你會知道你是走錯方向的，但係就真係行咗唔少冤枉路囉！

由機場出嚟之後，我地就直奔中央火車站，冇錯，因為我地又揀咗一間平靚正而近火車站嘅酒店嚟住。這家酒店距離哥本哈根中央火車站只有100米遠，即係話如果牙買加飛人保特住呢度，只需要10秒就可以去搭火車。sorry個gag有少少爛！講番間酒店，真係一出火車站，行過對面小車路，再前行幾步就到，超方便。由酒店行去著名的蒂沃麗花園（Tivoli Gardens）僅有5分鐘步行路程，距離哥本哈根的主要街道Strøget以及市政廳廣場（City Hall Square）有800米。 其實真係好近。

雖然著名嘅Tivoli Gardens就喺對面，但係佢其實係一個類似荔園嘅場所，所以我門口就經過好多次，因為每次去市中心都要經過佢，但係真係諗都冇諗過要入去。有尐地方唔係出名就要去嘅！Check in完酒店settle down之後，其實已經天黑，但係點都要搵尐嘢食嘅！而且初到貴境，冇理由唔出去八下啫。哥本哈根俾我嘅第一印象係佢尐人身型比較瘦，當然我係同牛高馬大嘅芬蘭人比，同香港人比，佢地依然有著數。佢地之所以瘦，我相信同佢地好多人以單車作為交通工具有關，一般嘅馬路，都有兩三條線俾你踩單車，係咪好羨慕呢？咁人地地多人少，同香港又係冇得比嘅！

行呀行，就喺Tivoli過少少見有一間賣牛扒的餐廳生意不錯，於是又走入去碰碰運氣。雖然是一間賣牛扒的店，但見左右都點了豬肋骨，我們也入鄉隨俗，我們兩人叫一份，那寫單姐姐看來有點不以為然，但係我參考過隔離位嘅份量，我相信我地嘅選擇是啱嘅，而結果坐我地傍邊兩枱的人，佢地係一人叫一份呀，但係結果各自都係打包收場。呢個豬肋骨幾好味，比我地嘅Dan Ryan's好味好多之餘，又真係豬有豬味！

而既然來到這個啤酒之都，也點都要啤啤佢。唔知係心理作祟定係人地釀啤酒真係有一手又或者唔駛諗得咁複雜，原來只要新鮮就好味，點都好，呢杯啤酒真係好味好多喎！

飲飽食醉，也不四圍走，回酒店休息，反正在這裡有好幾天的時間，不急！

嘉嘉航空，｛二十四A｝

前文提要：我在Tallin舊城區行呀行的，行行下唔覺唔覺，原來已經天黑，又是晚飯時份，這裡因為是遊客區，所以四周圍都是餐廳，但有的空無一客，有的坐滿了人，中間並沒有半滿的餐廳，很有趣，咁冇人客嘅就一定唔去喇，但係人多我亦未必想等，因為佢尐菜牌唔係太吸引。一時間真的不知怎樣揀，咁又行下先喇，行下行下，俾我聞到濃濃嘅蒜味，於是我又跟著那濃濃的蒜味走，轉個彎進入小巷，蒜味越嚟越濃，抬頭一看，原來是一間全蒜餐廳，即係佢嘅所有菜式都混有蒜嘅，咦，聽落幾得意喎，就呢間喇。

嘩，人很多呢，重好，個心重定尐。美麗而年青的侍應說要等一小時先至有位，反正晏晝果餐都未消化完，而我們還未行完古城，於是攞咗個籌，出去欣賞下呢個古城夜色，轉頭再番嚟食。我地半個鐘頭返番去已經有位。

上餐廳的第一件事是把大衣交給門房小姐掛好，這在很多外國大餐廳均有的安排，但那位金髮美女跟我說，這裡的另一個原因是為了避免大衣沾上陣陣蒜味！行上十幾級樓梯之後，蒜味越嚟越濃，樓梯嘅頂點就是餐廳，仍然坐滿人。

打開餐牌一看，果然名不虛傳，個個個環節都係蒜，於是先叫一杯啤酒飲下先，啤酒都有蒜？你問。係呀，蒜味啤酒，真係第一次飲。冇幾耐，蒜味啤酒到，一啖嗒落去，唔錯唔錯，係有蒜味，但係並唔算太濃，比想像中清香。而且佢好夠凍，飲得好舒服。人好奇怪，越凍嘅天氣越鍾意飲凍啤酒！

點菜完畢。望下周圍，尐裝修唔算太靚，冇果尐水晶吊燈之類，但係都幾雅致。坐咗冇幾耐麵包就到。個麵包好好食，同晏晝果餐不遑多讓，但係並唔係蒜蓉包，會唔會有尐失望？唔會，因為佢跟麵包上枱嘅蒜味牛油十分精彩，香濃適中，同麵包一齊食又得，就咁一啖食都得，得咗！

食下食下個包，大蒜湯亦都到嘞，真係香濃厚滑，美味誘人，一啖都冇飲剩，其實已經好飽好飽好好飽，但係我仍然對之後嘅主菜有所祈待。

主菜是牛，水準一般，但係佢果個伴碟嘅焗蒜頭非常精彩，成個蒜頭，批咗個頭，之後原隻放入焗爐焗，本來呢樣嘢只要你屋企有個焗爐都應該做到，但係佢尐蒜係當地出品，蒜味特濃，而家亦都焗到變哂蒜泥喇，入口即化，真係好正。

食完主菜，真係已經攬住個肚喇，但係我都重要堅持落去，因為我重點咗一個蒜泥雪糕，呢次真係由頭食到落尾，因為全蒜宴，其他地方未必有得食，梗係食全套喇！至於呢個蒜味雪糕，當初並未抱太大祈望，因為以前食過尐胡椒雪糕、龍蝦雪糕，都係桌頭多於實際，但係呢個蒜味雪糕唔同喎，食過之後你就知道乜野叫做齒頰留香嘞！

呢餐飯唔平呀，但係難得遇上一次全蒜宴，又竟然都好好味，咁就算喇，出外旅行，有時也不能太計較。抱著肥大的肚皮，帶著回甘的味蕾，我在手機內重溫華燈初上的古城，正！係時候番去瞓喇，才忽然醒起果99級樓梯！唉呀，唯有同自己講，呢99級係可以幫助我消化哂我今日過量嘅卡路里，唔係真係想搬去第二間住就算呀！

嘉嘉航空，極光之旅，（二十四）Tallin dinner

前文提要：我在Tallin舊城區行呀行的，行行下唔覺唔覺，原來已經天黑，又是晚飯時份，這裡因為是遊客區，所以四周圍都是餐廳，但有的空無一客，有的坐滿了人，中間並沒有半滿的餐廳，很有趣，咁冇人客嘅就一定唔去喇，但係人多我亦未必想等，因為佢尐菜牌唔係太吸引。一時間真的不知怎樣揀，咁又行下先喇，行下行下，俾我聞到濃濃嘅蒜味，於是我又跟著那濃濃的蒜味走，轉個彎進入小巷，蒜味越嚟越濃，抬頭一看，原來是一間全蒜餐廳，即係佢嘅所有菜式都混有蒜嘅，咦，聽落幾得意喎，就呢間喇。

嘩，人很多呢，重好，個心重定尐。美麗而年青的侍應說要等一小時先至有位，反正真晏晝果餐都未消化完，而我們還未行完古城，於是攞咗個籌，轉頭再番嚟食。我地半個鎔頭返番去已經有位。

上餐廳的第一件事是把大衣交給門房小姐掛好，這在很多外國大餐廳均有的安排，但那位金髮美女跟我說，這裡的另一個原因是為了避免大衣沾上陣陣蒜味！行上十幾級樓梯之後，就是餐廳，仍然坐滿人。

打開餐牌一看，果然名不虛傳，個個個環節都係蒜，於是先叫一杯啤酒飲下先，啤酒都有蒜？你問。係呀，蒜味啤酒，真係第一次飲。冇幾耐，蒜味啤酒到，一啖嗒落去，不唔錯唔錯，係有蒜味，但係並唔算太濃，比想像中清香。而且飲得好舒服。人好奇怪，越凍嘅天氣越鍾意飲凍啤酒！

Cheers!

點菜完畢，冇幾耐麵包就到。個麵包好好食，同晏晝果餐不遑多讓，但係並唔係蒜蓉包，有尐失望？唔會，因為佢跟麵包上枱嘅蒜味牛油十分精彩，香濃適中，同麵包一齊食又得，就咁一啖食都得，得咗！

Tallin的麵包都很美味！

食下食下個包，大蒜湯亦都到嘞，真係香濃厚滑，美味誘人，好飽好飽好好飽，但係我仍然能喫至一口不剩。

主菜是牛，水準一般，但係佢果個伴碟嘅焗蒜頭非常精彩，當地出品，蒜味特濃，而家亦都焗到變哂蒜泥喇，入口即化，真係好正。

最後，已經攬住個肚喇，但係我都重要堅持落去，因為我重點咗一個蒜泥雪糕，全蒜宴，其他地方未必有得食，梗係食全套喇！當初並未抱太大祈望，但係食過之後就知道乜野叫做齒頰留香嘞！

呢餐飯唔平呀，但係難得遇上一次全蒜宴，又竟然又好好味，咁就算喇，出外旅行，有時也不能太計較。抱著肥大的肚皮，帶著回甘的味蕾，我在手機內重溫華燈初上的古城，正！係時候番去瞓喇，才忽然醒起果99級樓梯！唉呀，唯有同自己講，呢99級係可以幫助我消化哂我今日過量嘅卡路里，唔係真係想搬去第二間住就算呀！

嘉嘉航空，（二十二）極光之旅，Tallin食lunch

上文提要：話說我幾經辛苦爬到上果間古老大宅嘅頂樓，坐低透番順條氣之後，就開始腦交戰，因為要落樓食飯，本來食嘢係我人生一大樂事，但係諗到食完飯之後要爬番上呢99級樓梯就真係唔係幾爽呀！不過，肚餓就一定要醫肚㗎喇，而且Tallin除咗古城聞名之外，佢嘅食物都唔差㗎！

鼓起最大嘅勇氣落樓，行番上樓嘅問題係幾個鐘頭後嘅事，唔好諗住。安頓一切便出外醫肚。事先喺網上搵過下資料，行到去廣場中心，見到網上推介的一間很旺場，而且佢亦都安排得好有心，喺門外派好幾個員工，著住古代服裝喺度大派仿古錢幣，除咗幾得意之外，重可以喺店內當錢用，見門外大條人龍，熱熱鬧鬧咁確係吸引，但係我就嫌它看起來太「遊客」。

反而喺正佢對面的一家叫做Peppersack嘅餐廳更吸收我，佢都有搞尐花神㗎，門外都有個小丑喺度表演嚟吸引遊客，個小丑雖然得自己一個但係都表演得好賣力，不過我之所以走入佢呢間鋪頭，同要支持弱小無關，我係嚟搵食㗎嘛，我之所以會揀入去呢間餐廳，當然係同食物有關喇。雖然我未入到去，但係我企喺門外，已隱約聞到麵包香，係好香果隻，直情似樓下麵包鋪出爐果個feel，我的鼻子是小了點，但係冇影響臭覺，覓食能力很高，於是這次我不信人龍，信自己個臭覺，走咗入呢間Peppersack。

入到去睇下尐客人，都知道我係嚟啱咗地方，因為以佢地嘅衣著同手袋睇，佢地唔多似遊客，似本地人多尐。座位排得好密，坐得都幾迫夾下，可見生意都唔差，唔係都唔夠膽排咁密，貪一屋空凳好睇咩！坐底第一件事係睇下左右隔嚟食尐乜，點知好幾台都係啱啱坐底，唯有靠自己喇！

愛沙尼亞曾經由俄羅斯帝國所管治，亦曾經係蘇聯成員之一，咁佢嘅俄國菜應該有番咁上下，而對我呢個香港人嚟講，俄國菜就梗係羅宋湯喇，呢個時候個金髮梳孖辮嘅少女走埋嚟同我寫菜，我問佢羅宋湯好唔好味呀？佢話好好味！於是我先叫一個羅宋湯，然後再叫咗個一個羊肉做主菜。其實有尐多餘，好似你走去生果檔問個阿嬸尐橙甜唔甜，佢梗係話甜喇，不過人就係咁戇居，更何況我而家係遊客，係會智商低幾成！

得咗一陣，個金髮美女就送上一籃麵包。呢籃麵包都幾多嘢，最吸引我嘅係佢點麵包果個汁，真係唔知乜嘢嚟㗎，但係好好食。麵包軟熟而醬汁惹味，我係咁食呀食，到差唔多食哂尐麵包，個湯先至到，嘩，大個湯大盤到呢，真係早知佢咁豪爽，我唔叫羊喇！雖然大盤，但係真係好好飲，飲到一滴不剩。呢個湯先至係五歐羅，真係任何匯率都底呀，我果陣時對10蚊我都覺得抵，更何況而家只係對$8.5左右。

之後，阿羊肉都嚟埋，伴碟唔少，但係肉嘅分量都好多，重有個牛咁大嘅薯仔，真係睇見都飽，以為食唔到幾多，點知一切一塊嚟食，嘩，不得了，尐肉酥軟可口，真係飽都食得哂！呢個羊貴少少，要23歐羅，但係都係物超所值。

埋單我呢份係28歐羅，嗄，原來果一大籃麵包係免費㗎，真係估佢唔到。對這個古城嘅第一印象已經非常良好，一個咁用心做食物嘅地方，尐人唔會太衰，於是我抱住大大漲漲嘅肚腩，開始我嘅古城遊。

這盤羊肉，非常酥軟美味，23歐羅。

這羅宋湯與麵包，5歐羅，不單好味亦飽肚。