加一撮鹽，為食路上

我今日會同大家講下點樣整菠蘿蛋糕，除咗香蕉蛋糕之外，菠蘿蛋糕都係我嘅拿手好戲，主要係我媽媽好鍾意食菠蘿，所以我也懂得好幾款用波蘿做的蛋糕的做法， 而其中最常做的，就是這款「反轉波蘿蛋糕」。

            材料：牛油120克、黄沙糖200克、菠蘿5-7片、雞蛋4隻、一個檸檬嘅皮(切幼絲)、鹽一小撮、白沙糖100克、自發粉180克。
            預熱焗爐至攝氏180度，在一個10吋直徑可上火及入焗爐的焗盆內，放入100克牛油和黄沙糖一同煑溶，離火後將菠蘿片平鋪在溶液上，置於一傍。

            在另一容器內把蛋黄、20克溶化了的牛油及檸檬皮拌好。

            先將蛋白加一小撮鹽打至企身，再輕手拌入白沙糖，之後拌入蛋黃混合物，最後拌入篩過的自發粉，輕手拌混後應是可以流動的厚液體狀，否則可能是蛋太細以致液體不足，這時就要加點水或加點稀釋了的菠蘿汁。再把這麵粉糊倒在早置一傍的菠蘿片及溶液上，放入焗爐焗大概30分鐘。焗好後，覆蓋一只比焗盆大的碟子於焗盆上，反手把蛋糕倒在碟子上，跟住你會見到菠蘿片美麗地鋪喺蛋糕面。

咁就完成了！

何嘉麗嘅晨光第一線生涯都完成了！

我今日之所以同大家整菠蘿蛋糕，係因為佢特別甜，我希望咁樣，可以喺大家嘅印象中留下甜蜜的記憶，因為呢篇亦係最後一篇嘅嘉嘉的為食路上。係呀，做埋今日就走喇，節目應該係一月中至有變動嘅，但係我一早已經請咗假一月會去南美，而且亦已經訂咗機票同酒店，重有同行嘅朋友都請哂假，所以我會早過Cuson同鵬仔離開晨光。

離開晨光亦都代表我會再一次離開港台，心情並唔好過，但係好拍檔難求！年少時好幸運遇上兩個合拍嘅同事，而近日三個老嘢亦都越見磨合，可惜變幻原是永恆，當日如果唔係舊人離去，我呢尐當年新人亦都冇機會上位。今日亦都係時候要讓路喇，喂，你地好自為之呀，要保住二台個金漆招牌呀！

最後，我要多謝電台俾我嘅動人時光，多謝馮棠哥同Wendy過去咁多年唔止一次咁邀請我返港台，多謝司勳同Vincent照顧得我無微不致，多謝我親愛嘅聽眾，特別係嘉友，你們的收聽，無論讚我或者鬧我，都係我向前嘅動力。

工作同生命一樣，並唔由我地嚟控制佢嘅長度，但係我地可以好似煮餸或者焗蛋糕般調效它的味道，若生活得太苦，就要自己找點甜味來調劑，而生活得太如意、身邊太多甜言蜜語的話，也要加一撮鹽以作警醒呀。後會有期！

為食路上，聖誕蛋糕2015

這是去年的制成品

十一月中，是時候開始做聖誕蛋糕了，本來今年不打算講，但當我在何嘉麗Call Me GaGa Facebook上提大家浸乾果時，竟然又有人問做法，於是才又再講一次。做聖誕蛋糕並不需要太高技巧，齊全的材料和充足的醞釀時間就幾乎可以肯定不會失敗。所以做聖誕蛋糕的第一個步驟是先去市場一轉，買料。今年比較好運，材料一早買齊，連比較難得的綠色糖漬車厘子我都搵到。

之後是醞釀，其實就是是用酒來招呼乾果，可以是Marsala，brandy或sherry，我試過用未祝聖嘅彌撒酒，純粹由個人口味出發，而今年我就用了紅酒Merlot！讓喝飽了酒的乾果，用不少於三星期的時間令酒精全面滲入蛋糕內，美味醉人的聖誕蛋糕就完成了！

講完一大輪，是時候開工了。乾果包括：金黃色乾提子350克，普通黑色提子乾100克，加侖子50克，另外糖漬的紅色車厘子、綠車厘子、雜錦果皮各50克，酒一支。把乾果放入大盆內，以酒浸至蓋過所有乾果，務求把乾果全面灌醉，呢枝酒係唔慳得嘅。

雖然酒已浸過所有材料，但仍然要每隔三、五小時去翻弄一次，以確保所有乾果都充份地吸收酒精，因為只有吸飽酒精嘅乾果，才有能力將酒精傳給蛋糕，箇中道理，當你打開個蛋糕果一刻你就明。

浸乾果的時間最好有48小時，如果時間真的緊迫，也不可以少過12小時。或許你可以趁今天去買定所需材料，以便周未做一個100克(六吋方型焗盆)的聖誕蛋糕。

除了上述的乾果及酒外，什材料還有牛油100克、黃砂糖100克、麵粉400克，大雞蛋兩隻，雜錦香料、玉桂粉、鹽各小許，杏仁精華一茶匙，果皮醬一湯匙。

做法簡單得很，預熱焗爐至150度。先把放軟了的牛油與糖攪至忌廉狀，顏色應比未打前淺，另外搞起來感覺輕身便成。

再分別加入雞蛋，每加一隻要先攪勻才加第二隻，之後加入果皮醬，再之後分次輪流加入篩過的麵粉和浸過的乾果（先把酒隔去，並留起之後用），每次都要仔細攪勻才可再加入材料。

然後倒入已鋪了牛油紙之六吋四方焗盆內，放入焗爐內焗2小時或直至試針無黏附物為止。如果你用的是焗爐火數低又或者不是吹風式焗爐，也許要焗2.5小時。

焗好後趁熱在蛋糕面盡情掃上浸過乾果的酒，

再快手用兩三層鍚紙把製成品連焗盆包實，並放在一旁攤凍。蛋糕全面放涼後，先把它從焗盆搬出來，再以一張新鍚紙包好，放入密封盒內靜待最少三星期才拿出來吃，喜歡酒味濃的，可每星期拿出來掃酒一次。在天氣凍而乾燥的地方，可隨手放在陰涼處，但在亞熱帶的香港這個時冷時熱又潮濕的地方，為免蛋糕發霉，便只好先放進密實盒再放入雪櫃了。

聖誕蛋糕並不難做，難只難在找齊材料並用自己愛飲的酒浸至入味，及在焗好後等酒味在蛋糕內揮發的過程，少一點耐性及心機也不行。今年一早已搵齊材料，係一個好嘅開始，預祝大家今年，有一個平安歡樂嘅聖誕！

為食路上，流浮山

早兩個星期，約咗朋友去流浮山，呢個時候去流浮山就梗係想食黃油蟹喇。進食時間係晚上七點，心諗途長路遠咁去到流浮山，汽油時間都用咗，冇理由就咁食完餐飯就走人，於是就計劃早尐入去，再兜埋入去白泥，睇埋個日落至食飯。如果以時間計，最理想就梗係早一個鐘頭前入去睇日落喇，咁就可以睇完日落就有飯食，但係日落唔係你阿媽，佢係唔會遷就你嘅，佢話收工就收工，完全冇得lur！

咁唯有早尐入去，於是五點出發，經過一大程車之後，個天已經越嚟越暗，當時至真係明白，乜野叫做時間唔等人！雖然天色變得好快，但我地相信既然已經到咗流浮山，過去白泥嘅路都唔係好遠，應該都趕得切，可以見到個咸蛋黃！

點知當架車一轉入深灣路已經見前面有車塞住，咦，呢個時間應該冇乜人入去睇日落喇，點解會大塞車呢！轉個彎可以睇遠尐，原來前面唔係有好多部車，不過最頭果度有架軍車，而軍車嘅體積對呢條路嚟講係大咗尐，所以每轉一個彎，都要慢慢腿嘅同時，對頭亦有好多車由白泥出嚟，所以至形成車龍！

於是我地就係咁跟住部軍車，磨下磨下，磨極都磨唔到白泥嘅同時，我係見到我右手邊嘅太陽開始由高位下滑，睇情形佢係好想收工，但係睇情形我亦唔可以喺白泥見到佢，於是，我唔理咁多喇，反正前面又停哂車等阿軍車腿位，於是我將部手機伸出窗影番幾幅留念先！

終於到達白泥，原來有軍車開路一尐都唔好玩！去到白泥竟然喺路邊有車位，梗係喇，人地都睇完走人喇！正在學人漫步沙灘之際，泊車的方向傳來警車響號，叫我地呢尐非法泊車人士好走喇，唔係佢就抄牌㗎喇！唉，都未企定就要走！

但係咁樣磨下磨下又竟然俾我磨到七點，即係有得食喇。

隻隻成包紙巾咁大隻呀！

呢支可樂真係幫到手！

負責訂位嘅朋友一早講咗有乜嘢食㗎喇，有豉油王蝦碌喇，有清蒸鮑魚、有豉椒聖子，有蒜溶扇貝，有蒸魚，當然重有專程為佢遠道前來嘅黃油蟹。點解由朋友訂位？佢識人吖嘛！

食物一一上枱，全部新鮮美味，火喉亦都啱啱好，終於輪到黃油蟹出場喇，嘩，一分為二立即見到成層樓咁高嘅羔出現眼前，真係睇見已經興奮，等唔切喇，一口咬落去，尐羔香到不得了，好好味，膽固醇？坐得埋枱就唔諗咁多喇，一路食一路驚，重衰過食咗過量膽固醇喇，唔嚟好過囉！埋單，真係一尐都唔貴，一人大概四百蚊。

有人話流浮山今非昔比，唉，你同我都今非昔比喇，以我話，流浮山未必冇好嘢食，但係真係要識人好尐，唔係話佢唔收你錢，又或者收你平尐，呢個唔可能喇，人地打開門做生意都要食嘅，唔可能做蝕本生意，但係俾足料同俾靚料你，就已經好好喇！呢個秋天，真係要多尐入流浮山至得呀，有風景有美食，唔係度度有，而且黃油蟹嘅季節重短過大閘蟹呀。

為食路上，上海吃大閘蟹

既然係大閘蟹季節，咁當我去到上海就唔可以唔食大閘蟹喇！上海食大閘蟹嘅店鋪，比較出名嘅有幾間，包括新光、王寶和同埋成隆行。新光我好多年前去過，而王寶和我亦都試過，前者當年係劃一地以套餐形式出現，聽講而家都係咁做，當年已經成700幾蚊，相信而家重貴，佢嘅好處係幫你脫哂殼，然後分開膏還膏，肉還肉、腳還腳咁一份一份食，好處就係唔駛食到手損脷損，唔好處就係你都唔知自己食咗幾多隻，而亦因為佢幫你做哂你冇乜嘢好做，唔好玩！同埋食大閘蟹喺揭開個蓋前，唔知尐膏夠唔夠多果一刻係好刺激嘅！

王寶和好尐，佢可以散叫，而價錢亦都相對合理。係上海的食大閘蟹食肆之中，最親切嘅選擇。成隆行就未去過，正因為未去過，所以今次就專程去試一試。不過我地都係淺嚐即止，因為佢嘅價錢都唔算平，三百幾蚊一隻先至得5两，而且我地第二日就會去上海以外嘅洋澄湖食大閘蟹，果度我之前去過喇，今次係食過番尋味！

喺上海住嘅同學安排之下，我地坐咗成兩個小時嘅車去到巴城。沿途係冇乜風景，大可閉目養神，而去到亦都已經係晚上，所以都冇乜湖光山色可言！不過此程目的係同大閘蟹死過，所以唔睇景就罷！

去到巴城附近已經見到有婦女走出馬路拉客去食大閘蟹，都咪話唔牙煙！再近尐就見到一個二個大牌寫住唔同嘅蟹場名字。我地去上海朋友用開果間，佢先帶我地去後面蟹場睇下，係一個二個浸喺水中嘅大籠，知道我地想食五兩左右就絞起其中一籠，嘩真係倒瀉籠蟹！

話就話俾我地揀，但係冇榜冇盛而燈光又昏暗，再加上水嘅反映，你真係唔知佢地有幾大隻，唯有講個信字！所以熟人介紹好重要。不過有一樣嘢可以肯定嘅，就係尐蟹好生猛。咁幾錢先！哈，呢度係80蚊一隻，哈哈，尋晚食三百幾蚊隻果尐即刻dump，唯有食多幾食維皮喇！

20分鐘後，一大盤蟹殺到，膏雖然未係最飽滿，但係肉味特別鮮甜。果位蟹農同我講話大閘蟹就係咁，膏多肉就冇咁甜，而肉甜尐膏又未夠滿。

咁就易喇，農曆九月就食肉連唔錯嘅膏，而農曆十月就食膏，幾時上去食，自己執生喇。

為食路上，「任食大閘蟹」攻略

我好細個屋企已經貫輸冇咁大隻鴨乸隨街跳嘅觀念，而我喺中電個老闆，亦好鍾意講 too good to be true。所以一分錢一分貨呢個道理，我一早就明，你以為一百蚊真係可以食到碗燕窩？不過如果你信，咁可能因為心理因素，你會覺得自己食完之後靚咗都冇人會拉你嘅！所以對於果尐一個價錢任食嘅鋪頭，我係好有保留。但係有一樣例外，就係任食大閘蟹。

今年精喇，一叫二十隻。

話說呢樣嘢係我舊年開始做，而咁啱又有幾個朋友同我癲埋一份，所以今年食過番尋味。其實我嘅癲係癲得嚟好理性嘅。我係好鍾意食大閘蟹嘅，而我又唔係咁鍾意食好大隻果尐，咁前年有個朋友喺網上團購，幫我買用500蚊唔駛買咗十隻大閘蟹，每隻四兩左右，我當時都驚唔知係乜貨，點知我揸住張團購單至知完來係銅鑼灣老字號，咁已經放心好多，跟住去攞貨、食完，覺得真係好抵食。至知道原來五十蚊隻大閘蟹係好食得過。

之後有記者朋友同我講話紫粵軒個「任食大閘蟹餐」都好抵食，而且佢尐貨係來自外國，所以水準有保證。咁我又心思思囉喎，但係成要成四百幾蚊一個人落樓，如果唔正咪好可憐！唔單止蝕水，重用埋我尐大閘蟹quota，呢樣先至超唔抵！思前想後，覺得都要去試嘅。於是就約埋幾個肯同我癲嘅人一齊去。

嘩，乜咁多花式㗎，又薰衣草、又風沙、又油泡，搞咁多花神都冇用，係完全吸引唔到我嘅，我只食一味，就係蒸。結果我食咗十一隻，但係食完之後我係有尐覺得自己輸咗嘅，所以我同朋友檢討一輪之後，決定今年如果佢再嚟，我地要調整策略。

首先，真係乜嘢都唔可以另外叫，上年我個朋友叫咗一杯香片，結果係加咗成百蚊。咁你又唔駛擔心會口行行，因為佢係有薑茶不停添加，同埋熱水亦都係免費嘅。其實食大閘蟹除非你飲花雕，如果唔係佢杯薑茶都好啱駛，一來夠熱可以消下滯，二來可以驅下大閘蟹尐寒氣，自己喺屋企食，都不過係飲呢兩樣嘢啫。

另外，佢呢個任食大閘蟹餐係包一碗蟹黃羹同一碟類似炸蝦丸物體。根據去年嘅經驗，呢兩樣嘢好long胃，係會影響你食蟹嘅數量嘅，而且食完蟹你會想搵尐熱嘢食下，咁呢碗蟹黃羹，雖然我唔食，因為有蛋，但係真係可以幫你暖下個胃。

一人叫得一隻，食完之後，要等半點鐘至有第二隻！

到咗戲肉部份，就係落單叫蟹嘅時候喇，我地舊年一來唔識路，二來扮斯文，第一次落單一人叫一隻，結果食完一隻再點第二隻，係等咗半粒鐘有多，真係乜嘢心情都冇哂喇！

所以根據去年經驗，我歸納咗呢幾招攻略。
1. 除咗你好想飲花雕之外，唔好另外點任何飲品或食物。
2. 請佢將蟹黃羹同埋果碟炸嘢喺你食完大閘蟹之後先至上，唔好俾佢牙住你個胃，俾佢質到飽哂！
3. 落單叫蟹嘅時候，唔好一隻一隻咁叫，要預備一人食四、五隻，然後喺大家食到第三隻嘅時候再落柯打，咁就喺你食完枱面嘅蟹之時，就有新蒸好熱辣辣嘅另一批貨到，咁個食蟹過程就好順暢，唔駛坐喺度等到冇哂食慾！

今年成績：12隻

最後呢個供略係最重要嘅，就係如果你冇能力食番至少六、七隻，我勸你唔好去，因為一定維唔到皮。但係如果你好似我咁食到十隻以上，咁就真係好抵，第一佢尐蟹嘅質素唔差，雖然只有三兩同埋蒸老咗，但係尐蟹好有羔，另外有人幫你煮埋、洗埋，自己食完拍下手就走得，真係乾手淨腳，心情特別好。

為食路上，豬肺湯

雖然這幾天的天氣並不像秋天，但根據中國的曆法，秋天確實已經在微涼的晚風中駕臨。天氣變得乾燥，皮膚就最能反映真相了。這種氣候就真係要喺飲食上潤一潤，嗱，煲豬肺湯就最適合不過喇！每當我跟朋友說起可以如何、如何去煲豬肺湯，朋友不是不信我懂得煲這湯，就是當我行咗一件奇蹟咁萬般讚嘆﹗唉，中國湯水有幾難，來去兩個要訣：材料加時間﹗不過煲豬肺湯就要多加一個要訣，就係心機。

買個豬肺已經要有準備工夫，你要早一天去同相熟的豬肉檔，請他代留新鮮豬肺一副，如果唔係就未必有豬肺，又就算有都可能唔夠新鮮，又或者新鮮但係個肺好多窿，咁咪一路入水一路漏水，咁咪洗到天光都未洗得乾淨囉！

買到靚豬肺番屋企之後，先洗下個豬肺嘅表面，之後搵一條大概八吋嘅膠喉，如果冇就要去買喇，咁呢條喉係點用嘅呢？佢一邊係用嚟插喺水喉出口，而另一邊則插去豬肺個喉位，之後就開水喉灌水入豬肺內，直至個肺漲滿，再把水擠出，這第一次擠出的水，應是淡紅色的。

之後把這灌水、擠水的過程重複，又重複，再重複重複重複，前後最少半小時，直至擠出來的水，是清澈透明為止，這步驟不可偷懶，未洗乾淨個豬肺便用來煲湯，事實會係點我唔知，因為未試過，但係一句講哂，後果自負！

呢個時候你都應該已經身水身汗，但係只係做咗預備工夫嘅一半，呢個moment唯有繼續幻想煲好之後碗湯幾咁潤，同埋屋企人會幾咁大力讚賞你，如果唔係，真係好想放棄！

咁豬肺都洗到乾淨哂喇，重有乜嘢做呢？你問！嗱，等豬肺洗乾淨後，便用刀把豬肺切成二吋乘二吋左右的方塊，之後再把豬肺方塊洗乾淨，睇下重有冇漬血或者其他尐唔知乜。之後就開火將隻鑊燒熱，把豬肺塊放落去就咁炒，乜都唔好落，就咁白鑊炒，一路炒一路有水從豬肺塊走出來，當炒出來的水差不多滿一鑊，便要把倒咗尐水去，再把豬肺回鑊繼續炒，直至豬肺唔再出水為止。你諗下，如果唔炒尐豬肺，你飲果碗湯其實係尐洗肺水，都咪話唔核突！

好喇，講番個肺，這時豬肺塊的尺碼，大概是未炒時的一半，所以切豬肺時唔可以切得太細塊—否則又係後果自負喇！

由於時間關係，我地事先已經將白菜、菜乾、肉排、南北杏及蜜棗洗乾淨，呢個時候可以將佢地同已經俾你炒到水都冇滴嘅豬肺，放入大湯煲入面煲嘞，先以大火煲至大滾，再收細火至湯水仍然滾動為止。係咁煲一個鐘頭，中間留意下佢有冇乾水，之後就可以放入燜燒煲，再喺飲之前半小時再攞番出嚟煲，咁就得嘞，咁你中間果段時間梗係唔可以得幾個字喇，點都要有番三幾小時。咁如果你冇燜燒煲，又或者冇時間，就要係咁中火煲佢三小時。

咁樣，一煲滋潤養生的豬肺湯便可以上枱嘞！這個湯的製作過程真係非常操勞，飲果個應該非常潤肺兼養顏，但係做果個就勞神而傷肝，真係飲咗都未必補得番！咁如果咁難搞嘅一煲湯都有人肯煲俾你飲，就真係要飲多幾碗喇，一來你要領略人地嘅心意，二來將來佢得手之後未必肯煲㗎喇！

為食路上，樂意牛扒屋

近來聽餐廳執笠的消息聽得多，實在有點麻木！不是對這些餐廳沒有感情，但感情真的不能天長地久，尤其是當餐廳主人的下一代成長了，要接手生意，是獨家經營還好，就算兄弟眾多，但做老豆果個一日重喺度，則萬事得以擺平，但如果當年是幾個好朋友合夥，其中一個而家想插個仔入嚟就麻煩，可能係其他股東唔想佢擺多個人入嚟出多份糧，亦可能係入到嚟唔識做嘢，阻手阻腳，更可能是年輕人想大展拳腳，把餐廳改頭換面，影響生意！無論邊樣，總之發展到第二代，除非冇人想插個仔入餐廳，否則冇爭拗就假嘅！

嗱，早排至有一間就係因為股東不和而拉閘！講真，呢尐餐廳而家唔執，都冇乜用，股東不和，就一定影響資源分配，冇錢買材料，就算你個廚煮到隻雞曉飛，都一定保持唔到水準，遲早俾客人拋棄！

但係另一種執笠，就一定要去支持，就係無良業主瘋狂加租，餐廳被迫離場果種！車，人地業主都要食㗎，做乜話人無良喎！我同意業主都要生存，我係講瘋狂加租果尐業主，你唔好聽咗一句就狂插，好多時聽嘢要聽得清楚尐，唔係有Facebook就可以鍾意就鬧，鬧人都要有根有據，唔係俾人當癲狗就唔好喇！

講番呢間被迫一年後停業嘅餐廳先。佢位於灣仔演藝附近嘅樂意牛扒屋，食過一次之後，你通常都會樂意去食第二次。這次並唔係我主動出擊，而係小芝媽個女阿小芝約嘅。

係星期六下午，以為呢尐餐廳喺星期六應該少人，點知滿座到不得了，唔知係咪個個星期六都係咁，定係執笠效應！安排咗一張靠近窗邊嘅卡位，真係好，一來靠窗可以睇下外面嘅風景，二來卡位係我嘅至愛，未食已經開始加分。

坐低佢俾咗張午餐菜牌我地，係手寫嘅，重係英文嚟嘅添！不過待應喺擺低咗張精巧嘅菜牌之後，亦立即介紹每一款套餐嘅主菜。

朋友分別叫咗牛，而我就叫咗豬扒。

先嚟餐包，唔，係暖笠笠㗎，一手抓向麵包頭，攞埋嚟一搣，嘩，係脆得好緊要㗎，二話不說，即刻揸牛油，然後一手送入口，好味呀！呢個麵包當然又為呢間餐廳加分喇！之後係羅宋湯，呢個湯除咗夠熱之外，就冇乜特別。

主菜到喇，朋友嘅牛我冇得試，但係睇佢地食得幾投入就知好味，至於我嘅洋蔥豬扒就煮得剛剛好，厚身得嚟表面唔老，而入面亦唔會唔熟，重有少少粉紅色，賣相同口感都唔錯，如果要批評，就係點解件豬扒會冇骨㗎，食豬扒最精彩係連住舊骨果附近尐肉吖嘛，快餐店唔識就話啫，呢尐老牌餐廳都唔識，我接受唔到囉！

唔好以為餐飯就喺呢度結束，可以計分，未！咖啡以外，佢地重附送甜品，重係只得一款，香蕉蛋糕，呢樣嘢係我嘅拿手好戲，因為其實好易整，但係易整都可以唔好食㗎！件香蕉蛋糕送到，睇樣非常合格，而味道亦香甜適中，輕輕的香蕉味特別吸引，唯一唔好嘅係有少少乾身。

我嘅豬扒埋單係百五蚊，而四個人加埋都不過一千。食物有水準，冇限時限刻要你起身，環境舒服，但係只有一年壽命，可惜！

最後只有向放喺餐廳門內嘅聖母瑪利亞祈禱，希望佢可以使業主回心轉意，唔好瘋狂加租！

而家搵一間價錢大眾化又唔當你係計時炸彈，驚你個半鐘頭會爆炸，所以非趕你走不可嘅餐廳真係好少，個個用生意難做嚟做藉口，搞到我地食都食到趕喉趕命！辛苦搵嚟自在食，咁委屈，我不如返屋企煮！

為食路上，金壘餐廳

我最鼓勵人食遠飯，嗨，聽緊收音機嘅朋友唔好誤會，我呢個遠，係遠近個遠，唔係軟硬個軟！我唔係鼓勵人，尤其係男士食軟飯，我係鼓勵大家去遠尐嘅地方食飯。

食遠飯有咩好呢？首先，你會去一個唔太熟悉嘅地方，於是你要事先搵下資料，例如點去喇，例如果頭附近除左食重有尐乜嘢行或者乜嘢玩喇。咁如果你係一家人，喺呢個過程中，就可以藉此增進家人嘅關係，咁周未周日，就唔駛淨係行商場咁沈悶喇！咁，行商場都唔係冇好處，就係唔駛諗，去到實有嘢食，而香港而家嘅小朋友亦都習慣左假日活動只有行商場，但係佢係你個仔嚟㗎，香港係你長大嘅地方，你有責任向你嘅下一代介紹下香港呀！

唔，長氣左添。我細個嘅時候已經好鍾意食遠飯嘅，尤其是去元朗，因為我個姑姐喺元朗教書，佢每年到左呢個時候，就會叫我地入元朗玩，重會帶我地去留浮山食蠔添。不過今次我唔係講食蠔，係講食西餐，而呢間亦唔係細個同屋企人去，而係大個女同朋友去嘅。

話說我今日要講呢間兩老牌西餐廳，喺元朗八鄉嘅金壘，門口有巴士小巴經過，不過我係開車去嘅。其實都係喺我入左電台做至識得去呢間餐廳，而家開車入去就好方便，一條路直入，沿途景物舒適開朗，淨係呢程車都值回票價，咁，話就話一條路直入，但係唔係一定唔塞車嘅，不過我近排多數假期入去，都好暢順就亦都係事實。

間餐廳有車位嘅，汽油如果平尐，去一次真係一件賞心樂事。佢近幾年裝修過，冇左以前果種舊式餐廳嘅感覺，但係勝在光鮮乾淨，如果秋天或者初冬嚟到，坐喺外面真係風涼水冷，不過希望唔好太多人食煙，如果唔係就重浪漫，變成煙雨淒迷！

食物方面，冇乜退步，亦冇乜進步，咸豬手依然係最受歡迎之作，有番四五個人嘅檯差唔多都有叫，而佢嘅炸魚亦都係做得唔錯嘅，不過我次次去都係食咖哩，真係幾好味嘅，所以我今次亦都點左咖哩雞。單點加$45就可以轉做餐，咁我一定轉喇，因為我鍾意飲羅宋湯吖嘛。朋友因為想飲鮮蠔周打湯，所以冇得轉。

待應喺檯面放低小籠包連牛油就行開，你唔好誤會，係一個小蒸籠入面放左兩個餐包仔啫，轉頭羅宋湯就到，嘩，乜咁細碗！

不過算喇，$45連湯包咖啡或茶係咁上下喇，人地開門做生意，燈油火臘人工都唔少錢。碗湯個味道唔錯，不過真係少左尐！朋友嘅蠔湯到，唔係餐湯就梗係大碟尐，但係朋友一𢳂、再𢳂，乜只蠔咁細隻，要打撈一輪至搵到！

到我嘅咖哩雞飯喇，好香，一放落檯已經聞到，立即𢳂番一羹嚟飲下先，好味，依然係我食開果隻味，二話不說將尐汁撈哂入尐白飯度，講真，食咖哩飯其實唔駛食餸，個汁正已經可以送哂成大碟白飯。但係既然有雞又冇理由唔食，不過一食就扣分，尐雞唔新鮮！佢呢尐又唔係雪雞，因為肉嘅質感好好，但係有一陣雪味，究竟係隻雞隔夜被迫變成咖哩雞，定係隻雞處理得唔好而留有雪味呢？我唔肯定，但係隻雞同尐咖哩係冇friend到就係一定嘅，因為雞依然係雞，除左面頭果層有咖哩汁外，你基本可以當佢係一舊有雪味嘅蒸雞嚟食都得！確實係有尐失望！

我重會唔會去？會，我下次會夜晚黑去，雖然我已經好少夜晚去果度食飯，點解？吖，唔記得話你知，我地以前鍾意去咁遠嘅其中一個原因係可以遠離人群，食下嘢、飲下啤酒、講下人生，而家都唔可以飲酒開車，重點會途長路遠去得咁密喎！不過我真係會搵晚再去試真尐，夜晚個廚應該唔會俾尐咁嘢我歎！

為食路上，Mango Tree，泰菜

認識我嘅人，都知道我好鍾意去曼谷，我鍾意果度尐人夠簡單，亦鍾意果度尐治安，對於一個遊客，甚至係單身遊客嚟講，都係好好嘅，咁當然，我唔會去尐環境太複雜嘅地方。至於食同住就更加係冇得彈，泰國菜固然比我地九龍城果尐價廉味美又新鮮，而意大利菜甚至法國菜，除左美味之外，重係同樣價錢不同幣值，即係同樣係300蚊，但一個係港幣一個係泰銖，咁你話點會唔食。

重有酒店，五星級酒店一般要成四五千蚊一晚，但係喺曼谷，如果就啱有酒店連機票套餐，真係千零蚊就有得住。咁你話對於我呢尐為食懶人嚟講，點會唔成日心思思想去喎！不過近年真係去少左，局勢不穩就一定有影響。我試過喺紅衫軍事件平靜左之後，去曼谷玩，但係當我食完碗海南雞飯行出鋪頭，就見到有一大隊插住紅旗嘅電單車隊巡遊，雖然後尾酒店話佢地只係巡一陣，但係當時個心都驚一驚㗎！之後有幾次好似平靜左，但係坐的士時，們的士司機又會兜你去Lumpini Park，去到個司機會對住你指手劃腳，解釋點解咁多人著紅衫，雖然冇幾耐佢就會車你去目的地，但係個心都會冇咁定。所以今次四面佛炸彈事件真係嚇到我唔敢去住㗎。

好奇怪喎，好似有一段時間冇去曼谷之後，個心係會掛住尐泰國菜，咁你話可以去九龍城喇，果度大把喇！係，係大把，但係冇感情呀！最後，的起心肝，我走左去Elements果間Mango Tree。咁呢間又有感情咩？有呀，因為每次我由曼谷番嚟，我都一定喺佢機場禁區入面果間芒果樹食番碗牛腩麵同食下其他泰國菜，真係有一種沖線嘅感覺。

咁點解去Elements呢間要的起心肝至去到呢？因為佢貴過曼谷果邊好多呀！

果日我冇訂位，去到walk in都即刻有檯，不過限時個半鐘頭還檯，呢個問題唔大。安排左喺右手面一個望窗位置，我話可唔可以坐窗邊，佢話有人訂左，咁冇所謂喇，於是趁佢地人未到我先影番幾張黃昏景相先。

一坐低我就叫左個大蝦柚子沙律，嚟到見唔算大碟，蝦亦只得3隻，但係都算新鮮，味道亦唔錯，少少辣。食下食下，聽到click click clock clock嘅聲音，原來待應帶緊兩位內地美女入座，樣靚、身材好、滿身名牌，就係俾對涼鞋出賣左！

之後我地又叫左一碟糯米釀雞翼，炸得幾脆，不過尐飯爛左少少，佢喺飯入面加左尐泰國香草，味道唔濃，但係好惹味。其實一人一隻連皮食埋都幾飽，但係我地重唔收手，再叫一碟芒果蟹肉炒飯，初時擔心炒飯會有蛋，問清楚至知原來係冇嘅，碟飯炒得乾身左尐，但係尐芒果同提子乾加入尐炒飯度，又好開胃喎，於是我又忘記左自己其實已經幾飽㗎喇，又食左兩大碗。

真係好飽喇，甜品都食唔落喇。食飽坐陣先，飲番杯茶解下滯。咦，點解忽然間咁靜，哦，原來兩位美女埋單起身走人！

我都走人喇，埋單四百幾蚊，以呢個環境、呢個地段、呢種服務計，唔貴，但係同曼谷比就一定係三倍價錢喇。

到我地食完哂埋單，窗邊果兩張檯都重係冇人坐嘅，一個咁上佳嘅位置，唔知點解佢要留位俾空氣都唔俾我地坐呢！係咪對我唔訂位嘅一種懲罰呢！

為食路上，豉油西餐、莎厘娜

豉油西餐，聽個名都知係中國人喺西餐上加鹽加醋而煮出嚟㗎喇！因為西餐一般係用鹽同牛油麵粉嚟煮，呢個你睇番一兩本西餐食譜都會知道。咁點解會搞出一個豉油西餐？我冇去考究呀，但係諗都諗到，係有人食過西餐，又或者打過洋人工，番屋企想煮俾屋企人食又或者想搞間西餐廳，但係牛油又貴喎，於是貪就手咪用豉油嚟煮囉。

我細個去呢尐餐廳食嘢時，係唔知佢地叫做豉油西餐嘅，根本未上過正式嘅西餐廳，見用刀叉食嘅，就當係西餐廳喇。咁其實我呢個定義都幾濫，因為一般嘅茶餐廳，果時都會俾刀叉嘅！講番豉油西餐先。細個時最想去嘅，唔係皇上皇，雖然我去得呢間最多，我最想去嘅係車厘哥夫，感覺上佢高檔尐，同埋食完大餐之後，係有後逐利益，就係阿媽會買包了傑糖番屋企，俾冇得嚟嘅哥哥姐姐食，咁你以為我有得嚟呢度食，番到屋企就冇得食糖咩！唔會喇，包糖係我帶番去嘅，我實會抽完稅至輪到佢地食喇！

豉油西餐廳除左尐食物用豉油煮之外，佢嘅另一特色就係暗，有尐甚至係近乎黑添！至於點解？我又係唔知，不過相信係受粵語殘片果尐高檔餐廳嘅佈置所影響啩。

喺豉油西餐廳我學識食嘅第一樣嘢係沙律。果陣時真係覺得係一件好潮嘅事，首先，沙律唔係中文嚟嘅，係由英文salad音譯過嚟，咁同同學講話自己食過沙律，佢地個個都吖大個口，然後就會問：咩嚟㗎？好唔好食㗎？講真，我其實覺得沙律唔好食嘅，因為我第一次食嘅沙律，係有好多一片片烚蛋擺喺度嘅，而我係唔食蛋嘅，所以要好小心咁揀尐未被污染嘅菜出嚟，所以其實我唔太鍾意食佢，但係當同學未試過，我就梗係大吹大擂喇！

其實豉油西餐中，我最鍾意嘅，咁多年都係佢嘅羅宋湯，味道同我地嘅中式湯真係有好大嘅分別，不過而家尐羅宋湯又真係冇左以前嘅味道！唔好話我淨係掛住懷舊，成日以為只有舊嘢至好！嗱，上個星期就俾我搵番一間重好得嘅豉油西餐廳。呢間餐廳叫做莎厘娜，位於高街，對於讀港大嘅同學唔會陌生，不過佢而家搬落左一條街，話說啱啱過左嘅呢個星期六，我去聖安多尼堂做分享，通常做嘢之前，我都會搵餐好嘅俾自己食。開車去到門口，竟然有車位，嘩，你話呢個唔係上天嘅恩賜都唔信喇！

坐到入去，周到嘅待應已經奉上午餐牌，見我地睇嚟睇去冇乜心水咁，又奉上大餐牌，其實我地唔係唔知食乜，係乜都想食。結果我叫左我最鍾意嘅雞皇飯，而朋友叫左煎龍脷，而餐湯就梗係揀羅宋湯喇！

羅宋湯駕到，真係不同凡響，熱辣辣而暗紅嘅湯，隱隱然傳來一陣香味，唔係蕃茄西芹咁簡單，冇錯喇，係燈籠椒嘅味道呀，呢個味道，令羅宋湯多一重口感，而厚身嘅燈籠椒亦令湯渣多一份質感，好味呀！真係控制唔到喇，一羹又一羹係咁飲，直至聽到烹一聲，原來係隻匙羹碰到碗底嘅聲音，哦，原來已經飲哂喇！真係好味。咁你話同記憶中嘅味道係唔係一樣？咁又未必，但係都有八九成喇！

之後嘅雞皇飯，對呢間餐廳嚟講亦係佢地嘅拿手好戲，唔好食就假嘅，佢嘅白汁真係又厚又香，當然連加一至係一百蚊嘅午市套餐，你唔可以要求佢用新鮮雞，但係臨尾重有杯香濃嘅咖啡，我真心覺得係物超所值嘅！

朋友嘅煎龍脷，睇相都知靚，而佢嘅汁亦都係別有韻味嘅。我真係講唔到佢有幾好食，你不如自己嚟試一次喇。

為食路上，掃街

你有冇試過掃街呀？唔係真係攞把掃把落街掃果尐清潔大隊長喎，我地呢個環節叫做為食路上，就梗係同食有關㗎喇，我所講嘅掃街，係真係沿住條街一路行一路食。咁你可能會問，而家邊度可以咁食法呀？係呀，而家真係唔知邊度有得咁食法呀！如果你知道邊度重有得掃街，唔該通知聲。

我最後一次真正嘅掃街係喺佐敦寶齡街，，好多年前喇，果度一到傍晚放工時間，尐車仔就唔駛二十秒，全部湧哂出嚟，之前又完全唔覺佢地踪影㗎啵，之後各就各位，有尐似而家行人專用區咁，自己知道自己位置，唔會擺錯位，當然背後有尐乜嘢有勢力人士做過手腳，我就唔知嘞！

之所以叫做掃街，係真係檔檔都咁好食。我通常會先剪番一串牛榜、牛肚，然後一路食一路行過唔夠三步嘅隔離果檔買一串炸大腸，咁你唔好以為我會攞到一手都係，係唔會嘅，因為炸大腸係好好生意嘅，你要排下先至有得食，咁我會大叫一聲：一串炸大腸呀！咁老闆會岳一岳高個頭，認住你個樣，跟住又dub低頭繼續切佢嘅炸大腸同埋另一樣唔記得係乜。老闆好勁，就算前面有成六七個人，佢都可以認清先後次序，永冇出錯，咁我企喺處等嘅時候除左食我嘅牛榜牛肚之外，又可以做尐咩呢？嘩，好多嘢做㗎，睇下附近重有乜嘢食喇，睇下條大腸喺個盤上面俾猛火煎到彈彈下個樣喇，同埋睇下老闆手起刀落切大腸都好好睇㗎。

食完條俾老闆切成一片片，搽滿芥辣同甜醬、香脆無比嘅大腸之後，我會去食番碗碗仔翅，係呀，我好豪㗎，唔食生菜魚肉嘅，淨係食翅。都唔知係真係鍾意食翅而冇錢食定係鍾意尐麻油味，其實係槳粉嚟嘅啫，有乜咁好食呢？唔知，但係我通常係可以食兩碗嘅！

食完翅其實都差不多，不過我係控制唔到自己唔去食雞腳墨魚嘅，尐雞腳同墨魚都係橙色嘅，記得佢個檔係零捨不同，係一個木櫃框玻璃箱，好似好乾淨咁，而佢用果把刀同炸大腸果把又唔同，係短身嘅，而尐雞腳係凍嘅，不過好好lun，尐腳筋真係好好𡁻，而尐雞骨係咬落有雞味㗎！

其實食到呢度都真係好飽喇，但係又冇乜點食過嘢咁，於是我通常都會買番底雞蛋仔嚟揸下手，好似會飽肚尐咁，不過多數都係meet 下meet下嘅啫，唔係真心食，邊度重食得落呀。不過番到屋企俾阿媽問起食過乜，我至少話有底雞蛋仔好似實在尐啩！

諗番起都有尐流口水！好多年冇掃過街喇，你呢，你幾耐冇掃過街呀！而家好似冇乜地方俾你咁掃法，真係一架一架車仔泊住一齊，你順住條水落去就可以督下督下咁有得食，真係好開心㗎，而家呢尐車仔檔上哂鋪，一來已經唔係果回事，二來價錢又貴到離譜，而最重要係一個鋪頭賣哂，冇以前果種由街頭食到街尾果種掃街feel，係差好遠囉！

不過上個星期，我又體驗左一種新嘅掃街型式。話說我計劃去威，點知個天要落雨，冇法喇，於是同朋友走左去茶餐廳坐，當大家都食緊早餐時，我地其實已經食左，於是就咁叫杯咖啡就坐左成朝，好彩果時個成11點，個場唔算旺，唔係真係俾人掃我地出街呀。坐到十二點幾，人開始多，於是我地就轉場去食晏，食左碗墨魚丸河之後，飲埋枝可樂，就行下行下，行左去食糖水，之後重買麵包番屋企食。每樣嘢都幾好食。

蝦，咁樣坐下食下，行下食下，唔知可唔可以算係現代掃街呢！喺冇辦法嘅情形之下，雖然掃得遠尐，冇左右隔離咁多檔俾你揀，但係都算係聊勝於無㗎喇呵！

嘉嘉的為食路上, 美華菜館

話說呢個星期日我去左美善同道果間美華菜館搵食，間鋪頭個老闆娘咁樣同個客講：你嚟幫趁唔係大哂，我唔做你生意至係大哂。好有勢，真係要有番咁上下至可以講呢句話。其實聽過呢間鋪頭好耐，不過對於美善同道我係好驚嘅，唔係驚有賊，係驚行錯路，果頭對我嚟講係一失足成千古恨，錯過左個街口就唔知要兜到去邊先至有回頭路。咁今次有人願意做司機就唔同咁講法喇。

去到係下午一點半，係刻意避過午飯最繁忙時段。但係去到都重係滿座，不過有幾個位埋緊單。冇幾耐就坐低，嚟舊式上海鋪就一定要食上海湯麵，呢個係我個人喜好，另外見到枱枱都食緊小籠包同窩貼，收到喇，呢兩樣一定係手本名菜，於是又每樣叫一籠，呢個時候老闆娘發聲，真係全場收到，兩樣只可以叫一樣！

我個心當然有少少唔高興，但係見個場咁多客，而蒸籠只可以蒸果幾籠，師傅亦都已經不停手咁包，於是算，就揀左窩貼。不過老闆娘都有好體貼咁補番句，佢話如果之後有多，會俾一籠我。咁又合理喎，佢都想個個客都有得食啫。之後我又叫左其他食物，只見佢不停咁叫我唔好再叫喇，食唔哂唔好呀！啱，食唔哂唔好，但係我食得哂吖嘛！

黑醋排骨先到。佢有三款排骨，我個心係想食酥炸排骨，但係老闆娘推薦黑醋，到我見到係兩碟一齊出，我就明點解。個黑醋味唔錯，排骨都諗得嚟幾有𡁻頭。

之後，係我嘅上海湯麵，對於呢個麵，我係非常有資格講好定係唔好，因為我真係食左幾十年上海湯麵，以我嘅經驗，呢個麵嘅湯要好濃、面頭尐肉絲唔駛多，夠味就得，而最重要係大白菜嘅絲要多要諗，再加一個豆板醬，咁就very good嘞！

呢碗麵嘅湯係淺啡色，顏色不對。飲一啖試試，味道都不對，飲落口毫不滿足！面頭尐菜唔夠諗，亦因而唔入味，又切得太大條，整體嚟講，唔係一碗有水準嘅上海湯麵。坦白講，好失望，因為喺香港自從小巴街果間上海鋪冇做之後，可以食到好味嘅黑色上海湯麵已經好難，一心以為呢間係我嘅安心之所，點知！

希望鍋貼會好尐喇！都係有少少失望，睇個樣就知，可以煎多兩分鐘就好嘞，而家係熟但係表皮未脆，咬落去係韌嘅。另外，我地亦分配到一籠小籠包，不過不失，不過尐薑絲真係切得好幼細，值得一讚！

臨尾見隔離位叫高力豆沙，老闆娘話一碟八粒，你食唔哂，唔好叫，嘩，咁我重唔乘機，我話，我同佢分呀！老闆娘見我咁欣賞，就話，平日唔可以，今日我幫你做！呢碟高力豆沙，係食得過嘅。

埋單二百零蚊，唔算貴，但係我相信我係錯過左佢嘅黃金時期，又或者係我叫錯嘢，但係基本功係唔會冇左㗎！如果連上海湯麵都做唔好，就唔好咁大口氣喇，雖然話小店有情，而無可否認，老闆娘係性情中人，生意亦都好到佢做唔切，但係打開門做生意就點都要顧下客人感受，因為你尐嘢好食就話俾你丙下當係情趣，如果尐食物唔能夠保持水準，到時你想做生意都冇人幫趁，重可以咁豪咁話我唔做你生意咩！