曼谷2015，馳名的文華東方自助餐

去曼谷旅行，似乎亦代表了暴飲暴食，去到說要減肥的是會俾人藐的！所以去曼谷食自助餐就成了必然行程。曼谷出名吃自助餐的地方主要有三間酒店，我之前在節目都略為提過，這三間酒店就是Sukhothai、Four Seasons(現改名為Anatara)及我大力推薦的文華東方。以價錢計，三間都差不多，而以Four Seasons 的最貴，但它也貴得有原因的，因為它是一個sparkling buffet，即是在食之餘，亦可以任飲有汽酒，注意，是有汽酒，不是香檳。不過如果不飲酒又或酒量有限的，也很難回本，而由於生意實在好，它的坐位安排得比較迫夾，雖未至於背碰背，但也可以伸手去隔離張檯篤佢尐嘢嚟食！

另外的Sukhothai，它的食物也很有水準，而曾經最吸引的就是佢個果汁檔，幾十種生果擺到五光十色，重可以隨你心意溝果汁嚟飲，諗番起都興奮，但而家已經冇支歌仔唱嘞，聽講話得番幾款咋喎！況且佢嘅甜品一直都冇乜進步，所以近年我都少去。

咁點解我會大力推薦文華東方的Lord Jim's呢？因為佢夠全面。價錢方面，如果係閒日，就連稅大概2000銖，星期六、日或者假日就係3000銖左右，價錢唔同當然食物都有分別，我試過閒日去冇得食鵝肝，而今次就冇得食生蠔，而其中分別最大嘅就係甜品，閒日真係少好多。

呢幾隻蠔係上次食嘅，假日，今次冇生蠔呀！

Lord Jim's就喺酒店正門入口右手邊樓梯上，地方唔算大，但係坐得比較疏，唔會背碰背，喺你入坐之前其實已經見到有沙律吧、魚生吧、中式蒸物包括蒸魚、扒車包括羊扒、牛扒，再行前尐嘅右手面就係煎枱，其中最搶手嘅就係煎鵝肝，再過就係日本食物，包括天婦羅，而左手邊就有頭盤、海鮮同甜品。呢個時候如果你太心急就會亂左陣腳，作必須要問下自己最想食乜、最多可以食尐乜，然後再作選擇，否則你一入門就俾佢尐蒸魚吸引，食唔夠兩舊就乜都飽哂喇！蒸魚，香港冇得食咩！

我次次去親，都係先食一打生蠔（如果有嘅話），再食六件煎鵝肝，然後再加兩塊牛扒。點解我咁揀？一來係我真係鍾意食，不過鍾意還鍾意，都要考慮圍皮嘅問題，就算好鍾意飲麵豉湯，你都唔會走去飲兩碗啩！二來自己喺屋企煎鵝肝，會彈到一地油，一路食諗起之後要抹地會好唔開心。咁食完呢三樣嘢之後，我係未飽嘅，就可以睇下有乜頭盤嘞，今次我覺得個龍蝦肉最鮮味。

你可能會問，咦，你唔食魚生嘅？係呀，我唔係隨便食魚生㗎，而且我見佢尐魚生貨式普通，不如留肚食其他嘢好過喇！

今次我食鵝肝有少少得著，事關我見果鍋煎鵝肝上面有尐好細粒黃色物體，其他人就撥開佢淨係夾件鵝肝，我好奇呀，於是夾粒試下係乜嘢嚟嘅，點知原來係芒果粒，咦，呢個配搭感覺上幾啱喎，而且人地大廚咁安排得，一定有道理嘅，於是我又去芒果糯米飯果邊夾佢半個芒果試試，果然，係天造地設嘅配對，芒果嘅清甜，完全可以抵消鵝肝嘅油膩，食完六件都唔覺滯，真係想再食多幾件！不過唔覺滯同唔滯係兩回事，都係節制下好尐！

之後就係食甜品喇，一枱都係真係唔知食邊樣好，但係食乜都好，都要先去攞番兩件馬卡龍同叫甜品枱個阿姐幫我整件橙酒班戟Crepe Suzette，可惜呀，而家嘅Crepe Suzette已經係預制件，唔似以前咁係即場做，味道梗有分別，氣派都唔同喇！

又係假日至有呢個陣容

最後，嚟杯咖啡，望住越嚟越繁忙嘅蕉柏椰河，感受下當日名作家喺呢度摘取靈感嘅餘韻，，陽光已經曬到入屋喇，不過曬我唔到喎，因為我一入座已經知會曬親，立即要求換位，所以至可以悠然自得咁坐喺度望住條河發呆！

曼谷2015，Another Hound Cafe

曼谷另一間新開的商場在Phrom Phong，位於Emporium的對面，叫EmQuartier。而聞說Emporium的Grey Hound，已改了名為Another Hound，走高檔路線，我心諗，所謂高檔應該是貴價的同義詞吧！一出BTS站，已覺四周豁然開朗！以前由BTS過Emporium的出口，陰陰窄窄、鬼鬼祟祟的，但現在是很寬敞的一片，一邊是Emporium，而另一邊就是EmQuartier，感覺絕對良好！由BTS走入Emporium，第一間餐廳叫Mercedes-Benz Cafe，佔兩個鋪位，一間是餐廳，另一間是車行，沒有時間入去看箇究竟，你食完話我知乜水準。

再前行，在以前Grey Hound的同一位置，就是Another Hound。Grey Hound雖說在香港也有分店，但我食過一次之後，是不會再在香港吃的，因為價錢雖然相近，但一個是泰銖，一個是港幣，超貴，有得揀，梗係食泰國版！而且曼谷的味道真是地道得多。講番呢間Another Hound先，初時以為佢改左個名而已，食物應該差不多，而我一心想食碗冬陰公湯麵啫，因該唔難啩。點知一打開餐牌，雖然都係英文，但係真係魚生同壽司，完全唔熟！

為左打發個待應，我地叫左嘢飲先，俾尐時間自己去研究個餐牌，好過佢外父咁礙棟喺度！朋友叫百爵冰紅茶，傳統貨式，無甚特別，唯一分別係佢舊冰好大，而呢舊冰係由百爵茶結成嘅，所以唔會越飲越淡。另一位朋友飲西瓜Shake，我試左一啖，嘩，個西瓜味清新到不得了！而我就叫左杯青芒果Smoothie，香港少有吖嘛，味道都非常好，，而以呢三杯計，西瓜Shake係最好飲嘅。

將個餐牌反轉地研究左一輪之後，朋友分別叫左蟹肉意粉(Spicy Linguine w/ Crab)同豬肉煙肉飯(Rice w/ Pork & Bacon)，而我就叫左一個齋睇名唔知係乜嘅意粉叉叉叉(Spaghetti Cha Cha Cha)！

率先駕到的是蟹肉意粉，嘩，好香哇，未得朋友同意已一隻叉拮入去捲左成圈粉嚟食！我嘅味覺真係正，從來冇出賣過我，個意粉除左香，重好惹味，重有少少辣，呢樣係泰國人嘅拿手好戲，辣得你心猿意馬，但係又唔會唔舒服。反而蟹肉味唔係好出。

之後係豬肉煙肉飯，看似平平無奇，但係好食到不得了，你可以幻想豬肉餅加煙肉嚟剁，會係點樣？係好有一種咸香味，同咸魚肉餅唔同食法，但我相信概念相同。是非常出色的fusion。

到我果碟唔知乜叉嘞！送到面前，見佢無味無相，不過係墨魚汁意粉一碟，再睇真尐，哦，原來係海鮮墨魚汁意粉！點解人地叫果兩碟咁色香味全，我呢碟咁普通㗎，原來佢個Cha Cha Cha係差差差，好差果個差呀！算喇，三個只有一個唔好，算唔錯㗎喇。而且今次主要係見朋友，唔好俾碟粉影響左心情。

點知就係我開口𡁻果啖粉嘅同時，我嘅味蕾開始歡呼，嘩，點解嘅，咁好食嘅！有尐乜嘢材料呀！又係泰國人的拿手好戲，佢用一大堆香料混雜，令到個意粉充滿各式味道，不斷咁刺激你嘅味覺，嘩，好彩我叫左杯Smoothie，可以用佢嚟平靜番個驛動的味覺，唔係就真係唔知點算喇！

雖然呢度冇我想食嘅炸雞翼同冬陰公湯粉，但係我真係一尐怨言都冇，因為呢間Another Hound嘅fusion菜，真係做得好成功，至少我地隨心叫的這三個菜，均甚有水準。埋單1595銖，折合港幣370蚊。

曼谷2015，曼谷隱世蟹煲

話說我有一個朋友，佢一年都要來回曼谷五六次，而每次見佢喺Facebook度甫出嚟尐相，又一定有一間大牌檔，而每次又都會見到佢唔係喺度排隊等入坐，就係見佢坐定定扁口扁面，表示等左好耐都重未有得食咁款！我呢個朋友係真正果隻大少，你要佢咁等係冇乜可能嘅，除非真係好好食！

終於忍唔住口走去問佢，佢俾左個地址我。嘩，我又唔係當地人，雖然上網大概知道地點，但係都唔敢肯定。朋友臨走重提我，人地成五點至開檔㗎，你唔好咁早去呀，但係你又要早尐去喎，唔係有排等呀，不過你又唔可以太遲去喎，佢得四樣嘢賣，賣哂就收檔㗎喇！咦，好複習喎，好有性格喎，啱我！但係我仍然係唔知點去嘅！

撞下彩喇！見有一日天氣唔錯，於是我就將個地址交俾酒店個門房，佢一睇就猛點頭，我問你知喺邊呀，佢話知，不過佢冇食過，但係次次經過都好多人，然後佢俾左隻手指公我，表示我識貨！嘻！之後佢同個的士司機講左一輪，到我上車，的士司機又俾左個like我，我個心都好定！十零分鐘車程就到，的士停喺對面，真係得一個大牌檔，傍邊放左幾張枱仔，可能真係早，得一兩枱人，對過相片，同朋友食果間一模一樣至坐低。四眼哥哥放左一張餐牌喺枱面，再加多句我地有百事，想飲酒就自己去711買，咁就走人。

果然只係得粉絲蟹煲、粉絲蝦煲、螄蚶同埋青口四樣，除左baby blue，對於青口，尤其是係大隻果尐，我係冇乜興趣嘅，於是點左三樣，並且去檔口前小小果間711買左罐泰國啤。

之後就叠埋心水坐喺度等喇，不過可能真係早，我啱啱開完罐啤酒佢碟螄蚶就到嘞，正想起筷，點知之前個四眼哥哥又出現，原來要幫我移枱。咁等我形容下原本位置先。

我原本係靠住一匹二匹布坐嘅，但係佢而家叫我搬出尐去近馬路嘅行人路邊，點解嘅！原來人地布鋪要收工。咁當尐布移哂入鋪頭，而員工亦將原本泊正門口嘅電單車開走，阿四眼哥哥又好敏捷咁喺原本擺布匹嘅地方再排出另一列枱凳，嘩，而家終於見到個陣容喇！

忽然間尐客人好似約埋咁，以9秒9時速坐哂埋位，而喺過程中，我嘅粉絲蟹煲同蝦煲都到嘞！可憐我碟螄蚶就係因為我八卦睇人地開枱而攤凍左少少，但係當我一叉拮落去再順手送入口，果種鮮味依然喺度，停唔到口喇！

朋友話，不如叫過碟，我話，你睇下尐人，我諗要等兩個鐘至輪到煮我果碟！唔係佢手腳慢，而係佢真係得四個火爐仔，咁你話點會唔係有排等呢！

唔理喇，繼續食螄蚶，香港唔敢食之餘，亦可能冇咁鮮味嘅貨式！唔，咁同時亦都唔可以待慢我果兩個蟹煲同蝦煲呀。好味，真係好味，蟹肉鮮甜、蝦肉彈牙！有冇味精？一定有，但佢勝在材料新鮮，真係見佢一隻隻蟹同蝦排哂喺個檔前面，有人點就攞嚟煮，冇花冇假！

煮法亦都好簡單，就咁用尐香茅、乾蔥、香草墊底，跟住放隻蟹或者3隻大蝦落個煲度，到咁上下，呢樣要睇師傅經驗喇，佢就放埋粉絲，再過一陣就一大把蔥咁放埋入去，扲蓋，就上枱。材料、程序都俾你睇哂，分別就係用料同埋時間嘅掌握。

三樣嘢都好好食，而最殺食係佢個價錢，埋單630銖，折合港幣150蚊！呀，差尐唔記得講地址: Charoen Rat 4, Bangkok

曼谷2015，Central Embassy + high tea

曼谷近日新開了兩個大商場，一個在Phrom Phong 的EmQuartier，另一個是在 Phloen Chit 的 Central Embassy，此外，Siam Square的兩期商場，在劫火後又已重生並出落得標致可人，所以如果你是那種有嘢買就開心的shopping精，你不會太失望。

由於另一日約了朋友在Phrom Phong，所以先去Central Embassy走走，要了解一個商場，它的Food Court也許是一個起步點，反正已有很長的一段時間未食過Food Court了，於是決定這次旅程的第一餐就交給它。我們去到是大概一點左右，是刻意的避了當地人的十二點午飯時間，但沒想過這麼靜，真係quieter than ghost，靜過鬼！

唔緊要喇，靜靜地重好，食物得就好喇！你見得我咁寫，都知食物唔係特別好，而且選擇不多，同它的名字Eathai一樣，絕大部份是泰國食品！不過又唔係差，65銖一個海南雞飯，不過涼粉冰就要45銖，基本嘢囉。但係個菠蘿沙冰好清甜、醒胃。

食飽上去行下。聽講五樓有嘢食，反正唔係太飽，可以繼續，但係一出lift，竟然見到鼎泰豐，講真，係有少少驚！行過少少重有間建興酒家添。個商場真係好有氣派，可惜冇乜人！於是我係咁意上上下下走一轉就走人！從衣服品牌，到酒樓食肆的安排看來，呢間商場，應該啱本地闊太去多尐。

好彩我嘅至愛Central Chitlom就在隔離，如果唔係咁樣走一轉Central Embassy真係唔抵。入去個超級市場買左尐水果，又上左去樓上買毛巾，咁跟手就行埋去Amarin Plaza間Green Cotton買浴袍，呢度尐浴袍質地好好，同大百貨公司尐品質相同，但係平起碼三分一。你見我講得咁輕鬆，唔好以為好近，不過與其又上又落咁搭一兩個站而又兩頭唔到岸，要行番轉頭，就不如落地行。而且除左一小段路面外，大部份都係行人天橋，所以都唔算太辛苦。

其實正話喺Central Embassy真係冇乜點食嘢，因為佢真係冇乜嘢好食，既然係咁，而又就腳，亦真係咁多年都未去過，就索性行過隔離Grand Hyatt間Erawan Tea Room果度食番個high tea。

嘩，很多人！雖然冇訂位，但幸運地窗口位有人埋單，位置又剛好望到隔離四面佛像的活動，非常有趣。不知這是不是港客集中地，但我見四周並無港人，反而新加坡人及本地人較多。遊目四顧間，三層高的high tea set已到。

它的設計依足傳統，由淡味吃起，但淡味其實也是一個相對的概念。那枝白色類似拍力支的物體就不可以說是淡味，不過它濃得嚟又好惹味喎，係泰國人最鍾意用嘅甜中帶咸嘅手法，再加上芝麻香，唔錯。另外兩件是椰堆及芒果肉，都是泰國的看家本領，不會太差。

第二層算是西式糕點，相對就失色了。Scone比較散硬，而附帶的果醬並不精彩，反而互忌廉比較似樣。朱古力豆糕不吃不是損失，檸檬撻則清新可口，其餘的兩件椰子物體，是泰國強項，冇得輸。反而那件類似咸水角物體的味道不錯，只是略嫌肥膩！

第三層包括一件雞翼、一件炸蝦、兩粒魚蛋、一件肉絲酥餅，這些都不過不失，另外紫色物體又是它們的地道食品，而其中最精彩的就是那碟椰汁豬肉粒，它傍邊還有一個窩形米餅，讓你把煨滿肉汁的肉粒放入米飯上一起食，這其實也是它們的地道食物，但這個肉汁最為精彩，而整個hightea set亦因它而提升不少！

總的來說，600銖連稅連飲品，再加上悠閑的風情、怡人的環境，又冇限你個半小時交枱，行得攰攰地，飲番杯茶回下氣再作戰，我覺得這是一個不錯的選擇。(三)

曼谷2015，曼谷的交通工具

當我們常批評曼谷的的士司機不老實時，我們作為遊客也要做足本份。

讓我們由第一程的士講起。從機場上的士，以為由的士站開出，應該冇乜好拗喇，對唔住，這程車是最常出現爭拗的，因為除了車費之外，也有路橋費要另付，所以司機在開車時，都會問你吐威，鞋威？即是收費及高速公路的意思，如果你同意，咁之後就會經過兩個閘口，一共收75銖，在臨近閘口時，司機會問你攞錢，這個一定要俾。有朋友唔知佢噏乜，只一味答No、No、No，結果司機同佢行地面，唔駛問都知佢有幾多時間慢慢欣賞曼谷街頭風景喇，塞左成兩個幾鐘呀！車費？梗係唔慌慳得去邊喇！行highway唔係話一定唔塞，但行地面就一定塞到癲！

重有一樣要提的是在機場的士站攞飛仔上的士的，在下車時要多給50銖，這是司機代的士站收的，也不能走數。所以由機場入城，除了咪錶上顯示的車費外，還要加125銖。我有朋友落車唔肯俾50銖，以為人地屈佢俾貼士，同司機圍住架車追逐，結果都係酒店同朋友解釋番至收科。諗起都幾好笑，兩個大人連的士司機，三個人圍住部的士走！明白嘅，錢唔係多，係原汁嘅問題！咁下次去曼谷，就乖乖地俾錢，唔好淨係識得問：點解嘅！

其實曼谷的士司機的不老實是會一早顯現的，並不會中途變卦或氹你落搭。所以在上車前你要講清楚你的目的地，如果他不想去，多半會殺個天價，那甚麼是天價呢？例如200銖。這也算天價？你問！是呀，雖然折合只是港幣46。另外，他們就算願意接你呢單生意，但上車時發覺他們不落錶，你首先要跟他說：滅他、滅他（英文的meter，咪錶是也），如果他即時落錶，你可以繼續安坐車中，不然，就要立即下車了。這亦不是錢的問題，是原汁的問題。

曼谷的士真的很抵坐，由機場出市區，成粒鐘，300銖一定夠坐有突，一般市內的也是幾十銖，雖然錢不是問題，但曼谷路面是常常塞車的，一塞半小時是閒事，塞足一小時也面不改容，所以我們這些遊客最常去的地方，的士司機是不想去的，因為亦是最塞的地方，這時你最好坐BTS。

BTS附近都有大型商場，而其中的Siam、Chit Lom兩個站，某程度上算是相連的，所以如果你時間並不充裕，就到這兩個站好了，這裡已有起碼三堆大型商場供你選擇，有Central World、Gaysorn及Siam Paragon，單是行一個Central World已經有排行，而Central World對面就係Big C，入到去你以為自己入左百佳，撞口撞面都係香港人，唔駛開聲都知，因為個個都係買旅遊書介紹果尐所謂10大必買！有尐創意喇，香港人，人地叫你買就買，旅遊書都信到十足，就唔怪得人叫你袋住先喇！

我都會去Big C，因為入面有間Swensen's，喺泰國周圍都有嘅雪糕品牌，平靚正，又時有新意！雖然今次果款班蘭味糯米併雪糕，望落有尐驚嚇，但係食落又幾好味。

通常食完雪糕，過夠冷河之後，我會行去換錢，不過全曼谷唔係淨係得Big C下一個街口轉右呢間Super Rich，如果唔係路經，係無謂特登嚟呢度，上網一查就知地址，連BTS站都有，所以唔駛迫哂嚟呢度。匯率可能有少少分別，但係你又唔係換一百幾十萬，所差真係無幾！咁如果你係逐蚊計，我就要提提你，大鈔嘅匯率係好尐尐嘅！

關於換錢，有一點要留意，就係而家手續比較認真。以前我試過放低張咭片都得！但今次一入到去見有個香港人，佢話唔記得帶旅遊證件，問我朋友可唔可以幫佢換錢，我朋友立即拒絕，因為如果佢尐美金有起事上嚟，係唔會有人信你唔識佢嘅！好心還好心，出外旅行，要好小心！我地同佢say sorry，並且話佢知BTS站 On Nut(即係去Train Market必經之站)同 Nana(即係夜生活集中)地都有Super Rich。

今次換錢真係好認真，先影印我個Passport，重識得即時用我個Passport遮住個影印本嘅個人資料，之後又要俾酒店名，又要俾電話，真係過去十幾年未試過嘅！所以換錢嘅時候，記得要帶證件，其他時候，我就習慣放喺酒店房間保險箱，以免行街時唔見左或者俾人扒左，補領手續麻煩吖嘛！

另外，你都可以踩單車，曼谷已經好似台灣咁，有單車租喇，但係...曼谷喎，好熱㗎喎！不過呢個係你個人選擇，我係唔會阻你嘅！

今日講住咁多先，明日開始Shopping。(二)

曼谷2015，不是懶人包

剛從曼谷回港。當人在曼谷時，已不停的收到朋友的Whatsapp，一來是對我生日的祝福，在此一一謝過，另外就是說我發達了，泰銖是五年新低！當然比起五年前，現在的一對4.37確是很便宜，因為之前最差曾經試過一對3.8，但相對起十多年前對5的年代，這個匯率又不是特別低，所以不會令我特別興奮，感覺良好就算賺了，不會發狂的去消費。

其實我一年都去三幾次曼谷，所以一般去完就算，不會特別寫出來，但今次我發現曼谷有很多轉變已經泡了面，而且我在回港後在網上看過一些曼谷的自助遊套票，覺得真是價錢低廉，而如果你以前從未到過曼谷，我希望你除了有由泰國贊助的旅遊達人方面的資料，也可以有我這個全自費的旅者的獨立意見。

旅遊套票豐儉由人，不過如果你是第一次去，又或不大熟路的話，我建議你找一間在BTS或地鐵附近的酒店。因為曼谷的小巷很考人的，走錯路是常餐！另外，也許你自命購物狂，可以由上午十一點行到晚飯時間而不覺疲累，但曼谷的下午是真的很熱，雖然大商場多的是，但你仍有很多機會走在街上，這樣的拖著一大包二大包的在街上走，並不好過，所以我會在午飯後再逛一會，便回酒店休息或到泳池曬太陽，得過了太陽最惡毒的鐘數再出動。所以如果你的酒店附近交通不方便，而被迫在街上行足一日，這是自我虐待，怪不得人。你可能會說，我坐的士就一定番到酒店喇！也許對，大部份情況不對！而關於的士，我稍後再講。

抵埗喇！

在曼谷機場一出禁區要做的事，就是買數據咭。泰銖299就有七天數據任用，更有100分鐘通話時間。這店就在出了禁區之後的Gate 7，其實它傍邊都有一間賣著同樣價錢的供應商，但人人都聚在這一間，一定有原因的，而我之前用過，覺得上網很快，也就繼續用它了。人龍頗長，但這裡是全曼谷最有效率的地方，所以通常排十五分鐘已經成交。

除非你是雙咭雙號，不然你就要通知你的家人，只可用網上通訊，例如Whatsapp，因為它是會幫你換電話咭的，但你不用擔心會遺失自己的咭，因為櫃台服務員在短短的幾分鐘間，已幫你換咭、上網、把舊咭收好、收錢並把電話連咭及找續一併送還給你，真的很快手。

之後就是搭車出城了。你可以跟著指示牌向下走去坐鐵路，但我一般是走落一層去坐的士，這時你亦真正感受到曼谷的悶熱。找到的士站後，向負責人要了一張號碼票，再跟著號碼去搵的士就是了，很方便。

在的士上如果你很熟路，你可以憑判斷知道司機有冇行錯，否則，我建議你開住手機個Google Map，把目的地打上去，就可以一路監控住個司機有冇行錯或者兜路，咁反正果Baht299 都已經俾左，唔用就嘥喇！

以前我是很抗拒在曼谷坐的士的，總覺得他們在兜路，但自從有了GPS後，我便安心得多，而司機見我們有衛星導航，除非拒載，不然真的很暢順。而今次在曼谷坐的士，感覺比之前又好多了。就以我這幾天坐過的的士為例，它們看起來均很新淨，更有自動波車，而內籠亦很光鮮，坐椅及安全帶都完整無缺，另外，司機的年齡都比較細，你把定了目的地位置的手機送到他們面前，他們很自然便會伸手撐大地圖看過究竟，不像以前的司機連Peninsula Hotel都唔知喺邊，然後就自把自為車左你去Peninsula商場！一個在河的另一邊，一個在四面佛像傍邊呀，大佬！

不過，在改變中的的士行業，也不是沒有陰暗的一面，它仍有害群之馬，不計咪錶開天殺價的有，明知塞車而扮唔識去的也有，而曼谷的交通擠塞亦是這行業最大的敵人！(一)