嘉嘉的為食路上，啤啤佢

我喜歡間中去飲酒，但我是那種不會在家飲酒，更不會一個人飲酒的人。咁你沒有失意或落寞的日子嗎？你問。不是，沒有這些時刻又怎算人生！我認為飲酒是開心的事，要與朋友高高興興的聚。而我另一個飲酒嘅條件，係果度尐野食得下。香港飲酒嘅好地方唔少，但係好多都只供應微波爐餐單，即係急凍炸魚薯條，冇食牌亦冇人煮，所以啱我去嘅酒吧並唔多，但係都唔係話冇，事在人為啫！

我近日嘅新發現係尖東海傍嘅一間德國酒吧 brotzeit。冇錯，又係德國吧，我又真係幾鍾意飲德國啤酒嘅。話說有一天行完山，想飲番杯又想醫肚，想起海傍那一列酒吧中的其中一間。去到想坐窗邊，其實之所以去尖東也是想望住個無敵維港景飲酒，不然大可去河內道飲喇！點知個侍應話有人訂左，我話我地好快，食完走，點知對方望望我然後話，我地有最低消費，嗄，酒吧都有最低消費，我真係第一次聽！之後佢叫我地上樓上，乜樓上又冇最低消費咩，哦，原來樓上又真係冇最低消費喎！咁即管上去睇睇喇，上到去就知道點解樓上冇最低消費，因為佢連景都冇！於是走人，過隔離睇睇！

去到隔離，樓上差不多坐滿，侍應叫我地落樓下，我地問：樓下有冇最低消費，佢好驚訝咁答：最低消費？我話隔離有！佢笑一笑然後話，冇，酒吧點會有最低消費。咪係！哈，第一印象已經好好。落到樓下，即係之前我想去果間嘅隔離，咦，呢個角度個海景重靚，我地被安排喺一列玻璃窗傍邊，坐低叫左杯啤酒先，係德國啤，佢重自稱係慕尼克最多人飲嘅啤酒添！唔，清清地，幾好味！個杯高高瘦瘦幾好揸。

咁要搵尐野嚟送酒嘅，我地點左咖哩香腸，之前未食過吖嘛。咖哩就當然辣喇，但係佢入口之後，辣完一陣就冇事，但係味道齒頰留香，而伴碟嘅薯角炸得非常美味，外脆內軟，一啖咬開，入面重係熱嘅，喉嚨痛咪就係咁嚟咖囉！

飲得咁上下，係時候食尐飽肚嘅嘢喇，咁我地就點左一個pizza，呢度嘅pizza係方形嘅，香香脆脆，幾好味，不過實在太大個喇，食到攬住個肚呀。

不過幾飽都好，甜品係一定要叫嘅，因為喺睇餐牌嘅時候，已經俾佢果張dessert platter嘅圖片所吸引，所以飽極都要食，最多叫細份，唔叫大份囉！

其實幅相已經影得好清楚佢有尐乜野食，但係當佢成碟擺喺你面前時，又係另一回事，就好似你一日都黑都睇周潤發做戲，亦都見佢成日周街同人selfie，但係佢有一日真係喺你面前出現，你咪一樣會叫到癲！同樣當呢碟甜品擺喺你面前時，第一個反應係想尖叫，因為實在太靚仔，蘋果批一望你就知係好料，重有果球雪糕，簡直係絕配呀！心太軟已經好明顯咁將個心擺左喺你面前，你見到能不心軟嗎！重有家鄉pancake，一放上檯已經聞到佢嘅香味，再加上酸甜適中嘅果醬，我等不及數一二三已經開動喇！

心滿意足的埋單，其實計起上嚟，我地嘅消費絕對超過隔離餐廳嘅最低要求，但係佢嘅做法乞人憎，所以我急急轉場，點知又竟然俾我搵到寶，今晚我飲得高興食得開心，再加上維港上嘅清風與山頂嘅明月，我終於明白乜野係無價寶喇！

嘉嘉的為食路上, 澳門一日遊（三）

進入我澳門一日遊的晚餐，而今次澳門之行，亦因為這間餐廳而引發，所以多少有點祈望！因為阿祖說很多人的，於是我早一天專程打電話過澳門訂位，不過接電話的阿姐說，你食咁早唔駛訂，嗄，咁我途長路遠咁走到嚟，你到時冇位而我班船又夠鐘咁點算呀！阿姐之後話，咁訂就訂喇！哈，澳門朋友真係幾豁達。

訂了6點30分，我們一早6點已在葡京下面的的士站等車，龍不算長，但車也不算多，二十分鐘也等到車了。上到車才知遇著個車手，只見他上山下斜的從容操縱，不用說別的，就單單那個不是葡京彎的半山無數小彎，已把我們一行三人，因為有一個坐前面，不停的由左西向右，再由右西番向左，他那手車，除了用流麗兩個字，我沒有其他形容詞！我上一次有類似經歷，係喺法蘭克福，原來德國有舒密加，澳門都有的士哥！真係臥虎藏龍！返香港還敢同人講話自己手車算係咁！唔好意思喇！

正當他在澳門狹小的街道上表演得淋漓盡致之時，你以為他一定要全神貫注喇，一心還邊度可以二用！不，他仍然可以回覆組員的詢問，甚麼組我不知道，只聽他說，今晚我是總指揮，有乜就問我喇！嘩，原來我地遇著個龍頭大哥！五臟六腑正喺度翻騰，就見他一手把我們兜了入一條小巷，而就在我們仍在車內執番尐手腳時，他已一下急剎把我們送達目的地！我們趕忙執齊魂魄盡快落車，我相信坐多五秒一定嘔！大氣也未唞完，又見他瀟灑地踏著後波，雪一聲已駛進夜空，不知所縱了！

定過神來，眼前就是新益美食，小店並不起眼，入去報上名字，那個阿姐說：你就係姓何果個係嘛！係呀，不過唔叫鴻燊啫！我望望現場又真係冇乜人，都覺得自己哂左個長途電話錢！

坐低第一件事是一人叫罐可樂，因為之前百年難得一遇嘅葡京車手試車經驗，如果唔urd一urd佢，唔嘔都會食唔落嘢！只見餐廳周圍貼滿各式的相片，水準並不高，我說的是照片的水準。再看餐牌，名字五花八門，奇奇怪怪的，坦白說，我除了反胃中之外，更有點反感！既來之則安之。反正客人不多，可以慢慢叫。見有好幾檯都有叫牛仔粒，上菜時亦見佢幾夠鑊氣，即管試試，唔對路至起身轉塲都唔遲。

牛仔粒好快就鑊氣駕到，望落去好得喎，但係下面重有個火煲住，咁猛火氣，尐牛仔粒會唔會變左牛佬粒呢。立即夾番粒嚟試試先，嘩、嘩、嘩、嘩，乜我幾時把聲有回音系統呀，原來唔係，係我地四個人同時發出嘅贊歎呀！真係色香味俱全，肉質重嫩滑到不得了，而且所謂粒，係真係粒粒都有成吋立方呀！停唔到口，大家係咁一粒一粒不停送入口，粒數都唔少。當然既然第一碟咁靠得住，我地又點會唔立即全方位點菜！




可惜一來我地得四個人，而佢尐菜式都係比較大型，另外呢餐已經係我地一日之內嘅第N餐，再加上阿車手哥免費送嘅撜彎駕駛親體驗，胃口真係唔太好。都奮力叫左幾碟佢地嘅招牌菜，包括椒鹽炸魚嘴，我係一名lun骨怪，呢度菜，真係有贊冇彈，魚嘴新鮮，烹調得宜，外脆內軟而且全熟又唔會太老，一碟六件，件件精彩。






另外我不大懂得欣賞但朋友食得很滿意的是鴛鴦三文治豬扒，是把豬扒中間打橫片開，再分別釀入芝士火腿同黑椒火腿，對於喜歡吃芝士的人來說，見到那漏緊出嚟嘅芝士汁，應該已不能控制自己了吧。








此外我們還點了煎藕餅，也許珠玉在前，我只能說不過不失！










不覺已到八點，人已經多到不得了，一來是時候搭船回港，二來也不好意思阻人做生意，埋單。這一餐共掃光了四度菜和六罐可樂，承謂$410，這個水準，這樣價錢真是沒話說。如果不是船票這麼貴（來回每位$366），一個星期去一次澳門都得。

嘉嘉的為食路上，澳門一日遊（二）

今日會繼續我上個星期未講完嘅澳門一日遊。上回講到我喺紅街市隔離飲完早茶，就梗係去紅街市打個round先喇！我記得我上次嚟喺好臭嘅，可能今次天氣比較凍，所以真係少少味都冇，淨係地下賣海鮮果層，已經睇到我心花怒放呀。一邊係賣龍躉嘅，呢樣嘢我冇乜興趣，一邊係賣蝦蟹嘅，澳門尐奄仔蟹咁出名，呢個街市又真係擺滿奄仔蟹，又平又靚，真係睇到我眼都凸埋，如果唔係重有成日玩，我真係會買番幾斤番香港呀！

行完一輪街市都要係咁以行下澳門名勝嘅！大三巴就係最經典喇，由紅街市慢慢行去大三巴大概半小時，今日嘅大三巴當然唔似我地細個嘅時候咁可以單獨合照，人流依然暢旺，但係又真係唔算擠擁，略為參觀聖堂遺蹟就向議事庭方向走，行下行下就開始多人，我地就好似條三文魚咁逆流而上，都幾攰！不過唔怕冇氣力喎，因為沿途都有得試食，只怕你食得太飽啫。

行呢邊嘅其中一個原因就係要路經營地街市，唔係喺度開餐，係想去梓記督番串牛雜啫，另外大家都行到有尐攰，想坐底飲杯咖啡休息下，可惜，澳門人比香港人識歎，果朝老闆未開門。唯有繼續前行，終於俾我地搵到間沙利文，坐底飲杯咖啡就要起行，因為我地訂左—點鐘食葡國菜。

喺澳門食葡國菜，對香港人嚟講，來去果幾間，唔係軍人俱樂部就係海灣，但係我地今次去左一間喺南灣果邊嘅亞利咖哩屋，點解會去？冇咖，係朋友記起佢細個嘅時候去食過，即係都有成三十幾年，我初時諗，咁耐，應該執左喇，點知網上一check，佢不單未執，評分重好高添，於是更加要試過究竟。

點左菜湯，葡國香腸、葡式炆牛尾、馬介休薯球、焗蟹蓋、咖哩牛腩。雖然話係菜湯，但係佢除左菜之外重有薯仔，另外亦有爆香左嘅烟肉一齊煮，所以個湯好惹味，而不可不提嘅係佢嘅麵包，非常好味，外脆內軟，查牛油又得、點湯又得、點咖哩汁又得，點葡式汁都得，真係點乜都咁一流！提提你葡式唔等於我地成日食果尐黃金金葡汁喎！其他所有我地叫左嘅食物都好好味，其中以葡式炆牛尾最為突出，$400食飽左四個人，唔知你話算唔算貴。除左某員工尐態度之外，呢一餐我完全冇投訴。

跟住我地一班朋友就分途廣播，有尐去賭場，而我就選擇左搭巴士去路環嘅龍爪角家樂徑沿海岸行番去路環村。路程唔算艱辛，但亦唔輕鬆，但係呢程嘅目的地係葡撻，咁就攰極都冇投訴喇！

我其實唔食萄撻嘅，但係佢嘅木糠布甸做得香滑酥細，好好味，既然之前算做做左運動，而家就可以放肆下喇！兩柸木糠布甸加一柸凍奶茶，唔算多呀！就坐喺鋪頭對面樹下嘅石檯果度，一面食一面欣賞小鎮風情，悠然自得。如果唔係張凳冇唉pang，我真係想瞓個晏覺呀。

咦，又夠鐘喇，夜晚果餐？下次再講喇！

嘉嘉的為食路上，澳門一日遊

係俾黃耀祖引誘的。話說果日佢嚟晨光做替工，傾下傾下，佢竟然俾左一幅相我睇，嘩，不得了，唔睇尤是可，一睇，我就控制唔到自己喇！係一張滿檯食物嘅照片，（噓聲）噓咩唧，唔係你以為幅相係乜野喎！真係一檯都係食物，而且碟碟都幾好樣添，雖然俾我話得好樣嘅食物都唔會太難食，不過都要問清楚先。佢話好呀，而且不過係千幾蚊就食飽左成十個人喇！

咁平？邊度！澳門呀，阿祖話。

澳門？嘩，真係有好幾年冇去喇，因為澳門比香港重細，而對國內同胞來說，澳門比香港的吸引力重大，因為可以賭錢，於是澳門有好幾年係比香港嘅新城市重迫嘅！不單止迫，重係冇車坐，唔好講的士，真係連巴士都冇得坐，迫到呢！當然我地可以搭賭場順風車，重唔駛錢添，但係總係唔似的士咁可以去到門口，於是就同自己講，忘記澳門喇!

原來真係怎可忘記得起，秋天，我會諗起澳門嘅奄仔蟹，夏天我會諗起佢果間任溝唔嬲嘅甜品鋪，冬天我會諗起路環新鮮出爐嘅暖笠笠萄撻，而春天我當然會諗起紅街市果間茶樓，一面品茗，一面欣賞百鳥爭鳴嘅情景喇！

正在沮喪，朋友話而家澳門冇咁多人去咖喇，內地反貪呀，尐人唔敢去賭錢咖喇！係咪真咖！唔理喇，博一鋪喇，反正去澳門都要賭，唔入賭場就喺人多唔多之上賭一鋪喇！

由於朋友工作忙，只能一日來回，其實都好，一來澳門尐酒店房唔平，平均一人要使多五百蚊，二來如果唔好玩可以走人，唔駛夾硬拖多日。咁如果好玩咯，咪下次再玩過囉。行程好簡單，一早出發，之後去澳門飲早茶，當然話早其實都唔係好早，因為我冇理由搭晨早五點船去飲茶唧，咁所以早茶就係九點左右飲，其實都要搭七點半果班船，真係重早過返工呀！

一上岸，即刻去排隊坐的士，真係冇乜人排隊喎，但係咁早，梗係冇乜人喇！轉眼已經去到紅街市，傍邊就係茶樓，黃色的一幢樓高三層的建築物，上面大大隻字寫住間茶樓名！

行到上二樓，已見一籠一籠的點心在門口等著我，真有他鄉遇故知嘅感覺！好滾動，我講佢沖茶果尐水，由一個銀色高身熱水爐內倒出，再沖落茶葉度，呢個係我細個飲茶嘅影象，好有親切感！普洱不算最好，但係咁平茶錢，你想飲乜唧，至少有茶味同普洱香。

唔講咁多，出去攞點心先，係呀，呢度係冇人賣點心嘅，自己出去攞喇。嘩，有豬潤燒賣，有燒賣，有糯米包，有叉燒包，有鳳爪、有牛肉球、有排骨，排骨真係有肉味，唔似香港尐咁食落得舊渣，糯米包更係久違了的上品，糯米乾身，用廣東雲吞皮包得密實，你可能冇食過，香港飲食集團果尐糯米包，係就咁衿塊上海雲吞皮上去，遮唔哂再衿多塊就算，完全冇包嘅含意，佢叫做糯米衿會比較乎合商品條例！

當然唔係個個點心都好好食，但係果日天氣好好，雖然因為晏左嘅關係，冇乜雀仔掛喺窗邊而少左尐情趣，但係由二樓一大列嘅窗望開去，只見一望無際嘅藍天白雲，襯得傍邊色彩燦爛嘅紅街市特別耀眼，澳門嘅西歐風情又番番嚟喇！

嗄，講完嗱，你去左澳門一日就係食得一餐？唔係，咁今日時間夠喇嘛，下次再講囉。

嘉嘉的為食路上，雪糕梳打

幾時第一次接觸雪糕？唔記得喎，應該好細個喇，細到唔記得。但係雪糕係一樣我從來冇試過唔鍾意食嘅嘢，而我亦都相信，冇乜人會唔鍾意食雪糕，佢地最多係怕凍、怕牙痺，或者會因為個味道唔啱所以唔食，但係就唔係唔鍾意食！我真係未見過人唔食雪糕，尤其是軟雪糕添，細個嘅時候最鍾意跟大人去睇戲，因為會有軟雪糕食，而大個左一聽見有雪糕車果個音樂響起，就一枝箭咁飛去買，有陣時去到佢又咁啱走左，都幾失落咖！反而而家喺九龍塘成日停喺上廣播道果架小巴隔離果架雪糕車，我少幫趁！

雪糕其實有好多食法，最基本就係喺雪糕之上加鹽加醋，例如香蕉船喇，咁你梗係以為我最鍾意食香蕉船，因為我可以一次過食三球雪糕，但係問心果句，除非冇其他選擇，我其實並唔係太鍾意食香蕉船，因為我覺得佢唔夠形，冇乜創意，扼食扼得嚟有尐太明顯，就咁三球雪糕加條分開左嘅香蕉再git尐朱古力漿咁，太過一心只為食，冇經過思考，冇乜氣質！

呢，反而雪糕梳打我就鍾意嘞，佢雖然只有一球雪糕，但係佢重有一枝汽水，一次過可以食齊雪糕汽水，亦都係我鍾意食雪糕梳打嘅原因。做法其實好簡單，就係將雪糕放喺個高身杯入面，送到埋檯再自己將尐汽水倒入個杯度。咁樣，雪糕同汽水會混合而成另一個形態，好得意，所以我好鍾意呀！

而且，佢好玩，因為尐汽水倒落雪糕度時，係會湧得比冇雪糕時快，一邊倒汽水一邊驚佢會倒瀉，而又真係次次都倒瀉，咁就要第一時間飛個頭埋隻杯度，以高速飲番由杯邊漏緊出嚟嘅汽水，跟住又乘機用條利lam下舊雪糕！然之後，就到𢳂雪糕喇，你要知道呢個時候，個杯係充滿左汽水嘅，而當果球雪糕喺汽水上面浮下浮下果陣，你係好難至𢳂得到尐雪糕嚟食嘅，於是每次只係食到一尐尐，但係咁𢳂下，漏下，又食下，lam 下，搞到自己忙哂，大汗疊細汗之餘，一杯雪糕梳打就咁樣食完喇，每次食完，我都會望住個高身杯依依不捨，而次次我都會喺我能力範圍內盡lam！

我最初每次都食雲尼拿雪糕溝七喜，後來有一次學人睇餐牌，見到有一款雪糕梳打叫做黑牛，咁食過嘅你一定知係乜，但係當時我係唔知嘅，蠢到以為係牛肉汁，覺得好核突，好彩我個哥哥去問人係乜野嚟嘅，至知道原來係...冇錯喇，係朱古力雪糕溝可樂呀，我當時第一個反應就係...咁點解唔叫做黑朱呢！不過，冇人採我！

唔駛多講，都知過左冇幾耐，就有一隻高身杯裝住球朱古力雪糕，另外重有一枝可樂放喺檯面。咁我又依足程序，食到身水身汗喇，但係喺食完呢杯黑牛之後，我並冇好似食白色果隻雪糕梳打咁lam盡，而係食完就算！因為我覺得黑牛冇咁好味，可能因為我鍾意飲可樂，咁樣溝左之後就失去左可樂嘅味道，而朱古力雪糕同可樂都係甜嘅，咁兩樣溝埋嚟飲，就會變得太甜喇！

不過，呢個唔太好嘅經驗並冇影響我對雪糕梳打嘅喜愛，唔知你地而家重會唔會飲雪糕梳打嘅呢！

嘉嘉的為食路上，雪條

雪條，有陣時係要嚟形容非常凍嘅天氣，例如、凍到好似條雪條咁，又或者形容尐喺冬天著短裙嘅女生，就話佢地對腳冇遮冇掩，好似條雪條咁！而我地今日講嘅雪條，就梗係食果尐雪條喇！

我諗冇乜邊個人未食過雪條，因為凍嘢就係人都鍾意食，尤其是係夏天，熱辣辣嘅時候，一枝汽水，一杯雪糕，一條雪條，係冇人會拒絕嘅！但係喺細個果陣時，零用錢唔多，而屋企兄弟姊妹又多，要一人一杯雪糕都真係幾肉赤，但係一人一條雪條就相對消費低好多喇！

記憶中我係重來都食唔哂一條雪條嘅，永遠喺我食到最滋味時，就聽到阿媽話，溶喇溶喇，就快滴到成身都係喇，咁之後阿媽就會攞左去自己食！究竟係唔係溶，係唔係滴污糟左件衫，我真係冇乜記憶，我只係記得條雪條往往就係咁食左一半都唔知有冇就冇得食！記得果時我次次都有為咁而喊，但係後來大左我就明喇，阿媽其實並唔係搶我條雪條去食，佢自己係冇買俾自己食，佢只係買俾我地食，而佢又只係喺我食到天一半地一半時至出手，咁佢其實係幫我執手尾，而唔係唔俾我食，如果佢真係唔俾我食，就買都唔買喇！不過呢尐要大個左先至明嘅！但係而家諗番轉頭都好窩心！

所以你唔好以為要俾人分左雪條食，係一個唔好嘅記憶喎，我讀書果陣，就成日同同學夾份食雪條嘞！咦，點食呀，你一啖，我一啖咁呀！咁核突！哈，梗係冇咁核突喇，有孖條咖嘛！孖條而家都重有得賣呀，佢一定係果汁雪條，而果汁雪條就從來都係雪條之中最平嘅，而佢重有另一個威勢呢，就係可以一分為二，咁一條本來已經係最平嘅雪條，再除二，咁對我地呢尐想食雪條又冇乜零用嘅學生哥嚟講，就真係正到冇朋友喇！

不過食孖條都唔係全部係美好回憶咖！我諗你同我都一樣有一個機會係可以唔駛扭已經有雪條食，但係呢個機會，又唔係好想佢出現喎！因為係要去剝牙囉！細個果陣時，成日去農甫道睇牙，而一年又總有一次甚至兩次係要剝牙嘅！咁，剝牙喎，咁大件事，梗係喊到拆天喇，而之後最乞人憎就係要咬住果舊，冇味道但係好左訂嘅綿花！每次我都想lur左佢出嚟！咁一路離開間牙科診所，阿媽就會話，嗱你咬實呀，唔好lur左佢出嚟呀，唔係止唔到血就大件事喇，呢句說話對我嚟講係冇意思嘅，因為我唔知唔止血有幾大件事，所以我係一定lur，不過阿媽係好知我心意嘅，佢跟住就會話，嗱，你咬到番屋企，我買條雪條俾你食！

嗱，呢句說話對我嚟講就有意義喇，有雪條食又唔同講法！於是我真係好乖咁忍果舊綿花，沿途留哂口水核核突突，我都唔lur番佢出嚟，咁我阿媽又永冇失信，佢真佢會買條雪條，不過係孖條，佢會一條分做兩條，另一條就係俾留喺屋企做功課嘅哥哥！而同樣，如果我哥哥去整牙，咁媽媽會揍埋我去，而如果我乖唔扭計，咁我都可以分到哥哥果半條孖條！

係呀，我地七十年代就係咁樣長大咖喇，物質唔係好充裕，但係總有得食下咁囉。分享嘅樂趣，而家係要嚟講嘅，我地果個年代就係要嚟做嘅。講多無謂，行動最實際，今日當我地一日到黑講分享，我會覺得我地當年嘅實際行動更真更自然！

嘉嘉的為食路上，記憶中的點心

飲茶真係香港人好重要嘅飲食文化。以前淨係飲早茶，後來發展到放食晏都約埋一大班同事去飲茶，而家重有埋夜茶添，重唔止，周街重有好多淨係賣點心嘅鋪頭。作為香港人，你梗係知道飲茶就唔係飲茶咁簡單，係飲茶兼食點心，而亦會隨時妹仔大過主人婆，叫到一檯點心，反而唔係咁多人願意出五六十蚊去沖壺靚少少嘅茶。

不過而家尐點心真係大不如前呀！乜野都塞隻蝦入去，蝦腸、蝦餃當然有蝦喇，咁燒賣有蝦都唔過份，但係唔駛有三隻蝦咁誇張係嘛！咁搞法，燒賣隨時發展成為只係黃色皮嘅蝦餃咋！你唔好笑我作大呀，我問你，你近排食嘅蝦餃，有幾多隻係有筍咖！雖然，燒賣嘅餡係有冬菇粒，但係照咁嘅發展速度，蝦餃燒賣，應該會慢慢合併成為一款點心而唔係兩款囉！我冇誇張呀，點心真係不斷咁變化咖！

唔駛講第二樣，就講下灌湯餃。而家你見到尐灌湯餃係一個黃色皮嘅，比蝦餃大一倍嘅餃，內容都不外乎係尐冬菇瘦肉蝦撈埋一堆嘅物體，另外有尐會加入一兩條魚翅類物體，然後就成隻野擺喺一個有湯嘅碗入面。個餡同外型都唔同佢計較住，講左個造型先。嗱，講到明係灌湯喇嘛，咁就梗係個餃入面灌滿左湯，而唔係一隻大尐嘅餃擺喺湯入面至稱得上做灌湯餃喇，不過除左老式嘅茶樓，我真係見唔番細個時候食嘅灌湯餃喇！你地知就話我聽，等我去懷舊一下。

灌湯餃以前係點樣嘅？以前食灌湯餃賣果個又戰戰兢兢，食果個又戰戰兢兢咖！因為佢真係一隻漲卜卜、注滿湯嘅餃，我重記得佢個點心籠比蝦餃燒賣果尐大，另外一個籠只係得一隻，咁呢隻咁矜貴嘅灌湯餃喺個籠入面係有寶座嘅，佢係坐喺一張銀色有窿嘅架上面，架嘅背面有個小掛勾，用泥方便我地叻起個灌湯餃嘅！

咁點解賣果個會戰戰兢兢呢？因為如果佢喺果籠灌湯餃放到我檯面之前，尐湯就流左出泥，咁呢籠灌湯餃就報銷咖喇！咁雖然唔關佢事，但係佢都會好凳事頭唔抵，因為一穿左，入面尐湯就會流哂出泥，係完全冇辦法挽救嘅！

咁當佢將籠灌湯餃安全咁放到我檯面，就開始到我戰戰兢兢囉喎，咁，我果陣時咁細，呢個將隻灌湯餃轉落隻碗度嘅動作，係唔到我做嘅，但係我都知道未放到入碗前，穿左嘅後果，所以我都好緊張。

咁咁隆重嘅儀式就一定係由我爸爸做，咁雖然籠灌湯餃係我地叫，但係其實成間茶樓尐食客都會望住你，當爸爸快手快腳咁成功將隻灌湯餃移入碗仔，咁大家就好似冇事發生過咁繼續睇報紙、歎茶，但係如果一個唔好彩穿左，咁成間茶樓尐人就會同你一齊驚叫，一齊凳你唔抵喇！好熱鬧咖！

係呀，果個年代，乜野都簡單尐，穿左隻灌湯餃，係我地穿左喎，都可以俾人講成餐茶咖！但係呢尐亦都係而家呢個年代所缺少嘅溫情。