為食路上，豉油西餐、莎厘娜

豉油西餐，聽個名都知係中國人喺西餐上加鹽加醋而煮出嚟㗎喇！因為西餐一般係用鹽同牛油麵粉嚟煮，呢個你睇番一兩本西餐食譜都會知道。咁點解會搞出一個豉油西餐？我冇去考究呀，但係諗都諗到，係有人食過西餐，又或者打過洋人工，番屋企想煮俾屋企人食又或者想搞間西餐廳，但係牛油又貴喎，於是貪就手咪用豉油嚟煮囉。

我細個去呢尐餐廳食嘢時，係唔知佢地叫做豉油西餐嘅，根本未上過正式嘅西餐廳，見用刀叉食嘅，就當係西餐廳喇。咁其實我呢個定義都幾濫，因為一般嘅茶餐廳，果時都會俾刀叉嘅！講番豉油西餐先。細個時最想去嘅，唔係皇上皇，雖然我去得呢間最多，我最想去嘅係車厘哥夫，感覺上佢高檔尐，同埋食完大餐之後，係有後逐利益，就係阿媽會買包了傑糖番屋企，俾冇得嚟嘅哥哥姐姐食，咁你以為我有得嚟呢度食，番到屋企就冇得食糖咩！唔會喇，包糖係我帶番去嘅，我實會抽完稅至輪到佢地食喇！

豉油西餐廳除左尐食物用豉油煮之外，佢嘅另一特色就係暗，有尐甚至係近乎黑添！至於點解？我又係唔知，不過相信係受粵語殘片果尐高檔餐廳嘅佈置所影響啩。

喺豉油西餐廳我學識食嘅第一樣嘢係沙律。果陣時真係覺得係一件好潮嘅事，首先，沙律唔係中文嚟嘅，係由英文salad音譯過嚟，咁同同學講話自己食過沙律，佢地個個都吖大個口，然後就會問：咩嚟㗎？好唔好食㗎？講真，我其實覺得沙律唔好食嘅，因為我第一次食嘅沙律，係有好多一片片烚蛋擺喺度嘅，而我係唔食蛋嘅，所以要好小心咁揀尐未被污染嘅菜出嚟，所以其實我唔太鍾意食佢，但係當同學未試過，我就梗係大吹大擂喇！

其實豉油西餐中，我最鍾意嘅，咁多年都係佢嘅羅宋湯，味道同我地嘅中式湯真係有好大嘅分別，不過而家尐羅宋湯又真係冇左以前嘅味道！唔好話我淨係掛住懷舊，成日以為只有舊嘢至好！嗱，上個星期就俾我搵番一間重好得嘅豉油西餐廳。呢間餐廳叫做莎厘娜，位於高街，對於讀港大嘅同學唔會陌生，不過佢而家搬落左一條街，話說啱啱過左嘅呢個星期六，我去聖安多尼堂做分享，通常做嘢之前，我都會搵餐好嘅俾自己食。開車去到門口，竟然有車位，嘩，你話呢個唔係上天嘅恩賜都唔信喇！

坐到入去，周到嘅待應已經奉上午餐牌，見我地睇嚟睇去冇乜心水咁，又奉上大餐牌，其實我地唔係唔知食乜，係乜都想食。結果我叫左我最鍾意嘅雞皇飯，而朋友叫左煎龍脷，而餐湯就梗係揀羅宋湯喇！

羅宋湯駕到，真係不同凡響，熱辣辣而暗紅嘅湯，隱隱然傳來一陣香味，唔係蕃茄西芹咁簡單，冇錯喇，係燈籠椒嘅味道呀，呢個味道，令羅宋湯多一重口感，而厚身嘅燈籠椒亦令湯渣多一份質感，好味呀！真係控制唔到喇，一羹又一羹係咁飲，直至聽到烹一聲，原來係隻匙羹碰到碗底嘅聲音，哦，原來已經飲哂喇！真係好味。咁你話同記憶中嘅味道係唔係一樣？咁又未必，但係都有八九成喇！

之後嘅雞皇飯，對呢間餐廳嚟講亦係佢地嘅拿手好戲，唔好食就假嘅，佢嘅白汁真係又厚又香，當然連加一至係一百蚊嘅午市套餐，你唔可以要求佢用新鮮雞，但係臨尾重有杯香濃嘅咖啡，我真心覺得係物超所值嘅！

朋友嘅煎龍脷，睇相都知靚，而佢嘅汁亦都係別有韻味嘅。我真係講唔到佢有幾好食，你不如自己嚟試一次喇。

為食路上，掃街

你有冇試過掃街呀？唔係真係攞把掃把落街掃果尐清潔大隊長喎，我地呢個環節叫做為食路上，就梗係同食有關㗎喇，我所講嘅掃街，係真係沿住條街一路行一路食。咁你可能會問，而家邊度可以咁食法呀？係呀，而家真係唔知邊度有得咁食法呀！如果你知道邊度重有得掃街，唔該通知聲。

我最後一次真正嘅掃街係喺佐敦寶齡街，，好多年前喇，果度一到傍晚放工時間，尐車仔就唔駛二十秒，全部湧哂出嚟，之前又完全唔覺佢地踪影㗎啵，之後各就各位，有尐似而家行人專用區咁，自己知道自己位置，唔會擺錯位，當然背後有尐乜嘢有勢力人士做過手腳，我就唔知嘞！

之所以叫做掃街，係真係檔檔都咁好食。我通常會先剪番一串牛榜、牛肚，然後一路食一路行過唔夠三步嘅隔離果檔買一串炸大腸，咁你唔好以為我會攞到一手都係，係唔會嘅，因為炸大腸係好好生意嘅，你要排下先至有得食，咁我會大叫一聲：一串炸大腸呀！咁老闆會岳一岳高個頭，認住你個樣，跟住又dub低頭繼續切佢嘅炸大腸同埋另一樣唔記得係乜。老闆好勁，就算前面有成六七個人，佢都可以認清先後次序，永冇出錯，咁我企喺處等嘅時候除左食我嘅牛榜牛肚之外，又可以做尐咩呢？嘩，好多嘢做㗎，睇下附近重有乜嘢食喇，睇下條大腸喺個盤上面俾猛火煎到彈彈下個樣喇，同埋睇下老闆手起刀落切大腸都好好睇㗎。

食完條俾老闆切成一片片，搽滿芥辣同甜醬、香脆無比嘅大腸之後，我會去食番碗碗仔翅，係呀，我好豪㗎，唔食生菜魚肉嘅，淨係食翅。都唔知係真係鍾意食翅而冇錢食定係鍾意尐麻油味，其實係槳粉嚟嘅啫，有乜咁好食呢？唔知，但係我通常係可以食兩碗嘅！

食完翅其實都差不多，不過我係控制唔到自己唔去食雞腳墨魚嘅，尐雞腳同墨魚都係橙色嘅，記得佢個檔係零捨不同，係一個木櫃框玻璃箱，好似好乾淨咁，而佢用果把刀同炸大腸果把又唔同，係短身嘅，而尐雞腳係凍嘅，不過好好lun，尐腳筋真係好好𡁻，而尐雞骨係咬落有雞味㗎！

其實食到呢度都真係好飽喇，但係又冇乜點食過嘢咁，於是我通常都會買番底雞蛋仔嚟揸下手，好似會飽肚尐咁，不過多數都係meet 下meet下嘅啫，唔係真心食，邊度重食得落呀。不過番到屋企俾阿媽問起食過乜，我至少話有底雞蛋仔好似實在尐啩！

諗番起都有尐流口水！好多年冇掃過街喇，你呢，你幾耐冇掃過街呀！而家好似冇乜地方俾你咁掃法，真係一架一架車仔泊住一齊，你順住條水落去就可以督下督下咁有得食，真係好開心㗎，而家呢尐車仔檔上哂鋪，一來已經唔係果回事，二來價錢又貴到離譜，而最重要係一個鋪頭賣哂，冇以前果種由街頭食到街尾果種掃街feel，係差好遠囉！

不過上個星期，我又體驗左一種新嘅掃街型式。話說我計劃去威，點知個天要落雨，冇法喇，於是同朋友走左去茶餐廳坐，當大家都食緊早餐時，我地其實已經食左，於是就咁叫杯咖啡就坐左成朝，好彩果時個成11點，個場唔算旺，唔係真係俾人掃我地出街呀。坐到十二點幾，人開始多，於是我地就轉場去食晏，食左碗墨魚丸河之後，飲埋枝可樂，就行下行下，行左去食糖水，之後重買麵包番屋企食。每樣嘢都幾好食。

蝦，咁樣坐下食下，行下食下，唔知可唔可以算係現代掃街呢！喺冇辦法嘅情形之下，雖然掃得遠尐，冇左右隔離咁多檔俾你揀，但係都算係聊勝於無㗎喇呵！

嘉嘉的為食路上, 美華菜館

話說呢個星期日我去左美善同道果間美華菜館搵食，間鋪頭個老闆娘咁樣同個客講：你嚟幫趁唔係大哂，我唔做你生意至係大哂。好有勢，真係要有番咁上下至可以講呢句話。其實聽過呢間鋪頭好耐，不過對於美善同道我係好驚嘅，唔係驚有賊，係驚行錯路，果頭對我嚟講係一失足成千古恨，錯過左個街口就唔知要兜到去邊先至有回頭路。咁今次有人願意做司機就唔同咁講法喇。

去到係下午一點半，係刻意避過午飯最繁忙時段。但係去到都重係滿座，不過有幾個位埋緊單。冇幾耐就坐低，嚟舊式上海鋪就一定要食上海湯麵，呢個係我個人喜好，另外見到枱枱都食緊小籠包同窩貼，收到喇，呢兩樣一定係手本名菜，於是又每樣叫一籠，呢個時候老闆娘發聲，真係全場收到，兩樣只可以叫一樣！

我個心當然有少少唔高興，但係見個場咁多客，而蒸籠只可以蒸果幾籠，師傅亦都已經不停手咁包，於是算，就揀左窩貼。不過老闆娘都有好體貼咁補番句，佢話如果之後有多，會俾一籠我。咁又合理喎，佢都想個個客都有得食啫。之後我又叫左其他食物，只見佢不停咁叫我唔好再叫喇，食唔哂唔好呀！啱，食唔哂唔好，但係我食得哂吖嘛！

黑醋排骨先到。佢有三款排骨，我個心係想食酥炸排骨，但係老闆娘推薦黑醋，到我見到係兩碟一齊出，我就明點解。個黑醋味唔錯，排骨都諗得嚟幾有𡁻頭。

之後，係我嘅上海湯麵，對於呢個麵，我係非常有資格講好定係唔好，因為我真係食左幾十年上海湯麵，以我嘅經驗，呢個麵嘅湯要好濃、面頭尐肉絲唔駛多，夠味就得，而最重要係大白菜嘅絲要多要諗，再加一個豆板醬，咁就very good嘞！

呢碗麵嘅湯係淺啡色，顏色不對。飲一啖試試，味道都不對，飲落口毫不滿足！面頭尐菜唔夠諗，亦因而唔入味，又切得太大條，整體嚟講，唔係一碗有水準嘅上海湯麵。坦白講，好失望，因為喺香港自從小巴街果間上海鋪冇做之後，可以食到好味嘅黑色上海湯麵已經好難，一心以為呢間係我嘅安心之所，點知！

希望鍋貼會好尐喇！都係有少少失望，睇個樣就知，可以煎多兩分鐘就好嘞，而家係熟但係表皮未脆，咬落去係韌嘅。另外，我地亦分配到一籠小籠包，不過不失，不過尐薑絲真係切得好幼細，值得一讚！

臨尾見隔離位叫高力豆沙，老闆娘話一碟八粒，你食唔哂，唔好叫，嘩，咁我重唔乘機，我話，我同佢分呀！老闆娘見我咁欣賞，就話，平日唔可以，今日我幫你做！呢碟高力豆沙，係食得過嘅。

埋單二百零蚊，唔算貴，但係我相信我係錯過左佢嘅黃金時期，又或者係我叫錯嘢，但係基本功係唔會冇左㗎！如果連上海湯麵都做唔好，就唔好咁大口氣喇，雖然話小店有情，而無可否認，老闆娘係性情中人，生意亦都好到佢做唔切，但係打開門做生意就點都要顧下客人感受，因為你尐嘢好食就話俾你丙下當係情趣，如果尐食物唔能夠保持水準，到時你想做生意都冇人幫趁，重可以咁豪咁話我唔做你生意咩！

為食路上，山頂的Wildfire

山頂對我們那一代人來說，是曾經遙不可及，所以亦格外有祈盼！小時候難得一次爸爸媽媽會帶我們上山頂去，那時候去山頂對於住在九龍區的我來說，真是攀山涉水，先要坐車，再要坐船，然後是走那長長的一段路去搭登山纜車。那時的所有交通工具都沒有冷氣，去一轉山頂真是冬冷夏熱！未到山頂已經想打道回府，但作為家中最年幼的我，仍是有特權的，就是可以伏在爸爸的背上瞓陣先，咁就可以無驚無險，上到山頂！

要講我同山頂嘅故事真係有排講，但係今日係講食，如果有人同你講話山頂有好嘢食，你係唔應該信，因為果度尐租咁貴，扣哂燈油火臘同人工租金，又重邊有錢買好材料，但係如果有人同你講話山頂尐餐廳算食得過，咁又可信程度高喎，因為有能力喺果度開餐廳嘅，都係大型連鎖式店鋪，全部由大廚房制作，餐廳只係番熱加工，咁水準就算做有保證喇！

山頂好多餐廳我都去過，不過要講個景最靚，就一定係野火嘞！佢主打嘅係美式西餐，薄餅、漢堡、沙律、牛扒、豬肋骨呢類食物少不了，飲品更是豐富而多姿多彩，梗係喇，咁好賺，甜品亦是這類餐廳的強項，它們最愛說自己提供的是美式份量，上到枱時唔好嫌大份呀，可惜，呢個係二十年前寫落嘅，到今日，真係三扒兩撥就食完！

因為開左車，所以冇飲酒，雖然唔係我揸車，但係做人唔可以咁冇義氣，冇得飲就一齊唔飲囉！我叫左杯檸檬茶，貪佢冇免費refill，係呀，呢個世界，便宜莫貪係處世名言，免費refill果尐即係即沖喇！朋友叫冇杯士多啤梨橙，待應送到埋嚟重唱住歌添，睇佢又唔似咁後生，係Twins嘅Fans喎！

另外叫左一個頭盤，包括炸雞翼、炸魷魚、煙三文魚、墨西哥餅同埋烚薯仔，即係乜都有，樣樣試下咁喇，呀，又樣樣都幾好食喎，唔知係咪掛住望落地玻璃窗外嘅變化而冇留意尐食物味道呢！不過窗外又真係多姿多彩㗎！我地訂左七點鐘，坐低果刻，外面依然光猛清晰，維港景一望無際，水面剛巧有一隻十幾層高嘅郵輪行過，望落去都好似隻艇仔咁細，非常可觀而有趣！

於是拿出手機，呢度影下，果度影下，順手又叉一件雞翼食下，再同自己影下，同人地影下，又去督件三文魚，就係咁影下食下，已經食完哂碟頭盤！咁靚嘅景，尐食物唔太差已經過到骨！

跟住天色開始變黑，就叫多個Pizza。都係講番今日主打果樣食物，即係個景先，雖然已經入黑，但係見住佢慢慢變黑，到最後黑左，真係全程都咁吸引。Pizza上枱喇，佢嘅安排非常好，就係喺Pizza下面加個架，將尐調味放喺下面，放正中間係人都攞到，咁唔駛遞嚟遞去咁，真係既方便又唔阻地方。

咁你唔好以為我可以專心食pizza喎，因為原來果個幻彩詠香江重未做完，一到八點，佢又飛左幾枝激光出嚟，呢尐嘢對於我地做騷出身嘅人嚟講係唔係特別吸引嘅，但係因為身處高位，所以可以一眼睇哂，一路順序咁閃到去郵輪碼頭果邊，又確實幾可觀！

冇錯，呢間野火嘅食物，喺佢其他分店都有得食，除左一樣，就係個靚景，所以至會遠道前來，咁如果你真係要嚟就要事先訂位喇，咁識訂就梗係訂30號枱喇，唔好問點解，你訂左，嚟到，坐低，再感受下周圍嘅艷羨眼光，你就明點解要訂30號枱㗎喇！

為食路上，滾動行勝利道

對於養貓養狗的朋友來說，勝利道是他們為寵物們買食物、做美容、睇醫生的地方，當然如果你想買一隻寵物番屋企養，勝利道都有得賣，條街真係變成寵物一條龍！變？你問，乜以前唔係咁嘅咩？所以嘢以前都唔係而家咁㗎喇，不過勝利道以前就真係同寵物扯唔上關係嘅。

其實我都好耐冇去勝利道，話說果日我忽然想去食下東江菜，去到泉章居又太多人，至醒起行過幾個街口果段窩打老道，好似有間醉瓊樓喎，與其喺度企到唔知幾時，不如去碰下運氣喇，行到身水身汗，去到門口至知佢冇做喇！雖然有尐惆悵，但係都要醫肚㗎，就轉左入勝利道。

細個時住窩打老道，每次口痕想落街搵嘢食都會行去勝利道，雖然佢隔離嘅梭椏道都有好幾間食肆，但係果度要撐斜路，我都做過廢青，唔多想郁係正常嘅！

當年勝利道近住窩打老道呢邊，有間好出名嘅夏銘記，佢尐魚蛋真係好好食，尐河粉又軟又新鮮，真係有一陣粉味，好好食。

咁嚟夏銘記食魚蛋粉，識食嘅就梗係飲番幾啖湯先喇，味精就梗係有喇，但係佢個湯底真係好惹味，真係要喺落辣油之前嗒真個湯，唔係真係浪費左。另外一定要食嘅係佢嘅辣油，一辣到底，非常有勁，咁如果你唔食辣就真係有尐可惜，因為食魚蛋粉唔加辣油已經係好可惜，再加上你唔加夏乜記呢個咁正嘅辣油，果個享受程度真係大幅下降，不過冇法，淨係食魚蛋粉囉，至少呢度嘅魚蛋真係比其他地方好！臨尾叫支汽水，只係收$6，實在經濟實惠，飲完真係順哂！

不過夏銘記已經唔喺勝利道嘞！玩嘢呀，你話，執左都重介紹！少安無燥，咁人地又冇執笠，人地只係搬左去油麻地警署後面果間百老匯電影中心隔離啫，我早幾個星期都去過，仍然好味，不過個鋪頭唔易搵，千祈唔好入錯喺大街大巷金壁輝煌，都同佢中間個字一樣果間就得嘞！

好，講番勝利道，咁點解我會忽然想起夏乜記呢？因為喺搵唔到東江菜又唔想食海南雞飯嘅情形下，最後我係走左入夏銘記個舊鋪去食晚餐。呢間餐廳有幾樣嘢係好攻到我嘅死穴嘅！第一，佢有卡位，係呀，卡位係我兒時上茶餐廳嘅情意結，第二，佢由一班年青人運作，有呢兩樣嘢嘅餐廳，我係一定入去嘅！

我叫左個晚餐，$188，唔算平，但係有五度菜連一杯飲品。包括餐湯，腸仔忌廉湯我又真係未飲過，前菜我揀左磨菇酥盒，相信個酥盒係現成貨，不過個磨菇汁加埋蜆肉都幾好味。之後重有意粉，呢碟嘅份量唔算大，而主菜係燴羊柳，羊嘅肉質唔錯，可惜味道過咸，我一路食一路飲水有尐剎風景！最後係甜品，初時以為係雪糕，但係食落至知係乳酪，酸酸甜甜咁，好消滯！

落樓要成二百蚊，咁你話抵唔抵？好食就幾多錢都抵，講真，食物一般，但係勝在份量好夠，真夠攬住個肚出門口。

出到門口望過對面，見到一間日本菜餐廳，又令我諗起當年我喺電台做嘢做到好夜都未食飯，於是揸架車去勝利道，就停喺對面間粥鋪。食完埋單，個老闆娘話有人幫我俾左，重記得老闆娘問，你唔識佢㗎咩？我笑一笑冇答佢，就開車走左喇，到而家都唔知果個係邊個。

對你地嚟講，係流住眼淚行嘅勝利道，對我嚟講係充滿感情同美好回憶嘅勝利道！

為食路上，荔枝角那仿似Soho的身影

唔知你記唔記得一幅甲網上圖片，呢幅相之所以可以喺網上go viral，就一定同佢個主角有關，但係更特別嘅係，呢位仁兄點解會出現喺果度！一個俾人認為係冇型廠佬先至會出沒嘅荔枝角，碧咸竟然著到行哂咁出現！

不過後來有朋友同我講，荔枝角近住D2出口果邊，而家好Hip，重有一兩間食肆幾型㗎喎！嗄？荔枝角好Hip！冇諗過喎，亦好難聯想，因為我喺果頭附近返工返左成十幾年，真係諗唔到佢邊忽會Hip囉，一係佢真係變得好厲害，一係個Hip字有新定義！不過點都好，所有人講嘅嘢都要自己親身求證至有發言權，於是搵個晚上，我去試下，果次去食日本菜，話就話係爐端燒，但係乜都有得食，果次因為同舊同事食，就掛住八而冇影相，但記憶中，價錢比食物突出！

之後亦提不起興趣再去，直至上兩個星期，想吃一點類似西班牙食物，但係又唔想過海，諗呀諗，就俾我想起呢間荔枝角的西班牙餐廳Rustico。打個電話去睇下而家乜嘢環境先。可以預約，但分兩輪，六點或八點半，咁我就book左八點半果輪，你可能會問，八點半唔夜咩？夜呀，但係我冇諗過八點半去，我諗住七點半去，因為以我嘅經驗，除非真係好紅嘅餐廳，否則分兩個seatings其實係餐廳自我感覺良好啫，事實係唔會坐得滿。

果然，到去就有位！咁雖然有位，但係我前面都有一對男女等緊入座，咁咪等一陣囉，呢尐西餐禮儀我都有嘅，但係唔知點解果位好型嘅餐廳女待應，竟然同我講，佢地嚟先，一陣間會係佢地入座先，希望你唔好覺得驚奇！呢句其實係英文嚟嘅，中文好少咁講嘢法嘅，咁我又貪得意咁回覆佢：我覺得驚奇，我意思係我好驚奇你會咁同我講囉！點知佢竟然問我乜話，之後成晚冇招呼過我，就算我點甜品佢都係搵等二個埋嚟！

餐廳嘅客人都唔算少，不過餐廳都幾多枱，望下周圍，從衣著睇，似係喺附近番工嘅，廠佬模樣都有好幾個，坐正喺我隔離係兩對好似好識食嘅夫婦，人地賣緊十五年火腿佢又嫌人老要十二年，下刪一萬字，好彩後尾佢個位滴水搬左去第二張枱，唔係真係煩死！

咁我食左尐乜嘢呢？西班牙餐廳就梗係食Tapas喇，但係我地今次人唔多，只點左最基本嘅西班牙腸Choriso同芝士火腿炸球，兩樣都幾好味，以後者更加精彩，火腿同芝士混合得天衣無縫，一口咬落去，香鬆惹味，而Choriso嘅醬汁亦好正，諗住叫份麵包嚟點下，點知眼大睇過龍，以為只有蕃茄包，但係好明顯蕃茄包同Choriso個汁係唔配嘅，個包本身唔係太精彩，亦同價錢噸—成比例，至於我，係蠢左！

其實食完兩份Tapas都幾飽，所以就share左一個Main course，係當日廚師精選，大蝦意粉。呢個意粉味道非常好，乾濕適中，大蝦亦都grill得好惹味，食得我非常滿意。

咁心情好就自己開胃，於是又叫多個甜品，Waffle加雪糕，普普通通，不過不失咁喇！

埋單四百幾蚊，但係我地好多食物都係share嘅，所以唔算平，但講真都唔算貴，材料好尐就梗係要貴尐，唔通要人做蝕本生意咩！















如果要彈就真係要講下佢尐服務，西班牙餐廳最重要係果份親切感，唔一定要下下同你吹水，亦都唔一定要不停換碟，重要嘅係果種感覺，呢間餐廳尐服務無論門口果位型姐到介紹當日精選果位重覆姐，到企喺Open Kitchen後面果班哥哥，都俾你一種唔冷唔熱嘅感覺，你話佢招呼唔好咩，你每次搵人你都搵到，但係就係好冷，好例牌咁囉！

其實我係同情阿重覆姐嘅，我估佢果晚起碼將個Chef's recommendation講左冇100都有50次，唔悶死都口臭死！人地得十幾個位嘅餐廳仔至用呢招啫，你咁多張檯，佢一枱講一次都唔駛做其他嘢，咪哂左個人手！

Rustico嘅食物係好嘅，但係招呼咁cool，唔敢再去，我驚凍親囉！

為食路上、三杯鴛鴦，一種情懷

在過去一個星期，我竟然一共幫趁了三間茶記。兩間在港島、一間在九龍。我說竟然，是因為三間都是在沒有計劃的情況下，闖了進去的。我所講的茶記是貨真價實，現沖現賣，沒有廠房預制配方，沒有上市，沒有連鎖店的茶記，是童年現在一般可愛果種茶記，係有樓上雅座嘅茶記，係冇絮，加一，唔會限時限刻，重一坐低已經奉上熱茶的茶餐廳。

關於茶記嘅記憶特別多，其中一個係我到好大個都分唔清兩種飲品嘅顏色。佢地一個叫好立克，一個叫阿華田！你或者會話，咁都分唔到，搞錯呀！冇搞錯喎，分唔到就分唔到㗎喇，我姐姐教過我㗎，佢話你記住有克字果個唔係黑色咪得囉！有克字果個唔黑，咁即係想飲白就叫克，嘩，重混亂呀！咁我就索性叫果隻飲品做白色，我成屋人都知㗎！

另一個關於茶記嘅記憶就係我成日打爛杯。細個時候，茶餐廳用嘅杯又厚又重，而我鍾意飲嘅白色，就係用一隻純白色嘅杯裝嘅，果時細個吖嘛，有杯甜甜地嘅熱嘢飲，都好開心㗎！加上個杯好靚，於是每次佢一放落枱，我會急不及待一手𢲡起隻杯耳，但係對一個小朋友嚟講，隻杯係太重喇，於是好自然另一隻手會走去幫忙，但當隻手一掂到熱辣辣嘅杯邊，就自然反應地放手，而果陣時嘅我，就真係小嘉嘉嚟嘅，所以一放就兩隻手都放哂，咁杯白色飲品連白色嘅杯就會跌左落地！

我好記得每一次當我打爛隻杯時，爸爸都話，唔駛驚，好彩冇淥親！於是我真係以為冇乜特別，只要唔淥親就得，到我大個至知道，原來爸爸每次除左要俾多一杯飲品嘅錢之外，重要俾埋果隻杯嘅錢。不過後來老闆娘一見我嚟，就換個膠杯嚟裝住杯飲品，咁就冇再打爛杯嘞，但係到好大個都俾個老闆娘囉！

重有一樣茶餐廳嘅深刻記憶就係樓上雅座！過去呢個星期我去過嘅茶餐廳，都係正牌茶記，通通都有樓上雅座嘅！樓上雅座係收貴尐㗎，而聽哥哥講，爸爸自己去嘅時候係坐樓下嘅，帶住我地幾個時失至坐樓上，果時以為好矜貴，後尾至知，原來樓下係平尐之餘，客人亦都開放尐，即係如果冇粗口做連接詞係講唔到一句完整句子嘅，咁我地係細路仔，爸爸唔想我地咁早接觸另一類文化係可以理解嘅！

今日我並唔係想講嘉嘉的個體回憶，我反而想大家一齊嚟回憶下你嘅茶餐廳經驗。

呢個禮拜，我去嘅第一間茶餐廳，喺堅尼地城卑路乍街嘅祥香，聽講係金漆招牌，做左成五十幾年，能夠喺大熱天時隨手搵一間餐廳嚟竭下腳，而俾我走左入去係我嘅運氣，刻意走上樓上係想回味一下目往事，而叫杯鴛鴦，係想扮下當年大人，點知杯鴛鴦竟然非常之到家，睇嚟，佢呢個長期啡香滿溢嘅樂園，應該有排做。

另一家都喺西環，不過喺正街，叫做聯華。又係隨便走入去想同自己過個冷河同歎番杯鴛鴦，杯嘢好唔好飲？正如我落柯打時問阿伙計哥，呢度有冇鴛鴦，佢答話，呢尐茶餐廳點會冇鴛鴦，所以我會答你，呢尐茶餐廳，杯鴛鴦點會唔好飲！

而我去呢間聯華嘅時間係下午茶時份嘅尾聲，所以人客都唔少，但係由伙計到食客都好輕鬆，有尐客坐喺度打機，阿嬸喺度填番尐糖同豉油，而個水吧哥哥，同個肥嘟嘟茶客傾到不知幾高興，真係飲完杯鴛鴦，成個人都開心哂！

重有一杯喺九龍飲嘅，話說大前日我去完書展，坐完架滿載香港精神，即係速度驚人嘅小巴之後，落車平要定一定神，於是就走左去小巴街度搵杯嘢飲下。

離遠見間茶餐廳個名叫做蘭亭咁有詩意，雖然個牌匾一定唔係王羲之提字，但係喺旺角有個咁嘅名，真係令我有種出汙泥而不染嘅感覺，於是即刻走入去。可能係晚飯時份，人客唔算多，而大部份都只係飲嘢，我同樣叫左杯鴛鴦，同樣，茶餐廳嘅鴛鴦又點會唔好飲呀。

三間餐廳，都堅守茶餐廳嘅陣地，俾我地知道我地對茶記嘅回憶，係真實嘅，亦都俾我地嘅下一代知道，我地時時掛喺口邊但係已經好少發揮嘅人情味係乜嘢一回事！香港唔止呢三間餐廳嘅，我冇叫你好似我咁老遠走去飲鴛鴦，但係你屋企附近一定有一間茶餐廳嘅，幫趁佢地呀，因為茶餐廳唔應該只係我地嘅回憶，而應該係我地嘅生活！