嘉嘉航空，福岡之旅（六）祇園站/一蘭

今天要搬旅館了。但並沒有太多的不捨，一來只住了一晚，二來我將會搬去的旅館才是我今次的目標住宿。但因為日本的旅館一般都在下午三時才check in，所以我心急極都要等到下晝至有房。而住緊呢間旅館又好好喎，準我12點至check out，於是我先把行李執好，就搭巴士巴出去博多站，￥100雖然只係搭兩個站，但係真係好抵玩。

去到博多站，人地尐鋪頭仲未開門，於是去食個早餐先。早餐我一般都食得好簡單，隨便搵咗一間咖啡室就坐底。都係食下三文治飲下咖啡之類。反而呢間咖啡室個景幾好，可以好悠閑咁望住條街，見到尐人在雨中趕上班的情況，覺得自己好幸福呀，不過，當掉番轉係我趕返工而佢地放緊假時，佢地嘅心情應該同我一樣，除非佢係果尐放緊假都諗住工作嘅大笨蛋喇！

坐下坐下，百貨公司開門喇。博多站嘅上蓋，真係好多嘢行，有阪急百貨，有Amu Plaza，我唔知你鍾意行邊類形嘅鋪頭，但係淨係一間Tokyu Hands就已經行得我不亦幾乎。由於時間關係，我只係行咗個外圍，未深入研究，反正今次係嚟踩下線，同埋食早餐，過幾日會再嚟，唔急！不過唔急、唔急，我都買咗成萬￥，所以女人買嘢好難講，我其實已經好忍手，而且亦都買咗咁多十年，都唔明重有乜好買，但反正我就係買咗喇！

係時候返旅館check out喇！由住緊果間旅館去新果間旅館，路途唔算長，但係都要行大概十分鐘。搭車又唔係，於是繼續行路，都好，反正係咁日食夜食，當做運動都好。喺拖住個篋周街行時，我係時時提住自己，唔好咁咗地呀，個篋唔好拖得咁嘈呀，小心唔好轆親人呀，咁所以其實大媽們唔係冇好處嘅，至少set咗一個bad example，等我知道出外旅行要更加檢點！

到喇，到呢間我間目標旅館喇！呢間旅館有乜好，遲尐至介紹，不過以佢位處Canal City 四百米內呢個地位，喜歡shopping嘅你，對呢間旅館真係冇投訴呀。確實，我亦都要去Canal City 走一轉，因為果度有方碗嘅一蘭拉麵。

嚟得福岡，又點會唔食一蘭呢，當然嚟得福岡亦一定要食拉麵，但係因為聽聞呢度係一蘭嘅發源地，所要點都要食下。不過一蘭其實已經食到冇乜新意，因為佢來來去去得果幾樣嘢食，所以喺去一蘭嘅福岡總店朝聖與Canal City之間，我揀了後者，因為至少個碗唔同啲。無錯，Canal City嘅一蘭個碗係長方形嘅，我唔知點解佢會有呢個安排，所以你都唔好問我。

一蘭就喺Canal City嘅地牢，果層嘅所有鋪頭都係食嘅，一蘭嘅人龍比香港短好多，亦都比大阪少人，但係都幾熱鬧，喺門口排咗大概20分鐘隊，揀好晒食物買埋食券之後，過一陣就有得入座。

速度係呢間鋪頭嘅賣點之一，所以真係影完晒相之後碗麵就上場，長方形嘅碗係幾吸引，而且望落去高高大大以為好大碗，點知篤落去原來個碗好淺下，咁都有個好處就係香港同大阪我都食唔晒嗰碗麵，而喺呢度我係食得晒嘅，終於第一次可以見天地！我講嘅係佢碗底果幾行字，真係要食哂麵再飲埋哂尐湯至見到㗎！

食得哂碗麵，心情特別好，所以臨走買多抽即食麵，方便返到屋企想食隨時有得食。