於是我上網搵銅鑼灣有乜好食呀！即刻彈左一堆唔知乜嘢出嚟，於是我好有耐性咁逐個睇，嘩，全部唔係細囈嘢就係唔慌好嘢，嗄，呢幾間都話好食！是咪收左錢，定係公關請呀，咁開飯法就不如靠自己去逐間試！但我時日無多，重有幾個鐘就要上刑場，一定要搵到間好嘅至安心去見牙醫呀！咦，以前禮頓中心咪有間類似豉油西餐嘅，喺地牢嘅，不如就去果度食喇，咦，咁耐冇去，水準如何呢？會唔會有變呢？但係老店應該靠得住嘅，其實最驚唔係佢能唔能夠保持水準，最驚係佢做唔做得住呀，銅鑼灣喎，租金幾十萬幾十萬咁㗎喎，咁搞法一碟炆牛尾咪要成千蚊至維到皮！一面諗一面上網搵，好似怕遲一秒搵佢會消失咁！
禮頓中心冇呀！上次經過好似變左咖啡鋪喇！
好彩佢只係搬左去隔離果幢原來用嚟做騷嘅舞台果度！嚇得我呀！
於是急急訂位然後坐車去見牙醫！真㗎，知道之後有好嘢食，內心係會踏實尐，坐上張行刑凳上都冇咁驚，總之每次牙醫部機器weeee一聲咁開，我就諗下佢個金必多湯，佢個田螺同火焰雪山，真係好能夠分散我嘅注意力。俾牙醫搞到我一口泡之後，終於生番哂，臨走佢重話，除左麻辣火鍋，乜都食得喇，發達！佢之後又補多句，咁就梗係唔好咁熱氣喇！
由小巴街急急腳行去利舞台果邊，搭lift上16樓，或者唔係周日假期，客人唔算多，依然係果種舊式嘅招呼，唔會扮friend亦唔會唔理你，總之做番本份，我其實寧願咁樣，做人做事都係實在尐好。
打開餐牌，咦，價錢真係唔算貴，比另外一家主打瑞士雞翼平，嘩，金必多湯呀，你好嗎？豬扒呀，用乜嘢汁好呢？龍脷呀，你坐定定等煎喇！最後我點了一個磨菇汁黑毛豬扒餐，餐湯改金必多湯加$15，我覺得好合理，朋友點左個牛油煎澳門龍脷餐。
金必多湯好似唔多覺有魚翅，但仍係湯底香甜，而朋友嘅磨菇湯雖然都係忌廉湯底，但係就同金必多湯唔同味，邊似得外面尐忌廉湯咁，無論磨菇湯、粟米湯、雞蓉湯、周打魚湯、都係一個味，因為佢得一個湯底，但係重竟然有食家夠膽話果間嘢好食！
埋單落樓五百蚊，有湯有茶，以銅鑼灣區嚟講，唔算貴，我當然亦知道唔可以用個平字嚟形容，但係真係貨真價實，條龍脷真係外脆內軟，油香四溢，豬扒係真係有肉味，我認為與其出外食埋尐唔知乜嘢，不如平日喺屋企自己煮，一個月或者兩個禮拜至出街搵間真係好嘅去食餐好嘅重實際。開飯就梗係番屋企喇，上網點開唧，用佢嚟查下地址就係幾方便就係真嘅！
呀，如果呢間餐廳可以喺銅鑼灣生存係因為大業主有良心，咁我要真心多謝，如果唔係，原來其實間餐廳捱租都捱得好辛苦，咁我請大業主手下留情，等我地都有番尐地方回味下童年體難得一喫嘅豉油西餐！
沒有留言:
張貼留言