嘉嘉的為食路上 - 拉椰糕

為食路上呢個環節開始到而家，好似未同大家一齊整嘢食，係呀，我忽然間冇左整嘢食果條神經，但係我記得我欠鵬仔一底拉椰糕，而且都拖左成大半年，咁我就嚟又大一歲喇，唔想欠住個債呀。所以上個星期二，當我做完節目，就揸住張清單去九龍城同超級市場買料。

拉椰糕真係好好食，我第一次食佢係N年前喺新世界中心果間金牛苑，記得果晚去到都未坐定，朋友就好慌張咁問個待應姐姐，重有冇拉椰糕，個姐姐好整以暇咁話，你等我去問下先，咁就行左去，之後果幾分鐘，我個朋友好似等佢老婆生仔咁，坐唔安企唔樂，一時又岳高頭裝下個姐姐番嚟未，一時又自己同自己講，下次記得訂位時要訂埋拉椰糕，總之緊緊張張咁，直至個姐姐行番番嚟，並且話有，咁佢至似番個人！我睇佢個資態，如果冇拉椰糕，係會起身走人果款！

終於果餐飯食到尾聲，待應姐姐同我地清好張枱，換過尐碗筷就問我地可以上拉椰糕未！呀，唔記得話你知，果陣時我地出街食飯係真係食得好悠閑嘅，食完每一度菜係會同你換碟，以免影響下一度菜嘅味道，而主菜之後係會幫你換碟食甜品，亦都唔會限你個半小時內要走人，當然你可以話唔得環保，但係呢尐先至叫做出街食吖嘛，趕喉趕命咁又點叫做出街食啫，只係想填飽個肚嘅話，食快餐店都得喇，駛乜上餐廳酒樓喎！

講番碟拉椰糕先，上枱真係得四舊丁方一吋嘅綠色物體，一叉拮落去，嘩，軟熟到啜住個叉，唔，好香嘅椰汁味，咦，暖嘅喎，當年微波爐未咁流行，而就算有，食肆尐大師傅係唔會用微波爐嘅，呢個係身份嘅象徵，所以呢件又軟又暖嘅拉椰糕係蒸嘅，一口咬落去，煙韌香甜，食完之後滿口椰香，回味尤甘，可惜一人得兩舊，但係已經好好喇，因為我地後面果張枱冇得食添呀。

其實拉椰糕唔難整，果份心機先至最攞命！你諗下，五、六分鐘咁蒸一層，冇可能整三層呀，最少都七層，如果三個色重最少要整九層添，咁樣來來回回已經成個鐘喇！重未計之前尐制作過程喎，整一底拉椰糕真係兩鐘頭閒閒地，咁你話焗底蛋糕都要喇，但係焗蛋糕係佢有佢焗，果一個鐘頭內你可以做其他嘢，唔駛哮住佢逐層加料喎！

好，開工。15厘米四方焗盤一個。材料方面我以就手為主，超市有嘅都係用超市嘅貨式。包括椰汁400克、木薯粉200克、粘米粉15克、班蘭葉兩條、冰糖120克、水200克、鹽少許、班蘭葉色素適量。做法：煲滾水，加入冰糖，煮溶之後熄火，攤凍。

用中火煮椰汁、剪成條狀嘅班蘭葉同鹽，一滾即刻熄火，攤凍。

將木薯粉同粘米粉倒埋一齊，再倒入攤凍哂嘅糖水同椰汁，一路倒一路攪，唔好俾佢結埋一舊舊，之後再過篩。

這裡應該有700克的椰汁混合物。將佢地分成300克同400克兩杯，喺400克果杯加入班蘭葉色素（我落得比較少，所以色淡），咁你就有一杯綠色、一杯白色嘅液體。

呢度係兩份，所以分別係800同600克

進入蒸糕嘅程序喇，注水入鑊並放入蒸架及焗盤，開火，水滾，倒入第一層綠色液體，五分鐘後，倒入第二層，呢層係白色嘅，如是者梅花間竹，而到最後兩層就分別蒸七分鐘，之後熄火，乜嘢都唔好郁，15分鐘之後至由個鑊度攞盆糕出嚟攤凍。

真係要等佢攤到凍哂至好倒出嚟切，唔係就會黏住個底，甩甩離離咁好肉酸，咁你可以話咁都食得啫，食得，咁既然咁都食得，就唔駛逐層倒咁哂心機喇，亦都唔駛加色素喇，成盤咁蒸咪得囉！駛乜咁貼身待候佢兩個鐘啫！