嘉嘉的為食路上 - 雲南米線

我的為食路上很多時都同工作有關。唔係因為工作原因而有機會用公數食好嘢，其實果尐飯真係背瘠骨落，食多得滯，好易會胃痛！我講嘅其實係工作地點。到而家我依然好鍾意去深水埗食嘢，你地唔好以為我係喺尐飲食書推介至識得去深水埗開飯喎，旨意佢地就死喇，做下參考就得，依足去食，會洗多好多冤枉錢！

我之所以比較熟深水埗係因為我喺果度番左四五年工。不過之後雖然唔係番深水埗但係都會落深水埗開會，而開完會都會食飯，咁跟住地頭蟲就梗係有好嘢食喇！話說有一次小葉約我去開會，之後就帶左我去一家到左今時今日我都會成日去嘅地方，呢間鋪頭係賣雲南米線嘅！因為我地去得比較早，所以人唔多。

自己搵位坐低，枱面放左一個膠籃，入面有匙羹同茶杯，另外重有一壺類似普洱茶嘅物體，咁當然重有一筒筷子喇！就係咁多，到左今日都重係咁安排，淨係中間試過一次裝修，改
歪個門口咁大把！餐牌呢，咁就要岳高頭喇。

第一次去對住掛得高高嘅餐牌真係不知如何是好，因為佢嘅量詞令我非常困擾，咁係乜嘢咁難明呢？窩，個窩字呀！佢話小窩米線連兩個餸20蚊，之後一個餸加2蚊。咁對廣東人嚟講，窩親就好大碗㗎喇嘛，揚州窩麵呀、蟹肉窩伊呀、雞絲窩米呀呢尐叫做窩呀呀嘛，咁食晏喎，一來邊食得落一窩嘢呢？之後博中眼瞓咩，二來咁大窩至收20蚊，嘩，用尐乜料嘅，真係有小小膽戰心驚呀！但係見另外兩個同事都係咁叫，重要加餸添，又點清菜，又炸雞翼又炸豬扒咁，重整左窩田七氣窩雞！

咁唔通我重扭扭擰擰咩，既來之則安之，叫窩炸醬腐皮呀，心諗炸醬撈左落尐湯度即係冇嘢，咁腐皮都好易食呀，大碗得滯都唔駛好似食剩好多餸咁咁浪費呀！

落完單之後人開始多，一張四人圓枱原來可以坐六個人，放在中央嘅大枱就更加係物盡其用，我地三個人坐四人枱，本來要插兩個人落嚟，但老闆話我地叫嘢多唔夠位罷至可以自成一國！但係人搭枱唔等於坐得好舒服，我嘅背瘠係長時期同後面位阿太接觸嘅，有時我重懷疑佢係有小小乘機借我嚟攤抖嘅添！

冇幾耐，果窩米線到嘞，車，嚇得我呀，咪碗一個，窩乜鬼嘢啫！睇見自己叫得兩味餸重有尐後悔添！嬲嬲地，一啖咬落尐米線度，咦，又幾好食喎，有米香、又彈牙，韌而七咬得斷，你知而家有尐麵線唔知係咪用橡筋做㗎，咬極唔斷嘅！嘩，個炸醬更加唔駛講，香辣惹味，當日我重好食得辣，自己再加一羹辣椒油，嘩，好食到唔停得口！我之後都有試過同事果尐雞肉、燒肉、火腿、魚蛋，覺得普普通通，而之後我都去試過佢最出名嘅黃鱔窩，味道確係香濃，但係對我嚟講就真係濃左尐，所以一路到而家，食左20幾年喇，我都係食同一個模式，就係炸醬腐皮米線嘞！

咁你又唔好以為乜都冇變，味道係變左少少，個炸醬冇咁惹味冇咁香之外，個價錢都變左好多次，由我最初食嘅20蚊一窩連兩個餸，到之後嘅22蚊、23蚊、24蚊、到今日已經係30蚊喇！加幅唔算多，但材料少左。亦係事實，記得最初食腐皮，真係一疊一疊咁食到你飽為止，但係前幾日我去，得番四疊都冇，而且重薄左好多添！

不過，話係咁話佢啫，生意難做亦係事實，只要佢盡力保持水準，我依然會幫趁㗎，都食左咁多年咯，炸醬腐皮米線，已經係朋友嚟㗎喇！