嘉嘉的為食路上，那一杯清心直說的何嘉麗

唔知你有冇聽過一杯飲品叫做何嘉麗呢？冇聽過唔緊要，因為呢杯飲品雖然曾經極為流行，但只限於某一個時空，而且佢亦並唔係咁易飲到，因為佢只係喺港台嘅酒吧有得賣。乜港台有酒吧咩？你問。有呀，曾幾何時重盛載過無數風流人物！當年五台山上工作嘅，未到過港台呢個吧，真係好打極有限！所以喺我二十年後，第一次返港台，同同事打完招呼之後，第一件事就係去個吧度睇睇！當然我知道個吧已經唔存在，但係我總係懷住一份渴望同希冀，俾我相信港台呢個吧係恆久而不息，永遠喺建制之外，但係當我偷偷地推開度門，我就發現，佢已改變，改變到我可能已唔再認識佢，但係咁其實又有乜嘢關係呢，我只係知道喺呢一剎那，我係想念你嘅！(誰令我能情深一片...)

人係唔會無源無故諗起舊事嘅，不過喺講原因之前，等我同你講下呢杯何嘉麗嘅來龍去脈。當年我都係一個APO，即係助理節目主任，亦即係畢業後可以考取嘅最低階級，不過我唔係公務員，係合約形式。咁當年我地都好多嘢做嘅，所以而家尐同事唔好呻忙，電台唔忙就冇左果種趣味㗎喇！咁好多時候都會做到唔記得左食晏，係呀，你地而家重有得食晏，然後喺成六點至覺肚餓，咁當然中間係食食埋埋好多唔等使嘅薯片汽水之類，食到滯哂！咁肚餓又唔係好開胃，就好自然會走左去吧，果陣時個吧已經好新潮，有飛碟賣，即係兩塊麵包中間夾尐嘢，然後放入個機度一夾，再烘一陣就有得食，而我最鍾意就係食芝士火腿飛碟，香脆惹味，而家諗番起都流口水！

有幾次喺我買完飛碟之後，都會遇到老闆，見到佢地我都只係點下頭、問候一下，然後已經唔知講乜嘢好就走人，後來有一次，果位當年重係戴住墨鏡嘅哥哥問我，傻瓜麗，係呀，呢個係林敏聰同我改嘅花名，做乜唔飲嘢，我話冇錢喎！係呀，各位現任APO，我地當年都係唔多夠洗㗎，加油喇！好，番番去當年現場先！咁果位戴住墨鏡嘅哥哥佢話，我請你吖，咦，有人請又唔區喎！好吖，我答。但係之後我就好後悔囉，因為喺葉先生整緊杯飲品時，佢係咁問我嘢，我一面唔知答乜，一面望住阿葉先生，想佢快手尐，點知阿葉先生好似黃先生上身咁，慢慢將幾枝唔知乜嘢係咁倒嚟倒去，急得我呀，唉，阿媽都教落，便宜莫貪喇！呀，葉先生同黃先生係當年一齊喺吧度做嘢嘅！

終於，搞掂，咦，酸酸地，甜甜地，又幾好飲喎，之後我就梗係多謝都差尐唔記得講就走人喇！咁又有一次我又落左去酒吧買飛碟，諗起當日杯飲品，於是就請阿葉生幫我整番杯出嚟，咁你而家又有錢飲？你問。係呀，月頭吖嘛！講番葉生先，我見佢今次快手快腳，轉眼已經搞掂，於是又抱住美好嘅心情去飲一淡先，點知，嘩，乜咁酸㗎，完全唔係之前果個味道。成十幾蚊一杯，就咁唔飲，浪費左尐喎，於是我話我上次飲唔係咁㗎喎，葉生問，咁係點㗎？

多謝 Betty Yam提供照片

既然佢問得我，於是我就索性走入吧檯後面，放肆咁逐樣試，加下呢尐又唔似，加下果尐又唔啱，終於喺我一輪調校之後，試啱味，重再做一次以確保份量準確不誤，至走人，臨走前我重話，記得呀，下次嚟要咁做呀，重有，你同我教埋黃生添呀！嘩，當年的我，幾有勢，真係不知天高地厚！之後呢杯何嘉麗就喺香港電台個吧入面不逕而走，而當年嘅何嘉麗，亦都喺傻下傻下咁喺港台有好多發展。之後聽講試過有杯混血何嘉麗同埋有杯夏妙然嘅，但係都唔紅！

今日之所以會諗起呢杯何嘉麗，喺因為收到消息，原來葉先生走左喇，仔大女大㗎喇，走得應該安樂，多謝葉生，多謝你帶俾我地好多美好嘅回憶。收到消息之後有一刻我想過再一次落去吧嘅原址緬懷一下，下一刻我相信我應該就咁保存住呢一份渴望 希冀，俾我相信世上有一幸福　垂手可得 又永遠喺掌握之外，有時　激情捉喺手裡面 會化為灰燼 反而藏喺心底　可以歷久常新，貪求思慕只因癡　一切眼淚　思憶都係徒然 (讓我安躺月下!)