不過你唔好以為嚟得我屋企就實有好嘢食，試過有一次唔識死，叫左成十幾人嚟我屋企，其實我果次都精，一早請阿媽叫佢個秋香幫我煮定兩個餸，重係要大大份嘅，咁就衰極都唔會餓親人喇！但係果段時期嘅我，依然比較有脾氣，見一大班人殺到上嚟，招呼得完呢個同果個去Club House打波，又唔記得睇火，到救得番個餸嚟，又好似冷落左朋友咁，一時間好似乜嘢都做唔到咁，個人忽然一把火咁燒起上嚟！最後，係煮左餐出嚟食，食就唔慌好食，但係至少有嘢落肚，真係要多得阿媽果兩個餸打底，唔係？我睇佢地實餓到連去之後去食碗麵醫肚嘅能力都冇呀！
咁呢次之後我就精左嘞，限人數！最好係6個，最多都唔好多過8個！咁生活就輕鬆好多喇！6個人嘅組合我認為最理想，四個人可能係兩對，咁好多時傾傾下就會變左兩對人自己傾，6個就唔同，會夾下其他朋友唔一定係夫婦或情侶，就算係都比較容易搵話題，就算冇嘢講，玩遊戲都係人多好辦事喇。
咁通常6個人我會煲一煲湯，尐人成日覺得煲湯好難，其實煲湯係最易，尤其是而家有燜燒煲。只要買足料，在爐頭上煲滾水之後落材料，喺佢再滾之後較細火，再係咁滾住佢嚟煲一個鐘頭，就可以放入燜燒煲，咁一路等到開飯之前半小時再攞出嚟煲滾佢再滾住煲半個鐘，咁個湯就冇乜機會失手嘞！
另外我一定會有一味魚以外嘅海鮮，方便吖嗎，嗱，白灼蝦就最就手喇，水滾掉落去見佢紅紅地，再熄火搇蓋，轉頭就有得食，除非你買左尐唔新鮮嘅蝦，否則呢鋪係冇得輸嘅！唔用蝦可以買鮑魚仔，亦都可以蒸蟹，總之蒸親唔會失手，除非你尐料唔新鮮或者唔記得睇火。
咁果陣時我就好似一隻兔仔咁，喺個廳同廚房之間跳出跳入，煮個不亦幾乎，但係慢慢喺每次曲終人散，淨番自己一個人喺廚房洗碗，我就會有少少失意，你唔好以為我尐朋友咁冇義氣，𡁻完鬆，掉低我自己善後！佢地係要求幫我洗埋碗至走，但我係潔僻精，人地洗完嘅碗我都會再洗多次，所以佢地幫我洗碗係冇用嘅！咁講番我呢段愛煮飯的日子，大概過左年幾兩年咁就結束左，而結束之後，我亦都好少下廚，一來真係冇乜mood下廚，二來亦因為少做而變得生手，時間、火喉掌握得唔夠好，破壞左我聲譽，就尤得試過我手勢嘅間中攞出嚟勉懷一下喇！
咁我而家冇大聚會？咁又唔係喎，而家去朋友屋企喇，佢地至少有工人，唔駛好似我咁，又要返工，又要去買餸，又要煮之後又要洗，真係散哂㗎！咁好唔好食？好㗎，佢地肯跟住本書嚟做，唔會太差，最多係老左少少，但係我都老左少少喇，唔計較得咁多，何況而家約埋朋友食飯，其實係傾偈多過食喇，唔駛做有得食，又可以同知己摸住酒杯底傾偈吹水，簡直係五星級代遇喇！
沒有留言:
張貼留言