終於忍唔住口走去問佢，佢俾左個地址我。嘩，我又唔係當地人，雖然上網大概知道地點，但係都唔敢肯定。朋友臨走重提我，人地成五點至開檔㗎，你唔好咁早去呀，但係你又要早尐去喎，唔係有排等呀，不過你又唔可以太遲去喎，佢得四樣嘢賣，賣哂就收檔㗎喇！咦，好複習喎，好有性格喎，啱我！但係我仍然係唔知點去嘅！
撞下彩喇！見有一日天氣唔錯，於是我就將個地址交俾酒店個門房，佢一睇就猛點頭，我問你知喺邊呀，佢話知，不過佢冇食過，但係次次經過都好多人，然後佢俾左隻手指公我，表示我識貨！嘻！之後佢同個的士司機講左一輪，到我上車，的士司機又俾左個like我，我個心都好定！十零分鐘車程就到，的士停喺對面，真係得一個大牌檔，傍邊放左幾張枱仔，可能真係早，得一兩枱人，對過相片，同朋友食果間一模一樣至坐低。四眼哥哥放左一張餐牌喺枱面，再加多句我地有百事，想飲酒就自己去711買，咁就走人。果然只係得粉絲蟹煲、粉絲蝦煲、螄蚶同埋青口四樣，除左baby blue，對於青口，尤其是係大隻果尐，我係冇乜興趣嘅，於是點左三樣，並且去檔口前小小果間711買左罐泰國啤。
之後就叠埋心水坐喺度等喇，不過可能真係早，我啱啱開完罐啤酒佢碟螄蚶就到嘞，正想起筷，點知之前個四眼哥哥又出現，原來要幫我移枱。咁等我形容下原本位置先。
我原本係靠住一匹二匹布坐嘅，但係佢而家叫我搬出尐去近馬路嘅行人路邊，點解嘅！原來人地布鋪要收工。咁當尐布移哂入鋪頭，而員工亦將原本泊正門口嘅電單車開走，阿四眼哥哥又好敏捷咁喺原本擺布匹嘅地方再排出另一列枱凳，嘩，而家終於見到個陣容喇！
忽然間尐客人好似約埋咁，以9秒9時速坐哂埋位，而喺過程中，我嘅粉絲蟹煲同蝦煲都到嘞！可憐我碟螄蚶就係因為我八卦睇人地開枱而攤凍左少少，但係當我一叉拮落去再順手送入口，果種鮮味依然喺度，停唔到口喇！
朋友話，不如叫過碟，我話，你睇下尐人，我諗要等兩個鐘至輪到煮我果碟！唔係佢手腳慢，而係佢真係得四個火爐仔，咁你話點會唔係有排等呢！
唔理喇，繼續食螄蚶，香港唔敢食之餘，亦可能冇咁鮮味嘅貨式！唔，咁同時亦都唔可以待慢我果兩個蟹煲同蝦煲呀。好味，真係好味，蟹肉鮮甜、蝦肉彈牙！有冇味精？一定有，但佢勝在材料新鮮，真係見佢一隻隻蟹同蝦排哂喺個檔前面，有人點就攞嚟煮，冇花冇假！煮法亦都好簡單，就咁用尐香茅、乾蔥、香草墊底，跟住放隻蟹或者3隻大蝦落個煲度，到咁上下，呢樣要睇師傅經驗喇，佢就放埋粉絲，再過一陣就一大把蔥咁放埋入去，扲蓋，就上枱。材料、程序都俾你睇哂，分別就係用料同埋時間嘅掌握。
三樣嘢都好好食，而最殺食係佢個價錢，埋單630銖，折合港幣150蚊！呀，差尐唔記得講地址: Charoen Rat 4, Bangkok
沒有留言:
張貼留言