今個星期日又係一年一度嘅母親節，你訂左位未？未？因為你冇需要慶祝母親節？哦，咁未訂位係冇問題嘅，但係如果你有需要食呢餐飯，而你又係搞手而你又未訂位，咁就頭痕喇！因為雖然而家離母親節重有前後四日，但係一尐比較有名氣嘅餐廳酒樓，應該已經滿座，而你唔好諗住早尐去博你早過人，或者遲尐去等人食完至食，你真係諗都唔駛諗嘅，因為而家所有餐廳酒樓都分兩席，平日都係咁喇，何況呢個全民皆慶嘅母親節！
母親節出去食飯，真係好多時會好罄嘅，先講食飯時間，通常係六點一輪，八點一輪，並且講明每輪由落單到起身走人，前後只有個半鐘頭時間！如果你問我對呢兩個時段有乜意見，我會話六點太早而八點太晏！正常晚飯時間係七點，但係咁樣俾你欄腰分割，人地又做唔都兩輪生意，所以有時真係唔知點揀，不過你唔可以諗太耐喇，因為如無意外，兩輪都已經或差不多book滿。而且我提你，唔好咁多隨身物品，因為喺呢尐大時大節，尐位應該係排得好密嘅，真係插針都唔落呀！
另外有好多餐廳酒樓重要你落埋訂先，如果唔係就冇得留位。嗱，呢樣我係同意嘅，因為好多人係會四出訂位，想俾多尐選擇屋企人驚吖嘛，本來咁係無可厚非，但係當佢地揀定左一間之後，又唔去取消其他幾間嘅booking喎，咁就真係幾冇品嘞！人地都想趁大時大節做多尐生意㗎，如果個個都係咁樣book法，容乜易上座率不及一半呀，所以我係同意收訂金呢個做法。
不過有一樣安排係我好反感嘅，就係佢來去得果幾款俾你揀！雖然個名可以改得好靚，乜嘢母儀天下、世上只有媽媽好、媽媽真的愛你等等！而亦都有八度菜連拼盤同埋美點雙暉，亦多數會好識做咁有枝康乃馨送俾座上嘅媽媽，但係幾款菜都不過係將尐次序掉換下，又或者味道改變下，譬如呢款係鮑汁鵝掌，另一款嘅鮑汁可以用嚟撈麵，再另一款貴尐就可以要嚟扣婆參，咁結果係款款菜單都係咁上下味，因為佢要快手、省時同就手吖嘛，你想食尐功夫菜？對唔住，今日師傅唔做，改日喇，差尐未講出口叫你走人，唉，佢開門閂門都話歡迎光臨、謝謝光臨其實係冇意思嘅，至少佢係唔歡迎你食節日限定以外嘅食物！
咁一路計落嚟，你會發覺個半鐘頭食八度菜，係會食唔切嘅，咁所以酒樓美其名就話搵個服務員專門幫你分餸，實質係幫你控制你嘅進食時間，嘩，咁樣趕喉趕命法，係真係會食到胃痛嘅！而且又一定唔係平㗎喎！暗而家平日出街食晚飯，好少少都要$150一位喇，如果上酒樓就$300走唔甩添，咁母親節，就$3500一圍已經係最低消費喇！
用$3500嚟自己煮真係可以食到好多嘢，但係因為係母親節，除非你母親唔係一家之煮，否則你喺星期六俾$3000叫佢去買餸，星期日自己煮，我諗佢煮左你都似！咁可以點做呢？當然，如果你係一個煮嘢男，呢日就係你表演嘅機會，否則係冇乜得點做，因為我都已經訂左位出街食！
有尐反高潮？係呀，我只係希望可以坐得舒服食得安樂，尐錢洗得心服口服啫！
沒有留言:
張貼留言