沖繩2015，首里城與泊Iyumachi、海鹽雪糕

今天出發去首里城，你當然可以開車去，但係我既然買左張24小時單軌通行證，就梗係坐單軌喇。半個小時唔駛就去到首里站，跟住在風和日麗的天氣下，我行咗20分鐘，就到首里城，其實呢個城係好細嘅，冇得同故宮果尐比，比京都二條城重細，不過保養得幾好，入場前會俾個膠袋你代住自己對鞋，出門口就要還番個袋俾佢，會循環再用。進入主要建築物，沿住指示行，又係唔駛半小時行完。記念品店亦都冇乜嘢可以引起我嘅購買慾，咁就又行番番去單軌車站。

講真，我覺得去首里呢個地方，最正嘅係之後行去同之後離開果兩段行程，陽光普照，微風吹來，都不知幾舒服。

呀，提下果尐開車去嘅人呀，你喺轉上首里之前，係會見到好幾個停車場，個個都話15分鐘就行到，本來行下無壞，但係如果有老人家，果段路都幾甘。你地唔駛急㗎，當你轉上去首里果條路，係有個停車場嘅，喺首里門口，好方便㗎！

好嘞，講番我自己。去完首里我地就坐單軌去美榮橋站，然後行去泊Iyumachi食魚生。講真，呢段路有尐長，但係中間經過泊瀨碼頭，可以喺果度行下，輕鬆下，又係一件賞心樂事。咁啱果日係星期日，重有一大片地安排左尐民娛活動，我又行去八下，都幾好玩。

終於行到泊Iyumachi激鮮漁港喇，規模比牧志公設市場大，但係因為係星期日，所以好多鋪頭都冇開，但係亦因為咁，我地多出左幾張枱，其實係放尐魚生同壽司喺人地個檔口果度食，因為呢度其實都不過係一個魚市場，只係一個二個檔口，並冇食肆。

唔知係因為星期日，定係時間關係，冇乜日本人—撞口撞面都係香港人，當然今日開檔嘅亦擺明係做遊客生意。呢度尐魚生多選擇尐，壽司都係，重有鮑魚仔刺身添，重有煮熟左嘅魷魚鬚。於是我又快手快腳掃幾盤又坐低食喇。

呢度尐魚生新鮮尐，所以如果你只有時間去一間魚市場，我提議你嚟泊Iyumachi。

之後我又坐番單軌去國際通。今次由牧志站開始行，因為尋日我係由中間行嘅。今日係假期，所以成個下午變左做行人專用區，不過中間嘅小街係有車行嘅，但係有人睇住，所以都好安全。不過正如我先前講過，條國際通來來去去都係果類店鋪，行左十份一已經等如行完。不過，我今次嚟係有任務嘅，就係試下佢個鹽味雪糕。

買咗杯軟雪糕，就咁坐喺門口食。雪糕本身已經咸咸地，其實呢種又咸又甜嘅處理手法，泰國人是高手，佢尐椰汁加小小鹽，真係好似關淑儀話齋：令人動心。講番呢杯鹽雪糕先。又係秉承咗沖繩嘅淡淡然嘅氣氛，即係點呢？就係你知道佢有鹽味，但係又未至於會特別吸引囉！或者你話，人地就係淡淡地俾你去加面前尐鹽呀！我知，亦都試過，不過幾款都唔係太吸引，唯一綠茶味嘅鹽比較特別。死喇，咁食法，唔知會唔會超標添！

之後又係行下行下，就行咗去果間好出名嘅沖繩咖啡店飲咗杯咖啡，幾骨子嘅環境，寧靜而舒服，左右都係本地年青人，唔知係唔係偽文青呢，不過點都好，佢地都係渴慕文化嘅人，呢度地方迫夾，三兩個靜靜地還可以，你一行六人扶老攜幼就唔好嚟喇！

之後就去食燒肉。冇跟旅遊書介紹，係自己行下行下，見有尐日本人都走入去，於是我又走入去。入到去坐低，先至知道大件事，佢所以待應真係小小英文都唔識，個餐牌只有少量食物係有英文，算喇，既來之則安之，是但督幾款嚟食喇，哈，又俾我地博到，重幾好食添，不過個牛舌就有尐失望，希望過幾日會食到好嘢喇！