沖繩2015，琉球之牛攻略

何物琉球之牛竟然要出攻略，係呀因為其實成個沖繩尐嘢都係幾好食，但係亦冇乜嘢係特別好食，所以難得有一間算係水準之作，就一定要介紹番。呢間本格炭火燒肉店，喺恩納村，如果你唔會去西南岸享受陽光與海灘，咁你就無謂去嘞，因為由那覇開車入去都要成50幾公里，一來一回已經三、四小時，但係如果你會住番一兩晚渡假村，咁呢間鋪頭，就可算係沖繩最佳選擇。

一早已經收到風，知佢常滿，於是就托朋友用佢果張credit card嘅貴賓服務幫我地訂咗兩晚。兩晚？你話。係呀，係兩晚呀，因為既然知道成個沖繩最好食係佢，咁做乜要食尐冇咁好嘅嘢唧！朋友回覆話只可以訂5點半前，之後就全部要現場輪候。唉，我只係希望佢呢張卡一撻出嚟會有人情講下啫，多謝朋友幫忙之餘，我心諗，好，咁有性格係嘛，一於全力攻佔佢。

第一晚5點半去到，即刻有得入座，門外亦唔多見有人，心諗，呢間嘢係咪名大於實呀！入到門口佢叫我將對鞋放入locker，然後就入座。入到去一睇，枱數並唔多，我冇刻意去數，估計只有十二張枱左右，大部份都係四人卡位，但係中間有四張枱係用竹簾隔開，一拉起「堂」簾就可以變成八人座位，非常方便。

坐低就奉上放滿燒到紅哂嘅炭一大抽，好磬！之後就送上毛巾清水，然後就係餐牌，係中文版添。氣氛好優悠，又係例牌叫番杯啤酒先，之後再慢慢睇下個餐牌，見到有尐有個紅手指公印，即係推薦品喇，但係睇嚟睇去都唔知點取捨，因為雖然朋友推薦呢間，但係就只係話要訂位，其他乜都冇講。

咁我見反正明晚都會再嚟，叫個套餐睇下點，於是我地叫咗芭蕉套餐，即係有上等牛五花肉同上等牛里肌肉，另外叫左特選牛排套餐，即係肋眼牛排。

啤酒唔駛再介紹喇，又係Orion。

嘩，套餐原來重有好多嘢食，包括白飯、麵豉湯、韓式涼菜和沙律。主角到喇，厚切的牛五花肉非常惹味，一層油一層肉，咬落層次分明，但係又似乎分唔清邊層係油邊層係肉。到肋眼排，我當正佢一大件肉眼排咁燒，先燒四面再燒前後，咁樣就可以鎖住尐肉汁，然後燒到剛剛熟，就即刻夾起嚟食，唔，入口溶化，回味尤甘。

好味，兩個套餐連啤酒，埋單至係一萬日元，食得過。肯定明晚再來，但係我地明日要去遠遊，心諗，佢地見我地今日幫趁，應該可以俾我地改時間啩，點知都係打咩！

第二日，我地辛水辛汗咁趕到去，都係遲左到，雖然只係遲左半小時，但係都要等一個鐘，唔係等一分鐘喎！好彩，我地住果間酒店就喺附近，咁重好，可以沖個涼，換過件衫舒舒服服咁食。我見其他香港人就好困擾，聽講有兩夫婦嘅酒店係一個小時車程至到，而另一家則扶老攜幼，個細路唔識性扭計就唔在講，老人家要等咁耐都好辛苦！

一小時後，再出現，都重要等一陣呀！今次我地精喇，唔叫套餐，叫左一份牛五花肉、一份肋眼牛排同一份豆腐乾沙律同埋一份牛舌。

肋眼排保持水準，可惜今日碟牛五花肉係薄切，第一片唔覺意燒燶左，之後真係要兩面輪流燒再加上金晴火眼咁岌住佢至冇再浪費食物，但係就冇左果份閑情囉，好彩，份牛舌補番數，嘩，真係好食到冇朋友，你見佢切得唔厚嘅，但係𡁻落去真係質感十足，又爽又軟，真係唔知點形容好！

其實佢尐食物就只係料靚，唔知點解其他店做唔到，搞到兩邊佈滿食店嘅一條街，得佢一間最好生意！食完之後，再喺附近無拘無束咁行下，一來消化下，二來享受下呢度嘅小村落氣氛，辛苦搵嚟自在食，咁努力賺錢咪就係咁之嘛！