正如我尋日講，我其實係冇諗過喺呢個暑假去旅行嘅，同人迫之外，重要俾天價附加費，但係當你個心開始咗去旅行呢個想法，就會自自然然成日掛住掛住想去旅行，於是無端白事又會上網搵下尐酒店價錢，轉頭又會上網睇埋機票價錢，之後亦會順手打個電話去旅行社問下有冇平飛執，終於俾我發現，原來8月25號之後，機票係冇附加費嘅！
又咁啱上網又俾我訂到朋友大力推介嘅酒店，雖然第一晚full咗，但係訂到兩晚都想試下，本來玩咁短日子要搬酒店唔係我果杯茶，但係見朋友講得咁好，而咁啱價錢又唔貴，於是立即成行。
11點15分嘅航班，原來呢個時間幾好㗎喎，有時太早又真係搞到自己辛苦過番工真係冇乜意思，放假吖嘛！通常四五日嘅行程，我都會泊架車喺機場，但係今次泊開嘅露天停車場滿咗，心諗，呢次發達，因為根據過去經驗，佢係會指我去有蓋停車場嘅，以露天價錢泊有蓋車位，都唔可以話唔happy，點知今次佢叫我泊過去航天城果邊，雖然話有shuttle車番你番過去機場，但係時間上就係要預鬆尐喇，而回程係喺1號停車場，冇乜指示牌，但係佢幾乎係唯一嘅一部旅遊巴，所以都幾易認。
講番我個行程先。Check in完畢，就入禁區個Lounge果度搵食，因為今次喺Gate25上機，所以我揀咗近近地喺Gate 23嘅the Cabin，入到去轉左手邊，人唔算多，但係有一大陣嘅食物味，明顯係抽氣做得唔夠好，望望枱面，有丹麥酥、蝦餃、燒賣、牛肉燒賣之類，總之中西兼備但係選擇唔算多，我望下周圍都坐得幾滿下，而且開始有尐嘈雜聲，於是行番出去轉過右手邊睇下乜嘢環境。
嘩，真係天堂呀，人都唔多個，好清靜，雖然枱上嘅食物比較少，
但係我覺得清靜嘅環境重於一切，於是就隨便攞幾件蛋糕餅仔，坐低叫做食個早餐先，唔駛食咁飽嘅，四個鐘頭後，當我去到福岡，你驚冇得食咩。
食完嘢，去探下個廁所先，嘩，乜洗手位對面嘅化妝area得一枝hand cream孤零零咁企咗喺度呀！平日至少有洗面奶、lotion同handcream咁3枝嘢係埋一齊㗎，就算冇咁多枝都至少有個托盤呀，冇，真係得枝hand cream冇人冇物咁企咗喺度！唉，精致的年代，隨住不境氣一去不復反。
之後再行番出去坐咗一陣，就行去閘口登機喇！到我入閘嘅時候，個地勤姐姐同我講話，我同你換咗個位，一時間我唔係好明佢講乜！到佢俾番張登機證我睇時，至知道係upgrade咗去Business Class，當時真係好歡喜，但係亦都覺得好奇怪，佢做乜唔話upgrade，而話同我換咗個位呢，等我有一刻以為佢唔知換咗我去邊添！
有得upgrade就梗係最好喇，雖然只係坐中間果排而冇得坐窗口位。不過都好滿足喇，呢個旅程已經有一個好開始，睇嚟呢次旅遊應該幾開心！好喇，坐定定，等食飛機餐先！
沒有留言:
張貼留言