嘉嘉航空，福岡之旅（二）商務客位

話說我被upgrade去坐商務客位，不知幾爽！個位闊尐之外，報紙都多尐，任你攞，唔駛同人爭！都未坐定，就問我飲唔飲番杯嘢，係問喎，唔係派喎，有得揀至係老闆，我見既然咁高興，就不如整番杯香檳喇，雖然唔係名牌，但係見到尐香檳酒升起的泡，真係心情特別好。

一邊歎住香檳一邊歎報紙，真係人生一大樂事。嘩，寫下寫下，你會以為我咁大個人第一次坐商務位，唔係，我過去幾十年打工嘅時候，出親差都係坐商務位，所以唔係未坐過，亦唔係未upgrade過，不過比較少喺機口upgrade，所以特別興奮！

起飛喇！到架機飛定咗就開始食嘢嘞。前菜係香草三文魚他他及大蝦沙律，同埋冷烏冬。個烏冬有蛋絲，所以我冇食，而且個沙律望落都幾大份，留肚食主菜。當我正話講話係三文魚嘅時候，你有冇少少驚呢？因為袁國勇教授話食生嘅三文魚第同食屎，不過他他雖然都係生，但係應該唔同做法，應該冇咁屎啩！

唔，呢舊屎幾好味喎，用嚟襯住隻帶子一齊食，都不知幾惹味。大蝦有兩隻，我一隻同青瓜一齊食，非常清香味美，另一隻用三文魚醬一齊食，又更加帶出蝦嘅鮮味，最後我就咁空口食三文魚，發覺佢除咗係咸咗少少之外，本身都好好味，本來諗住用嚟搽麵包，但係又怕太飽於是收手！

到主菜嘞，選擇都幾多，有香草白汁海鮮配意式扭紋粉、日式咖哩雞配芝麻白飯同埋夏威夷果仁炒牛柳配白飯，我就係揀咗呢個飯嘞！一來我喺香港係唔食牛嘅，所以一離境我係會盡量食牛，另一個原因就係喺Menu上，呢個飯嘅傍邊，有一行細到唔係好睇到嘅字，話呢個飯係凱悅軒嘅料理，咁凱悅軒喎，我梗係要試下喇！一來我想試下佢嘅手勢，二來我其實係唔同意大師傅將尐食物變成飛機餐，因為咁樣大量處理嘅食物，雖然商務位相對較經濟位少人，但係食物即刻上枱果下同煮好翻熱至上枱中間，確實有好大嘅分別。

食物上枱喇，坦白講，有少少想去商品說明果度去告佢呀，明明係叫做夏威夷果仁炒牛柳配白飯，但係我真係半粒夏威夷果仁都見唔到呀，只係見到一大堆嘅菇類，我同意用菇類係最安全，因為呢樣嘢點煮都唔會太過火，如果用夏威夷果仁就隨時諗到冇朋友，不過你就應該改番個食物說明喇！

好，成份食物，白飯唔駛點試椒絲同菇都唔駛試，主要係試個牛柳。用隻叉一拮落去，咦，出奇地林，再切一片嚟試下，唔錯喎，當然我唔係以餐廳嘅水準嚟話佢唔錯，我係考慮到佢翻熱之後仍然可以一口𡁻爛，而覺得佢無論舊肉到個處理手法，都算係唔錯嘅！當然，加如果呢件嘢係喺餐廳食，我會立即退貨！

雖然話白飯不在試味之列，但係我都仍然認為尐飯係可以唔駛咁爛嘅！

到甜品喇，冇得揀，係雪糕，不過味道就有幾款，我揀咗杏仁味，非常清新，食完咸咸地嘅中菜之後，嚟一杯雪糕真係賞心樂事，而且而家佢地會為雪糕解凍，唔似得以前咁，真係放到落機都重係硬到未食得，如果你坐嘅係短途機！

之後嚟番杯咖啡，真係無以上之，本來都想飲番杯餐後酒嘅，但係已經飲咗好幾杯香檳，節制下好，以免影響我嘅旅程。

落機喇，商務位嘅客人梗係行先喇，但係福岡實在唔算太多遊客，所以過關好快，快到我出咗嚟等咗一輪，條行李帶都重係未出行李。冇問題，一於放慢腳步，好好感受下呢個地方。