嘉嘉航空，福岡之旅（七）天神站的隱世芝士撻

由於我是第一次到福岡，所以我事前看了很多旅遊網站，亦在書店打了不少旅遊書的書釘。其中我留意到天神站的地下街是很多旅遊書及網站都大力推薦的，於是我也預了一個晚上去逛—個不亦樂乎。

去到才知被搵笨！除非你未去過日本，否則我看不出這地下街有幾特別，都是以賣未成名的牌子及二線藥妝為主，價廉，但係唔肯定係唔係物美。

而由於我在晚上前往，所以很多店鋪也已關門，當然有些冇癮，正計劃打道回旅館，返去浸番個溫泉冇咁嬲，點知就喺呢個時候，俾我見到一條人龍，你要知道，人龍對於出外搵食嚟講，絕大部份時間係一個正面嘅指示。於是我又行埋去八下，見到排隊嘅男女老少都有，再行埋尐就聞到一陣焗西餅味，但係唔算好揚果種味道，於是我又排埋一份睇下佢究竟賣乜東東。

哦，原來係BAKE cheese tart。佢係北海道名物，而喺八月尾亦已登陸香港百貨公司，不過我未食過。講番福岡天神站呢間BAKE cheese cake先。呢間鋪個門面真係幾有型嘅，一大度灰色嘅牆璧，上面有一個一個櫃桶仔，而鋪面就係擺滿一盤又一盤一式嘅芝士撻，真係完全冇得揀，因為佢只係出爐芝士撻，亦都只係得一隻味。

再睇真尐，灰色牆壁後面，完來就係焗餅房，咁唔怪得佢可以賣出爐芝士撻喇，情形就好似我地細個嘅麵包鋪，焗房就喺麵包鋪後面，尐麵包有乜辦法唔好食呢，邊似而家果尐麵包西餅，全部係由廠房包辦，送到出嚟都三點，仲未計中間唔知經過尐乜嘢地方，咁尐包又點會好食呀！

發完勞騷嘞，講番呢個芝士撻先。呢間鋪睇情形喺當地係好巴閉，因為佢係有購買限制嘅！一個人最多可以買12個，而我見排喺我前面嘅日本太太同埋前面嘅人，又真係個個都買一打，咁我諗我今次應該冇跟錯隊喇啩！

排下排下，大概過咗15分鐘唔夠就已經到我買喇，過程唔算沉悶，因為你係會見到佢一盤一盤咁出爐，又會見到佢將尐撻由個餅模轉過去撻紙上面，我就睇得非常投入，不過前面個日本小朋在友就顯得有尐悶喇。

不過有一樣奇怪嘅就係雖然面前係一盤又一盤嘅芝士撻，但係佢嘅味道並唔係特別濃，咁我就更加放心，即係冇落香味劑喇！又繼續前行，當我行近尐嘅時候就知道，原來喺灰牆上我以為係櫃桶仔嘅設計，係餅盒嚟㗎，嘩，真係靚到冇朋友！

一路向前行，一路見到人一盒一盒咁攞走，即係人人都一打一打咁買喇！我其實當時都諗過買多尐㗎，不過啱啱食完飯，而且跟住幾日都好多嘢食，咁我又冇咁神心hand carry番香港，於是就買一件試下就算。一個連稅要￥216，如果買一打就￥1242。不過日本人喺包裝上真係不遺餘力，我就咁散買，佢都同我包得靚靚。其實我買到之後，就會即刻食㗎喇，真係浪費咗個咁靚嘅包裝袋呀。

呢間鋪頭雖然已經有餅房，又有賣餅嘅前台，但係佢亦都留咗一個小小嘅地方俾人坐得舒舒服服咁食餅，呢尐咪就係對客人嘅尊重囉！我小心奕奕咁由個袋攞個撻出嚟，正如我先前講過，佢並唔係特別香，但係望落去微焦嘅表皮，非常吸引。

一口咬落去，好軟熟，而且齒頰留香，係好清嘅芝士香，你唔會聞到好濃嘅芝士味，但係你知道你係食緊芝士。兩三啖就食完㗎喇，但係好滿足。呢十五分鐘，係排得非常有價值。

雖然話香港八月尾都已經有得食，但係邊有人地果種閑適呀！你下次去開天神站，真係可以去試下呀。

食完芝士撻，反正天神站嘅鋪都差不多收哂，於是我索性行上地面，感受一下福岡微涼嘅天氣。