話說我行去食燒肉，點知離遠已經見到有好多人企咗喺門口。於是我一去到門口即刻行入去登記，我正想同個女侍應講我幾多個人時，見佢已經指指枱面一個牌，原來係要自己寫名喺張紙度，並且已經係第二張，甚至連第二張都已經寫咗好幾個名，果時至係6點幾，係咪咁旺呀，我心諗！冇選擇之下我亦立即將自己個名寫落張登記紙度，跟住數下數下發覺我都要等成十幾張枱至到我，而放眼開去，呢間鋪頭嘅枱亦都唔算多，咁於是我去問個女待應大概要等幾耐，佢話唔知！咁真係唯有等喇！我諗最少要等一個鐘頭！本來可以去附近行下先嘅，但係呢區又唔係商場集中地，冇得話去shopping下至番嚟，而周圍亦都冇乜好行，做緊生意嘅除咗呢間燒肉店，就只有幾個露天停車場同埋前面街角嘅好幾部販賣機！
等呀等，嘩，終於見到有人食完行出嚟喇，之後係個女待應出嚟叫名。叫完一個名、冇反應，再叫一個又冇反應，嘩，一時間所有企喺門口嘅人都好緊張呀，個個都希望自己前面嘅人唔出現，咁自己就可以即刻入座！但係呢個世界邊有咁理想呀，於是我就喺門口嘅矮石膊半坐半踎咁等咗90分鐘，冇錯係個半小時，至終於有得入座。
入到去，好煙呀，除咗燒烤所產生嘅煙同味道之外，仲有吸煙嘅煙味，冇錯呀，呢度係準食煙嘅，不過好彩我坐果個位唔係食風位，如果唔係，好似我對面枱果個女仔咁，坐正喺抽氣前面，於是燒烤嘅煙同抽煙嘅煙都去哂佢果度，我見佢就真係幾慘喇，不過日本女仔就係有呢個能耐，咁嘅環境都仲係笑笑口！俾著港女，走咗喇！
枱面一早已放上燒紅咗嘅炭爐同埋一本中文餐牌，其實佢嘅選擇唔算多。
唔理咁多喇，點菜先。其實喺入門口嘅時候，已經留意到佢果張以中、英、日、韓文寫嘅statement，話佢地有一款牛肉，叫做上雪花肉，一人只可以點一份。嘩，咁矜貴，乜咁巴弊，咁就梗係一人叫一碟先喇，另外又分別叫咗一份上里脊肉同紅里脊，咁至可以比較一下佢嘅上雪花肉有幾咁犀利威！當然我亦都會叫一份牛舌，這是賣飛佛！見佢係咁燒，實好熱氣，於是我又叫咗一份蔬菜，不過燒烤過嘅蔬菜，我諗都應該會好熱氣！不過唔駛驚，飲多幾杯番鬼佬涼茶咪得囉！
因為尐食物係生嘅，所以點完菜，轉個頭已經上枱。果份限住一人一份嘅上雪花牛好似幾好樣喎，略厚切，搵塊嚟燒下先。燒呢尐牛唔可以懶，一定要時不時將佢反轉再反轉，唔係燒老咗就冇人可憐，而佢咁樣限住叫，亦都唔好諗住燒壞咗叫過碟，真係冇得翻轉頭呀！
講下講下，第一塊已經燒好。唔，果然係入口融化，而以￥690呢個價錢計，雖然只得五塊，但係都真係物超所值，性價比極高！其實佢嘅上里脊肉都唔係差，而且價錢只係比上五花肉平￥10，但係佢可以冇限制咁食，就顯得冇咁矜貴囉，燒第一塊時確實有尐失望，但係我即時改變燒法，只用爐邊火嚟燒呢個部位嘅肉，嗱，咁就燒出嫩滑而juicy嘅燒肉嘞，佢確實冇五花肉咁肥美，但係只要俾心機燒，都可以好好味！
跟住梗係要試賣飛佛，阿牛舌喇，又係要比心機慢慢燒，雖然我比較鍾意厚切，但係我用心燒烤，喺佢剛剛熟就離火，效果一樣咁好，爽軟適中，￥890都係抵嘅。
一餐飯落嚟食咗￥6900，係抵食而好味嘅，不過等咗個半鐘但係食咗唔夠9個字就走人，就唔係幾抵，唔係佢限我進食時間，只係佢咁煙，食完仲唔走人；容乜易變煙肉！
唉，真係天光食到天黑呀！
沒有留言:
張貼留言