嘉嘉航空，福岡之旅（三）由機場出博多

話說我已經飛抵福岡機場，而由福岡機場出博多站，你要先由國際線機場乘1號巴士至國內線機場，然後就可以搭地鐵往市內沿線分站。巴士站就在機場外，指示清楚，搵唔到嘅機會好低！

巴士係免費嘅，班次都算密而且唔迫，我來回兩程都坐唔滿。

我喺站頭企咗唔夠一分鐘就有車到，唔係旅遊巴而係似我地香港嘅機場巴士，行李架嘅位置亦都係一樣，唔同嘅係佢喺中間上車，而行李架亦都有一個軸，令你可以抽起佢再推行李入去，然後再放番低個軸，咁樣，行李唔會掉出行李架之餘，亦都唔駛用好大力至可以抽件行李入個行李架度，呢樣嘢，香港尐機場巴士要學下喇！

絲絨布嘅坐椅非常舒服，坐咗唔夠二十分鐘就到國內線機場。落車之後，順著車頭方向前行，唔夠20步就是往地鐵站的電梯，落到去，依照你嘅目的地，買票就可以入閘。我們第一晚的旅館在博多站，車費￥260，其實福岡好細，坐兩個站就到博多站，真係都未坐定就已經落車喇，反而由鐵路站行去旅館嘅路程仲遠！

我住嘅第一間旅館(Hotel Hokke Club Fukuoka)係要嚟攝期嘅，不過可能係旺季，都要成千幾蚊港紙一晚！來短途嘅旅程，我係盡量唔換住宿嘅，但係因為我地嘅目標旅館已經客滿，要到第二日嘅行程先至有房，咁如果唔換，我咪完全冇得住我嘅目標旅館，咁至搞到要換旅館啫！不過已經好好㗎喇，因為成個博多尐旅館都爆滿，唔住就冇得住添呀！不過，我講嘅當然係我住得起果尐，而唔係幾千蚊一晚果尐喇！不過以今次嚟講，換旅館都有好處，就係方便我將兩間旅館作一個比較，如果唔係，我又點知道我第二晚住嘅旅館係幾咁平靚正喎！

我落機當日嘅天氣唔係幾好，天陰陰之外，重不時落毛毛雨，街上雖然濕滑，但係好乾淨、好寧靜，行咗成十分鐘，終於到達旅館，但係個人都冇乜點濕而雙腳亦冇踩到黑哂同埋濕哂！由門外睇，以為係商業大樓，入到去就係一間普通過普通嘅日本平價旅館，但係我出外旅行，一向對旅館嘅要求只係乾淨、有熱水沖涼就得，反正一定係一早出咗去，好夜至番歸，主要係沖涼同瞓覺，所以我係唔會花好多錢喺旅館上嘅。

簡單嘅登記手續之後，就可以上房喇。入到房，正如我所料，係一間平實嘅套房，但係環境光潔，設施齊全，非常之合心意，睇資料原來仲有一間細細嘅溫泉，雖然明知唔慌大，不過都諗住今晚食完飯去浸下先。

放低行李就即刻出動，因為要去食一間平價而美味嘅燒肉店，要排隊嘅，越早越好。我諗你知道我講嘅燒肉店唔係我地果尐燒味鋪嘅拜神燒肉呀呵，係類似BBQ嘅網燒鋪頭，自己點食物、自己燒嚟食果尐！

由旅館出發，大概行十分鐘左右就到，你可能會覺得奇怪，點解又係行十分鐘左右？哦，因為間燒肉店喺博多站附近，所以其實我係行番轉頭啫！行呀行，離遠已經見到間鋪頭，唔係因為佢個門面好大又或者有個大大嘅霓虹招牌，呢尐小鎮風情嘅地方，點會有尐咁招搖嘅嘢吖，我之所以知道間鋪頭喺邊，係因為我離遠已經見到有好多人企咗喺門口呀。