三文魚pizza冇幾耐亦都到喇！嘩，駛唔駛咁大個！以目測得出嚟嘅呎碼應該至少有16吋直徑！三文魚都幾多，但係有少少焗咗過火，即係尐魚肉老咗，但係都幾好食！可惜，真係太大個，到最後當然吃不完，諗住打包上房，夜尐食，但係房入面又冇焗爐，包番去都冇用喇，唯有唔食算數！但待應小姐見我地食剩咁多，問係唔係有乜野問題呀？我地話，唔係，只係太大份食唔哂，點知佢真係非常之好人，她話幫我把剩下的半個包起，放入廚房，叫我今晚吃飯時叫廚房再焗熱就可以了。嘩，乜咁好嘅！
喺旅館食飯有乜好處呢？就係近房，咁返房，有甚麼好做呢？當然是瞓覺！雖說天已黑齊，但反正極光是在晚上才出現。出去行又太黑冇乜嘢好做，極光又未出現，咁你話唔瞓番覺又可以做乜喎，而且睡覺不需要藉口，番緊工都會眠一眠，更何況我是在渡假喎！
一覺醒來，咦，點解咁光嘅！原來已是另一天！嗄，咁我咪又少咗一個睇極光嘅機會，雖然話呢一覺沒有浪費到，因為會咁樣瞓到懞哂，證明我很需要那一覺。但我在極光圈入面嘅日子無多，咁樣瞓法，隨時冇得再睇極光喎，決定今晚幾大都唔瞓！落去食早餐先。
這酒店的早餐花款不多，但份量很足，三文魚，當然有三文魚喇，真係已經食到有尐厭，嘻！悠悠閑閑的吃，不知不覺間竟又坐了個多兩個小時，不可再hea了，要出外走走。不然當人家問起Inari時，我只能分享睡覺經驗就唔係幾好嘞！根據網上資料和酒店的情報提供，從酒店出發，向右面一直走，就會去到被譽為芬蘭其中一個最細緻嘅博物館（Siida Museum），從中亦可知道這個地方的發展史，我見這地方長年冰天雪地，建築物最高只有兩層，人都唔多個，發展史應該冇乜睇頭，但作為遊客，好歹也要看看，而且我由酒店望出去，大大話話成二十分鐘路程都未見有建築物，我相信由酒店行去呢間博物館，會係我克服滑冰恐懼症的好方法，好，一於要面對它。
天氣很好，但亦表示地面會比較滑，因為雪開始溶化！我保持我的企鵝步，左右左右的，並盡量揀雪才踩落去，這樣行下停下慢慢的走，沿途又停下來拍照，竟然把短短的路程變成了一個小時的遊歷。入場費9歐羅，像大部份的博物館一樣，除非你真有興趣及曾深入研究，不然，真是味同嚼蠟，就連紀念品店的貨物也毫不吸引！反而外面的風景更有睇頭，至少可以玩下雪！
Inari也是玩冰上活動的好地方，如果你想坐雪橇犬拉車、鹿車或冰上電單車等，可以請酒店代訂。我見有些網上資料建議在香港網上訂購，這是完全不必要的，因為由Tromso到Kirkenes至Inari，只要是在陸地，便一定有這些活動提供。
見周圍無甚睇頭，不如返酒店行落去已結冰的Inari湖玩雪，到得返到酒店附近，原來已是中午時份，沒有幾多間店鋪開門，隨意的走進正在營業的其中一間餐廳，完全沒有客人的，看真些，餐廳的格局其實更似酒吧，而且滿是煙味，也許主力做晚間生意，所以這個時間才如此冷清吧！餐牌上寫的亦不外乎湯與pizza，還有啤酒。當然有馴鹿和三文魚喇，但三文魚真的吃到有尐厭，好喇，一於來一客馴鹿pizza配啤酒吧！到了北歐這幾天，也真的未試過它的啤酒呢！
啤酒偏向淡口，很清新，而pizza，馴鹿肉的肉質粗粗的有點似駝鳥肉，無甚特別，叫做食過咁喇！埋單後，正想得打道回酒店休息片刻再去玩雪，但見到酒店對面就有一間超級市場，本著逛超市最能了解當地人生活的原則，我當然要去行下喇，更何況，我已經有幾日冇飲過原味可樂，係時候要借幫自己補充下喇！
沒有留言:
張貼留言