在聖誕老人村只逗留了半天不到，你會問，不會太短嗎？不會，因為我們一早做了功課，對其他人這個地方的吸引力可能是玩一整天都未夠，但對我來說，半天已經很足夠，因為我在下午還有地方要去。在剛才下車的地點坐巴士返回Rovaniemi，這次我會在火車站下車，因我們要搭火車到Kemi。
對很多人來說，Kemi是玩冰海浮水的好地方，但當我見過其他人玩這個活動的照片後，我第一時間提醒自己，除非被人用枝槍指住，唔係一定唔可以玩呢樣活動，而就算玩，都一定要第一個玩。因為我相信那些借給我們穿的浮水衣，其實只有那麼幾件，你可以想象當一個人在冰海浮水時，很自然會高叫或做出其他更激反應，這時候就會在浮水衣內制造蒸氣，而當中亦少不免有唾液，即係口水，咁到佢玩完換番件衫出嚟俾下一個去浮，作話個負責人會唔會咁好死幫你消毒！抹都未必會抹添！所以我係基於衛生原因而唔玩冰海浮水嘅！
咁我唔玩浮冰海，去Kemi又做乜呢？我去果度睇Snow Hotel雪酒店呀！你又唔好以為我會住喎，都係唔會，因為無論網上資料或者朋友嘅經驗都係，住呢尐酒店係有少少攞苦嚟辛嘅！因為就算佢喺冰床上面鋪咗幾咁厚嘅fur，佢都係一張冰床，而我地又唔係好似小龍女咁要瞓寒冰床嚟練功，更加冇佢嘅內功護體，所以我地係會覺得好凍好凍嘅，當然果度亦都唔可以開暖氣，雖然佢會俾一個好暖嘅睡袋俾你，但係都係會覺得好凍，瞓唔著之外，我地中國人重驚攝親，真係唔講得笑！
但係參觀就冇問題喇，因為佢係年年砌一次，所以次次都會有尐唔同嘅。講咗咁耐，我其實重喺火車站，重俾我見到之前遇見果三個香港女孩，佢地住嘅旅館冇錯好近，但係喺山上，果日又係落住大雪，見佢地拖住個篋又不知如何是好，於是我又建議佢地搭的士，之後就坐火車Kemi喇！
去到剛好過了午餐時間，但在這種天氣，不容得我話唔食就唔食，因為冇體力喺呢種咁具挑戰性嘅天氣係好危險嘅，於是隨便走入一間仍然營業嘅pizza店。見後面果兩個女仔果份pizza都幾好樣，但係都係好大件，就叫咗一個蒜泥pizza，另外叫咗兩罐可樂，點知個侍應重唔離開，之後我地表示叫完喇，佢好似好好奇咁問，one only？咁大個，唔係一個係幾多呀！呢個時候我見到後面果兩個女仔嘅另一個pizza駕到，原來佢地真係一人食一個，點解可以食得落㗎！
食飽飽就行去雪酒店，一路向海邊行就得，唔識都可以問人，尐人都好友善嘅！嘩，見到喇，真係好靚，離遠見到一個白色嘅城堡，於是急急腳走埋去，嗱，唔好話我唔提你呀，雖然當日落緊雪，但係因為好多人去呢間雪酒店，所以地面都好滑下，於是我又駛出我嘅企鵝步，肉酸唔緊要，最緊要唔好再跌！
一入門口已經係冰雕嘅船艦，當時個天暗暗地，周圍風雲變色，真係有幾分似海盜出沒，不過走上去隻船度影相都要好小心，因為真係好滑。如果你唔怕滑，佢傍邊就有條冰梯，見人地瀡得咁開心，我都有尐心癢癢，但係前面重有一半旅程，都係小心尐好。
跟住就正式進入冰酒店喇！先係一度冰雕嘅拱門，入咗去之後就係酒吧，咁無論枱、凳或者bar枱都係冰雕嘅，之後就逐間房、逐個廳咁行，一路行一路心驚驚，因為真係毫無揸拿，隨時跣過人仰馬翻，但係人地尐北歐小朋友就輕鬆得多，見佢地跌咗起番身、跌咗起番身，好似唔會跌親咁，真係羨慕呀！
行呀行，終於行到睡房喇，嘩，好靚，真係好似龍宮咁呀，見冇人監視，瞓上床試下先，我咁樣瞓一陣梗係唔覺凍喇，但係起身嘅時候，我件羽絨都有少少濕呀，你話真係喺度住一晚，真係凍到牙關打震都似！
就係咁一路行，一路怕跣親，全程企鵝步就睇完個Snow Hotel，我得好靚，亦都好值得參觀，唉，個冰爪又留咗喺酒店！我個腦唔知要嚟做乜嘅呢！唔覺唔覺，天都就嚟黑喇，係時候要搭車番酒店喇！
沒有留言:
張貼留言