既然叫得做古城，咁佢一定保留咗唔少古舊嘅建築，冇錯，由一出碼頭就見到嘅古堡，到街上嘅石頭路，在在都顯示佢嘅古樸，我地喺古城行咗一個圈，影下相叫做到此一遊咁喇，因為古城內好多鋪頭都已改裝成為咖啡室或者快餐店，當然亦都有我一入到Tallin就見到嘅麥當當！
係嘞，呢間麥當當有乜嘢好呢！就係佢同全世界嘅麥當當一樣，都係可以俾你任坐同埋有洗手間免費俾你用，但係佢呢度嘅洗手間就多一重關卡，就係佢係要你幫趁，然後用你張收條上面印嘅果個密碼，你至可以入到洗手間。咁你可能會諗，易喇，咪企喺洗手間門口等人出嘅時候頂住度門咪有得去囉！嘩，你邊度嚟㗎，千祈唔好咁失禮添呀，歐洲人係好尊重呢尐規條嘅，你咁樣頂住度門，俾人話你就有辱國體呀！
麥當當另一個好嘅地方就係佢有早餐！話說我第二朝瞓醒諗住早尐出發去望個彌撒至搭船番赫爾辛基，點知唔知係咪因為前一晚係周未，當地人都興Saturday night fever，於是全城未醒，就算有一兩間餐廳仔叫做打開咗門，但係佢地都只係預備而未開始做生意，所以當我行到落街見到呢個情景係有尐腳軟，因為唔知點解人在歐洲特別肚餓，而我又行咗成百級樓梯落嚟就更加腳軟，冇早餐食？真係驚冇力行去上山去揭聖堂喎！行下行下，竟然見到間麥當當已經開咗門，真係心都開埋，無論平時幾咁憎佢，呢一刻我都情難自禁咁投向佢懷抱！
食完呢餐之後，就係時候尋找聖堂之旅，之前我當然問過人，大家都係指向同一個方向，但係因為天主教唔係呢度嘅國教，所以尐人並不熱衷於帶路，但我見方向啱咗，又有哂門牌地址喺手，應該好易搵到，咪自己慢慢行下搵下囉！點知唔係，我一早都話呢尐古城嘅門牌亂哂大籠㗎喇，果然，明明下一個號碼就到，但係下一個號碼又同前一個號碼差成十個門牌號碼，但如果唔係向前行，左右隔離又冇建築物，問人！我當然識問人，但係竟然冇人知呢度有間教堂！
唔服氣，再行番轉頭，咦，好似有條小巷喎，行下入去先，入到去就見到一度大門寫住同個聖堂同一個門牌號碼，但係外面睇係似一間古舊建築物多過似聖堂囉！唔理喇，推門入去睇下，入到去係一個庭園，再行前尐見到有尐人出入，哦，原來聖堂就喺呢度，嘩，如果我見搵極都搵唔到就走人，就真係大損失，一來錯過了參與彌撒嘅機會，二來就錯過咗呢個咁靚同埋擺滿聖像畫嘅聖堂喇！
彌撒之後，佢地見我呢個東方面孔都好好奇，同我傾咗好耐，傾傾下重話要開埋地下室個聖像畫收藏俾我睇，後來因為個電制出咗問題而只好放棄，天主自有安排，下次喇！
望完彌撒之後，我落番山，沿途經過大使館區同埋好多座興建得壯嚴肅穆嘅東方教會嘅教堂，點分？佢地起到好似羊蔥頭咁㗎，行呀行，又行到Toompea Hill嘞，你唔好以為好高，都不過係一個山丘仔，但係因為古城嘅建築物唔算高，所以由果度望出嚟，係一見望哂，好開揚嘅！
係時候出碼頭搭船番赫爾辛基，不過喺Tallin我食咗一個好美味嘅晚餐，星期一至同你講喇。
沒有留言:
張貼留言