嘉嘉航空，極光之旅（十八）裝備

仍然是關於事前準備，因為作為一個自助遊者，事前準備充足，去到現場都可以很踢腳，何況準備不足！

今次要講的是衣著。當我跟人說去北歐，一般的第一個反應是：嘩，好靚！之後一定是：嘩，好凍喎！這其實也是我出發前的感覺，北歐一定好凍喲！因為我真的在北京凍到病左，手尾長到唔記得，所以初時真的很怕。但因為有家人在歐洲生活，去探望他時發覺他就算在很冷的天氣外出，也只是穿一件絨大衣，而之內也只穿一件恤衫或長袖襯衣，下加一條牛仔褲，看多了便明白歐洲的暖氣是非常足夠的，與我們夏天大放冷氣的程度有異曲同功之妙。畢竟與同學仔的北京之旅是三十年前的事，當日除了冇乜錢買衫之外，亦傻下傻下不知天高地厚才會凍病，所以在出發前我已經對怎樣穿，非常有把握。

衣服方面一件厚羽絨是少不免，何謂厚，你要看羽絨的磅數和含量，還有究竟是羽毛多還是羽絨多。另外要試穿上身，記住不可太貼身，要預留空位以便打底，但也不能太鬆身，不然入風也很凍，並且必需要蓋過膝頭，這方面女士是沒有爭議的，服從性很強，但男士可能嫌「論盡」，身材偏矮的穿起長衣又真的欠型格及似星球大戰裡那個Jedi！但也至少要穿一件蓋過屁股的，如果堅持穿件只及腰的，去到你一定會後悔！

打底反而不能太厚，更不可以一件過，我們始終是亞洲人，除非你曾經在寒冷天氣生活，不能學他們般一件衛衣走天涯，因為我們去的地方大部份都不是城市，有時要在戶外走一大段路，內衣太薄也不足以保溫，體溫流失得快，人自然會凍親！我的做法是一件快乾排汗襯衫打底，因為在室內是會熱到標汗的！外加一件薄身及腰羽絨，再加一件fleece，在戶外就加厚羽絨外褸。因為她們的暖氣真的很足夠，有的甚至會令你窒息，但又不是間間一樣，所以這個層層剝的穿法是最好的了。頸巾當然是不可或缺，唔駛講喇嘛！

褲子也很講究，先穿一條貼身但見得人的，現在流行的那種legging最好，外面再穿一條薄身的羽絨褲，另加一條防水或膠褲就可以，另外我也帶了一條雪褲，以備氣溫忽然降至零下二十幾度甚至下大雪，不過今次冇用！這也是要看環境而決定除幾多條，所以最入面果條要見得人。

另外就是鞋了。一對所謂的heavy duty鞋是少不免的了，何謂heavy duty？即可防水及厚底的那種。防水是因為你踩在鞋上的雪，很快會化成水，如果不防水而滲得雙腳盡濕，則你捱不到半小時已雙腳凍僵，其實如果腳汗大的也要帶多一對襪在身邊，因為腳汗在寒冷的地方也會變冷而令體溫流失的。另外就是厚底，這會令你雙腳不用與冰冷的地面接觸，試想想你穿著一對布鞋行在雪地，不消五分鐘，雙腳應該頂唔順了！

這對鞋可以是普通鞋型亦可以是短靴型，但也只足以讓你在下雪的城市內走動，若像我今次要去等極光，亦即是要在晚間的雪地上逗留一小時以上的話，則一定要買一對雪靴。我在網上見到有朋友在淘寶用二百蚊買了一對雪靴！他說也捱到三十分鐘！我不會相信二百蚊，無論是港幣還是人民幣，二百蚊冇可能會有一對靠得住的雪靴！

我不是大花筒，但花了這麼多錢遠道去看極光，卻因為裝備不足而功虧一簣，回去酒店暖完腳再出來天都光喇，這不是我的做事方法！所以我很認真的研究了一大輪雪靴，包括很流行但其實人家澳洲人是在家裡穿的UGG；裡裡外外都是毛，但重過棵樹的毛靴；也上網研究過那對二百蚊貨仔，結論是要輕身、要保暖、要防水、要厚底！於是我買了一對標明可抵受-25度華氏的雪靴，你說很貴嗎，是，不平的，千多元，但我在雪地上行走自如，溫暖舒適就已值回票價了。買這對鞋時，記得帶同厚襪，不然買細了，就真是哂心機鳥！

嘉嘉航空，極光之旅（十九）赫爾辛基的一餐

極光圈的行程是完全結束了，接下來如果見到極光，也應該只是在夢中，不過，講真，我真係未發過極光夢，或者既然見過就唔會發夢都想去，又或者我對極光嘅依戀唔係咁深，所以未至於發夢都想見囉！

由Rovaniemi坐飛機到赫爾辛基，前後只係一個鐘頭零二十分鐘，航班包飲品一份，不過都算係有得揀，唔似去台灣咁得包冇得揀嘅紙包飲品，飲品名單中當然有我喜歡嘅可樂，雖然係細罐裝，但係如果自己買，都要5歐羅一罐㗎！

時間過得好快，飲完罐汽水已經landing！抵達赫爾辛基又係搭機場巴士出市區，因為我的酒店就在火車站附近，落車轉個彎再上一條短短嘅斜路已經到。這當然是刻意的安排，其他人點樣做我唔知，但係我係好鍾意住尐由機場方便到達嘅酒店嘅，因為一落機人生路不熟，又上又落又要轉幾輪車之後又要行十九幾分鐘至到嘅酒店，我係覺得好唔方便嘅，而且走嘅時候多數會買到一手都係，到時又拖住一抽二lung咁行九千幾里至到機場，我係好頂唔順嘅！

嘩，入到房，真係唔想出門口，當然我住呢間唔係五星級酒店，但係同之前喺極光圈住嘅旅館真係有分別，高床軟枕，真係好吸引。結果，沖完涼之後，唔知點解就捐咗上床，不過，我都好自律，只係休息咗半個鐘就起身出門口，因為，都成八點㗎喇，除非諗住食即食麵啫，如果凍重唔出門，就冇嘢食㗎喇，佢地真係收得好早㗎！

人生路不熟，而且今次旅行嘅目的係睇極光，對於名店冇乜研究，其實北歐著名食店應該不少，但係我唔識，於是隨便的在酒店附近的街上走走看看，見最多人的一間就走進去。嘩，真係好多人。竟然要排隊添！天寒地凍，好彩係企喺餐廳入面排，冇咁凍，但係亦因為企咗入餐廳而成身好熱，因為佢地尐暖氣真係好似我地香港人嘅冷氣咁，係開得絕不手軟！鋪面唔算大，但係都預咗幾張凳俾你坐，換著喺香港？話之你喺門口吹風，開多幾張枱至係硬道理！而最大功德當然係有好多個勾俾你掛衫，如果唔係，要抱住咁大堆衫喺咁熱嘅地方等位，都幾罄。

呢個時候至有尐心情望下間餐廳，這間餐廳叫MorriSon's，是一間類似我們香港Dan Ryan's的餐廳，賣的是漢堡及牛扒之類的食物。坐位設計基本上係兩人枱，以歐洲水平計，枱與枱之間嘅矩離幾近，但係可以因就你嘅人數而隨時拍台，所以八人甚至十人都冇問題，咁如果多尐人拍枱，就會坐得舒服尐。

企咗十分鐘左右就有位喇，呢個等候時間對於我地喺香港等慣位嘅人嚟講，真係唔算係乜。當侍應話輪到我地，並提我記得攞番尐衫時，我係有尐擔心嘅，嘩，一陣間唔係要咁攬住尐衫食嘛！入到去，睇定尐至見到，原來每個位靠牆嘅方向都裝有一個掛衫勾，其實我真係多得嚟擔心，人地喺呢尐地方做得生意，梗係好識安排喇！

打開menu，入面賣嘅嘢真係同一間美式餐廳一樣，價錢都唔平喎！望下左右隔離，個個都叫漢堡包，係件漢堡扒牛咁大件，而佢伴碟果尐薯角好香之餘，望落去都好脆喎，咁我冇理由唔跟大隊㗎，於是就叫咗個漢堡包同埋一碟凱撒沙律。呢個時候我望下坐喺我地隔離嘅一班亞洲裔年輕人，見佢地叫到一枱都係，我心諗係佢地咁有錢，定係呢度算平呢，唔知喇，量力而為喇！

呢度嘅水係收錢嘅，水喉水除外，我一來孤寒，二來知佢尐水喉水係飲得嘅，而且重係好夠凍嘅添，所以我只係要咗水喉水同埋可樂。食物到喇，好香呀，也真不知是這幾天沒有吃過特別好的一餐還是甚麼，漢堡包及凱撒沙律的味道都很好，就連可樂都特別正！好味之餘，份量亦非常北歐，即刻大份呀，食到攬住個肚！

在進食時見它生意不絕，人客來了一批又一批，價錢不平宜的！後來才知道這間餐廳也算略有名氣，算我有口福喇！所以在外覓食，不熟環境的話，最好跟著人龍走，總錯不了！

嘉嘉航空，極光之旅（十六）計劃行程

究竟北極光這個話題是幾時開始蘊釀，又是幾時成形的呢！只記得之前討論過人一世物一世，有些地方在經濟環境許可的情況下，是必定要去一次的，除了我心儀的馬丘比丘外，我也同意點都要睇一次北極光的。之後偶爾也會在報紙雜誌看到關於極光的報導，但都是一些旅行家的訪問，心想，也許這不是我等平民可以去的地方。

之後又見到有報導說，下一次有這麼燦爛的極光的出現，是二十年後！二十年後？我縱使仍在世上，也未必抵受得極北的天氣吧。但又是得個諗字，仍然是未有行動。忽然有一天朋友傳來一個與北極光有關的網頁，嘩，那些極光實在動人，色彩班爛，姿態迷人，但因為是當地人寫的，心想以他們的身體結構，在寒冷的冬夜坐在一望無際的山頭等極光，當然冇問題，但我這個南方人，應該坐不了十分鐘便變冰柱了，於是又close file。

有一天我在網上搜尋到一個台灣的網頁及相關的部落格，發覺北歐的天氣比相像中容易面對，而且除了北極光外，那一幅又一幅聖誕咭也似的雪地風景照實在誘人，慢慢我對這地方真的發生了興趣，真的想睇睇極光，就像想見一個書信往來多年，但未見過面的朋友一樣。

別以為一句我要睇極光，便可以成行，因為就算你選了北方，也要決定到北方那裡去。想一擊即中的就一定要去加拿大的黃刀，但你幻想一下你睇完極光回來後跟人說你去了睇極光，當對方滿心想著冰島、挪威之類的國家時，你答你是去加拿大，對方在某些神情裡，也一定閃過一個不太明顯，但失望的眼神。加拿大探親、探朋友就差不多，睇極光好像不太型！

另一個選擇是冰島、格陵蘭，如果你之後想順道一遊英國，也應該揀這條路線。另一個就是北歐了。亦是我今次的選擇。揀北歐，只因為我從來都未到過北歐，雖然一般都認為這條路線的極光命中率最低，但正如我時時說，掌握準確的資料最重要！

就算你決定了去北歐這方向，也不是話行就行，因為北歐也有很多路線可選的，當然，如果你有一年的時間去浪蕩，則所有路線都可以任你慢慢玩，但我要返工呢。由於我的假期有限，所以必須要一擊即中。從各方面的資料來看，最簡單而命中率高的是從挪威坐郵輪北上，一來輕鬆方便，二來差不多一定睇到。這條「水線」一般是從Bergen出發，經過Tromso到達Kirkenes，七天的行程價錢介乎於一千五百到四千歐羅之間，看你住那種房間、出發日期和郵輪類形等等。Hurtigruten 對北歐人來說，就等於我們當年的天星，很多人是開車上船，然後在下一站開車回家的。

這個郵輪的好處是可以逐個碼頭買而不需要買全程的，所以我選擇了從Tromso起至Kirkenes的航段，亦即是當郵輪進入北極圈之後的第一個港口Tromso我才上船，因為Tromso亦是極光出現率很高的其中一個挪威城市。

其實在決定乘坐這海上路線之前，我要先決定內陸怎樣走，一般都是乘坐航機到芬蘭的赫爾辛基，所以究竟由芬蘭內陸北上，或是先飛上北方再南下都很影響整個行程。不過很多時候又唔係你想點行就點行，因為都會因飛機及郵輪的航班時間表，而影響你的決定，所以一定要查清查楚並要仔細的配合，才可以落手訂機票、船票及酒店，不然在訂了郵輪時才發覺航班不配合，又或心儀的酒店客滿，則不單浪費金錢，也浪費時間和心機。

雖然我自己嘅極光之旅嘅行程，主要係陸路，而水路只有頭尾三日，不過我由明天開始搵咗我嘅朋友Carmen嚟同我講下郵輪行程，因為佢係坐足八日遊輪，等你可以有資料參考，就可以揀最啱你嘅行程喇。

嘉嘉航空，（十七）極光是甚麼

講咗咁多日睇極光之旅，其實極光係乜嘢嚟嘅呢？北極光原名Aurora Borealis，由加里略於1619年命名，Aurora是羅馬晨曦女神，而Boreas則是希臘的北風女神，你講Northern Lights北歐人都會明。極光之所以咁矜貴，在於它的難得，一來世界上看得到極光的地方不多，而人煙可到又看到極光的則更少，南極的叫Aurora Australis或Southern Lights，可在澳洲或南美高地一帶看到，而北極的則不外乎去加拿大的黃刀Yellowknife，冰島、格陵蘭及北歐；二來你就算去到，也不一定能看到，當然，如果你是當地居民，你就會時時睇到，但亦因而唔覺得係乜嘢一回事，好似車我地去INari個司機咁，早尐番屋企瞓覺好過。不過極光亦唔係地球嘅專有景點，其他星球如土星及木星等也有這個現象出現，或者幾十年後，當火星旅行成為事實之後，去火星睇極光會成為一個受歡迎嘅活動都唔定。不過呢尐機會並不屬於我，年輕人，祝你好運！

講番我自己個極光之旅先，我今次算是好運，第一晚已看到，而之後亦有機會再看，但由於我今次只帶了iPhone在身，所以拍得來的照片都是黑黑一片，於是人們搞笑地對我說：有一種極光是黑色的！我可不介意，見到記在心中就是。

關於極光有很多傳說，其中一個就是顏色，除了肯定不是黑色的外，也有很多變化，而極光之所以吸引，當然就在於它那舞動中多變的顏色。它可以是最多人知道的綠色、紫色，亦有藍、紅、黃及粉紅，至於白色，則是被厚雲掩蓋下仍見到的湧動。

另一個傳說是觀看的地方，人們一般會說去挪威睇極光，但如果你去挪威的奧斯陸睇，則攞諾貝爾獎的機會應該會較高！咁即係話喺果度係睇唔到嘅！雖說北緯50度以上已可看到極光，但北極光一般在北極圈內的極光圈內才最易見到，由於極光是四圍走唔定性的，所以極光圈也沒有一定的位置，大概在北緯66度吧。所以雖然2013年冬季是太陽黑子進入本世紀第二次活耀期（極光指數以一至九度分，一度最弱而九度最強），但如果位處北緯50度的地方，則要起碼八度才有機會見到，而在北緯60度以上的，則極光指數只要有三度已可見到，但在北緯66度以上的則二度已很有睇頭，可見越北越有利。有興趣的話，可上這個提供極光指數的網頁看看：http://www.gi.alaska.edu/AuroraForecast/Europe

還有一個傳說是日期，都說只有冬天才有極光，其實唔係嘅，極光全年都在，不過北歐的夏天日長夜短，甚至可以是24小時日照，太陽光當然光過極光，所以才看不到極光。另一個傳說就係2014年唔睇，就要等二十年後才再有機會看的說法，正如我一直講，極光係一直喺度嘅，不過可以2014年後冇咁洶湧，但係舊年去睇嘅人睇到，而今年去睇嘅人，也應該有機會看到。至於去睇極光嘅月份，雖然資料顯示每年嘅8月中至翌年4月都會出現，佢係以北歐進入冬季嚟計，但係如果以機會率計，我會選擇在10月頭至2月尾之間。

去睇極光，天時地利人和同資料都好重要，你現在終於明白為甚麼有人，即是我，一到便見到極光，而有人去了兩次連青光都見唔到條的原因吧！掌握準確的資料最重要呀！

其實見到極光也沒有甚麼大不了，旅行嘅過程先至最重要，而路途上嘅經歷對我的啟發更有意義：這麼荒涼苦寒的地方，上主也賜她美麗動人的極光和平靜祥和的白雪，我們又何必為生活而過份擔憂呢！

嘉嘉航空，極光之旅（十五）玻璃屋酒店

我的極光之旅應該講得七七八八，再之後落去嘅行程就已經離開咗極光圈，即係話睇到極光嘅機會係近乎零！其實要去北半球睇極光，有好多種行法，我嘅係一種，因為我嘅假期唔長，所以只可以精華遊，如果你嘅假期多，就可以每個地方留耐尐，見到極光嘅機會亦多尐，所以當我決定挑戰自己要去睇極光，就開始搵料，並盡量集中於睇到極光的範圍。現在要查資料的話，第一件事就當然是上網。網上很多網頁都載有與極光相關的資料，而且內容豐富，不過無論中外的網頁，也多是就住「遊客」的口味而寫，連自由行的行程都很「遊客」，當然我也是遊客，但有些行程並不適合我，例如我之前講過喺Kemi嘅冰海浮游，另外就係入住Hotel Kakslauttanen Igloo Village的玻璃屋。

呢個差不多所有極光旅行團必備嘅行程，我偏偏沒有去，而當人人都說那是世界一百間必住的酒店時，我偏說不喜歡！

當然你可以說我孤寒，因為價錢確實是其中一個我考慮放棄這間酒店的原因。她的價錢分淡季(Low season) 、閒日(shoulder season) 及旺季(high season) 三種。淡季一般是從11月1號至211月14號，對，只有這半個月不到的時間是淡季。旺季是12月19日至1月6號及1月15日至2月16日，而閒日則是11月15日至12月18日及2月17日至4月30日。

既然日期有分別，價錢當然也有分別。以兩個成年人入住一間房計，淡季是170歐元一個人一晚，閒日是194歐元，而旺季則是224歐元！二人計即分別是340歐元、388歐元及448歐元。只有短短的兩星期，夾正淡季入住並不容易，更何況做生意的不會死錯人，那段時間一定冇嘢睇、冇嘢睇同埋冇嘢睇！去得這麼遠的一趟旅行，也不會選淡季了，其實閒日先至得果一個月，也未必會中，所以224歐元一個人是被她食硬的了。

未完，條數未計完！你可能會諗，人一世物一世，224歐元係貴，但係都包埋早餐呀，咁其他食得慳尐咪得囉！唔得喎，唔慳得喎，因為你也必須要喺佢果度食晚餐，而這部份的餐費是另計的，盛惠31歐元一位，聖誕新年的話則是41歐元一位。

那麼這接近二千幾港元的一間房會為你帶來甚麼享受呢！當然會有一間玻璃屋供你入住，check in時間是下午二時，而check out時間是早上十點。 另外，行李安排也有規定，你的大件行李要停放在酒店的行李間，而只可攜帶基本日用品去玻璃屋酒店那邊，因為那間玻璃屋只有廁所及洗手盆而沒有沖涼設備的！即是說你要在酒店大樓內做齊沖涼、桑拿、吃飯，然後再走一段十分鐘的路程才回到玻璃屋！

你可能會浪漫地認為，在無遮無掩之下看極光才是這間酒店的賣點呀！對不起，如果這是你的計劃，請先做資料搜集，看看這間酒店之所在地，是不是在極光圈內。答案當然是不！人家劃得成個極光圈出嚟，就一定有原因，既然不在極光圈內，看到極光的機會真是非常十分很微，所以千萬別妄想在玻璃酒店會看到極光，能夠在玻璃屋的晚空看到飄雪，已經是最大的賞報了！

不過，如果你真的想入住這間酒店的玻璃屋，可直接發電郵與酒店聊絡（hotel@kakslauttanen.fi），除非你懂芬蘭語，不然英文的用字要簡單易明，亦要寫清楚入住及離開的日期及房間類別，她們的回應是很快的，大概是一個工作天的時間，亦很專業的，見你冇反應問多一兩次之後就會自動消息，唔會煩親你，亦唔會冇反應。

我唔係唔知道有其他方法可以買到平尐嘅房價，例如你可以透過網上代理例如booking.com之類去訂，亦真係有人以這方法用一個較平的價錢訂到玻璃屋，但那要你一早預知放假的日期，並好得閒成日望實個電腦，一見減價立即卜鎚至得！呢尐機會，唔屬於我地呢尐要番工又要夾時間嘅人，如果你得，恭喜你並祝你好運！

嘉嘉航空，極光之旅（十四）在Rovaniemi的最後一天

上文提到我地喺Kemi參觀完冰酒店，之後就心滿意足咁去諗住行番去火車站搭車返Rovaniemi。點知行下行下，去到一個巴士站，咦，借個廁所用下都好喎，於是走咗入去順便睇下有乜資料，因為明天我們的時間很鬆動，如果有尐特別景點，就可以去見識下。點知景點就搵唔到，卻俾我地發現原來火車就快開出，但以我地同火車站嘅矩離，就算係跑足全程，都唔可能追到，而下一班車就有排至開出，點算呢！

忽然聽到廣東話：快尐喇，就快開車喇！嗄？咁得意？轉頭睇下，原來係兩個香港嚟嘅女孩子，而就快開嘅原來係巴士，息而呢班車嘅目的地亦都係Rovaniemi，於是二話不說就跳埋上車，心諗，Rovaneimi有幾大呀，去到自然番到酒店喇最多咪叫的士，都不過係10歐羅之嘛！於是喺車上舒舒服服咁瞓足全程。

到站喇，一落車，嘩，乜原來已經一天都黑哂！巴士站原來離火車站好遠，亦都冇咁方便，喺呢個站落車嘅本地人已經走哂，淨低果兩個香港女子同我地，真係四野無人，唔好話人—車都冇一部經過。我地見果兩個女子好似胸有成竹咁，就走埋去問：你地點樣走呀？其中一個話，我地訂果間旅館個主人會嚟接我地。嗄，我地連旅館電話都冇帶出嚟，想叫佢地嚟接都無從添！

咁啱，佢地個旅館主人到，當果兩個女仔上咗車之後，正要離去，個司機見我一—地企咗喺度，就問你地去邊呀？我地話，我地喺度等下睇下有冇車載我地返酒店呀。佢望一望我地，就話，你地唔駛等，唔會有車嚟呢邊㗎！嗄！佢話你地行李多唔多呀？我話只有背囊，佢話咁你住喺邊呀，我講咗之後，佢話，哦，好熟㗎，我免費車你去喇。嘩，好嘢呀！

路程唔算長，真係轉個彎就到，但係我地又唔識路又論論盡盡咁，如果冇佢，應該天光都未到。去到酒店，千鞠躬，萬多謝，而佢亦同我地酒店門房打咗個招呼，再同我地揮一揮手就走人，不帶走一點雲彩！

回到酒店已經很晚了，再加上今日由早玩到晚，既勞心且勞力，所以也沒有氣力覓食，在酒店房淥個杯麵算了！寧靜的環境加上疲倦的身軀，一覺瞓到大天光。

一早起來拉開窗簾，外面一片白濛濛，原來下了一整晚的雪！

由於當天我會乘搭下午三點機由Rovaniemi返回Helsinki，所以早上可以很清閑的在鎮內遊覽。原來Rovaniemi內原來有好幾間中國餐館，可惜沒有時間，不然一定入去食飯兼吹水，尋找一下他鄉的故事。

在這麼鋪天蓋地的下著雪的地方，生活並不會太沉悶，因為他們會利用天然的環境，設計好些遊戲讓人們周街玩，例如雪滑梯，你見他們跣下跣下瀡又一次，跣下跣下又瀡一次，尖叫聲夾雜著歡笑聲，好不開心，但我則只有傍觀的份兒，因為真的很牙煙。在厚雪的日子，我覺得白雪真的很美，但在溶雪或雪被踩得光滑時，就真的很可怕，真係會斷骨㗎！但我相信滑倒也是一種可練就的習慣，因為我見北歐人不是不會滑倒，而是倒下之後起身快，拍兩拍就當甚麼事也沒有發生過似的繼續行，而且他們也滑得很有技巧，不像我的一滑便拉傷條筋！

我們由酒店一路向海邊行，很簡單的一條直街，但中間也有好幾個商場，內裡不是沒有東西合用，而是暖氣開放得太疏爽，入去隨便睇睇，也要除褸、除帽、除衫的，之後又要抱著一大堆衫的四圍走，實在影響購物心情，所以走入其中一間繞了不及一層已經冇癮走人。反而走到海邊，看看凝固了的海面，閑閑的逛逛更怡然自得。

在返回酒店的途中，再在世界最北的麥記吃了另一餐後，就回去check out。

Book了一點鐘的airport shuttle，很準時，上車時付錢給司機就成了，每位七歐羅。這些穿梭巴士是很受歡迎的，所以一定要預訂，不然要踫運氣而剛巧那班滿了你上不了車就會大失預算。

去到機場check in，不一會就上機了。由於我不想行程太緊，所以今晚我會回Helsinki休息一晚，但我知道有些人是會機駁機的永不停步，這是個人選擇問題，沒有甚麼對錯。

嘉嘉航空，極光之旅（十二）聖誕老人村

話說我幫趁完地球上最北嘅麥記之後，就又千辛萬苦的走著企鵝步，一步一步的上斜落斜的番回酒店。一宿無話，因為之前周車勞頓，而家眼瞓到震。一覺醒來，又出發喇去玩喇。去Rovaniemi的原因只有一個，就是去搵聖誕老人。於是第二天食過早餐，就一早走去搭8號巴士去聖誕老人村。這條8號線基本上是繞著Rovaniemi而走，以便把最多的乘客送到聖誕老人村去，所以你住的酒店或旅館附近，也一定有車站，地圖上密密麻麻的佈滿巴士站的位置，要是你仍然搵唔到，亦大可問問櫃檯就一定知道最近你的車站的所在地，班次很多亦很準，車資是6歐羅，上車俾錢。

路途並不遙遠，沒有特別計時，感覺上少過半小時。那天的雪下得比較大，所以一落車，你真的有置身童話故事中的感覺，因為整個聖誕老人村都被白雪掩蓋，非常美麗，我仿如印了在聖誕卡上的一個身影。落車乜都唔理，就飛撲落個雪地度，真係好似未見過雪咁！其實呢幾日，日日見雪，應該見到有尐飽至係，但係童話國度就有呢度神奇，你真係覺得有個聖誕老人喺度等緊你咁！

當然，我已經係成年人喇，癲咗一陣就清醒過來！根據資料，聖誕老人的辦公時間是早上10點至下午5點，我們特別早一點出發以免同人迫餐死，亦成功地成為第二個進入聖誕老人嘅辦公室同聖誕老人拍照的遊客，重同佢傾咗幾句添！就係呢幾句壞事嘞。喺知道我係香港嚟之後，佢好似好行咁首先同我用普通話講：你好嗎！跟住就講佢都好想嚟香港，我心諗你係聖誕老人，要嚟香港容乜易，但係回心一諗，佢只係個大茄哩啡，都唔知係月薪定時，咁佢要嚟香港就唔係咁容易喇！之後我又諗起我喺電台做騷時果尐扮聖誕老人嘅同事，又諗起香港在聖誕節期間喺商場扮聖誕老人嘅其他演員，於是我十分冇癮的同聖誕老人say goodbye之後，就連果張合照都冇買，一來這一向不是我的習慣，去到見過就是，二來，自己睇穿咗個現實就冇咁興奮囉！

現實還現實，咁遠水路嚟到，點都要周圍參觀下嘅。同聖誕老人分手之後，即係離開佢喺閣樓嘅的「辦公室」之後，就落番樓下。一落樓就已經係售賣記念品的商店，選擇不算太多但幾精美，難得一到，我也買了些聖誕老人杯做記念及送人。搞笑地，在聖誕老人村也有Marimekko，貨品還非常齊全，但在這裡買沒有退稅安排，所以如果你想掃貨，還是回赫爾辛基買比較化算。

其實聖誕老人村並不大，還不到我們的任何一個大型商場的其中一層，除了聖誕老人辦公室樓下有記念品店外，其他好幾個小樓房亦是以賣記念品為主，來去都是那些記念品，但他就有本事令你入去睇完又睇，當然我們都是同一心態，就是怕如果唔入某一間而咁啱買漏咗咪好唔抵，於是你去完一間又一間，原本在第一次見到唔想買嘅嘢去到第間間你點都會心思思買咗佢，呢尐就係人地做生意精明之道！無端白事買到一手嘢之後，係時間做正經事，就係去聖誕老人村嘅郵局。

去到郵局，已見到裡面有很多人在寫聖誕卡，亦有一大堆卡等著寄，郵費大概80港元，嘩，真係貴得厲害，明劏！冇你咁好氣，見過就算，我又冇集郵，亦冇集郵嘅朋友，而且佢唔包你寄到，寄失咗真係會好嬲，所以我亦沒有寄！看來，我這個遊客並不太梳爽！

另一個在聖誕老人村必去的地方就是喺其中一間記念品店內及外都劃有的北極圈線，跳向一邊就進入了北極圈，跳去另一邊就不是了，你可能會說這有甚麼好玩！你可以這樣說，但為甚麼這麼多人去英國時又要特登去一轉格林威治村呢，原因應該相似！

之後在村內的雪地內上上下下的走來走去，可以玩下雪，亦可以玩下雪上活動如雪地電單車之類，亦可以去餐廳醫肚，而我因為要趕下一場，所以我走人喇！呀，又如果你想學我咁瀟灑去到聖誕老人村都唔寄番張聖誕卡俾自己，但離開咗聖誕老人村之後又後悔的話，唔需要太沮喪，因為只要你仍在Rovaniemi，你仍有好幾個機會，而最後機會就是機場。